Nworɛ Dwirɛhanɛniɛ 10 - AHYERƐLƐ KRONGRON

¹ Kyɛbɔ nwɔsea fuin ma sona bɔ ɔyɔ sakyeɛfona ye sakyeɛ ne bo mvamva ne, sɔ ala yeɛ ngwaseasɛm kãa bie sɛkye nworɛ ne animnyam ɔ.

² Nworɛniɛ adwene maa ɔyɔ bɔ ɔte paa ɔ, nakoso kwaseaa adwene de, ɔmaa ɔyɔ bɔ ɔtte mayee ɔ.

³ Sɛ kwaseaa nate atee so po a, nworɛ bɔ ye, na ye yɔleɛ ma ebiala nwu ye kyɛ ɔte kwaseaa.

⁴ Sɛ wɔ hene fɛ wɔ so yaa a, nnɛfi ye nyunu berɛ, ofikyɛ sɛ ɛbrɛ wɔ nwo ase a, ɔmaa bɛfa wɔ bɔne mbiri mbiri bɛkyɛ wɔ.

⁵ Edwirɛ yealɛ bie wɔ berɛ bɔ manwu ye wɔ wiase ɔ, bɔ ɔte kyɛ mvomsoɛ bɔ maen panyi wayɔ ɔ;

⁶ bama ngwaseasɛm dibea maa wanya animnyam piri, na sikafoɛ dibea de, wahɔ ase.

⁷ Manwu nganga bɔ bɛtete mbɔngɔ so ɔ, wɔ aberɛ bɔ nnehyeɛ bɛnate ase kyɛ nganga ɔ.

⁸ Sona biala bɔ ofu kumaa ne, ye bɔbɔ ɔkɔtɔ nu, yeɛ bɔ okodwiri ɛwaen kogua ne, ewoo kɔha ye.

⁹ Ebiala bɔ odwa nyɔboɛ ne, nyɔboɛ pura ye; yeɛ bɔ ɔpakye mmakaa ne wora, nu yeɛ opura ɔ.

¹⁰ Sɛ ebie dadeɛ tiri ná wanzi a, ye de sana ɔfa anwoserɛ pee ɔyɔ adwuma, yiti nworɛ yeɛ ɔma sona adwuma yɛ yé ɔ.

¹¹ Sona bɔ ole ewoo ayire ne, sɛ ɔma ewoo ka ebie yie koraka né wahye ye a, ye de mvasoɛ biala nne bɔ ole ewoo ayire ne aso.

¹² Nworɛniɛ noa dwirɛ maa onya animnyam, nakoso kwaseaa de, ye noa dwirɛ maa onya dwirɛ.

¹³ Ngwaseasɛm yeɛ ɔfa hyɛ ye dwirɛ bo ɔ, na ye dwirɛ n’ayieleɛ te gyimikekã.

¹⁴ Kwaseaa dwudwo pee bɔ ye noa mbe ɔ, nakoso sona nze bɔ ɔbaasi ɔ, bɔ kyẽa bie okosi wɔ ye si ne, nwa yeɛ ɔkɔhora kɔla ye ali kohyire ye ɔ?

¹⁵ Adwuma bɔ kwaseaa yɔ ne, ɔmaa ɔfɛ, na ɔnze atee po bɔ ɔfa so kɔ kuro nu ɔ.

¹⁶ Maen bɔ wɔ hene adwene te ngwadaa adwene ɔ, bɔ wɔ nnehyeɛ bɛto poen ngyerɛmɔ ɔ, wɔ yaakɔ o!

¹⁷ Ɔte saleɛ ma wɔ, maen bɔ wɔ hene te dehyeɛ baa ɔ, bɔ wɔ nnehyeɛ bɛto poen wɔ mmerɛ bɔ ɔsɛ ɔ nu ɔ, kyɛ bɛfa bɛpena anwoserɛ, ná mmom bɛnno bɛmmo ɔ!

¹⁸ Ɔnate ɛfoen ti sua kwatena bu gua nu, yeɛ anyeɛhalɛ ma sua nwi.

¹⁹ Ɛpoentolɛ ma sona sere, nzaa ma sona nye gye, na sikaa yeɛ ɔyɔ nikyee biala ɔ.

²⁰ Ɛhene ne, wɔ ti anu po, nnɛnoma ye, yeɛ nnɛfea wɔ pumbu nu noma sikafoɛ, ofikyɛ ewienu anomaa bie kɔfa wɔ noa dwirɛ ne kɔhɔ, anaa kaka bie bɔ ole ndaa ɔ kɔɔbɔ amaneɛ.