Numeri 19 - AHYERƐLƐ KRONGRON

Nandwie mmeleɛ kɔkorɛ nzoen ne

¹ AWURADE sele Mose ne Aarɔn kyɛ,

² “Mmeraa bɔ AWURADE ahyɛ ne, ye nwo ahyɛdeɛ ɛhe: Ka kyire Yisraelfoɛ kyɛ bɛ́fa nandwie beleɛ kɔkorɛ bɔ ollili nnɛen, bɔ ngekalewa biala ɔnne ye nwo, bɔ bɛffale kɔnnua biala bɛttole ye kɔme le ɔ bɛ́brɛ wɔ.

³ Ɛ́mɔfa nandwie beleɛ ne bɛ́ma ɔsɔfo Eleasa. Odi kyɛ bɛfa nandwie ne bɛkɔ asikyeleɛ ne asi ná beku ye wɔ Eleasa nyunu.

⁴ Odi kyɛ ɔsɔfo Eleasa fa ye sa mmɛseka bɔ nandwie mogya ne anu, ná ɔpete ye pɛen nzoo ogua ɛtena sua atenaleɛ ne anyunu dɔ.

⁵ Odi kyɛ bɛyera nandwie beleɛ ne wɔ Eleasa nyunu berɛ. Bɛ́yera ye nwomaa, ye naen, ye mogya, ɔne ye fure ne.

⁶ Odi kyɛ ɔsɔfo ne fa bakaa bɔ bɛfrɛ ye sida, sufiɛ ne adaabene, ná ógyi bɛ gua see bɔ bɛyera nandwie beleɛ ne wɔ nu ne anu.

⁷ Na odi kyɛ ɔsɔfo ne ɔpo ye ndaadeɛ, ná ɔfa nzue obia, ná ye si ye wawa asikyeleɛ ne anu; nakoso ɔsɔfo ne nwo kogua fiɛ maa okoodwu nɔsoa.

⁸ Sona bɔ ɔyera nandwie beleɛ ne, odi kyɛ ɔfa nzue ɔpo ye ndaadeɛ ná ɔfa nzue obia; ɔkɔyɛ sona bɔ ye nwo nde ɔ maa okoodwu nɔsoa.

⁹ Na odi kyɛ sona bie bɔ ye nwo te ɔ sesa nandwie beleɛ nzoen ne, ná ɔ́fa kogua asikyeleɛ ne asi nekaa bɔ berɛ te sannwuu ɔ. Odi kyɛ bɛfa besie bɛma Yisrael maen ne, ná bafa bafra nzue bɔ bɛfa bɛte bɛ nwo ne. Bɛfa bɛte bɛ nwo befi bɔne nwo.

¹⁰ Sona bɔ ɔkɔsesa nandwie beleɛ nzoen ne, odi kyɛ ɔpo ye nningyein, na ye nwo kogua fiɛ maa okoodwu nɔsoa. Ɛhe kɔyɛ ahyɛdeɛ afebɔɔ kɔla berɛ kɔma Yisraelfoɛ ne ɛwɔfoɛ bɔ waatena bɛ nu ɔ.

¹¹ Ebiala bɔ ye nwo kɔha sona fuin ne, ye nwo kogua fiɛ ɛlɛsoo.

¹² Ye ɛlɛsa ne aso, ɔne ɛlɛsoo ne aso, odi kyɛ ɔfa sɔ nzue ne bie pete ye nwo ma ye nwo te. Nakoso sɛ wambete ye nwo ɛlɛsa ne aso ɔne ɛlɛsoo ne aso a, ye nwo ngɔte.

¹³ Ebiala bɔ ye nwo kɔha sona fuin, ná wambete ye nwo ne, ɔfa fiɛ ka AWURADE nyianu sua ne. Sɔ sona ne, odi kyɛ bɛpɛ ye asue befi Yisrael. Ɔnate kyɛ bamva nzue bɔ bɛfa bɛpete bɛ nwo ne bie bambete ye nwo ne ati, ye nwo nde, na ye nwo bɔ wagua fiɛ ne tɛ wɔ berɛ.

¹⁴ Sɛ sona wu wɔ ɛtena sua nu a, ye wo mmeraa ɛhe: ebiala bɔ ɔkɔhɔ sɔ ɛtena sua ne anu, ɔne ebiala bɔ ɔwɔ sɔ ɛtena sua ne anu ne, ye nwo kogua fiɛ ɛlɛsoo.

¹⁵ Na kukue biala bɔ bamva tire bangata so ne, ye nwo nde.

¹⁶ Sona biala bɔ ɔkɔhɔ buro ná ye nwo kɔha sona bɔ watɔ ngrandɛ noa, anaa sona bɔ wawu ye ɛdangama wue ye fuin, anaa ye nwo kɔha kuro sona bowue, anaa asieleɛ ne, ye nwo kogua fiɛ ɛlɛsoo.

¹⁷ Na ɔnate kyɛ sɔ sona ne ye nwo agua fiɛ ne ati, odi kyɛ bɛfa bɔne nwo afɔleɛ bɔ bayera ye ne ye nzoen ne bie, ná bɛfa asue nu nzue begua so wɔ kukue nu.

¹⁸ Odi kyɛ sona bɔ ye nwo te ɔ fa sufiɛ bɔ nzue ne anu, ná ɔ́fa pete ɛtena sua ne anwo, ɔne nu nningyein amukoraa so, ɔne mmenia bɔ né bɛwɔ berɛ ne aso, ɔne ebiala bɔ ye nwo hane bowue ne anaa sona bɔ bahu ye ne, anaa fuin ne, anaa asieleɛ ne.

¹⁹ Ye ɛlɛsa ne aso, ɔne ɛlɛsoo ne aso, odi kyɛ sona bɔ ye nwo te ne fa nzue ne bie pete bɛ bɔ bɛ nwo agua fiɛ nemɔ aso, ná ɔnate so ɔte bɛ nwo ɛlɛsoo ne aso. Afei odi kyɛ bɛpo bɛ ndaadeɛ ná bɛfa nzue bebia, na ye nɔsoa ne bɛ nwo kɔte.

²⁰ Sona biala bɔ ye nwo agua fiɛ, nakoso bande ye nwo ne, sɔ sona ne odi kyɛ bɛpɛ ye asue befi mmenia ne anu, ofikyɛ wagua AWURADE nekaa krongron ne anwo fiɛ. Ɔnate kyɛ banhwie nzue krongron ne bangua ye nwo ne ati, ye nwo nde.

²¹ Ɛhe kɔyɛ daa ahyɛdeɛ kɔma bɛ. Sona bɔ ɔpete nzue fa te bɛ nwo ne, odi kyɛ ɔpo ye nwo nningyein, na sona biala bɔ ye nwo kɔha nzue bɔ bɛfa bɛpete bɛ nwo ne, ye nwo kogua fiɛ maa okoodwu nɔsoa.

²² Sona bɔ ye nwo nde ne, nikyee biala bɔ ye nwo kɔha ye ne, sɔ nikyee ne nwo kogua fiɛ, na ebiala bɔ ye nwo kɔha sɔ nikyee ne, ye nwo kogua fiɛ maa okoodwu nɔsoa.”