Numeri 3 - AHYERƐLƐ KRONGRON

Aarɔn mma mmienzua mɔ

¹ Mmerɛ bɔ AWURADE ne Mose dwudwole wɔ Sinai bokaa ne aso ne, né Aarɔn ne Mose bɛ sasofoɛ mɔ ɛhe:

² Aarɔn mma mmienzua bɛ dumaa ɛhe: Nadabo bɔ ɔte bamuɛbaa, Abihu, Eleasa ɔne Yitama.

³ Aarɔn mma mmienzua mɔ bɔ bapopa bɛ ngoo bɔ Aarɔn hyɛle bɛ sɔfo ne, bɛ dumaa ɛne.

⁴ Nakoso Nadabo ne Abihu de, bewuwuli wɔ AWURADE nyunu wɔ Sinai ɛserɛ ne aso, ofikyɛ né bɛmvata kyɛ bɛfa see bɛbɔ afɔleɛ wɔ AWURADE nyunu, nakoso bɛyɔle sɔ. Né belle ba. Na Eleasa ne Yitama yeɛ belili sɔfo mmerɛ bɔ né bɛ baba Aarɔn te ase ɔ.

Lewifoɛ adwuma

⁵ Na AWURADE sele Mose kyɛ,

⁶ “Ma Lewi abusua kure ne bɛbra, ná maa bɛɛyɛ Aarɔn somvoɛ bɛboka ye wɔ ɔsɔfo adwumayɔlɛ ne anu.

⁷ Odi kyɛ bɛso wɔ nyianu sua ne anu, ná bɛyɔ adwuma bɛma Aarɔn ne maen ne amukoraa wɔ ɛtena sua atenaleɛ ne anyunu berɛ.

⁸ Odi kyɛ bɛnea ɛtena sua atenaleɛ ne anu nningyein amukoraa so, ná begyina Yisraelfoɛ gya nu bɛyɔ nyianu sua ne anu adwuma bɛma bɛ.

⁹ Ma Lewifoɛ mɔ bewura Aarɔn ne ye mma mmienzua mɔ bo; maye bɛ mafi Yisraelfoɛ nu bɔkɔɔ mafa bɛ mama Aarɔn.

¹⁰ Tu Aarɔn ne ye mma mmienzua mɔ sie berɛ, na bɛ yeɛ odi kyɛ bɛyɔ sɔfo adwuma ne ɔ. Sɛ ebie mbaen kɔ ɔsɔfo adwuma ne anwo a, odi kyɛ beku ye.”

¹¹ Na AWURADE sele Mose kyɛ,

¹² “Nea, maye Lewifoɛ ne mafi Yisraelfoɛ nu, na mafa bɛ masi Yisraelfoɛ bamuɛbaa mɔ amukoraa bɛ gya nu. Lewifoɛ mɔ kɔyɛ me deɛ,

¹³ ofikyɛ bamuɛbaa amukoraa te me deɛ. Mmerɛ bɔ ngukuni Misraim aseɛ so bamuɛbaa amukoraa ne, nduli Yisrael bamuɛbaa amukoraa nziele berɛ mane me nwo, kyɛ mmenia deɛ oo, kyɛ ngaka deɛ oo; bɛte me deɛ. Me ole AWURADE.”

¹⁴ Na AWURADE sele Mose wɔ Sinai ɛserɛ ne aso kyɛ,

¹⁵ “Ka Lewifoɛ mɔ. Nea bɛ nana mɔ saso ɔne mmusua mmusua ná fa ka bɛ. Bienzua biala bɔ wali ofi bosome ko bɔ ɔkɔ ne, ka ye bie.”

¹⁶ Yiti Mose gyinane AWURADE dwirɛ so hale bɛ, kyɛbɔ AWURADE hyɛle ye ne.

¹⁷ Lewi mma mmienzua mɔ, bɛ dumaa ɛhe: Gɛsɔn, Kohate ne Merari.

¹⁸ Gɛsɔn mma mmienzua mɔ, sɛ ɛnea bɛ mmusua mmusua a, bɛ dumaa ɛhe: Libini ne Simei.

¹⁹ Kohate mma mmienzua mɔ, sɛ ɛnea bɛ mmusua mmusua a, bɛ ole Amram, Yisare, Hebron ne Yusiɛl.

²⁰ Merari mma mmienzua mɔ, sɛ ɛnea bɛ mmusua mmusua a, bɛ ole Maheli ne Musi. Lewifoɛ mmusua nemɔ, sɛ ɛnea bɛ nana mɔ saso a, bɛ ɛne.

²¹ Gɛsɔn boso ama deɛ ole Libini abusua ne Simei abusua; Gɛsɔnfoɛ mmusua nemɔ ɛne.

²² Bɛ nu mmienzua amukoraa, bɛ bɔ bali ofi bosome ko bɔ ɔkɔ ɔ, bɛhale bɛ ne, bɛ somaa te apee nzoo ɛyaa nnu.

²³ Odi kyɛ Gɛsɔnfoɛ mmusua nemɔ bɛkyekye b’asikyeleɛ wɔ nyianu sua ne asi wɔ eyia atɔleɛ,

²⁴ na Layel awa bienzua Eliasafe yeɛ né ɔla Gɛsɔnfoɛ b’abusua ne noa ɔ.

²⁵ Gɛsɔn boso ama nemɔ, b’adwuma wɔ ɛtena sua atenaleɛ ne anu ole kyɛ, bɛ́nea ɛhemɔ amukoraa so: nyianu sua ne, pumbu ne ɔne ye ngatasoɛ, ɛtena bɔ onwi ɛtena sua atenaleɛ anoa nu berɛ ne,

²⁶ aluo berɛ mbɛmuɛ tena nemɔ; aluo berɛ bɔ wapɛ nyianu sua ne ne afɔleɛ bokyea ne anwo wayia ne, ye nyunu berɛ ɛtena bɔ onwi berɛ ne, ɔne ye nyamaa nemɔ, ɔne bɛ nwo adwuma amukoraa.

²⁷ Kohate boso ama deɛ ole Amramfoɛ abusua, Yisarefoɛ abusua, Hebronfoɛ abusua ɔne Yusiɛlfoɛ abusua; Kohatefoɛ mmusua nemɔ ɛne.

²⁸ Bɛ nu mmienzua amukoraa, bɛ bɔ bali ofi bosome ko bɔ ɔkɔ ɔ, bɛhale bɛ ne, bɛ somaa te apee mmɔtwɛ ɛyaa nzia. Kohatefoɛ yeɛ né bɛyɔ nekaa krongron berɛ adwuma ɔ.

²⁹ Odi kyɛ Kohatefoɛ mmusua nemɔ bɛkyekye b’asikyeleɛ wɔ nyianu sua ne ngwaen,

³⁰ na Yusiɛl awa bienzua Elisafan yeɛ né ɔla Kohatefoɛ b’abusua ne noa ɔ.

³¹ B’adwuma ole kyɛ bɛkɔnea ɛhemɔ aso: apam alaka ne, ɛpoen ne, kanea bakaa ne, afɔleɛ bokyea nemɔ, nekaa krongron berɛ nningyein bɔ asɔfo nemɔ fa yɔ ɛsɔnenɛ adwuma ne, ɔne mbɛmuɛ ɛtena ne, ɔne sɔ nningyein nemɔ nwo adwuma amukoraa.

³² Né ɔsɔfo Aarɔn awa Eleasa yeɛ ɔla Lewifoɛ mbanyi nemɔ noa, na ye yeɛ né ɔnea bɛ bɔ bɛyɔ nekaa krongron berɛ adwuma ne aso ɔ.

³³ Merari boso ama deɛ ole Mahelifoɛ abusua ɔne Musifoɛ abusua; bɛ yeɛ bɛte Merarifoɛ mmusua ɔ.

³⁴ Bɛ nu mmienzua amukoraa, bɛ bɔ bali ofi bosome ko bɔ ɔkɔ ɔ, bɛhale bɛ ne, bɛ somaa te apee nzia ɛyaa nyɔ.

³⁵ Na Abihail awa bienzua Suriɛl yeɛ né ɔla Merari mmusua nemɔ bɛ noa ɔ; odi kyɛ bɛkyekye b’asikyeleɛ wɔ nyianu sua ne sorɔ.

³⁶ Adwuma bɔ bɛfa bewurale Merari boso ama nemɔ sa ole kyɛ, bɛnea ɛhemɔ aso: nyianu sua ndaboa nemɔ, ye kwatena nemɔ, ye bonima nemɔ, ye nyinasoɛ, ɔne bɛ nwo nningyein amukoraati, ɔne adwuma biala bɔ ɔfa sɔ nningyein nemɔ anwo ɔ;

³⁷ yeɛ bonima mɔ bɔ bapɛ aluo berɛ nwo babra bayia amukoraa, bɛ nyinasoɛ, bɛ pɛmbɛen mɔ, ɔne bɛ nyamaa mɔ.

³⁸ Na bɛ bɔ odi kyɛ bɛkyekye b’asikyeleɛ wɔ nyianu sua ne nyunu, wɔ ye eyia afiteleɛ so yeɛ ole Mose ne Aarɔn ne Aarɔn mma mmienzua nemɔ. Nekaa krongron berɛ sɔnenɛ adwuma biala bɔ odi kyɛ bɛyɔ bɛma Yisraelfoɛ ne, bɛ yeɛ owura bɛ sa ɔ. Sɛ ebie mbaen pingye nekaa krongron ne a, odi kyɛ beku ye.

³⁹ Lewifoɛ mmienzua amukoraa bɔ Mose ne Aarɔn gyinane AWURADE ahyɛdeɛ so hale bɛ mmusua mmusua ne, bɛ bɔ bali ofi bosome ko bɔ ɔkɔ ne, bɛ somaa te apee aburanyɔ ne nyɔ.

Pɔ wɔ bamuɛbaa mɔ fi AWURADE berɛ

⁴⁰ Na AWURADE sele Mose kyɛ, “Ka Yisraelfoɛ bamuɛbaa mmienzua amukoraa, bɛ bɔ bali ofi bosome ko bɔ ɔkɔ ɔ, ná kyerɛ bɛ dumaa.

⁴¹ Nakoso Lewifoɛ de, ye bɛ sie berɛ ma me; Me ole AWURADE, ná fa bɛ si Yisraelfoɛ bamuɛbaa amukoraati bɛ gya nu. Lewifoɛ bɛ nyɛmmoa koso, fa bɛ si Yisraelfoɛ mɔ nyɛmmoa bamuɛbaa amukoraa bɛ gya nu.”

⁴² Yiti Mose hale Yisraelfoɛ bamuɛbaa nemɔ amu, kyɛbɔ AWURADE hyɛle ye ne.

⁴³ Na bamuɛbaa mmienzua bɔ bɛhale bɛ ná bɛhyerɛle bɛ dumaa ne amukoraa, bɛ bɔ bali ofi bosome ko bɔ ɔkɔ ne, bɛ somaa te apee aburanyɔ ne nyɔ ɛyaa nyɔ aburasoo ne nza.

⁴⁴ Na AWURADE sele Mose kyɛ,

⁴⁵ “Fa Lewifoɛ mɔ si Yisraelfoɛ bamuɛbaa amukoraati bɛ gya nu, ná Lewifoɛ bɛ nyɛmmoa mɔ koso, fa bɛ si Yisraelfoɛ bɛ nyɛmmoa mɔ gya nu, na Lewifoɛ mɔ kɔyɛ me deɛ: Me ole AWURADE.

⁴⁶ Na kyɛ ɔkɔyɛ ná ɛkɔpɔ Yisraelfoɛ bamuɛbaa ɛyaa nyɔ ne aburasoo ne nza, bɔ bɛbo Lewifoɛ ne somaa so nen,

⁴⁷ de bɛ nu biala ye ti nyɔboɛ sekel nnu, kyɛbɔ nekaa krongron berɛ sekel te nen; sekel bɔ nu nonɛ te gyera aburanyɔ ɔ.

⁴⁸ Na sikaa bɔ bɛkɔfa bɛkɔpɔ bɛ bɔ bɛbo so nen, odi kyɛ ɛfa ma Aarɔn ne ye mma mmienzua mɔ.”

⁴⁹ Mmenia bɔ bɛbole bɛ bɔ Lewifoɛ pɔle bɛ ne aso ne, bɛ ti nyɔboɛ ne, Mose le fili bɛ bɔbɔ bɛ berɛ.

⁵⁰ Olele sikaa ne fili Yisraelfoɛ bamuɛbaa nemɔ berɛ; né ɔte sekel apee ko ɛyaa nza aburasia ne nnu, kyɛbɔ nekaa krongron berɛ sekel te ɔ.

⁵¹ Na Mose gyinane AWURADE dwirɛ so fale bɛ ti nyɔboɛ sikaa ne mane Aarɔn ne ye mma mmienzua mɔ, kyɛbɔ AWURADE hyɛle Mose ne.