Nworɛ Dwirɛhanɛniɛ 11 - AHYERƐLƐ KRONGRON

Nworɛ nwo mvasoɛ

¹ Gyi wɔ paanoo gua nzue nye, na kyẽa bie wɔ sa kɔhã ye.

² Kyekyɛ nu ma nzoo anaa mmɔtwɛ po, ofikyɛ ɛnze edwirɛ tɛɛ bɔ ebiaa ɔbaasi aseɛ ye aso ɔ.

³ Sɛ esue yi munungum nu tɛkyɛ a, ɔtɔ gua aseɛ so; sɛ bakaa bu tɔ ngwaen anaa sorɔ a, nekaa bɔ bakaa ne tɔle ne, berɛ ala yeɛ ɔkɔla ɔ.

⁴ Sona bɔ ɔnea kyɛbɔ mvrama si bɔ ne, ongolua ye nningyein; yeɛ bɔ ɔnea kyɛbɔ ewienu ayɛ kusuu ne koso, ɔngɔfa ye fieso aleɛ.

⁵ Kyɛbɔ ɛnze mvrama atee, anaa kyɛbɔ mmowue si nyi wɔ pemvoɛ kunu ne, sɔ ala yeɛ Nyameɛ bɔ ɔyɔ nikyee biala ne, ɛnze atee bɔ ɔpe so yɔ ye adwuma ɔ.

⁶ Dua wɔ fieso nningyein ngyerɛmɔ, yeɛ nnɛte wɔ sa fi ye lualɛ nwo nɔsoa, ofikyɛ ɛnze bɛ nu horɛ bɔ ɔkɔyɛ paa ɔ; kyɛ ɛhe anaa ɛhene, anaakyɛ bɛ munyɔ bɛkɔyɛ paa ɔ.

Ngwadaa nu ne mmerandeɛ nu

⁷ Hyireinn yɛ ahomeka, na anyeɛ nye gye kyɛ onwu eyia ɔ.

⁸ Yiti sɛ sona di afoɛ pee a, odi kyɛ ɔma ye nye gye wɔ ye mukoraa nu. Nakoso odi kyɛ osa kaye kyɛ, awosii ngyẽa bɔ bɛbaawa ne, ɔsone pee. Bɔ ɔkɔwa ne amukoraa te mbaen.

⁹ Aberandeɛ, ma wɔ nye gye wɔ wɔ mmerandeɛ nu, nya anigye wɔ wɔ nu wɔ wɔ mmerandeɛ nu. Yɔ bɔ wɔ nye gye ye nwo ɔ ɔne bɔ ɔte wɔ nye so akɔnnɔ ɔ, nakoso nwu ye kyɛ, Nyameɛ kobua wɔ ndɛen wɔ bɔ ɛkɔyɔ amukoraa nwo.

¹⁰ Ye aworabɔlɛ fi w’ahone nu, ná ye anwoɔnaen nu ateetee fi wɔ so, ofikyɛ ngwadaa nu ne mmerandeɛ nu po te mbaen.