Numeri 25 - AHYERƐLƐ KRONGRON

Yisraelfoɛ sɔne Baal Peɔ

¹ Mmerɛ bɔ Yisraelfoɛ bɛɛkyekyele asikyeleɛ bɛtenane Sitim ne, Yisraelfoɛ hyɛle ye bo bɛ ne Moabo mmrasua nemɔ bɛlelale.

² Moabo mmrasua nemɔ hwehwene Yisraelfoɛ hɔle Moabo mmosoen sɔnenɛ nu. Yisraelfoɛ lili mmosoen so aleɛ ne bie, na bɛkotole bɛ mmosoen nemɔ.

³ Yisrael fale ye nwo wurale bosoen Baal Peɔ bo, yiti AWURADE fɛle Yisrael so yaa paa.

⁴ Na AWURADE sele Mose kyɛ, “Yeye bɛ bɔ bɛlela mmenia ne noa amukoraa, ná fa nyamaa bɔ bɛ kɔme eyia nu wɔ AWURADE nyunu, amaa ɔnate so AWURADE ayakyi ye yaa piri bɔ wafɛ ye Yisrael so ne.”

⁵ Yiti Mose sele Yisrael mbanyi nemɔ kyɛ, “Ɛmɔ anu biala ohuhu ye mmenia bɔ bafa bɛ nwo baawura bosoen Baal Peɔ bo ne.”

⁶ Berɛ ne ala, bɔ begu so besu wɔ ɛtena sua atenaleɛ anoa nu berɛ ne, Yisraelniɛ bienzua bie ɔɔfale Midianniɛ braa bie oowurale ye ɛtena sua nu. Né Mose ne Yisrael maen ne amukoraa bɛ nye tua ye.

⁷ Mmerɛ bɔ Finehase, bɔ ɔse ole ɔsɔfo Aarɔn awa Eleasa nwuni ye ne, odwɔsole hwene ye nwo fili mmenia ne anu. Ɔfale pealɛɛ tirale,

⁸ na ɔpole Yisraelniɛ biaa ne wɔ ɛtena sua nu berɛ. Ɔfale pealɛɛ ne wɔle Yisraelniɛ biaa ne ɔne Midianniɛ braa ne bɛ munyɔ bɛ kunu. Na amaneɛ ne fili Yisraelfoɛ so.

⁹ Nakoso bɛ bɔ bewuli amaneɛ ne anu ne, né bɛte apee aburanyɔ ne nna.

¹⁰ Na AWURADE sele Mose kyɛ,

¹¹ “Me yaa bɔ mvɛle ye wɔ Yisraelfoɛ so ne, Finehase bɔ ɔse ole ɔsɔfo Aarɔn awa Eleasa ne, wama m’ahone atɔ nzue nu. Ofikyɛ watu ye nwo wasie berɛ wagyina me gya nu wahwe bɛ nwo nungunɛ wama me. Ɔnate ye sɔ ti, mangũkũ Yisraelfoɛ mɔ wɔ me nungunɛhwenɛ nu.

¹² Yiti ka kyire ye kyɛ, me ne ye yayɛ m’asomdwee apam.

¹³ Na ɛhe kɔyɛ daa sɔfolilɛ nwo apam kɔma ye ne ye boso ama, ofikyɛ wagyina ye gya nu pindinn wama ye Nyameɛ, na wapata wama Yisraelfoɛ.”

¹⁴ Yisraelniɛ biaa bɔ ohuni ye ne Midianniɛ braa ne, bɛfrɛ ye Simri. Ye baba ole Salu bɔ né ɔla Simeonfoɛ bɛ nana mɔ sasofoɛ kure ko anoa ne.

¹⁵ Midianniɛ braa bɔ ohuni ye ne, bɛfrɛ ye Kosibi. Sure bɔ ɔla Midian abusua ko anoa ne, ɔwa brasua ɛne.

¹⁶ AWURADE sele Mose kyɛ,

¹⁷ “Ɛ́mɔtane Midianfoɛ nye, ná ɛ́mɔhuhu bɛ,

¹⁸ ofikyɛ bɛnate nnakannaka so baha ɛmɔ. Balakalaka ɛmɔ wɔ edwirɛ hemɔ anwo: Baal Peɔ sɔnenɛ nwo, yeɛ b’eliɛma brasua Kosibi bɔ ɔte Midian panyi bie awa ne anwo. Kyẽa bɔ Peɔ sɔnenɛ hwene amaneɛ wale ne yeɛ behuni Kosibi ɔ.”