Numeri 29 - AHYERƐLƐ KRONGRON

Totorobɛndo aluolue afɔleɛ

¹ “Bosome nzoo ne, ye kyẽa bɔ oli moa ne, ɛ́mɔyɛ nyianu krongron; nnɛma ɛmɔyɔ adwuma biala. Ɔte kyẽa bɔ ɔsɛ kyɛ ɛmɔhu totorobɛndo nemɔ ɔ.

² Odi kyɛ ɛmɔbɔ naen yeralɛ afɔleɛ bɔ ɔbo AWURADE fona ɔ bɛma ye: ɛ́mɔfa nandwie nyii akrɔngrɔma ko, boaen nyii ko, yeɛ mmoaen nyii akrɔngrɔma nzoo bɔ bali afoɛ ngoko, bɔ bellili nnɛen biala ɔ.

³ Bɛ nwo aburoo afɔleɛ ne, odi kyɛ bɛfa esam paa bɔ bafa ngoo bafra ye ɔ yeɛ bɛbɔ ɔ. Bɛ́fa olonka nza bɛ́boka nandwie nyii ne aso, ná bɛ́fa olonka nyɔ bɛ́boka boaen nyii ne aso,

⁴ ná bɛ́fa olonka ko bɛ́boka mmoaen akrɔngrɔma nzoo ne anu biala so.

⁵ Afei koso, ɛ́mɔfa abɔngye nyii ko bɛ́bɔ bɔne nwo afɔleɛ maa ɔyɛ mbata ma ɛmɔ.

⁶ Naen yeralɛ afɔleɛ bɔ ɛsraen fi a bɛbɔ ne, ɔne ye nwo aburoo afɔleɛ ne, yeɛ daa biala naen yeralɛ afɔleɛ ne ɔne ye nwo aburoo afɔleɛ ne, yeɛ bɛ nwo anonneɛ afɔleɛ nemɔ, odi kyɛ ɛmɔfa sɔ afɔleɛ nemɔ bɛboka so, kyɛbɔ bɛ nwo nhyehyɛleɛ te ɔ. Ɔte afɔleɛ bɔ bɛbɔ ye see so bɛma AWURADE bɔ ɔbo ye fona ɔ.

Mbata kyẽa afɔleɛ

⁷ “Sɔ bosome nzoo ne ala, ye eleburu ne aso, ɛ́mɔyɛ nyianu krongron. Ɛ́mɔhye hɔen, na nnɛma ɛmɔyɔ adwuma biala.

⁸ Odi kyɛ ɛmɔbɔ naen yeralɛ afɔleɛ bɔ ɔbo AWURADE fona ɔ bɛma ye: ɛ́mɔfa nandwie nyii akrɔngrɔma ko, boaen nyii ko, yeɛ mmoaen nyii akrɔngrɔma nzoo bɔ bali afoɛ ngoko, bɔ bellili nnɛen biala ɔ.

⁹ Bɛ nwo aburoo afɔleɛ ne, odi kyɛ ɔyɛ esam paa bɔ bafa ngoo bafra ye ɔ: ɛ́mɔfa olonka nza bɛ́boka nandwie nyii ne aso, ná ɛ́mɔfa olonka nyɔ bɛ́boka boaen nyii ne aso,

¹⁰ ná ɛ́mɔfa olonka ko bɛ́boka mmoaen akrɔngrɔma nzoo ne anu biala so.

¹¹ Afei koso, bɔne nwo mbata afɔleɛ ne, daa biala naen yeralɛ afɔleɛ ne, ɔne ye nwo aburoo afɔleɛ ne, yeɛ bɛ nwo anonneɛ afɔleɛ nemɔ, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛ́boka so.

Asese aluolue afɔleɛ

¹² Bosome nzoo ne, ye kyẽa bɔ ɔtɔ so buru ne nnu ne, ɛ́mɔyɛ nyianu krongron; Nnɛma ɛmɔyɔ adwuma biala. Ɛ́mɔli aluolue ɛlɛsoo bɛma AWURADE.

¹³ Odi kyɛ ɛmɔbɔ naen yeralɛ afɔleɛ bɔ ɔbo AWURADE fona ɔ wɔ see so bɛma ye: ɛ́mɔfa nandwie akrɔngrɔma buru ne nza, mmoaen nyii nyɔ ɔne mmoaen nyii akrɔngrɔma buru ne nna bɔ bali afoɛ ngoko, bɔ bellili nnɛen biala ɔ.

¹⁴ Bɛ nwo aburoo afɔleɛ ne, odi kyɛ ɔyɛ esam paa bɔ bafa ngoo bafra ye ɔ: ɛ́mɔfa olonka nza bɛ́boka nandwie nyii buru ne nza ne anu ko biala so, ná ɛ́mɔfa olonka nyɔ bɛ́boka mmoaen nyii nyɔ ne anu ko biala so,

¹⁵ ná ɛ́mɔfa olonka ko bɛ́boka mmoaen akrɔngrɔma buru ne nna ne anu ko biala so.

¹⁶ Afei koso, daa biala naen yeralɛ afɔleɛ ne, ye nwo aburoo afɔleɛ ne, ɔne ye nwo anonneɛ afɔleɛ ne, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛboka so.

¹⁷ “Ye elenyɔ ne aso, ɛ́mɔfa ɛhemɔ bɛ́bɔ afɔleɛ: nandwie nyii akrɔngrɔma buru ne nyɔ, mmoaen nyii nyɔ, mmoaen nyii akrɔngrɔma buru ne nna bɔ bali afoɛ ngoko, bɔ bellili nnɛen biala ɔ,

¹⁸ ná ɛ́mɔfa nandwie nyii nemɔ, mmoaen nyii nemɔ ɔne mmoaen akrɔngrɔma nemɔ bɛ nwo aburoo afɔleɛ, ɔne bɛ nwo anonneɛ afɔleɛ nemɔ bɛ́boka so, kyɛbɔ bɛ somaa nwo nhyehyɛleɛ te ɔ.

¹⁹ Asa koso, daa biala naen yeralɛ afɔleɛ ne, ɔne ye nwo aburoo afɔleɛ ne, yeɛ bɛ nwo anonneɛ afɔleɛ nemɔ, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛboka so.

²⁰ Ye ɛlɛsa ne aso, ɛ́mɔfa ɛhemɔ bɛ́bɔ afɔleɛ: nandwie nyii buru ne ko, mmoaen nyɔ, ɔne mmoaen nyii akrɔngrɔma buru ne nna bɔ bali afoɛ ngoko bɔ bellili nnɛen biala ɔ,

²¹ ná ɛ́mɔfa nandwie nyii nemɔ, mmoaen nyii nemɔ ɔne mmoaen akrɔngrɔma nemɔ bɛ nwo aburoo afɔleɛ, ɔne bɛ nwo anonneɛ afɔleɛ nemɔ bɛ́boka so, kyɛbɔ bɛ somaa nwo nhyehyɛleɛ te ɔ.

²² Asa koso, daa biala naen yeralɛ afɔleɛ ne, ɔne ye nwo aburoo afɔleɛ ne, yeɛ ye nwo anonneɛ afɔleɛ ne, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛboka so.

²³ Ye ɛlɛnna ne aso, ɛ́mɔfa ɛhemɔ bɛbɔ afɔleɛ: nandwie nyii buru, mmoaen nyii nyɔ, mmoaen nyii akrɔngrɔma buru ne nna bɔ bali afoɛ ngoko bɔ bellili nnɛen biala ɔ,

²⁴ ná ɛ́mɔfa nandwie nyii nemɔ, mmoaen nyii nemɔ ɔne mmoaen akrɔngrɔma nemɔ bɛ nwo aburoo afɔleɛ, ɔne bɛ nwo anonneɛ afɔleɛ nemɔ bɛ́boka so, kyɛbɔ bɛ somaa nwo nhyehyɛleɛ te ɔ.

²⁵ Afei koso, daa biala naen yeralɛ afɔleɛ ne, ye nwo aburoo afɔleɛ ne, ɔne ye nwo anonneɛ afɔleɛ ne, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛboka so.

²⁶ Ye elennu ne aso, ɛ́mɔfa ɛhemɔ bɛbɔ afɔleɛ: nandwie nyii ngona, mmoaen nyii nyɔ, mmoaen nyii akrɔngrɔma buru ne nna bɔ bali afoɛ ngoko bɔ bellili nnɛen biala ɔ,

²⁷ ná ɛ́mɔfa nandwie nyii nemɔ, mmoaen nyii nemɔ ɔne mmoaen akrɔngrɔma nemɔ bɛ nwo aburoo afɔleɛ, ɔne bɛ nwo anonneɛ afɔleɛ nemɔ bɛ́boka so, kyɛbɔ bɛ somaa nwo nhyehyɛleɛ te ɔ.

²⁸ Asa koso, daa biala naen yeralɛ afɔleɛ ne, ɔne ye nwo aburoo afɔleɛ ne, yeɛ ye nwo anonneɛ afɔleɛ ne, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛboka so.

²⁹ Ye elesia ne aso, ɛ́mɔfa ɛhemɔ bɛbɔ afɔleɛ: nandwie nyii mmɔtwɛ, mmoaen nyii nyɔ, mmoaen nyii akrɔngrɔma buru ne nna bɔ bali afoɛ ngoko, bɔ bellili nnɛen biala ɔ,

³⁰ ná ɛ́mɔfa nandwie nyii nemɔ, mmoaen nyii nemɔ ɔne mmoaen akrɔngrɔma nemɔ bɛ nwo aburoo afɔleɛ, ɔne bɛ nwo anonneɛ afɔleɛ nemɔ bɛ́boka so, kyɛbɔ bɛ somaa nwo nhyehyɛleɛ te ɔ.

³¹ Asa koso, daa biala naen yeralɛ afɔleɛ ne, ye nwo aburoo afɔleɛ ne, ɔne ye nwo anonneɛ afɔleɛ nemɔ, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛboka so.

³² Ye ɛlɛsoo ne aso, ɛ́mɔfa ɛhemɔ bɛ́bɔ afɔleɛ: nandwie nyii nzoo, mmoaen nyii nyɔ, mmoaen nyii akrɔngrɔma buru ne nna bɔ bali afoɛ ngoko, bɔ bellili nnɛen biala ɔ;

³³ ná ɛ́mɔfa nandwie nyii nemɔ, mmoaen nyii nemɔ ɔne mmoaen akrɔngrɔma nemɔ bɛ nwo aburoo afɔleɛ ɔne bɛ nwo anonneɛ afɔleɛ nemɔ bɛ́boka so, kyɛbɔ bɛ somaa nwo nhyehyɛleɛ te ɔ.

³⁴ Asa koso, daa biala naen yeralɛ afɔleɛ ne, ye nwo aburoo afɔleɛ ne, ɔne ye nwo anonneɛ afɔleɛ nemɔ, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛboka so.

³⁵ Ye ɛlɛbɔtwɛ ne aso, odi kyɛ ɛmɔyɛ nyianu krongron; nnɛma ɛmɔyɔ adwuma biala.

³⁶ Odi kyɛ ɛmɔbɔ naen yeralɛ afɔleɛ bɔ ɔbo AWURADE fona ɔ wɔ see so bɛma ye: ɛ́mɔfa nandwie nyii ko, boaen nyii ko, mmoaen nyii akrɔngrɔma nzoo bɔ bali afoɛ ngoko, bɔ bellili nnɛen biala ɔ;

³⁷ ná ɛ́mɔfa nandwie nyii ne, boaen nyii ne ɔne mmoaen akrɔngrɔma nemɔ bɛ nwo aburoo afɔleɛ, ɔne bɛ nwo anonneɛ afɔleɛ nemɔ bɛboka so, kyɛbɔ bɛ somaa nwo nhyehyɛleɛ te ɔ.

³⁸ Asa koso, daa biala naen yeralɛ afɔleɛ ne, ɔne ye nwo aburoo afɔleɛ ne, yeɛ ye nwo anonneɛ afɔleɛ ne, odi kyɛ ɛmɔfa abɔngye nyii ko bɛbɔ bɔne nwo afɔleɛ bɛboka so.

³⁹ Ɛhemɔ ole aluolue bɔ AWURADE ahyehyɛ wato berɛ wama ɛmɔ ɔ. Odi kyɛ ɛmɔ bɔhyɛlɛ afɔleɛ nemɔ ɔne ɛmɔ akyɛdeɛ afɔleɛ nemɔ, ɔne ɛmɔ naen yeralɛ afɔleɛ, ɔne ɛmɔ aburoo afɔleɛ nemɔ, ɔne ɛmɔ anonneɛ afɔleɛ ɔne ɛmɔ asomdwee afɔleɛ nemɔ koso, ɛmɔbɔ.”

⁴⁰ Yiti Mose hane edwirɛ ne amukoraa hyirele Yisraelfoɛ, kyɛbɔ AWURADE hyɛle ye ne ala.