Nworɛ Dwirɛhanɛniɛ 2 - AHYERƐLƐ KRONGRON

Anigye te mbaen

¹ Ngane ye me ti anu kyɛ, “Bɔ sɔ bra ne bie, gye wɔ nye nea kyɛbɔ anigye si te ɔ.” Na ɛhe koso, ɔte mbaen.

² Na ngane kyɛ, “Ɛserelɛ te ɛlaenbɔlɛ! Yeɛ anigye koso, nzikyɛ mvasoɛ yeɛ ɔwɔ so ɔ?”

³ Mvale adwene kyɛ ngɔfa nzaa ngɔgye me nye, wɔ aberɛ bɔ mepena nworɛ si atee ɔ, yeɛ afei kyɛ ngɔyɔ ngwaseade ɔ, kɔpem kyɛ ngonwu bɔ ɔte paa ma adasa kyɛ bɛkɔyɔ ye wɔ ewiase, wɔ bɛ ngoa tikaape ye anu ɔ.

⁴ Nyɔle m’agyapadeɛ mbiri mbiri, nzisili me sua mɔ, na nyɔle me bobe boo mɔ.

⁵ Nyɔle me bɔbɔ me turo mɔ, ɔne mmakaammaa boo, na nnuale mmakaa ahoroɔ bɔ besu mmaa ɔ.

⁶ Mbepɛle abura mɔ, na nzesale nu nzue nguaguale mmakaa bɔ malua bɔ benyi frɔmfrɔm ne aso.

⁷ Ndotɔle nganga mmienzua ne mmrasua, na nyane nganga mɔ bɔ bɛwole bɛ wɔ m’awuro ɔ. Nyane nandwie ne mmoaen pee ndrale ebiala bɔ olili me nyunu moa wɔ Yerusalem ɔ.

⁸ Asa koso, mmoaboale ɛdwetɛ ne sikaa kɔkorɛ pee noa mvale, yeɛ nyane agudeɛ mvili ahemvo mɔ ne mbɔtam mbɔtam mɔ berɛ. Nyane edweintolɛfoɛ mmienzua ne mmrasua, bɔ bienzua kohia biala, ɔne sómaa pee.

⁹ Yiti nyɛle sona titire ndrale ebiala bɔ olili me nyunu moa wɔ Yerusalem ɔ, na ngɔle so nwuni nworɛ.

¹⁰ Nikyee biala bɔ ɔyɛle me nye so nyemene ne, mva mɔle me nye akɔhoma. Nikyee bɔ ɔma me anigye ne, mandwe me nwo mamvi ye nwo, ofikyɛ me ɛfɛɛ adwuma mukoraa, nyane anigye mvili nu, na ɛhe te me fɛɛ amukoraa nwo akatuaa.

¹¹ Afei ndole me nye nneane me sa noa adwuma mukoraa, ɔne nningyein bɔ mafɛ mayɔ ne, na nwuni kyɛ ye mukoraa te mbaen, ɔte dadwene mbaen, na mvasoɛ biala nne so wɔ wiase.

Nworɛ ne anigye

¹² Yiti nhyɛle ye bo ndwenene nworɛ, ɛlaenbɔlɛ ne ngwaseasɛm nwo, ofikyɛ bɔ okoli me bia koli hene ne, nzikyɛ bieku yeɛ ɔkɔhora kɔyɔ ɔ? Sana bɔ bali moa bayɔ ne ala.

¹³ Na nwuni kyɛ mvasoɛ wɔ nworɛ so tra ngwaseasɛm, kyɛbɔ mvasoɛ wɔ kanea so tra awosii ne.

¹⁴ Nworɛniɛ se nekaa bɔ ɔkɔ ɔ, nakoso kwaseaa de, awosii nu yeɛ ɔnate ɔ. Nakoso nwuni kyɛ ayieleɛ komapɛ ne ala yeɛ oyie bɛ mukoraa ɔ.

¹⁵ Na afei nzele me nwo kyɛ, “Ayieleɛ bɔ okoyie kwaseaa ne, me koso ebie ala yeɛ okoyie me ɔ. Sɛ ɔte sɔ de a, né nzu ati yeɛ manwu nworɛ matra bɛ ɔ?” Na mmuale me nwo kyɛ, ɛhe koso te mbaen.

¹⁶ Ofikyɛ nworɛfoɛ oo, ngwaseafoɛ oo, bɛ nwo ngayeɛ ngɔtena berɛ afebɔɔ. Ɔnate kyɛ mmerɛ bie baawa bɔ mmenia wora kofi bɛ mukoraa ɔ. Hmmm! Nworɛniɛ wu, kyɛbɔ kwaseaa koso wu ne ala.

¹⁷ Yiti asetena yɛle me tɛ, ofikyɛ nikyee biala bɔ ɔkɔ so wɔ wiase ne, ɔte ɛhawo ma me; ye mukoraa te mbaen, na ɔte dadwene mbaen.

Adwumayɔlɛ ne sikaa te mbaen

¹⁸ Amba, adwuma worawora bɔ mafɛ me nwo mayɔ ye wɔ wiase ne, ɔyɛle me tɛ, ofikyɛ, nwuni kyɛ mebaayakyi ye berɛ mema me koliagyaa.

¹⁹ Nwa yeɛ ɔse ɔ, kyɛ sɔ sona ne kɔyɛ nworɛniɛ oo, anaakyɛ kwaseaa oo? Nakoso agyapadeɛ biala bɔ mafa m’anwoserɛ ne me nworɛ mapena manya ye wɔ wiase ne, ye yeɛ okooli ye sa ɔ: Ɛhe koso te mbaen.

²⁰ Ye sɔ ati, adwuma worawora bɔ mafɛ me nwo mayɔ ye wɔ wiase ne, mbɛle me nwo nnuni me nwo wɔ ye nwo.

²¹ Ofikyɛ, ɔtɔ mmerɛ bie a, ebie bɔ wafa ye nworɛ ne ye nimdeɛ ne ye adwene wapena agyapadeɛ ne, odi kyɛ ɔyakyi ye berɛ ma sona bɔ wamvɛ ye nwo ɔ bafa: Ɛhe koso te mbaen, na ɔte edwirɛ yealɛ piri paa.

²² Kuro sona ɛfɛɛ amukoraa ne adwenedwene bɔ ɔla ye so wɔ wiase ne, nzikyɛ mvasoɛ koraa yeɛ onya fi nu ɔ?

²³ Ofikyɛ, yealɛlilɛ wayi ye asetena nu tɛkyɛ, yeɛ ye adwuma koso te ye hawo. Odwu kɔngɔen po a, né wato ye ne adwenedwene: Ɛhe koso te mbaen.

²⁴ Nikye paa biala nne berɛ mma sona ndra kyɛ okodidi, ɔkɔno ná ɔkɔfa bɔ wafɛ wanya ye ɔ ɔkɔgye ye nye ɔ. Na ɛhe koso, nwuni kyɛ Nyameɛ yeɛ ɔfa ma ɔ;

²⁵ ofikyɛ sɛ ɔnne nu a, ahaa nwa yeɛ ɔkɔhora kodidi, anaa nwa yeɛ ɔkɔhora konya anigye ɔ?

²⁶ Ofikyɛ sona bɔ ɔsɔ Nyameɛ nye ne, ɔma ye nworɛ, nimdeɛ ne anigye; nakoso bɔnefoɛ de, Nyameɛ maa ɔpena agyapadeɛ gua berɛ ma sona bɔ ɔsɔ Nyameɛ nye ɔ: Ɛhe koso te mbaen, na ɔte dadwene mbaen.