Numeri 32 - AHYERƐLƐ KRONGRON

Bɛkyɛ asue Yɔɔdan si dɔ aseɛ

¹ Né Ruben boso ama mɔ ne Gade boso ama mɔ bele nyɛmmoa pee paa. Mmerɛ bɔ Gadefoɛ ne Rubenfoɛ nwuni kyɛ Yasere aseɛ ɔne Gileade aseɛ te paa ma ngaka sielɛ ne,

² bɛhɔle Mose, ɔsɔfo Eleasa ne Yisrael mbanyi berɛ beesele bɛ kyɛ,

³ “Atarote, Dibɔn, Yasere, Nimra, Hesebon, Eleale, Sebam, Nebo ɔne Beon:

⁴ AWURADE lili sɔ aseɛ nemɔ aso ngonim wɔ Yisraelfoɛ nyunu. Ɔte aseɛ paa ma nyɛmmoa, na wɔ ngoaa koso yɛle nyɛmmoa.”

⁵ Bɛtoale so kyɛ, “Sɛ anya alo yɛ de a, ye de maa bɛfa aseɛ ye bɛma wɔ ngoaa ma ɔyɛ yɛ agyapadeɛ. Nnɛmaa yɛpɛ asue Yɔɔdan yɛkɔ ye si.”

⁶ Nakoso Mose bisale Gadefoɛ ne Rubenfoɛ kyɛ, “Aso odi kyɛ ɛmɔ aliɛma mɔ kɔ koɛ ma ɛmɔ de ɛmɔtena wa?

⁷ Nzu ati yeɛ ɛmɔbu Yisraelfoɛ abasa nu maa ɔnate so bɛngɔpɛ asue Yɔɔdan bɛngɔhɔ aseɛ bɔ AWURADE afa ama bɛ ne aso ɔ?

⁸ Nzomane ɛmɔ nana mɔ mvili Kadese Banea kyɛ bɛɛnea aseɛ ne, sɔ ala yeɛ bɛyɔle ɔ.

⁹ Beedwuli Ɛseko bɔnza ne anu ná benwuni aseɛ nen, bebuli Yisraelfoɛ abasa nu kyɛ nnɛmaa bɛkɔ aseɛ bɔ AWURADE afa ama bɛ ne aso.

¹⁰ AWURADE fɛle yaa paa sɔ kyẽa ne, na ɔtale ndaen kyɛ,

¹¹ ‘Nahorɛ nu, bɛ bɔ befili Misraim bɛwale ne, bɛ nu biala bɔ wali ofi afoɛ aburanyɔ bɔ ɔkɔ ne, ongonwu aseɛ bɔ ndale ndaen kyɛ ngɔfa ngɔma Abraham, Yisake ɔne Yakob ne, ofikyɛ banni nahorɛ bamma me.

¹² Sana Kenisiniɛ Yefune ɔwa Kalebo ɔne Nun awa Yosua angome yeɛ bekonwu ye ɔ, ofikyɛ bɛ yeɛ bali nahorɛ bamma AWURADE ɔ.’

¹³ Na AWURADE fɛle Yisrael so yaa paa, na ɔmaa behyinihyinini ɛserɛ so toonn afoɛ aburanna, kɔpem kyɛ aworɛ ndoatoasoɛ bɔ bayɔ bɔne wɔ AWURADE nyunu ne, bɛ mukoraa bewuwuli ɔ.

¹⁴ Afei ɛmɔ, bɔnefoɛ boso ama, ɛmɔasi ɛmɔ nana mɔ gya nu, ɛmɔahɔ so bahu AWURADE ahone maa wafɛ Yisrael so yaa piri paa.

¹⁵ Sɛ ɛmɔyakyi ye si lilɛ a, okosa kɔyakyi mmenia hemɔ bɛ nu wɔ ɛserɛ ne aso, na ɛmɔkɔmaa mmenia he amukoraa bɛ boso konua.”

¹⁶ Afei bɛwale Mose berɛ beesele ye kyɛ, “Yɛkosisi mmoaennduin wɔ wa yɛkɔma yɛ mmoaen mɔ, na yɛkɔkyekye nguro yɛkɔma yɛ mma mɔ.

¹⁷ Nakoso yɛkɔfa akodeɛ yɛkoli Yisrael ama anyunu yɛkɔɔho, kɔpem kyɛ yɛkɔfa bɛ yɛkodwu b’aseɛ so ɔ. Sɔ mmerɛ ne, ɔnate porɛ ye anu mmenia ne ati, yɛ ngwadaa mɔ kɔtena nguro bɔ yabɔ bɛ nwo waen nemɔ anu.

¹⁸ Yɛngosa yɛ si yɛngɔhɔ yɛ awuro kɔpem kyɛ Yisraelfoɛ amukoraa bɛ sa kɔha b’agyapadeɛ ɔ.

¹⁹ Yɛ ne bɛ ngɔhyɛ Yɔɔdan si dɔ aseɛ ne, ofikyɛ yɛ sa aha yɛ agyapadeɛ deɛ wɔ Yɔɔdan ye bue faen bɔ ɔkɔ eyia afiteleɛ dɔ ne.”

²⁰ Yeɛ Mose sele bɛ kyɛ, “Sɛ ɛmɔyɔ ɛhemɔ a: sɛ ɛmɔfa akodeɛ ná ɛmɔkɔ koɛ wɔ AWURADE nyunu,

²¹ ná ɛmɔ amukoraa bɔ ɛmɔtira akodeɛ ne, sɛ ɛmɔpɛ asue Yɔɔdan wɔ AWURADE nyunu, kɔpem kyɛ ɔkɔfoa ye pɔfoɛ mɔ kofi ye nyunu,

²² ná AWURADE di aseɛ ne aso ngonim a, ye si ye, ɛmɔkɔhora bekosa bɛ si. Sɛ ɔba ye sɔ a, né ɛmɔnni AWURADE ne Yisrael nyunu fɔ, na aseɛ he kɔyɛ ɛmɔ agyapadeɛ AWURADE nyunu.

²³ Nakoso sɛ ɛmɔanyɔ sɔ a, ye de ɛmɔayɔ bɔne batia AWURADE, na ɛ́mɔkaye kyɛ ɛmɔ bɔne nwo asohwenɛ kɔwa ɛmɔ so.

²⁴ Ɛ́mɔkyekye nguro bɛ́ma ɛmɔ ngwadaa mɔ, ná ɛ́mɔsisi tuin bɛ́ma ɛmɔ mmoaen mɔ. Nakoso odi kyɛ ɛmɔyɔ bɔ ɛmɔahyɛ ye nwo bɔ ne.”

²⁵ Na Gadefoɛ ne Rubenfoɛ ne sele Mose kyɛ, “Wɔ ngoaa kɔyɔ kyɛbɔ me mene ahyɛ ne.

²⁶ Yɛ mma mɔ, yɛ ye mɔ, yɛ mmoaen kure mɔ, ɔne yɛ nyɛmmoa amukoraa kɔhɔ so bɛkɔtena Gileade nguro nemɔ anu.

²⁷ Nakoso wɔ ngoaa mɔ, yɛ nu biala aboaboa ye nwo kyɛ ɔkɔhɔ koɛ kɔma AWURADE, na yɛkɔpɛ asue Yɔɔdan ne kyɛbɔ me mene ahyɛ ne ala.”

²⁸ Yiti ahyɛdeɛ bɔ ɔfa Gadefoɛ ne Rubenfoɛ nwo ne, Mose ha hyirele ɔsɔfo Eleasa, Nun awa Yosua, ɔne Yisrael mmusua kure nemɔ bɛ nana mɔ sasofoɛ mbanyi nemɔ.

²⁹ Na Mose sele bɛ kyɛ, “Gadefoɛ ne Rubenfoɛ, bɔ bɛ nu biala waboaboa ye nwo kyɛ ɔkɔ koɛ ma AWURADE ne, sɛ bɛ ne ɛmɔ pɛ asue Yɔɔdan ná ɛmɔkodi aseɛ ne aso ngonim a, ye de ɛ́mɔfa Gileade aseɛ ne bɛ́ma bɛ ma ɔyɛ b’agyapadeɛ.

³⁰ Nakoso sɛ bamva b’akodeɛ bɛ ne ɛmɔ bangɔambɛ asue Yɔɔdan a, ye de odi kyɛ bɛ ne ɛmɔ nya agyapadeɛ wɔ neka horɛ wɔ Kanaan aseɛ so.”

³¹ Gadefoɛ ne Rubenfoɛ nemɔ buale kyɛ, “Kyɛbɔ AWURADE aha ahyire wɔ ngoaa ne, sɔ ala yeɛ yɛkɔyɔ ɔ.

³² Yɛkɔfa yɛ akodeɛ, yɛkɔpɛ asue ne AWURADE nyunu yɛkɔhɔ Kaanan aseɛ so. Nakoso y’aseɛ bɔ yanya ye wɔ asue Yɔɔdan bue faen ne, ɔkɔhɔ so kɔyɛ yɛ deɛ.”

³³ Amorifoɛ hene Sihon ye ahennie ɔne Basan hene Ogo ye ahennie: b’aseɛ ne bɛ nguro, ɔne nguro bɔ wapɛ bɛ nwo wayia nemɔ aseɛ ne, Mose fa mane Gadefoɛ, Rubenfoɛ ɔne Yosef awa Manase abusua kure ne bue.

³⁴ Gadefoɛ kyekyele nguro hemɔ bieku: Dibɔn, Atarote, Aroye,

³⁵ Atrote Sofan, Yasere, Yobeha,

³⁶ Bete Nimra, ne Bete Haran. Bɛtole nguro nemɔ anwo fasue, yeɛ besisili mmoaen nduin wɔ bɛ nu.

³⁷ Rubenfoɛ kyekyele nguro hemɔ bieku: Hesebon, Eleale, Kiriatim,

³⁸ Nebo, ɔne Baal Meon (bɛsesane dumaa ne biemɔ), ɔne Sibima. Nguro bɔ besa bɛkyekyele nemɔ, bɛtotole bɛ dumaa foforɛ.

³⁹ Manase awa Makyiri ye bosofoɛ mɔ, bɛhɔle Gileade beelili so ngonim, na bɛfoane Amorifoɛ bɔ né bɛwɔ berɛ ne.

⁴⁰ Yiti Mose fale Gileade mane Manase awa Makyiri ye bosofoɛ maa bɛtenane berɛ.

⁴¹ Manase awa Yari hɔle oolili bɛ nguraa nemɔ aso ngonim, na osa tole bɛ dumaa Hawote Yari.

⁴² Yeɛ Noba hɔle oolili Kenate ne ye nwo nguraa nemɔ so ngonim, na ɔsesane kuro ne dumaa fa tole ye nwo Noba.