Numeri 21 - AHYERƐLƐ KRONGRON

Kɔɔbere woo ne

¹ Arade hene, bɔ ɔte Kanaanniɛ, bɔ né ɔte ngwaen dɔ aseɛ ne aso ne, ɔtele kyɛ Yisrael nate Atarim atee so ɔba. Ɔne Yisraelfoɛ bɛɛhone, na ɔhyele bɛ nu biemɔ nnure.

² Yeɛ Yisrael hyɛle AWURADE bɔ kyɛ, “Sɛ ɛkɔfa mmenia hemɔ kowura yɛ sa amba a, ye de yɛkɔsɛkye bɛ nguro mɔ bɔkɔɔ.”

³ AWURADE tiele Yisrael abisadeɛ ne, na ɔfale Kanaanfoɛ ne wurale bɛ sa. Behuhuni bɛ bɛsɛkyele bɛ nguro nemɔ pasaa; yiti bɛfrɛle berɛ Hɔma.

⁴ Yisraelfoɛ fili Hɔre bokaa ne anwo ne, bɛtoale so bɛfale Ɛpo Kɔkorɛ atee ne aso kyɛ bɛkondo bɛfa Edom aseɛ ne asi; nakoso mmenia ne annya aboterɛ wɔ atunu.

⁵ Yisraelfoɛ dwudwole tiale Nyameɛ ne Mose kyɛ, “Nzu ati yeɛ ɛmɔaye yɛ bafi Misraim aseɛ so kyɛ yɛɛwuwu wɔ ɛserɛ ye aso ye? Ofikyɛ aleɛ ne nzue nne wa, na sɔ aleɛ tɛɛtɛɛ he abɔ yɛ.”

⁶ Yiti AWURADE somane ewoo mɔ bɔ bɛ noa te borɔ maa bɛwale mmenia ne anu, na bɛkekale Yisraelfoɛ maa bɛ nu pee wuwuli.

⁷ Yeɛ mmenia ne wale Mose berɛ beesele kyɛ, “Yayɔ bɔne kyɛ yadwudwo yatia AWURADE, ɔne wɔ ɔ; serɛ AWURADE maa ɔye ewoo nemɔ ofi yɛ wa hɔ.” Yiti Mose pale kyerɛ mane maen ne.

⁸ Na AWURADE sele Mose kyɛ, “Yɔ ewoo bɔ ye noa te borɔ ɔ ye sɛso, na fa sinze mbuna so. Ebiala bɔ ewoo ne bie aha ye ne, sɛ ɔnea mbuna ne aso ewoo ne a, okonya ngoa.”

⁹ Yiti Mose fale kɔɔbere yɔle ewoo ne. Ɔfa sinzele mbuna so; na sɛ ewoo ka ebie ná sɔ sona ne nea kɔɔbere ewoo ne a, onya ngoa.

Yisraelfoɛ toa so bɛkɔ Moabo

¹⁰ Yisraelfoɛ tuli bɛ bo, na bɛɛkyekyele asikyeleɛ wɔ Obote.

¹¹ Befili Obote, na bɛɛkyekyele asikyeleɛ wɔ Yiye Abarim bɔ ɔwɔ Moabo ndendeneɛ so ɛserɛ so ne, wɔ eyia afiteleɛ.

¹² Befili berɛ ne, besili nu bɛɛkyekyele asikyeleɛ wɔ Serede bɔnza ne anu.

¹³ Befili berɛ ne, besili nu, na bɛɛkyekyele asikyeleɛ wɔ asue Anɔn ye bue dɔ, wɔ ɛserɛ bɔ ɔtrɛ fi Amorifoɛ ɛwɛen so ne aso; ofikyɛ asue Anɔn yeɛ ɔte Moabo ne Amorifoɛ b’ɛwɛen ɔ.

¹⁴ Yiti yeɛ baha ye wɔ AWURADE Koɛ Nwo Nwomaa ne anu kyɛ, “Wahebo bɔ ɔwɔ Sufa ɔne bɔnza nemɔ anu. Asue Anɔn

¹⁵ ɔne bɔnza nemɔ ndoroleɛ, bɔ ɔtrɛ kɔ Are aseɛ bɔ mmenia wɔ so, bɔ ɔla Moabo ɛwɛen so ne.”

¹⁶ Befili berɛ ne, bɛtoale so bɛhɔle Beɛ, abura bɔ ye nwo berɛ yeɛ AWURADE sele Mose kyɛ, “Boaboa mmenia ne noa, na ngɔma bɛ nzue” ne.

¹⁷ Afei Yisrael tole edwein he: “Abura, pu nzue bra! Ɛ́mɔbɔ bele ye so!

¹⁸ Abura bɔ mbanyi mɔ tuli ne, bɔ mmenia nemɔ anu atitire tuli ne, ɛhɔtɔ ne pɔmaa yeɛ bɛfa betuli ɔ.” Befili ɛserɛ ne aso bɛhɔle Matana,

¹⁹ befili Matana bɛhɔle Nahaliɛl, befili Nahaliɛl bɛhɔle Bamote,

²⁰ na befili Bamote bɛhɔle bɔnza bɔ ɔla Moabo mbɔtam, bɔ ɔwɔ Pisiga ti afia bɔ ye nye nea ɛserɛ pralaa ne aso ne.

Yisraelfoɛ di Sihon so ngonim

²¹ Afei Yisrael tuli ɛbɔfoɛ maa bɛhɔle Amorifoɛ hene Sihon berɛ beesele ye kyɛ,

²² “Maa mva w’aseɛ ye aso mbɛ nu ngɔ. Yɛngɔmakye ngɔhɔ fieso anaa bobe boo nu; yɛngɔno abura biala nu nzue. Yɛkɔfa Ɛhene Atimbire ne aso kɔpem kyɛ yɛkɔpɛ nu wɔ w’aseɛ ne aso ɔ.”

²³ Nakoso Sihon amma Yisrael ate maa wamva ye aseɛ ne aso. Sihon boaboale ye mmenia amukoraa noa, na ɔfale koɛ toale Yisrael wɔ ɛserɛ ne aso. Ɔwale Yahase, na ɔne Yisrael bɛhone.

²⁴ Yisrael le ngrandɛ huni ye, na bɛfale ye aseɛ ne fite asue Anɔn kɔpem Yabɔko, toonn kɔpem Amorifoɛ nemɔ dɔ; ofikyɛ né Amorifoɛ nemɔ abɔ b’ɛwɛen ne anwo waen pambee.

²⁵ Yisrael fale nguro sɔ ne amukoraati, na Yisraelfoɛ tenatenane Amorifoɛ nguro nemɔ amukoraa so, wɔ Hesebon ne ye nguraa amukoraa nu.

²⁶ Ofikyɛ Hesebon te Amorifoɛ hene Sihon ye ahenguro. Né ɔne Moabo hene daa baho maa wale ye aseɛ amukoraa toonn waadwu asue Anɔn.

²⁷ Yiti edweintolɛfoɛ nemɔ ka kyɛ, “Ɛmɔbra Hesebon. Maa besa bɛkyekye kuro ne, maa bɛpagya Sihon kuro ne besie berɛ.

²⁸ Ofikyɛ see fili Hesebon wale, see bɔ ogye wuronyiwuronyi fili Sihon kuro ne anu. Ɔɔyerale Are bɔ ɔwɔ Moabo, ɔne asue Anɔn nwo atitirefoɛ.

²⁹ Moabo, wɔ yaakɔ! Mmenia bɔ bɛso bosoen Kemose, ɛmɔ boso anua! Wama ye mma mmienzua ayɛ akobɔfoɛ, yeɛ wayakyi ye mma mmrasua mɔ wama Amori hene Sihon wahye bɛ nnure.

³⁰ Yiti bɛ boso anua, ofi Hesebon bɔ ɔkwaadwu Dibɔn, na yɛhuhuni bɛ maa oodwuli kyɛ see trɛ hɔle Medeba ɔ.”

³¹ Yiti Yisrael tenane Amorifoɛ aseɛ ne aso.

³² Na Mose somane maa bɛɛtetɛle Yasere. Belili Yasere nwo nguraa nemɔ aso ngonim, na bɛfoane Amorifoɛ bɔ né bɛtete aseɛ ne aso ne befili berɛ.

Yisraelfoɛ di Ogo so ngonim

³³ Ye si ye, Yisraelfoɛ kakyili bɛ nye bɛfo bɛhɔle Basan atee so. Basan hene Ogo ne ye mmenia amukoraa bɛfale koɛ beeyiale Yisraelfoɛ wɔ Yedrei.

³⁴ Nakoso AWURADE sele Mose kyɛ, “Nnɛsuro ye, ofikyɛ mafa ye mawura wɔ sa, ɔne ye mmenia amukoraa ne ye aseɛ amukoraa. Na kyɛbɔ ɛyɔle Amori hene Sihon bɔ né odi bia wɔ Hesebon ne, sɔ ala yeɛ ɛkɔfa kɔyɔ ye ɔ.”

³⁵ Yiti Yisraelfoɛ huni Ogo ne ye mma mmienzua mɔ, ɔne ye mmenia ne amukoraa, bɔ yeɛ sona komapɛ po wanga ɔ. Na bɛfale ye aseɛ ne bɛyɛle bɛ deɛ.