Numeri 23 - AHYERƐLƐ KRONGRON

¹ Yeɛ Balaam sele Balake kyɛ, “Si afɔleɛ bokyea nzoo wɔ wa ma me, ná ma me nandwie nyii nzoo ne mmoaen nyii nzoo.”

² Balake yɔle kyɛbɔ Balaam hane ne ala, na Balake ne Balaam bɛfale nandwie nyii ko ne boaen nyii ko biala bɛbɔle afɔleɛ wɔ afɔleɛ bokyea ko biala so.

³ Yeɛ Balaam sele Balake kyɛ, “Tena wɔ naen yeralɛ afɔleɛ ne anwo, na mekɔ ahameɛ kãa. Ebiaa AWURADE ne me kooli ngitahoɛ. Bɔ ɔkɔye kohyire me biala, ngɔhã ngohyire wɔ.” Na Balaam sili nu hɔle bokaa pralaa bie aso.

⁴ Nyameɛ yele ye nwo ali hyirele Balaam, na Balaam sele ye kyɛ, “Masiesie afɔleɛ bokyea nzoo ne, na mafa nandwie nyii ko ɔne boaen nyii ko biala mabɔ afɔleɛ wɔ afɔleɛ bokyea ko biala so.”

⁵ Na AWURADE fale edwirɛ tuale Balaam noa kyɛ, “Sa kɔ Balake dɔ, na edwirɛ he yeɛ odi kyɛ ɛkã ɔ.”

⁶ Yiti Balaam sa wale Balake berɛ. Né Balake gyi ye naen yeralɛ afɔleɛ ne anwo berɛ, bɔ Moabo mbanyi nemɔ boka ye so ɔ.

⁷ Yeɛ Balaam hyɛle ngɔm kyɛ, “Balake waafa me wafi Aram wawa, Moabo hene waafa me wafi eyia afiteleɛ mmokaa so. Ɔnwa: ‘Bra ná baanoma Yakob ma me; Bra baawa Yisrael amoen!’

⁸ Meyɛ sɛɛ né manoma mmenia bɔ Nyameɛ ɔnnomane bɛ ɔ? Meyɛ sɛɛ né mawa mmenia bɔ AWURADE ɔppole bɛ ɔ amoen?

⁹ Ngyi nyɔbotaen nemɔ ti afia yeɛ menwu bɛ ɔ: Ngyi mmokaa nemɔ aso yeɛ me nye tua bɛ ɔ. Ɛhemɔ te mmenia bɔ bɛ ngome bɛte ɔ, na bɛnga bɛ nwo bɛmvora maen maen ngaa nemɔ!

¹⁰ Nwa yeɛ ɔkɔhora kɔha Yakob boso ama bɔ bɛ somaa te kyɛ mvuture ɔ, anaakyɛ ɔkɔhora kɔha Yisraelfoɛ nna nu ngyɛmuɛ ko ɔ? Ma me wue yɛ kyɛ mmenia bɔ bɛtengyɛ ɔ bɛ wue, ná m’ayieleɛ ɔyɛ kyɛ bɛ deɛ!”

¹¹ Yeɛ Balake sele Balaam kyɛ, “Nzikyɛ dwirɛ yeɛ afa ali me ye? Mvale wɔ mmale kyɛ baanoma me pɔfoɛ mɔ, nakoso eyiralɛ mmom yeɛ ayira bɛ ɔ.”

¹² Balaam buale kyɛ, “Aso nna bɔ AWURADE afa atua me noa yeɛ odi kyɛ menea meka ye yé ɔ?”

Balaam ngɔmhyɛlɛ bɔ ɔtɔ so nyɔ

¹³ Yiti Balake sele Balaam kyɛ, “Bra ma me ne wɔ yɛhɔ nekaa foforɛ bɔ egyi berɛ a wɔ nye tua bɛ ɔ; ekonwu bɛ nu bie, engonwu bɛ mukoraati; na afei gyina berɛ na noma bɛ ma me.”

¹⁴ Balake fale ye hɔle bokaa Pisiga ti afia wɔ Sofim ɛserɛ so. Osili afɔleɛ bokyea nzoo, na ɔfale nandwie nyii ko ne boaen nyii ko biala bɔle afɔleɛ wɔ afɔleɛ bokyea ko biala so.

¹⁵ Balaam sele Balake kyɛ, “Gyina wɔ naen yeralɛ afɔleɛ ne anwo, na maa ngɔ moa dɔ me ne AWURADE yɛɛli ngitahoɛ.”

¹⁶ AWURADE yele ye nwo ali hyirele Balaam, na ɔfale edwirɛ tuale ye noa kyɛ, “Sá kɔ Balake dɔ, na edwirɛ he yeɛ odi kyɛ ɛkã ɔ.”

¹⁷ Osa hɔle Balake dɔ ne, né Balake gyi ye naen yeralɛ afɔleɛ ne anwo, bɔ Moabo mbanyi nemɔ boka ye so ɔ. Na Balake bisale Balaam kyɛ, “AWURADE nwa nzɛ?”

¹⁸ Yeɛ Balaam hyɛle ngɔm kyɛ, “Dwɔso, Balake, ná tie; Sipore awa, tie bɔ meka ye.

¹⁹ Nyameɛ ɔtte kyɛ kuro sona, ná wapɛ anoanu, yeɛ ɔtte kyɛ dasaniɛ, ná wasesã ye adwene. Aso wahyɛ bɔ bɔ ongoli so anaa? Anaa waha edwirɛ bie bɔ ɔngɔma ɔngɔwa nu ɔ?

²⁰ Tie, saleɛ nwo dwirɛ yeɛ wafa wasoma me ɔ, wayira bɛ, yiti mengɔhora ye sesã.

²¹ Wannwu amumuyɛɛ biala wɔ Yakob nu; yeɛ wannwu amaneɛ dwirɛ biala wɔ Yisrael. AWURADE bɛ Nyameɛ gyi bɛ si, babɔ ye ohomoo wɔ bɛ nu kyɛ b’ɛhene ɛne.

²² Nyameɛ bɔ ɔyele bɛ fili Misraim ne, ye anwoserɛ te kyɛ torɔen mmɛen ma bɛ.

²³ Amba, bɛyyele ngonyaa biala bettiale Yakob, yeɛ bɛwwale Yisrael amoen biala. Afei bɛkɔhã bɛkɔfa Yakob ne Yisrael nwo kyɛ, ‘Nea bɔ AWURADE ayɔ ɔ!’

²⁴ Tie, Yisrael te maen bɔ odwɔso kyɛ gyata beleɛ, na ɔpagya ye nwo kyɛ gyata nyii! Ommutu berɛ, sana wali naen bɔ wahye ye ɔ, sana wano kaka bɔ wahũ ye ɔ, ye mogya.”

²⁵ Yeɛ Balake sele Balaam kyɛ, “Nzaade a, nnɛnoma bɛ koraa, yeɛ nnɛyira bɛ koraa.”

²⁶ Nakoso Balaam buale Balake kyɛ, “Manga mangyire wɔ kyɛ, ‘Bɔ AWURADE kɔha biala, yeɛ odi kyɛ meyɔ ɔ’?”

²⁷ Yiti Balake sele Balaam kyɛ, “Bra, maa mva wɔ ngɔ neka foforɛ. Ebiaa, berɛ de, Nyameɛ kɔpene so maa ɛkɔnoma mmenia nemɔ kɔma me.”

²⁸ Yiti Balake fale Balaam hɔle bokaa Peɔ so, bɔ egyi berɛ a, wɔ nye tua ɛserɛ pralaa ne.

²⁹ Balaam sele Balake kyɛ, “Si afɔleɛ bokyea nzoo wɔ wa ma me, ná ma me nandwie nyii nzoo ne mmoaen nyii nzoo.”

³⁰ Yiti Balake yɔle kyɛbɔ Balaam hane ne, ɔfale nandwie nyii ko ne boaen nyii ko biala bɔle afɔleɛ wɔ afɔleɛ bokyea ko biala so.