Nworɛ Dwirɛhanɛniɛ 4 - AHYERƐLƐ KRONGRON

¹ Nza nwuni nhyɛsoɛ amukoraa bɔ ɔkɔ so wɔ wiase ɔ. Bɛ bɔ mmenia hyɛ bɛ so ne, nea bɛ nye moen, belle aworakyekyerɛniɛ biala. Tumi wura bɛ bɔ bedi anyandim ne sa. Ao, amaneɛnwunɛfoɛ nemɔ, belle aworakyekyerɛniɛ biala!

² Na nyane adwene kyɛ, awufoɛ bɔ bawuwu ne po, bɛ ti te paa tra ateasefoɛ bɔ bɛtɛ te ase ne.

³ Nakoso sona bɔ bennya bɛwwole ye, bɔ onnya nnwuni bɔne yɔleɛ bɔ ɔkɔ so wɔ wiase ne de, ye ti te paa tra bɛ munyɔ.

⁴ Na nwuni kyɛ, ɛfɛɛ mukoraa bɔ sona fɛ, ɔne ye sa noa adwuma mukoraa bɔ ɔyɔ ye yé ne, ɔnate ye nye bɔ ɔboro kyɛ ɔne obiɛngo bɛkɔyɛ pɛ ti ɔ: Ɛhe koso te mbaen, na ɔte dadwene mbaen.

⁵ Sona kwaseaa ye gya nga ye sa nga, na ɔyɛ ye bɔbɔ ye nwo aborɛ.

⁶ Wɔ sa bum ko bɔ asomdwee wɔ nu ne, ɔte paa tra wɔ sa bum nyɔ bɔ ɛfɛɛ ne dadwene boka so ɔ.

⁷ Nza nwuni nikyee bieku bɔ ɔte mbaen wɔ wiase ɔ:

⁸ Sona bɔ wayɛ angonam bɔ olle ba anaa aliɛmaa ɔ, nakoso adwuma serɛ alaa yeɛ ɔkɔ so yɔ ɔ, na ye nye nzɔ ye anwonya bɔ wanya ye ɔ. Na obisa ye nwo kyɛ, “Adwuma bɔ mefɛ me nwo meyɔ, bɔ mama m’anigye abɔ me ye, nwa yeɛ mefɛ mema ye ɔ?” Ɛhe koso te mbaen ne adwuma fuin.

Adamvoa nwo mvasoɛ

⁹ Mmenia nyɔ te paa tra sona horɛ, ofikyɛ bɛbɔ nu bɛyɔ adwuma a, benya nu akatuaa paa.

¹⁰ Sɛ ko tɔ ase a, obiɛngo ne pagya ye; nakoso sona bɔ ɔte angonam ne de, ɔtɔ ase a, ye yaakɔ, ofikyɛ onnya ebie mma ɔmmoka ye.

¹¹ Asa koso, sɛ mmenia nyɔ bɛda bɛen ko a, bɛkã bɛ nwo hyerɛ. Nakoso sɛ sona horɛ ngome da a, ɔkɔyɛ sɛɛ né wahã ye nwo hyerɛ?

¹² Sɛ ebie fa ngondii toa sona horɛ, ná odi ye so ngonim a, mmenia nyɔ de, ɔngora nni bɛ so ngonim. Nyamaa bɔ banwo ye mmɛsa ne, nu telɛ nyɛ mmerɛ.

¹³ Aberandeɛ hianiɛ bɔ ɔse nworɛ ne, ye nwo le mvasoɛ tra ɛhene kwaseaa bɔ ye nye afi bɔ ondie foɛtulɛ ko ɔ.

¹⁴ Ebie fi kuku nu badi hene, ɔwɔ nu kyɛ bɛwole ye bɛtole ehiaa nu wɔ ye maen nu.

¹⁵ Na aberandeɛ bɔ osili sɔ hene ne gya nu ne, nwuni ateasefoɛ amukoraa bɔ bɛnate wiase kyɛ baali ye si.

¹⁶ Mmenia pembepembe bɔ olili bɛ so ne, ɛka bɛ a ennwu ye noa. Nakoso bɛ bɔ nziɛ ye bɛwale ne de, banguro ye dwirɛ. Nahorɛ nu, ɛhe koso te mbaen, na ɔte dadwene mbaen.