Nworɛ Dwirɛhanɛniɛ 12 - AHYERƐLƐ KRONGRON

¹ Kaye Nyameɛ bɔ ɔbɔle wɔ ne wɔ wɔ mmerandeɛ nu koraka né mmerɛ tɛɛ ne awa; anyɔ sɔ ná afoɛ nemɔ pingye a, ɛkɔhã kyɛ, “Mennya bɛ nu anigye biala”;

² koraka né eyia, hyireinn, ɛsraen ne nzramaa bakakyi awosii, ɔne kyɛ esue tɔ a osa muna ɔ;

³ kyẽa bɔ awuro berɛ awɛmvoɛ mɔ bɛ nwo kɔwosowoso bɛ, bɔ mmienzua anwoserɛfoɛ bɛ nu kokundu, bɔ mmrasua bɔ besi aburoo ɔ bɛkɔyakyi ye silɛ, ɔnate kyɛ bɛnzone, mmerɛ bɔ bɛ bɔ bɛnea mboma nu ɔ bɛ nye so kɔyɛ bɛ wusiwusi;

⁴ kyẽa bɔ bɛkɔtoto mmorɔnoɛ mɔ so anoa nemɔ anu, bɔ bɛngɔte aburoo silɛ nga ɔ, bɔ anomaa suɛ maa ekotingye kofi nnaa nu ɔ, bɔ edweintolɛfoɛ amukoraa bɛ bo kɔpɛ ɔ;

⁵ kyẽa bɔ sona kosuro nningyein bɔ so kɔ anwuro ɔ, bɔ atee so kɔyɛ suro ɔ, bɔ atonwaa kɔbɔ nyerɛen ɔ, bɔ torɔka kɔhwe ye nwo ase ɔ, bɔ akɔnnɔ bo kɔpɛ ɔ; ofikyɛ sona kɔ ye awuro afebɔɔ ne anu, bɔ ɛsɛenvoɛ bekyinikyini mmorɔnoɛ so ɔ;

⁶ koraka né ɛdwetɛ nyamaa ne ate, koraka né sikaa kɔkorɛ talie ne abɔ, koraka né bua ne abɔ wɔ asue noa, koraka né nyamaa bɔ bɛfa bɛto nzue ne ate;

⁷ koraka né nnɛterɛ asa ahɔ nnɛterɛ nu kyɛbɔ né ɔte daa ne ala, koraka né nwomeɛ wasa wahɔ Nyameɛ bɔ ɔfa mane ne berɛ.

⁸ “Mbaen nu mbaen.” Nworɛ Dwirɛhanɛniɛ ne nwa nyoo, “Ye mukoraa te mbaen!”

Edwirɛ n’ayieleɛ

⁹ Nworɛ Dwirɛhanɛniɛ ne, nna nworɛ angome yeɛ ɔse ɔ, na mmom ohyirehyirele mmenia nimdeɛ bokale so. Otiele anyandera pee, ɔpɛnzɛpɛnzɛle nu, na obuli anyandera pee.

¹⁰ Nworɛ Dwirɛhanɛniɛ ne, ɔbɔle mmɔden kyɛ ɔkɔpena edwirɛ mɔ bɔ bɛtɔ asoɛ nu ɔ, na edwirɛ bɔ wahyerɛ wato berɛ ne, ɔte nahorɛ ne turoloo.

¹¹ Nworɛniɛ ye noa dwirɛ ɔte kyɛ nandwiehanɛniɛ ye pɔmaa noa buralɛ; yeɛ ye anyandera bɔ waboaboa ye noa ne koso, ɔte kyɛ mberɛgoo bɔ mmoaenneafoɛ komapɛ wafa wabɔ berɛ pindinn ɔ.

¹² Mma, bɔ waha wɔ ɛhemɔ asi ne, mebɔ wɔ kɔkɔ kyɛ, nwomaa pembepembe hyerɛlɛ olle ayieleɛ, yeɛ nikyeesualɛ pee koso fa ɛfɛɛ wura sona nwonaen nu.

¹³ Edwirɛ amukoraa bɔ yate ne, sɔa yeɛ yɛbɔ ye porɛ ɔ: Suro Nyameɛ ná di ye mmeraa dwirɛ so, ofikyɛ bɔ odi kyɛ kuro sona biala ɔyɔ hɔ ɛne.

¹⁴ Ɔnate kyɛ, Nyameɛ kobua yɔleɛ biala nwo ndɛen, bɔ yayɔ ye mvealeɛ nu boka so, kyɛ paa oo, kyɛ tɛɛ oo, okobua ye nwo ndɛen.