Numeri 20 - AHYERƐLƐ KRONGRON

Meriba nzue ne

¹ Bosome bɔ oli moa ne anu, Yisrael maen ne amukoraa beedwuli Sen ɛserɛ ne aso, na mmenia ne tenane Kadese. Berɛ yeɛ Miriam wuli ɔ, na berɛ yeɛ besiele ye ɔ.

² Né mmenia ne nnya nzue wɔ berɛ, yiti bɛyɛle Mose ne Aarɔn nwo lɔen.

³ Mmenia ne ne Mose nyane edwudwolɛ, na bɛhane kyɛ, “Y’eliɛma nemɔ wuwuli wɔ AWURADE nyunu ne, yɛ koso yɛwuwuli bie po a ahaa né so apɛ!”

⁴ Nzu ati yeɛ ɛmɔafa AWURADE mmenia bawa ɛserɛ ye aso maa yɛ ne yɛ nyɛmmoa mɔ yɛbaawuwu wɔ wa ye?

⁵ Nzu ati yeɛ ɛmɔafa yɛ bafi Misraim bawa aseɛ tɛɛtɛɛ ye aso ye? Aseɛ ye ngɔhye aburoo anaa borɔdoma anaa bobe anaa akengaa, na nzue bɔ yɛkɔno ɔ po nne wa.”

⁶ Yeɛ Mose ne Aarɔn fili mmenia ne anu bɛhɔle ɛtena sua atenaleɛ anoa nu berɛ. Bɛfale bɛ nyunu bebutubutuli ase, na AWURADE animnyam yele ye nwo ali hyirele bɛ.

⁷ AWURADE sele Mose kyɛ,

⁸ Fa pɔmaa ne, ná ɛne eliɛma Aarɔn bɛboaboa mmenia ne anoa. Bɛ nyunu berɛ ala, ɛ́mɔdwudwo béhyire nyɔbotaen ne maa opu ye nzue bra. Ɛhe kɔmaa ekonya nzue kofi nyɔbotaen ne anu kɔma bɛ; ɔnate so ɛkɔmaa mmenia nemɔ ne bɛ nyɛmmoa konya nzue bɛkɔno.

⁹ Yiti Mose fale pɔmaa ne fili AWURADE nyunu berɛ, kyɛbɔ ɔhyɛle ye ne.

¹⁰ Mose ne Aarɔn boaboale mmenia ne anoa wɔ nyɔbotaen ne anyunu, na osele bɛ kyɛ, “Ɛ́mɔtie, ɛmɔ, ɛlɔenyɛlɛfoɛ! Aso nyɔbotaen he anu yeɛ odi kyɛ yɛnya nzue yɛma ɛmɔ ɔ?”

¹¹ Yeɛ Mose pagyale ye sa, na ɔfale ye pɔmaa ne fini nyɔbotaen ne aso pɛen nyɔ. Nzue pu fili nu wale pee, na mmenia nemɔ ne bɛ nyɛmmoa mɔ none bie.

¹² Nakoso AWURADE sele Mose ne Aarɔn kyɛ, “Ɔnate kyɛ ɛmɔanne me banni, ná ɛmɔamma wanna ali wɔ Yisraelfoɛ nyunu kyɛ nde krongron ne ati, ɛmɔngɔfa mmenia hemɔ bengodwu aseɛ bɔ mafa mama bɛ ne aso.”

¹³ Ɛhe ole Meriba asue, nekaa bɔ Yisraelfoɛ ne AWURADE nyane dwudwolɛ, berɛ yeɛ AWURADE yele ye krongronyɛlɛ ali ɔ.

Edomfoɛ amma Yisraelfoɛ ate

¹⁴ Mose tuli ɛbɔfoɛ fili Kadese maa bɛhɔle Edom hene berɛ beesele ye kyɛ, “Eliɛma Yisrael nwa: Ɛse edwirɛ tɛɛ mɔ bɔ watoto yɛ ne amukoraa.

¹⁵ Ɛse kyɛbɔ yɛ nana mɔ hɔle Misraim, ɔne kyɛbɔ yɛtenane Misraim yɛhyɛle, ná Misraimfoɛ hyɛle yɛ ne yɛ nana mɔ so ɔ.

¹⁶ Yɛsu yɛfrɛle AWURADE. Otiele yɛ suɛ, na ɔsomane abɔfo maa ɔɔyele yɛ fili Misraim. Kekesaala ye yɛwɔ Kadese, kuro bɔ ɔwɔ w’aseɛ ne noa ne aso.

¹⁷ Maa yɛfa w’aseɛ ye aso yɛpɛ nu yɛhɔ. Yɛngɔfa fieso anaa bobe boo nu, yeɛ yɛngɔno abura biala nu nzue. Yɛkɔfa atee bɔ bɛfrɛ ye Ɛhene Atimbire ne aso, na yɛngɔmakye yɛngɔhɔ bɛen anaa famaa kɔpem kyɛ yɛkɔpɛ nu wɔ w’aseɛ ne aso ɔ.”

¹⁸ Nakoso Edom buale ye kyɛ, “Nnɛma ɛmɔfa yɛ aseɛ ye aso. Sɛ ɛmɔfa so a, yɛkɔhwe ngrandɛ yɛkɔwa ɛmɔ so.”

¹⁹ Yisraelfoɛ sele ye kyɛ, “Yɛkɔfa atimbire ne aso ala; na sɛ yɛ ne yɛ nyɛmmoa mɔ, yɛno ɛmɔ nzue po a, ye de yɛkotua ye kerɛ. Ɛhe de ɔnyɛ se; maa yɛbɔ ase yɛpɛ nu yɛhɔ.”

²⁰ Nakoso Edom hene sele kyɛ, “Nnɛma ɛmɔfa yɛ aseɛ ye aso.” Yeɛ Edom fale mmenia pee ne ɛlɔen bɔ bɛ nwo ye se wale Yisraelfoɛ so.

²¹ Edom amma Yisrael ate maa wamva ye aseɛ ne aso, yiti Yisrael kakyili ye nwo hɔle.

Aarɔn wue

²² Yisraelfoɛ tuli bɛ bo befili Kadese, na maen ne amukoraa beedwuli Hore bokaa ne anwo.

²³ Na AWURADE sele Mose ne Aarɔn wɔ Hore bokaa ne anwo, bɔ ɔwɔ Edomfoɛ aseɛ ne wɛen so kyɛ,

²⁴ “Aarɔn kowu kɔɔtoa ye mbanyi mɔ. Ye gya baa ngotia aseɛ bɔ mafa mama Yisraelfoɛ ne aso, ofikyɛ ɛmɔyɛle m’ahyɛdeɛ nwo asoserɛ wɔ Meriba asue nwo.

²⁵ Fa Aarɔn ne ɔwa Eleasa, ná ɛne bɛ fo bra Hore bokaa ne aso.

²⁶ Puro Aarɔn ndaadeɛ ne, ná fa wura ɔwa Eleasa. Nakoso Aarɔn de, okowu kɔɔtoa ye mbanyi mɔ: berɛ yeɛ okowu ɔ.”

²⁷ Mose yɔle kyɛbɔ AWURADE hyɛle ye ne ala. Bɛfole bɛhɔle Hore bokaa ne aso bɔ Yisraelfoɛ amukoraa bɛ nye tua bɛ ɔ.

²⁸ Mose puropurole Aarɔn ndaadeɛ nemɔ, ɔfa wurale ɔwa Eleasa, na Aarɔn wuli wɔ bokaa ne ati afia. Mose ne Eleasa fi bokaa ne aso dwu wale ase.

²⁹ Na maen ne amukoraa nwuni kyɛ Aarɔn awu ne, Yisrael awuro ama mukoraa suni ye eleburasa.