Numeri 24 - AHYERƐLƐ KRONGRON

Balaam ngɔmhyɛlɛ bɔ ɔtɔ so nza

¹ Afei Balaam nwuni kyɛ ɔyɛle AWURADE fɛ kyɛ ye Balaam wayira Yisrael ɔ. Yiti wangɔ ammisa so kyɛbɔ ɔyɔle ye daa ne, na mmom ɔfale ye nye hyirele ɛserɛ ne aso.

² Balaam mane ye ti so, na onwuni kyɛ Yisraelfoɛ baboaboa bɛ noa mmusua kure mmusua kure. Na Nyameɛ Sunzum wale ye so,

³ na ɔhyɛle ngɔm kyɛ, “Beɔ awa Balaam ye ngɔmhyɛlɛ ɛhe, sona bɔ ɔse ase ne, ye ngɔmhyɛlɛ,

⁴ sona bɔ ɔte Nyameɛ dwudwolɛ ne, ye ngɔmhyɛlɛ, bɔ onwu Ɛdangama ye nyekyire ne, bɔ ɔkata ye nye po a, ye nye nwu nikyee ne.

⁵ O Yakob, wɔ ɛtena sua mɔ yɛ nyemene, O Yisrael, w’atenaleɛ mɔ yɛ nyemene!

⁶ Bɛte kyɛ bɔnza bɔ ɔtrɛ kɔ dede ɔ, bɛte kyɛ asue noa turo mɔ, bɛte kyɛ pɛprɛ mmakaa bɔ AWURADE alua ɔ, bɛte kyɛ sida mmakaa bɔ begyigyi asue noa ɔ.

⁷ Nzue kofi ye bua nu kɔtengyɛ, na ye boso ama konya nzue pee, ye hene kɔyɛ titire kɔtra Agage, na ye ahennie konya ngɔsoɛ.

⁸ Nyameɛ bɔ ɔyele Yisrael fili Misraim ne, ye anwoserɛ te kyɛ torɔen mmɛen ma ye. Ɔkɔsɛkye maen maen bɔ bɛte ye pɔfoɛ ɔ, ná wabubu bɛ mmowue nu. Ɔkɔto ye agyaen kɔwowɔ bɛ.

⁹ Okunduni, na obutu berɛ kyɛ gyata, ɔte kyɛ gyata beleɛ; nwa yeɛ okotingye ye ɔ? Ebiala bɔ okoyira wɔ ne, Nyameɛ koyira ye, yeɛ ebiala bɔ ɔkɔnoma wɔ ne, Nyameɛ kɔnoma ye.”

¹⁰ Yeɛ Balake fɛle Balaam so yaa hahii. Ɔfale ye sa fini ye bɔbɔ ye sa nu, na osele Balaam kyɛ, “Ndole me sa mvrɛle wɔ kyɛ baanoma me pɔfoɛ mɔ; nakoso ayira bɛ pɛen nza mmom.

¹¹ Fi wa kɔ! Kɔ wɔ kuro! Ngane kyɛ ahaa ngɔma wɔ akatuaa piri paa, nakoso AWURADE abɔ w’akatuaa agua.”

¹² Yeɛ Balaam sele Balake kyɛ, “Aso manga mangyire wɔ bɔfoɛ mɔ bɔ ɛsomane bɛ me berɛ ne kyɛ,

¹³ ‘Sɛ Balake fa ye awuro bɔ ɛdwetɛ ne sikaa kɔkorɛ ayi ye tɛkyɛɛ po ma me a, mengɔhora mengoli me ti piri mengobu AWURADE dwirɛ so, ná mengɔyɔ paa anaa tɛɛ biala; na mmom bɔ AWURADE kɔha ne, ye ala yeɛ ngɔhã ɔ’?

¹⁴ Afei, mesa mekɔ me maen nu. Na maa nga bɔ kyẽa bie maen he kɔfa kɔyɔ wɔ maen ɔ ngyire wɔ.”

Balaam ngɔmhyɛlɛ bɔ ɔtɔ so nna

¹⁵ Afei Balaam hyɛle ngɔm kyɛ, Beɔ awa Balaam ye ngɔmhyɛlɛ, sona bɔ ɔse ase ne, ye ngɔmhyɛlɛ,

¹⁶ sona bɔ ɔte Nyameɛ dwudwolɛ ne, ye ngɔmhyɛlɛ, sona bɔ ole Anwuro Anwuro Nyameɛ nwo nimdeɛ, ná onwu Tuminiɛ Nyameɛ ye nyekyire, sona bɔ ɔkata ye nye po a, ye nye nwu nikyee ne, ye ngɔmhyɛlɛ:

¹⁷ Bɔ menwu ye mefa ye nwo ne, nna kekesaala ye yeɛ ɔkɔwa nu ɔ; bɔ me nye tua fa ye nwo ne, ongosi kekesaala ye. Nzramaa bie kofi Yakob nu kofite, na ɛhɔtɔ bie kofi Yisrael nu kodwɔso. Okoli Moabo mbanyi so ngonim, ná wabrɛ Sɛti boso ama amukoraa ase.

¹⁸ Edom kɔyɛ ye pɔfoɛ deɛ na Sɛre koso, ɔkɔyɛ ye pɔfoɛ deɛ, nakoso Yisrael de, ɔkɔhɔ so koli ngonim.

¹⁹ Sona bie bɔ ofi Yakob abusua nu yeɛ okoli hene ɔ, na nguro nemɔ aso ama bɔ bekonya bɛ ti bekodidi nu ne, okohũhũ bɛ.”

²⁰ Afei Balaam tole ye nye neane Amalɛke, na ɔhyɛle ngɔm kyɛ, “Amalɛke yeɛ odi mu paa wɔ maen maen mɔ nu ɔ, nakoso ye ayieleɛ ole kyɛ ɔkɔbɔ koraa.”

²¹ Yeɛ ɔtole ye nye neane Kenifoɛ, na ɔhyɛle ngɔm kyɛ, “Wɔ atenaleɛ gyi berɛ pindinn, na wɔ bue wɔ nyɔbotaen nu;

²² nakoso bɛkɔbɔ Kenifoɛ maen ne, kɔpem kyɛ Asure kɔhye wɔ nnure ɔ?”

²³ Na osa toale so kyɛ, “Aworabɔlɛ dwirɛ, sɛ Nyameɛ yɔ ɛhe a, nwa yeɛ okonya ye ti kodidi nu ɔ?

²⁴ Nakoso ɛlɛen mɔ kofi Kitim kɔwa, nu koɛhonɛfoɛ ne koli Asure ne Ebere so ngonim; na Kitim koso kɔbɔ afebɔɔ.”

²⁵ Afei Balaam sili nu sá hɔle ye kuro, na Balake koso sili nu hɔle.