Numeri 2 - AHYERƐLƐ KRONGRON

Mmusua kure nemɔ atenaleɛ

¹ AWURADE sele Mose ne Aarɔn kyɛ,

² “Odi kyɛ Yisraelniɛ biala ɔkyekye ye asikyeleɛ wɔ ye koɛhonɛfoɛ kure nu. Ɔsɛ kyɛ bɛboa bɛ noa wɔ bɛ nana mɔ sasofoɛ frangaa nwo; odi kyɛ bɛma b’asikyeleɛ nemɔ pɛ ɛtena sua atenaleɛ ne anwo bra yia, ná ebiala ma ye deɛ nye kyire ɛtena sua ne.

³ Yuda bɛ koɛhonɛfoɛ kure ne yeɛ odi kyɛ bɛkyekye asikyeleɛ kure kure wɔ eyia afiteleɛ ɔ. Aminadabo awa Nason yeɛ odi kyɛ otua Yuda boso ama nemɔ bɛ noa ɔ.

⁴ Na ye lɔen bɔ baha bɛ ne, bɛ somaa te apee aburasoo ne nna ɔne ɛyaa nzia.

⁵ Yisaka abusua kure ne yeɛ odi kyɛ bɛkyekye b’asikyeleɛ deɛ bɛtoa Yuda so ɔ. Suare awa Netanɛl yeɛ odi kyɛ otua Yisaka boso ama nemɔ bɛ noa ɔ,

⁶ na ye lɔen bɔ baha bɛ ne, bɛ somaa te apee aburannu ne nna ɔne ɛyaa nna.

⁷ Afei Sebulɔn abusua kure ne yeɛ bɛtoa so ɔ: Helon awa Eliabo yeɛ odi kyɛ otua Sebulɔn boso ama nemɔ bɛ noa ɔ,

⁸ na ye lɔen bɔ baha bɛ ne, bɛ somaa te apee aburannu ne nzoo ɔne ɛyaa nna.

⁹ Yuda asikyeleɛ nu mmenia bɔ bɛhale bɛ kure kure ne, bɛ mukoraa bɛ somaa te apee ɛyaa ko aburawɔtwɛ ne nzia ɔne ɛyaa nna. Bɛ yeɛ odi kyɛ bedi moa betu bɛ bo befi asikyeleɛ ne anu ɔ.

¹⁰ “Ruben yeɛ odi kyɛ ɔkyekye ye asikyeleɛ deɛ kure kure wɔ ngwaen dɔ ɔ. Sedɛre awa Elisure yeɛ odi kyɛ otua Ruben boso ama nemɔ bɛ noa ɔ,

¹¹ na ye lɔen bɔ baha bɛ ne, bɛ somaa te apee aburanna ne nzia ɔne ɛyaa nnu.

¹² Na Simeon abusua kure ne yeɛ odi kyɛ bɛkyekye b’asikyeleɛ deɛ bɛtoa Ruben so ɔ. Surisadai awa Selumiɛl yeɛ odi kyɛ otua Simeon boso ama nemɔ bɛ noa ɔ,

¹³ na ye lɔen bɔ baha bɛ ne, bɛ somaa te apee aburannu ne ngona ɔne ɛyaa nza.

¹⁴ Na afei Gade abusua kure ne yeɛ ɔtoa so ɔ. Rewel awa Eliasafe yeɛ odi kyɛ otua Gade boso ama nemɔ bɛ noa ɔ,

¹⁵ na ye lɔen bɔ baha bɛ ne, bɛ somaa te apee aburanna ne nnu ɔne ɛyaa nzia ne aburannu.

¹⁶ Ruben asikyeleɛ nu mmenia bɔ bɛhale bɛ kure kure ne, bɛ mukoraa bɛ somaa te apee ɛyaa ko aburannu ne ko ɔne ɛyaa nna ne aburannu. Sɛ betu bɛ bo befi asikyeleɛ ne anu a, bɛ yeɛ odi kyɛ bɛtɔ so nyɔ ɔ.

¹⁷ “Odi kyɛ ɛtena sua atenaleɛ ne, ɔne Lewifoɛ asikyeleɛ nemɔ, bɛba asikyeleɛ ngaa nemɔ afia. Kyɛbɔ besi bɛhyehyɛle asikyeleɛ nemɔ ne, odi kyɛ abusua kure biala di ye nekaa.

¹⁸ “Efraim yeɛ odi kyɛ ɔkyekye ye asikyeleɛ deɛ kure kure wɔ eyia atɔleɛ ɔ. Amihude awa Elisama yeɛ odi kyɛ otua Efraim boso ama nemɔ bɛ noa ɔ,

¹⁹ na ye lɔen bɔ baha bɛ ne, bɛ somaa te apee aburanna ɔne ɛyaa nnu.

²⁰ Manase abusua kure ne yeɛ odi kyɛ ɔtoa Efraim so ɔ. Pedasure awa Gamaliɛl yeɛ odi kyɛ otua Manase boso ama nemɔ bɛ noa ɔ,

²¹ na ye lɔen bɔ baha bɛ ne, bɛ somaa te apee aburasa ne nyɔ ɔne ɛyaa nyɔ.

²² Afei Benyamin abusua kure ne yeɛ ɔtoa so ɔ. Gideoni awa Abidan yeɛ odi kyɛ otua Benyamin boso ama nemɔ bɛ noa ɔ,

²³ na ye lɔen bɔ baha bɛ ne, bɛ somaa te apee aburasa ne nnu ɔne ɛyaa nna.

²⁴ Efraim asikyeleɛ nu mmenia bɔ bɛhale bɛ kure kure ne, bɛ mukoraa bɛ somaa te apee ɛyaa ko ne mmɔtwɛ ɔne ɛyaa ko. Sɛ betu bɛ bo befi asikyeleɛ ne anu a, bɛ yeɛ odi kyɛ bɛtɔ so nza ɔ.

²⁵ “Dan yeɛ odi kyɛ ɔkyekye ye asikyeleɛ deɛ kure kure wɔ sorɔ dɔ ɔ. Amisadae awa Ahiesa yeɛ odi kyɛ otua Dan boso ama nemɔ bɛ noa ɔ,

²⁶ na ye lɔen bɔ bɛhale bɛ ne, bɛ somaa te apee aburasia ne nyɔ ɔne ɛyaa nzoo.

²⁷ Asɛ abusua kure ne yeɛ odi kyɛ bɛkyekye b’asikyeleɛ deɛ bɛtoa Dan so ɔ; Okran awa Pagyiɛl yeɛ odi kyɛ otua Asɛ boso ama nemɔ bɛ noa ɔ,

²⁸ na ye lɔen bɔ baha bɛ ne, bɛ somaa te apee aburanna ne ko ɔne ɛyaa nnu.

²⁹ Afei Nafetali abusua kure ne yeɛ ɔtoa so ɔ; Enan awa Ahira yeɛ odi kyɛ otua Nafetali boso ama nemɔ bɛ noa ɔ,

³⁰ na ye lɔen bɔ baha bɛ ne, bɛ somaa te apee aburannu ne nza ɔne ɛyaa nna.

³¹ Dan asikyeleɛ nu mmenia bɔ bɛhale bɛ ne, bɛ mukoraa bɛ somaa te apee ɛyaa ko aburannu ne nzoo ɔne ɛyaa nzia. Sɛ betu bɛ bo befi asikyeleɛ ne anu a, bɛ yeɛ bekotu bɛ bo kure kure bekoli nziɛ ɔ.”

³² Yisraelfoɛ bɔ bɛhale bɛ ne, bɛ somaa ɛne, kyɛbɔ bɛ nana mɔ bɛ sasofoɛ te ɔ. Asikyeleɛ ahoroɔ nemɔ anu mmenia bɔ bɛhale bɛ kure kure ne amukoraa, bɛ somaa te apee ɛyaa nzia ne nza ɔne ɛyaa nnu ne aburannu.

³³ Nakoso kyɛbɔ AWURADE hyɛle Mose nen, Lewifoɛ mɔ de, banga bɛ bammoka Yisraelfoɛ ngaa nemɔ aso.

³⁴ Na Yisraelfoɛ yɔle kyɛbɔ AWURADE hyɛle Mose ne ala. Bɛkyekyele asikyeleɛ kure kure; na sɔ ala koso yeɛ besili nu ɔ. Ebiala li ye abusua nu, kyɛbɔ bɛ nana mɔ sasofoɛ te ɔ.