Numeri 7 - AHYERƐLƐ KRONGRON

Maen mbanyi mɔ afɔleɛ

¹ Kyẽa bɔ Mose sili nyianu sua ne yiele ne, ɔfale ɛpopalɛ ngoo popale ye, na ɔtele ye ne nu nningyein amukoraati nwo. Ɔfale ɛpopalɛ ngoo popale afɔleɛ bokyea ne, na ɔtele ye ne ye nwo nningyein amukoraati nwo.

² Sɔ kyẽa ne, Yisrael mbanyi, yeɛ mbanyi bɔ bɛlela bɛ nana mɔ sasofoɛ noa, yeɛ mmusua kure nu mbanyi bɔ bɛlela mmenia bɔ bɛhale bɛ nemɔ noa ne, bɛbɔle afɔleɛ.

³ Bɛfale b’afɔleɛ hemɔ bɛwale AWURADE nyunu: teaseɛnam nzia bɔ bakata so ɔ, ɔne nandwie buru ne nyɔ; mbanyi nyɔ biala bɛ teaseɛnam ko, yeɛ panyi biala ye nandwie ko. Bɛfale bɛ bɛbrɛle AWURADE wɔ nyianu sua ne anyunu.

⁴ Yeɛ AWURADE sele Mose kyɛ,

⁵ “Dé sɔ nningyein nemɔ fi bɛ berɛ, maa bɛfa bɛyɔ ɛtena sua atenaleɛ ne anu ɛsolɛ adwuma, ná fa ma Lewifoɛ mɔ biala kyɛbɔ adwuma bɔ owura ye sa te ɔ.”

⁶ Yiti Mose lele teaseɛnam nemɔ ne nandwie nyii nemɔ, na ɔfa mane Lewifoɛ mɔ.

⁷ Ɔneane Gɛsɔnfoɛ b’adwuma nwo mane bɛ teaseɛnam nyɔ ne nandwie nyii nna,

⁸ yeɛ ɔneane Merarifoɛ b’adwuma nwo mane bɛ teaseɛnam nna ne nandwie nyii mmɔtwɛ, na ɔsɔfo Aarɔn awa Yitama yeɛ né ɔnea Merarifoɛ nemɔ aso maa bɛyɔ b’adwuma ɔ.

⁹ Nakoso Kohatefoɛ de, wamma bɛ bie, ofikyɛ bɛ de, nningyein krongron bɔ owura bɛ sa ne, bɛsoa ye wɔ bɛ bati.

¹⁰ Kyẽa bɔ bɛpopale afɔleɛ bokyea ne ngoo ne, mbanyi nemɔ sá fale afɔleɛ bɛwale maa bɛfa betuli afɔleɛ bokyea ne bewurale AWURADE sa; mbanyi nemɔ fale b’afɔleɛ ne bɛwale afɔleɛ bokyea ne anyunu.

¹¹ Na AWURADE sele Mose kyɛ, “Odi kyɛ ɛlɛho biala mbanyi ne anu ko fa ye afɔleɛ ba, maa bɛfa betu afɔleɛ bokyea ne bewura me sa.”

¹² Aminadabo awa bienzua Nason bɔ ofi Yuda abusua kure nu ne yeɛ ɔfale ye afɔleɛ deɛ wale kyẽa bɔ oli moa ne ɔ.

¹³ Ye afɔleɛ ne ɛhe: talie bɔ bafa ɛdwetɛ bayɔ ɔ ko, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

¹⁴ ayaa ko bɔ bafa esikaa kɔkorɛ bayɔ ɔ, bɔ nu nonɛ te kilo ko nu ngyɛmuɛ buru, bɔ ɛyɛɛ ayi ye tɛkyɛ ɔ;

¹⁵ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

¹⁶ abɔngye nyii ko bɔ bɛfa bɛbɔ bɔne nwo afɔleɛ ɔ;

¹⁷ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Aminadabo awa Nason ye afɔleɛ deɛ ɛne.

¹⁸ Kyẽa bɔ ɔtɔ so nyɔ ne, Suare awa bienzua Netanɛl bɔ otua Yisaka abusua kure noa ne, ɔfale ye afɔleɛ deɛ wale.

¹⁹ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

²⁰ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

²¹ nandwie nyii akrɔngrɔma ko, boaen nyii ko, boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

²² abɔngye nyii ko bɔ bɛfa bɛbɔ bɔne nwo afɔleɛ ɔ;

²³ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Suare awa Netanɛl ye afɔleɛ deɛ ɛne.

²⁴ Kyẽa bɔ ɔtɔ so nza ne, Helon awa Eliabo bɔ otua Sebulɔn abusua kure noa ne, ɔfale ye afɔleɛ deɛ wale.

²⁵ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

²⁶ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

²⁷ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

²⁸ abɔngye nyii ko bɔ bɛfa bɛbɔ bɔne nwo afɔleɛ ɔ;

²⁹ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Helon awa Eliabo ye afɔleɛ deɛ ɛne.

³⁰ Kyẽa bɔ ɔtɔ so nna ne, Sedɛre awa Elisure, bɔ otua Ruben abusua kure noa ne, ɔfale ye afɔleɛ deɛ wale.

³¹ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

³² ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

³³ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

³⁴ abɔngye nyii ko bɔ bɛfa bɛbɔ bɔne nwo afɔleɛ ɔ;

³⁵ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Sedɛre awa Elisure ye afɔleɛ deɛ ɛne.

³⁶ Kyẽa bɔ ɔtɔ so nnu ne, Surisadai awa Selumiɛl bɔ otua Simeon abusua kure noa ne, ɔfale ye afɔleɛ deɛ wale.

³⁷ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

³⁸ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

³⁹ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

⁴⁰ abɔngye nyii ko bɔ bɛfa bɛbɔ bɔne nwo afɔleɛ ɔ;

⁴¹ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Surisadai awa Selumiɛl ye afɔleɛ deɛ ɛne.

⁴² Kyẽa bɔ ɔtɔ so nzia ne, Dewel awa Eliasafe bɔ otua Gade abusua kure noa ne, ɔfale ye afɔleɛ deɛ wale.

⁴³ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

⁴⁴ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

⁴⁵ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

⁴⁶ abɔngye nyii ko bɔ bɛfa bɛbɔ bɔne nwo afɔleɛ ɔ;

⁴⁷ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Dewel awa Eliasafe ye afɔleɛ deɛ ɛne.

⁴⁸ Kyẽa bɔ ɔtɔ so nzoo ne, Amihude awa Elisama bɔ otua Efraim abusua kure noa ne, ɔfale ye afɔleɛ deɛ wale.

⁴⁹ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

⁵⁰ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

⁵¹ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

⁵² abɔngye nyii ko bɔ bɛfa bɛbɔ bɔne nwo afɔleɛ ɔ;

⁵³ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Amihude awa Elisama ye afɔleɛ deɛ ɛne.

⁵⁴ Kyẽa bɔ ɔtɔ so mmɔtwɛ ne, Pedasure awa Gamaliɛl bɔ otua Manase abusua kure noa ne, ɔfale ye afɔleɛ deɛ wale.

⁵⁵ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

⁵⁶ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

⁵⁷ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

⁵⁸ abɔngye nyii ko bɔ bɛfa bɛbɔ bɔne nwo afɔleɛ ɔ;

⁵⁹ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Pedasure awa Gamaliɛl ye afɔleɛ deɛ ɛne.

⁶⁰ Kyẽa bɔ ɔtɔ so ngona ne, Gideoni awa Abidan bɔ otua Benyamin abusua kure noa ne, ɔfale ye afɔleɛ deɛ wale.

⁶¹ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

⁶² ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

⁶³ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

⁶⁴ abɔngye nyii ko bɔ bɛfa bɛbɔ bɔne nwo afɔleɛ ɔ;

⁶⁵ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Gideoni awa Abidan ye afɔleɛ deɛ ɛne.

⁶⁶ Kyẽa bɔ ɔtɔ so buru ne, Amisadae awa Ahiesa, bɔ otua Dan abusua kure noa ne, ɔfale ye afɔleɛ deɛ wale.

⁶⁷ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

⁶⁸ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

⁶⁹ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

⁷⁰ abɔngye nyii ko bɔ bɛfa bɛbɔ bɔne nwo afɔleɛ ɔ;

⁷¹ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Amisadae awa Ahiesa ye afɔleɛ deɛ ɛne.

⁷² Kyẽa bɔ ɔtɔ so buru ne ko ne, Okran awa Pagyiɛl, bɔ otua Asɛ abusua kure noa ne, ɔfale ye afɔleɛ deɛ wale.

⁷³ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

⁷⁴ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

⁷⁵ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

⁷⁶ abɔngye nyii ko bɔ bɛfa bɛbɔ bɔne nwo afɔleɛ ɔ;

⁷⁷ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Okran awa Pagyiɛl ye afɔleɛ deɛ ɛne.

⁷⁸ Kyẽa bɔ ɔtɔ so buru ne nyɔ ne, Enan awa Ahira bɔ otua Nafetali abusua kure noa ne, ɔfale ye afɔleɛ deɛ wale.

⁷⁹ Ye afɔleɛ ne ɛhe: talie ko bɔ bafa ɛdwetɛ bayɔ ɔ, bɔ nu nonɛ te kilo ko ne bue, ayaa ko bɔ bafa ɛdwetɛ bayɔ ɔ, bɔ nu nonɛ te kilo ko, kyɛbɔ nekaa krongron berɛ kilo nonɛ te ɔ. Né esam paa bɔ bafa ngoo bafra ye ɔ, bɔ bɛfa bɛbɔ aburoo afɔleɛ ɔ wayi bɛ munyɔ tɛkyɛ;

⁸⁰ ayaa ko bɔ bafa esikaa kɔkorɛ bayɔ ɔ, bɔ nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, bɔ ɛyɛɛ ayi ye tɛkyɛ ɔ;

⁸¹ nandwie nyii akrɔngrɔma ko, boaen nyii ko, yeɛ boaen nyii akrɔngrɔma ko bɔ wali afoɛ ko bɔ bɛfa bɛbɔ naen yeralɛ afɔleɛ ɔ;

⁸² abɔngye nyii ko bɔ bɛfa bɛbɔ bɔne nwo afɔleɛ ɔ;

⁸³ ɔne asomdwee afɔleɛ nwo nningyein hemɔ: nandwie nyɔ, mmoaen nyii nnu, mbɔngye nyii nnu, ɔne mmoaen nyii akrɔngrɔma nnu bɔ bali afoɛ ngoko ɔ. Enan awa Ahira ye afɔleɛ deɛ ɛne.

⁸⁴ Mmerɛ bɔ bɛfale ɛpopalɛ ngoo bɛpopale afɔleɛ bokyea nen, nningyein hemɔ yeɛ Yisrael mbanyi fa wale maa bɛfa bɛbɔle afɔleɛ betuli afɔleɛ bokyea ne bewurale Nyameɛ sa ɔ: talie bɔ bafa ɛdwetɛ bayɔ ɔ buru ne nyɔ, ayaa bɔ bafa ɛdwetɛ bayɔ ɔ buru ne nyɔ, kulie bɔ bafa esikaa kɔkorɛ bayɔ ɔ buru ne nyɔ.

⁸⁵ Talie bɔ bafa ɛdwetɛ bayɔ ne, ko biala nu nonɛ te kilo ko ne bue, yeɛ ayaa bɔ bafa ɛdwetɛ bayɔ ne, ko biala nu nonɛ te kilo ko. Nningyein bɔ bɛfale ɛdwetɛ bɛyɔle ne amukoraa, nu nonɛ te kilo aburanyɔ ne mmɔtwɛ, kyɛbɔ nekaa krongron berɛ kilo nonɛ te ɔ.

⁸⁶ Ayaa buru ne nyɔ bɔ bafa esikaa kɔkorɛ bayɔ, bɔ ɛyɛɛ ayi bɛ tɛkyɛɛ ne, bɛ nu biala nu nonɛ, ɛkyɛ kilo ko nu ɛyaa a, ɔte nu ngyɛmuɛ nza, kyɛbɔ nekaa krongron berɛ kilo nonɛ te ɔ. Na sikaa kɔkorɛ amukoraa bɔ bɛfa bɛyɔle ayaa nemɔ ne, nu nonɛ te kilo ko ne bue.

⁸⁷ Ngaka amukoraa bɔ bɛfa bɛbɔle naen yeralɛ afɔleɛ ne, bɛte nandwie nyii buru ne nyɔ, mmoaen nyii buru ne nyɔ, mmoaen nyii akrɔngrɔma buru ne nyɔ bɔ bali afoɛ ngoko, bɔ bɛ nwo aburoo afɔleɛ boka so ɔ; yeɛ bɔne nwo afɔleɛ mbɔngye nyii buru ne nyɔ.

⁸⁸ Asomdwee afɔleɛ ngaka ne amukoraa bɛte nandwie nyii aburanyɔ ne nna, mmoaen nyii aburasia, mbɔngye nyii aburasia, mmoaen nyii akrɔngrɔma aburasia bɔ bali afoɛ ngoko ɔ. Bɛfale ɛpopalɛ ngoo bɛpopale afɔleɛ bokyea ne beyiele ne, sɔ nningyein nemɔ yeɛ bɛfa bɛbɔle afɔleɛ betuli afɔleɛ bokyea ne bewurale AWURADE sa ɔ.

⁸⁹ Sɛ né Mose kɔ ɛtena sua ne anu kyɛ ɔne AWURADE bɛkwaadwudwo a, né ɔte komviɛ ne kyɛ odwudwo kyire ye fi Adanzeɛ alaka ne aso mbata bia bɔ ɔwɔ kɛrubim nyɔ ne b’afia ne, ye anwuro ɔ; né komviɛ ne ɔne Mose bedwudwo.