Numeri 34 - AHYERƐLƐ KRONGRON

Kanaan aseɛ ne wɛen

¹ AWURADE sele Mose kyɛ,

² “Fa ahyɛdeɛ he ma Yisraelfoɛ ná ka kyire bɛ kyɛ, Sɛ ɛmɔkodwu Kanaan aseɛ ne aso a (Kanaan aseɛ bɔ ɔkɔyɛ ɛmɔ agyapadeɛ ne, ye wɛen mɔ ɛhe),

³ ɛmɔ aseɛ ne, ye ngwaen dɔ wɛen ne, ɔkɔtrɛ kofi Sen ɛserɛ so ná ɔne Edom babɔ wɛen. Ɛmɔ ngwaen dɔ wɛen ne, ɔkɔtrɛ kofi Ngyee Ɛpo ne anoa wɔ eyia afiteleɛ.

⁴ Ɛmɔ wɛen ne kɔkondo kɔfa Akrabim pambaa ne ngwaen, ná wapɛ nu wahɔ Sen, na ye noa kɔɔpem Kadese Banea ngwaen. Ɔkɔtoa so kɔhɔ Hasa Ada, na wapɛ nu waadwu Asimɔn.

⁵ Ɛwɛen ne kɔtrɛ kofi Asimɔn koodwu Misraim bɔnza ne anu, na ye noa kɔɔpem ɛpo ne.

⁶ “Ɛmɔ eyia atɔleɛ wɛen kɔyɛ Ɛpo Piri ne ye mboanoa; ɛhe yeɛ ɔkɔyɛ ɛmɔ atɔleɛ ɛwɛen ɔ.

⁷ Ɛhe yeɛ ɔkɔyɛ ɛmɔ sorɔ dɔ wɛen ɔ: ɛ́mɔto wɛen ne béfi Ɛpo Piri ne beedwu Hore bokaa ne.

⁸ Ɛ́mɔto wɛen ne befi Hore bokaa ne maa oodwu Lebo Hamate, ná ye noa ɔɔpem Sedade.

⁹ Afei ɛwɛen ne kɔtrɛ koodwu Sifron, na ye noa kɔɔpem Hasa Enan; berɛ yeɛ ɔkɔyɛ ɛmɔ sorɔ dɔ wɛen ɔ.

¹⁰ Ɛ́mɔto ɛmɔ eyia afiteleɛ ɛwɛen ne befi Hasa Enan beedwu Sefam;

¹¹ na ɛwɛen ne kɔtorotoro kofi Sefam koodwu Ribla bɔ ɔwɔ Ayin eyia afiteleɛ ne. Ɛwɛen ne kɔtorotoro koodwu Kinerete Ɛpo eyia afiteleɛ ndoroleɛ nu.

¹² Ɛwɛen ne kɔtorotoro kɔhɔ Asue Yɔɔdan noa, na ye noa kɔɔpem Ngyee Ɛpo ne. Ɛmɔ aseɛ ne, ɛhe yeɛ ɔkɔyɛ ye noa wɛen mɔ ɔ.”

¹³ Na Mose fale ahyɛdeɛ he mane Yisraelfoɛ kyɛ, Aseɛ he yeɛ odi kyɛ ɛmɔfa serewagualɛ so bɛkyɛ ɔ. AWURADE ahyɛ kyɛ bɛ́fa bɛ́ma mmusua kure ngona ne bue ne.

¹⁴ Ofikyɛ Rubenfoɛ abusua kure bɛ nana mɔ sasofoɛ, bɛ ne Gadefoɛ abusua kure bɛ nana mɔ sasofoɛ, yeɛ Manase abusua kure ne bue de, bale b’aseɛ deɛ.

¹⁵ Sɔ mmusua kure nyɔ ne bue ne, bale b’aseɛ deɛ wɔ Yɔɔdan bɔ opingye Yeriko ne, ye si dɔ, wɔ eyia afiteleɛ.

Mbanyi bɔ bɛkɔhyɛ aseɛ ne ɔ

¹⁶ AWURADE sele Mose kyɛ,

¹⁷ “Mmenia bɔ bɛkɔhyɛ aseɛ ne bɛkɔma ɛmɔ maa ɔkɔyɛ ɛmɔ agyapadeɛ ne, bɛ dumaa ɛhe: Ɔsɔfo Eleasa ne Nun awa Yosua.

¹⁸ Odi kyɛ ɛmɔye panyi ko befi abusua kure biala anu maa bɛkyɛ aseɛ ne maa ɔyɛ ɛmɔ agyapadeɛ.

¹⁹ Mbanyi nemɔ, bɛ dumaa ɛhe: Yuda abusua kure deɛ ole Yefune awa Kalebo.

²⁰ Simeon abusua kure deɛ ole Amihude awa Semuel.

²¹ Benyamin abusua kure deɛ ole Kisilɔn awa Elidade.

²² Dan abusua kure deɛ ole Yogli awa Buki bɔ ɔla bɛ noa ne.

²³ Yosef boso ama mɔ: Manase abusua kure deɛ ole Efode awa Haniɛl bɔ ɔla bɛ noa ne.

²⁴ Efraim abusua kure deɛ ole Sifitan awa Kemuel bɔ ɔla bɛ noa ne.

²⁵ Sebulɔn abusua kure deɛ ole Panake awa Elisafan bɔ ɔla bɛ noa ne.

²⁶ Yisaka abusua kure deɛ ole Asan awa Paltiɛl bɔ ɔla bɛ noa ne.

²⁷ Asɛ abusua kure deɛ ole Selomi awa Ahihude bɔ ɔla bɛ noa ne.

²⁸ Nafetali abusua kure deɛ ole Amihude awa Pedahel bɔ ɔla bɛ noa ne.

²⁹ Mmenia hemɔ yeɛ AWURADE fa wurale bɛ sa kyɛ bɛhyɛ aseɛ ne bɛma Yisraelfoɛ maa ɔyɛ b’agyapadeɛ wɔ Kanaan aseɛ so ne.”