Numeri 4 - AHYERƐLƐ KRONGRON

Kohatefoɛ b’adwuma

¹ Na AWURADE sele Mose ne Aarɔn kyɛ,

² “Ɛ́mɔye Kohatefoɛ befi Lewifoɛ ngaa nemɔ anu ná ɛ́mɔha bɛ ngome. Bɛ mmusua mmusua ɔne bɛ nana mɔ saso yeɛ ɛ́mɔgyina so bɛha bɛ ɔ.

³ Ɛ́mɔha ebiala bɔ wali ofi afoɛ aburasa bɔ ɔkwaadwu aburannu, bɔ waso kyɛ ɔyɔ ɛtena sua atenaleɛ ne anu adwuma ɔ.

⁴ Kohatefoɛ mɔ, b’adwuma wɔ ɛtena sua atenaleɛ ne anu ole kyɛ bɛkɔnea nningyein krongron paa nemɔ aso.

⁵ Sɛ mmerɛ dwu kyɛ ɛmɔtutu asikyeleɛ ne bɛkɔ a, odi kyɛ Aarɔn ne ye mma bɛkɔ ɛtena sua ne anu bɛkɔye mbɛmuɛ tena ne bɛfa bɛkyekye Adanzeɛ alaka ne anwo.

⁶ Odi kyɛ bɛfa abɔngye nwomaa ngatasoɛ bɛkata so; bɛ́fa ɛtena bibire bɛ́sɛ so, ná bɛ́fa ye mbuna nemɔ bewurawura nu.

⁷ Na paanoo krongron poen ne, odi kyɛ bɛfa ɛtena bibire bɛsɛ so, ná bɛ́fa ɛhemɔ bégua so: ndalie ne ɛyɛɛ kulie nemɔ, turonzemaa ne bua mɔ bɔ bɛkɔfa bekohwie afɔleɛ nzaa ɔ; odi kyɛ bɛfa daa biala paanoo ne koso bɛto so.

⁸ Afei odi kyɛ bɛfa ɛtena kɔkorɛ bɛsɛ so, ná bɛ́fa abɔngye nwomaa ngatasoɛ bɛ́kata so, ná bɛ́fa ye mbuna nemɔ bewurawura nu.

⁹ Odi kyɛ bɛfa ɛtena bibire bɛkata ɛhemɔ anwo: kanea bakaa ne ɔne ye nganea nemɔ, akapɛ bɔ bɛfa bɛtengyɛtengyɛ kanea nyamaa ne noa ne, kanea nyamaa nzoen ndalie nemɔ, yeɛ ngoo ndowaa amukoraa bɔ behwie nu ngoo begua kanea ne anu ne.

¹⁰ Odi kyɛ bɛfa abɔngye nwomaa bɛkyekye kanea bakaa ne ɔne ye nwo nningyein amukoraati nwo, ná bɛ́fa bésie ndaboa bɔ bɛfa bɛsoa ɛtena sua ne aso.

¹¹ Odi kyɛ bɛfa ɛtena bibire bɛsɛ afɔleɛ bokyea bɔ bafa sikaa kɔkorɛ bayɔ ne aso, ná bɛ́fa abɔngye nwomaa ngatasoɛ bɛ́kata so, ná bɛ́fa ye mbuna nemɔ bewurawura nu.

¹² Odi kyɛ bɛsesa nningyein bɔ bɛfa bɛsɔne wɔ nekaa krongron berɛ ne amukoraa, ná bɛ́fa bégua ɛtena bibire nu. Bɛ́fa nwomaa paa ngatasoɛ bɛkata so, ná bɛ́fa bésie ye mbuna ne aso.

¹³ Odi kyɛ betu nzoen ne befi afɔleɛ bokyea ne anu, ná bɛ́fa koogyan bɛ́sɛ afɔleɛ bokyea ne aso;

¹⁴ ná bɛ́fa nningyein hemɔ amukoraati bɔ bɛfa bɛsɔne wɔ afɔleɛ bokyea ne aso ne begua so: ngukue bɔ bɛfa see begua nu ɔ, ateɛ anoa tworɔntworɔn nemɔ, sofi nemɔ, ayaa nemɔ, afɔleɛ bokyea ne aso nningyein amukoraati; bɛ́fa nwomaa paa ngatasoɛ bɛkata so, ná bɛ́fa ye mbuna nemɔ béwurawura nu.

¹⁵ Sɛ Aarɔn ne ye mma mɔ bɛkata nekaa krongron ne ɔne nekaa krongron ne anu nningyein anwo beyie, ná sɛ mmenia ne betu bɛ bo befi asikyeleɛ berɛ a, odi kyɛ Kohatefoɛ basoa sɔ nningyein nemɔ. Nakoso onni kyɛ bɛ nwo ka nningyein krongron ne, ná banwu. Ɛhemɔ ole ɛtena sua atenaleɛ ne anu nningyein mɔ bɔ ɔsɛ kyɛ Kohatefoɛ mɔ bɛsoa ɔ.

¹⁶ “Odi kyɛ ɔsɔfo Aarɔn awa Eleasa yeɛ ɔnea ɛhemɔ aso ɔ: ngoo bɔ bɛfa begua kanea ne anu ne, ɛyɛɛ fona ne, daa biala aburoo afɔleɛ ne, ɛpopalɛ ngoo ne, nyianu sua ne ɔne nu nningyein amukoraa so nealɛ, nekaa krongron ne ɔne nu nningyein amukoraati.”

¹⁷ Yeɛ AWURADE sele Mose ne Aarɔn kyɛ,

¹⁸ “Kohatefoɛ mmusua mmusua ne, ɛ́mɔnea yé kyɛ bɛ boso ngonua wɔ Lewifoɛ nu ɔ.

¹⁹ Na ɛhe yeɛ ɔsɛ kyɛ ɛmɔyɔ bɛma bɛ ɔ, amaa sɛ bɛba nningyein krongron paa nemɔ anwo a, banya ngoa ná banwuwu: Aarɔn ne ye mma yeɛ odi kyɛ bɛkɔ nekaa krongron ne anu ná bekokyire Kohatefoɛ bɛ nu biala ye adwuma bɔ ɔsɛ kyɛ ɔyɔ, ɔne nningyein bɔ ɔsɛ kyɛ ɔsoa ɔ.

²⁰ Nakoso nnɛma Kohatefoɛ mɔ bɛkɔ nekaa krongron ne anu bɛkɔnea nningyein krongron nemɔ le, amaa banwuwu.”

Gɛsɔnfoɛ ne Merarifoɛ b’adwuma

²¹ Afei AWURADE sele Mose kyɛ,

²² “Ka Gɛsɔnfoɛ mɔ koso: Bɛ mmusua mmusua ɔne bɛ nana mɔ saso yeɛ gyina so ka bɛ ɔ.

²³ Ka ebiala bɔ wali ofi afoɛ aburasa bɔ ɔkwaadwu afoɛ aburannu, bɔ waso kyɛ ɔyɔ ɛtena sua atenaleɛ ne anu adwuma ɔ.

²⁴ Ɛsɔnenɛ adwuma ɔne nningyein soalɛ ne, Gɛsɔnfoɛ bɛ deɛ bɔ ɔsɛ kyɛ bɛyɔ ɛhe:

²⁵ odi kyɛ bɛsoa nyianu sua mbɛmuɛ tena nemɔ, ɛtena sua atenaleɛ ne ɔne ye ngatasoɛ, abɔngye nwomaa bɔ ɔsɛ so ne, ngatasoɛ bɔ ɔsɛ so ne, ɔne ɛtena bɔ onwi ɛtena sua atenaleɛ anoa nu berɛ ne,

²⁶ aluo berɛ mbɛmuɛ tena nemɔ, aluo berɛ bɔ wapɛ nyianu sua ne afɔleɛ bokyea ne anwo wayia ne, ye ɛtena bɔ onwi ye anoa nu berɛ ne ɔne ye nyamaa nemɔ, yeɛ nikyee biala bɔ ohia kyɛ bɛfa bɛyɔ bɛ nwo adwuma ɔ. Na odi kyɛ bɛyɔ adwuma biala bɔ ɔfa sɔ nningyein nemɔ anwo ɔ.

²⁷ Odi kyɛ Aarɔn ne ye mma mmienzua mɔ yeɛ bekyire Gɛsɔnfoɛ adwuma amukoraa bɔ bɛ́yɔ ɔ: nningyein amukoraa bɔ odi kyɛ bɛsoa ɔne adwuma amukoraa bɔ odi kyɛ bɛyɔ ɔ. Ɛ́mɔfa nningyein bɔ ɔsɛ kyɛ bɛsoa amukoraa nwo adwuma béwura bɛ sa.

²⁸ Gɛsɔnfoɛ mmusua mmusua ne, b’adwuma bɔ ɔfa ɛtena sua atenaleɛ nwo ɛne; na ɔsɛ kyɛ ɔsɔfo Aarɔn awa Yitama yeɛ ɔnea bɛ so maa bɛyɔ b’adwuma ɔ.

²⁹ Merarifoɛ de, gyina bɛ mmusua mmusua ɔne bɛ nana mɔ sasofoɛ so yeɛ ka bɛ ɔ.

³⁰ Ka ebiala bɔ wali ofi afoɛ aburasa bɔ ɔkwaadwu afoɛ aburannu ɔ, bɔ waso kyɛ ɔyɔ ɛtena sua atenaleɛ ne anu adwuma ɔ.

³¹ Na ɛhe yeɛ ɔte b’asɛdeɛ kyɛ bɛsoa ɔ. Ɛtena sua atenaleɛ ne anu nningyein amukoraa, bɔ odi kyɛ bɛsoa hɔ ɛhe: nyianu sua ndaboa nemɔ, ye kwatena nemɔ, ye bonima nemɔ, ye nyinasoɛ nemɔ,

³² bonima mɔ bɔ bapɛ aluo berɛ amukoraa nwo bayia ne, bɛ nyinasoɛ, pɛmbɛen nemɔ, nyamaa nemɔ, ɔne bɛ nwo nningyein amukoraati, ɔne adwuma bɔ ɔboka so amukoraati. Na ɛ́mɔhyire ebiala nningyein bɔ odi kyɛ ɔsoa ɔ.

³³ Ɛtena sua atenaleɛ nwo adwuma ne, Merarifoɛ mmusua mmusua ne b’adwuma amukoraa ɛne, na ɔsɔfo Aarɔn awa Yitama yeɛ odi kyɛ ɔnea bɛ so ɔ.

Bɛhale Lewifoɛ

³⁴ Yiti Mose ne Aarɔn ne maen mbanyi ne hale Kohatefoɛ nemɔ. Begyinane bɛ mmusua mmusua ɔne bɛ nana mɔ sasofoɛ so yeɛ bɛhale bɛ ɔ.

³⁵ Bɛhale ebiala bɔ wali ofi afoɛ aburasa bɔ ɔkwaadwu afoɛ aburannu, bɔ waso kyɛ ɔyɔ ɛtena sua atenaleɛ nu adwuma ɔ.

³⁶ Na mmenia bɔ bɛhale bɛ mmusua mmusua ne anu ne, bɛ somaa te apee nyɔ ɛyaa nzoo ne aburannu.

³⁷ Kohatefoɛ mmusua mmusua ne anu mmenia amukoraa bɔ bɛso wɔ ɛtena sua atenaleɛ ne anu, bɔ Mose ne Aarɔn hale bɛ ne, bɛ somaa ɛne. Begyinane AWURADE ahyɛdeɛ bɔ ɔnate Mose so hyɛle ne aso yeɛ bɛhale bɛ ɔ.

³⁸ Gɛsɔnfoɛ bɔ begyinane bɛ mmusua mmusua ɔne bɛ nana mɔ sasofoɛ so bɛhale bɛ ne,

³⁹ bɛ bɔ bali ofi afoɛ aburasa bɔ ɔkwaadwu afoɛ aburannu bɔ baso kyɛ bɛyɔ ɛtena sua atenaleɛ nu adwuma nen,

⁴⁰ bɛ somaa, kyɛbɔ begyinane bɛ mmusua mmusua ɔne bɛ nana mɔ sasofoɛ so bɛhale bɛ ne, ɔte apee nyɔ ɛyaa nzia ne aburasa.

⁴¹ Gɛsɔnfoɛ mmusua mmusua nu mmenia bɔ bɛso wɔ ɛtena sua atenaleɛ nu berɛ amukoraa, bɔ Mose ne Aarɔn gyinane AWURADE ahyɛdeɛ so hale bɛ ne, bɛ somaa ɛne.

⁴² Merarifoɛ bɔ begyinane bɛ mmusua mmusua ɔne bɛ nana mɔ sasofoɛ so bɛhale bɛ ne,

⁴³ bɛ bɔ bali ofi afoɛ aburasa bɔ ɔkwaadwu afoɛ aburannu, bɔ baso kyɛ bɛyɔ ɛtena sua atenaleɛ nu adwuma nen,

⁴⁴ kyɛbɔ begyinane bɛ mmusua mmusua so bɛhale bɛ ne, bɛ somaa te apee nza ɛyaa nyɔ.

⁴⁵ Merari mmusua mmusua ne anu mmenia bɔ Mose ne Aarɔn hale bɛ ne, bɛ somaa ɛne. Begyinane AWURADE ahyɛdeɛ bɔ ɔnate Mose so hyɛle ne aso yeɛ bɛhale bɛ ɔ.

⁴⁶ Lewifoɛ amukoraa bɔ Mose ne Aarɔn ne Yisrael mbanyi begyinane bɛ mmusua mmusua ɔne bɛ nana mɔ sasofoɛ so bɛhale bɛ ne,

⁴⁷ bɛ bɔ bali ofi afoɛ aburasa bɔ ɔkwaadwu afoɛ aburannu, bɔ baso kyɛ bɛyɔ ɛtena sua atenaleɛ nu adwuma, ɔne kyɛ bɛsoa ɛtena sua atenaleɛ nwo nningyein nen,

⁴⁸ bɛ somaa te apee mmɔtwɛ ɛyaa nnu ne aburawɔtwɛ.

⁴⁹ Bɛfale ɛsɔnenɛ adwuma ahoroɔ ɔne nningyein soalɛ adwuma ahoroɔ bewurale bɛ sa, kyɛbɔ AWURADE nate Mose so hyɛle bɛ ne. Yiti Mose hale bɛ, kyɛbɔ AWURADE hyɛle ye ne.