Numeri 27 - AHYERƐLƐ KRONGRON

Selofehade mma mmrasua nemɔ

¹ Selofehade ɔse ole Hefa, bɔ ɔse ole Gileade, bɔ ɔse ole Makyiri, bɔ ɔse ole Manase, bɔ ye koso ɔse ole Yosef ne. Yiti Selofehade te Manase bosoniɛ. Ye mmrasua mɔ ole Mahela, Nowa, Hogela, Milka ɔne Tisa. Selofehade mma mmrasua nemɔ wale

² Mose, ɔsɔfo Eleasa, Yisrael mbanyi ɔne maen ne amukoraati bɛ nyunu wɔ ɛtena sua atenaleɛ anoa nu berɛ, na bɛhane kyɛ,

³ “Yɛ baba wuli wɔ ɛserɛ ne aso. Bɛ bɔ bɛ ne Kora yɛle AWURADE nwo lɔen ne, né ye de ɔbboka bɛ so. Nakoso ɔnate ye bɔbɔ ye bɔne ti, owuli bɔ wanwo baa bienzua biala ɔ.

⁴ Nzu ati yeɛ ɔnate kyɛ yɛ baba wanwo baa bienzua ne ati, odi kyɛ bɛma ye dumaa mini wɔ ye abusua nu ɔ? Yɛ baba aliɛma mmienzua nemɔ b’agyapadeɛ deɛ ne, fa nu bie ma yɛ.”

⁵ Mose fale bɛ dwirɛ ne tole AWURADE nyunu.

⁶ Na AWURADE buale Mose kyɛ,

⁷ “Edwirɛ bɔ Selofehade mma mmrasua nemɔ bɛka ne, ɔte turoloo. Odi kyɛ ɛma bɛ koso benya bɛ baba aliɛma mmienzua nemɔ b’aseɛ deɛ ne bie, amaa ɔnate so bɛ sa aha bɛ baba agyapadeɛ deɛ.

⁸ Afei sá ka kyire Yisraelfoɛ kyɛ, Sɛ bienzua bie wu, ná sɛ olle ba bienzua a, ɔsɛ kyɛ ɛmɔfa ye agyapadeɛ bɛma ɔwa brasua.

⁹ Sɛ olle baa brasua a, ye de ɛ́mɔfa ye agyapadeɛ bɛ́ma oliɛma mmienzua mɔ.

¹⁰ Na sɛ olle aliɛmaa bienzua a, ye de ɛ́mɔfa ye agyapadeɛ bɛ́ma ye baba aliɛma mmienzua mɔ.

¹¹ Na sɛ ye baba olle aliɛmaa bienzua a, ye de ɛ́mɔfa ye agyapadeɛ ne bɛ́ma ye abusuaniɛ kaenn, maa ɔfa. Ɛhe kɔyɛ ahyɛdeɛ ne nhyehyɛleɛ kɔma Yisraelfoɛ, kyɛbɔ AWURADE hyɛle Mose ne.”

Yosua si Mose gya nu

¹² AWURADE sele Mose kyɛ, “Fo Abarim mmokaa he, ná to wɔ nye nea aseɛ bɔ mafa mama Yisraelfoɛ ne.

¹³ Sɛ ɛnea yie a, ɛkɔtoa wɔ mbanyi mɔ kyɛbɔ eliɛma Aarɔn toale bɛ ne.

¹⁴ Ofikyɛ mmerɛ bɔ maen ne dwɔso tiale me wɔ Sen ɛserɛ ne aso ne, ɛmɔyɛle me mmeraa dwirɛ nwo asoserɛ. Ɛmɔamma wanna ali wɔ Yisraelfoɛ nyunu kyɛ nde krongron, wɔ nekaa bɔ nzue wale ne.” (Ɛhe ole Meribate Kadese asue bɔ ɔwɔ Sen ɛserɛ ne aso ne.)

¹⁵ Na Mose srɛle AWURADE kyɛ,

¹⁶ “AWURADE bɔ ɛte anwoɔnaen amukoraati, bɛ sunzum Nyameɛ ne, ye sona maa otua maen ye anoa,

¹⁷ sona bɔ okoli bɛ nyunu wɔ nikyee biala anu, na afei watua bɛ noa wɔ bɛ koɛhonɛ nu, amaa AWURADE mmenia banyɛ kyɛ mmoaen bɔ belle neafoɛ ɔ.”

¹⁸ Na AWURADE buale Mose kyɛ, “Ye Nun awa Yosua, bɔ sunzum ne akanyane ye ne, ná fa wɔ sa gua ye so.

¹⁹ Maa oogyina ɔsɔfo Eleasa ne maen ne amukoraa bɛ nyunu, na fa ye tua maen ne anoa wɔ bɛ nyunu.

²⁰ Fa wɔ tumi ne bie wura ye sa, amaa ɔnate so Yisraelfoɛ amukoraa bayɛ sotie bama ye.

²¹ Nakoso odi kyɛ ɔba ɔsɔfo Eleasa nyunu maa ɔfa Yurim so obisa AWURADE noa dwirɛ ɔma ye wɔ AWURADE nyunu. AWURADE noa dwirɛ so yeɛ odi kyɛ ɔne Yisrael maen ne amukoraa begyina bɛyɔ nikyee biala ɔ.”

²² Yiti Mose yɔle kyɛbɔ AWURADE hyɛle ye ne ala. Ɔyele Yosua, na ɔmaa oogyinane ɔsɔfo Eleasa ɔne maen ne amukoraa bɛ nyunu.

²³ Mose fale ye sa guale Yosua so, na ɔfale ye tuale maen ne anoa, kyɛbɔ AWURADE nate Mose so hyɛle ne.