Numeri 22 - AHYERƐLƐ KRONGRON

Balake fa amoenwaa soma Balaam

¹ Yisraelfoɛ tuli bɛ bo, na bɛɛkyekyele asikyeleɛ wɔ Moabo aseɛ frɛtɛɛ bɔ ɔwɔ asue Yɔɔdan si bɔ opingye Yeriko ne aso.

² Né Sipore awa Balake anwu nningyein amukoraa bɔ Yisrael afa ayɔ Amorifoɛ ɔ.

³ Moabo surole Yisrael maen ne paa, ofikyɛ né bɛsone pee. Na Yisraelfoɛ nwo suronyi tɔle Moabo so.

⁴ Yeɛ Moabo sele Midian mbanyi nemɔ kyɛ, “Ɛlɔen piri he koli nningyein amukoraa bɔ wapɛ yɛ nwo wayia ɔ, kyɛbɔ nandwie di aseɛ so ndire ɔ.” Sɔ mmerɛ ne, né Sipore awa Balake yeɛ ɔte Moabo hene ɔ.

⁵ Otuli ɛbɔfoɛ maa bɛhɔle Beɔ awa Balaam berɛ wɔ Petore bɔ ɔla asue Yufreti noa, wɔ Amawo aseɛ so ne. Na bɛtole bɛ sa bɛfrɛle ye kyɛ, “Mmenia bie fi Misraim bawa; bayɛ aseɛ so mitimiti, na baatena bapingye me.

⁶ Bra kekesaala ye ná baanoma mmenia ye mɔ ma me, ofikyɛ bɛ nwo yɛ se tra me. Ebiaa né mali bɛ so ngonim ná mafoa bɛ mafi aseɛ ye aso. Ofikyɛ mese kyɛ ebiala bɔ ekoyira ye ne, okonya saleɛ, na ebiala bɔ ɛkɔnoma ye ne, musue kɔto ye.”

⁷ Yiti Moabo mbanyi ne Midian mbanyi fale abisa aboadeɛ ne, na besili nu bɛhɔle Balaam berɛ bɛɛfale Balake dwirɛ ne bɛɛbɔle ye amaneɛ.

⁸ Balaam buale bɛ kyɛ, “Ɛ́mɔla wa ma aleɛ hye, na edwirɛ bɔ AWURADE kɔha kohyire me biala ngɔma ɛmɔ so kɔte.” Yiti Moabo mbanyi nemɔ lale Balaam berɛ.

⁹ Nyameɛ wale Balaam berɛ oobisale ye kyɛ, “Nwa mɔ yeɛ bɛ ne wɔ wɔ wa ye?”

¹⁰ Balaam buale Nyameɛ kyɛ, “Sipore awa Balake bɔ ɔte Moabo hene ne ɔtole me ngraa kyɛ,

¹¹ ‘Mmenia biemɔ afi Misraim bawa, na bayɛ aseɛ ye aso mitimiti, yiti bra ná baanoma bɛ ma me; ebiaa ngɔhora me ne bɛ yɛkɔho na mafoa bɛ mafi wa.’ ”

¹² Na Nyameɛ sele Balaam kyɛ, “Nnɛne bɛ kɔ; nnɛnoma mmenia nemɔ, ofikyɛ mayira bɛ.”

¹³ Yiti Balaam dwɔsole ngyerɛmɔ, na osele Balake ye mbanyi nemɔ kyɛ, “Ɛ́mɔsa bɛhɔ ɛmɔ kuro, ofikyɛ AWURADE amma me ate kyɛ me ne ɛmɔ yɛhɔ.”

¹⁴ Yiti Moabo mbanyi nemɔ sili nu bɛhɔle Balake berɛ na bɛɛbɔle amaneɛ kyɛ, “Balaam ambene so kyɛ ɔne yɛ kɔwa ɔ.”

¹⁵ Balake sá somane mbanyi, bɔ bɛsone na besa bedi mu bɛtra bɛ bɔ belili moa bɛhɔle nemɔ ɔ.

¹⁶ Bɛhɔle Balaam berɛ beesele ye kyɛ, “Sipore awa Balake nwa: ‘Nnɛma hwee si wɔ ate wɔ me wa walɛ ne anwo;

¹⁷ ofikyɛ ngɔma wɔ akatuaa bɔ ɔfata paa ɔ, na bɔ ekose me ne biala ngɔyɔ. Mesrɛ wɔ, bra baanoma mmenia ye ma me.’ ”

¹⁸ Nakoso Balaam buale Balake ɛbɔfoɛ nemɔ kyɛ, “Sɛ Balake fa ye awuro bɔ ɛdwetɛ ne sikaa kɔkorɛ ayi ye tɛkyɛɛ po ma me a, mengɔhora mengohwi mengɔfa AWURADE me Nyameɛ ahyɛdeɛ so mengɔyɔ ye nwo hwee.

¹⁹ Ɛmɔ koso, ɛ́mɔla wa ɛnɛ, kyɛbɔ ɛbɔfoɛ hene mɔ yɔle ne ala, maa ndie edwirɛ bɔ AWURADE kɔha kohyire me bieku ɔ.”

²⁰ Sɔ kɔngɔen ne, Nyameɛ wale Balaam berɛ oosele ye kyɛ, “Sɛ biaa nemɔ bawa baato bɛ sa bafrɛ wɔ a, dwɔso na ɛne bɛ hɔ; na mmom bɔ ngɔhã ngohyire wɔ ne ala yeɛ yɔ ɔ.”

²¹ Yiti Balaam dwɔsole ngyerɛmɔ, osiesiele ye afunum, na ɔne Moabo mbanyi nemɔ besili nu bɛhɔle.

Balaam afunum ne dwudwo

²² Nyameɛ fɛle yaa paa, ofikyɛ Balaam sili nu kyɛ ɔkɔ. Na AWURADE abɔfo oogyinane atee ne anu sili ye ate. Né Balaam te ye afunum ne aso, na né ɔne ye ngoaa nyɔ yeɛ bɛnate ɔ.

²³ Afunum ne nwuni kyɛ AWURADE abɔfo ne gyi atee ne anu, bɔ yeɛ otira ngrandɛ ɔ. Yiti afunum ne makyele fili atee ne anu, na oowurale eburo. Balaam bɔle afunum ne kyɛ ɔmaa ɔfa ye nye kyire atee nu.

²⁴ Né atee kyenɔnn bie la bobe boo nemɔ anu. Ɛwaen wɔ ye bɛen ne famaa. Na AWURADE abɔfo oogyinane atee ne anu.

²⁵ Afunum ne nye bɔle AWURADE abɔfo ne aso ne, ɔfale ye nwo hwili ɛwaen ne mane Balaam gya hwili ɛwaen ne. Yiti Balaam bɔle kaka ne bieku.

²⁶ Nyameɛ abɔfo ne wale ye nyunu, na oogyinane nekaa kyenɔnn bie, bɔ yeɛ ɛpɛne wɔ nwo kɔ bɛen anaa famaa a ɔnyɛ yee ɔ.

²⁷ Afunum ne nwuni Nyameɛ abɔfo ne, obutuli berɛ bɔ né Balaam tɛ te ye so ɔ. Balaam fɛle yaa hahii, na ɔfale ye pɔmaa bɔle afunum ne.

²⁸ AWURADE mane afunum ne dwudwole, na obisale Balaam kyɛ, “Nzikyɛ yeɛ mayɔ wɔ ɔ, bɔ yeɛ yiti abɔ me pɛen nza ye?”

²⁹ Balaam buale afunum ne kyɛ, “Ofikyɛ edi me nwo angorɛ! Sɛ ndira ngrandɛ a, ahaa ngohũ wɔ kekesaala ye!”

³⁰ Nakoso afunum ne bisale Balaam kyɛ, “Aso nna w’afunum ole me, bɔ yeɛ atena me so alaa maa waadwu ɛnɛ ye? Aso mayɔ wɔ sɔ le?” Na Balaam buale ye kyɛ, “Daabi.”

³¹ Yeɛ AWURADE bukyele Balaam nye, na onwuni kyɛ AWURADE abɔfo ne gyi atee ne anu, bɔ wahwe ye ngrandɛ ɔ. Balaam bɔle ye nu ase fale ye nyunu butuli ase.

³² Yeɛ AWURADE abɔfo ne bisale ye kyɛ, “Nzu ati yeɛ abɔ wɔ kaka ne pɛen nza ye? Mawa kyɛ mebaasi wɔ ate, ofikyɛ nikyee bɔ ɛyɔ ne, ɔndengyɛ wɔ me nyunu.

³³ Afunum ne nwuni me, na ɔmakyele fili me nyunu pɛen nza. Sɛ wammakye wamvi me nyunu a, amba, ahaa mahu wɔ dadaada, maa ye de wanya ye ti wadidi nu.”

³⁴ Yeɛ Balaam sele AWURADE abɔfo ne kyɛ, “Mayɔ bɔne, ofikyɛ né menze kyɛ agyina atee ne anu kyɛ esi me ate ɔ. Afei, sɛ bɔ meyɔ ne ɔnzɔ wɔ nye a, ye de, mesa mekɔ awuro.”

³⁵ Na AWURADE abɔfo ne sele Balaam kyɛ, “Ɛne biaa nemɔ bɛhɔ, nakoso bɔ ngɔhã ngohyire wɔ ne angome yeɛ odi kyɛ ɛkã ɔ.” Yiti Balaam ne Balake mbanyi nemɔ bɛhɔle.

³⁶ Balake tele kyɛ Balaam awa ne, ooyiale ye wɔ Moabo kuro Yiri, bɔ ɔwɔ Anɔn ɛwɛen so, ɛwɛen ne anoa dɔ paa ne.

³⁷ Na Balake bisale Balaam kyɛ, “Manzoma kyɛ bɛɛfrɛ wɔ? Nzu ati yeɛ amma ɔ?” Aso mengɔhora mengɔma wɔ akatuaa bɔ ɔsɛ ɔ?”

³⁸ Balaam buale Balake kyɛ, “Kekesaala ye, mawa, nakoso atee nne berɛ kyɛ meka bɔ me bɔbɔ mekuro ɔ. Edwirɛ bɔ Nyameɛ kɔfa kotua me noa ne, ye ala yeɛ odi kyɛ meka ɔ.”

³⁹ Balaam ne Balake bɛhɔle, na beedwuli Kiriate Husote.

⁴⁰ Balake fale nandwie mɔ ne mmoaen bɔle afɔleɛ, na ɔfale naen ne mane Balaam ne mbanyi bɔ né bɛboka ye so ne.

Balaam ngɔmhyɛlɛ bɔ oli moa

⁴¹ Aleɛ hyene ne, Balake fale Balaam ɔne ye bɛfo bɛhɔle Bamote Baal. Bɛwɔ berɛ ne, né Balaam nye tua Yisraelfoɛ nemɔ anu bie.