Numeri 15 - AHYERƐLƐ KRONGRON

Afɔleɛ ahoroɔ nwo mmeraa

¹ Na AWURADE sele Mose kyɛ,

² “Ka kyire Yisraelfoɛ kyɛ, Sɛ ɛmɔbadwu aseɛ bɔ mefa mema ɛmɔ ma ɛmɔtena so ne aso,

³ ná ɛmɔbɔ afɔleɛ wɔ see so bɛma AWURADE a, kyɛ kaka ne ofi nandwie kure nu oo, anaa mmoaen kure nu oo, kyɛ ɔte naen yeralɛ afɔleɛ oo anaa afɔleɛ biala oo; sɛ ɔte afɔleɛ bɔ ɛmɔfa betua aboadeɛ, anaakyɛ ɔte akyɛdeɛ afɔleɛ, anaa sɛ ɛmɔdi ɛmɔ aluolue bɔ mahyehyɛ mama ɛmɔ ne a, bɔ ɔte afɔleɛ bɔ ɔbo AWURADE fona a,

⁴ ye de ebiala bɔ ɔbɔ sɔ afɔleɛ ne ma AWURADE ne, odi kyɛ ɔbɔ aburoo afɔleɛ koso boka so. Ɔ́fa aburoo esam paa olonka ko bɔ bafa ngoo towaa ko ne bue bafra ye ɔ.

⁵ Afei koso, boaen akrɔngrɔma ko biala, fa bobe nzaa towaa ko ne bue yɛ anonneɛ afɔleɛ boka naen yeralɛ afɔleɛ anaa afɔleɛ ne aso.

⁶ Boaen nyii de, fa aburoo afɔleɛ esam paa olonka nyɔ bɔ bafa ngoo towaa ko ne bue bafra ye ɔ boka so,

⁷ ná fa bobe nzaa towaa nyɔ bɔ anonneɛ afɔleɛ bɔ ɔbo AWURADE fona ɔ.

⁸ Sɛ ɛfa nandwie nyii bɔ naen yeralɛ afɔleɛ anaa afɔleɛ biala a, kyɛ ɛfa tua aboadeɛ oo, anaakyɛ ɛfa bɔ asomdwee afɔleɛ ma AWURADE oo,

⁹ ye de fa ɛhemɔ boka nandwie nyii ne aso: aburoo afɔleɛ bɔ ɔte esam paa olonka nza bɔ bafa ngoo towaa nza ne bue bafra ɔ,

¹⁰ na fa bobe nzaa towaa nza ne bue bɔ anonneɛ afɔleɛ wɔ see so, bɔ ɔbo AWURADE fona ɔ.

¹¹ Nandwie biala, anaa boaen nyii biala, anaa boaen akrɔngrɔma nyii biala anaa abɔngye nyii biala bɔ ɛfa bɔ afɔleɛ ne, sɔ ala yeɛ yɔ ɔ.

¹² Kyɛbɔ ngaka bɔ ɛfa bɔ afɔleɛ ne bɛ somaa te ne, odi kyɛ ɛfa sɔ nningyein nemɔ boka bɛ nu biala so.

¹³ Yisrael maen baa biala, sɛ ɔbɔ afɔleɛ wɔ see so, bɔ ɔbo AWURADE fona a, sɔ ala yeɛ odi kyɛ ɔyɔ ye ɔ.

¹⁴ Sɛ ɛwɔfoɛ bie waasikye ɛmɔ, anaakyɛ waatena ɛmɔ nu ná okuro kyɛ ɔbɔ afɔleɛ wɔ see so, bɔ ɔbo AWURADE fona a, odi kyɛ ɔyɔ kyɛbɔ ɛmɔyɔ ne ala.

¹⁵ Yisraelfoɛ de, ahyɛdeɛ komapɛ yeɛ ɔla berɛ ma ɛmɔ ne ɛwɔfoɛ bɔ baatena ɛmɔ nu ne ɔ; odi kyɛ ɔyɛ ahyɛdeɛ afebɔɔ wɔ ɛmɔ aworɛ ndoatoasoɛ nu. Odi kyɛ ɛmɔ ne ɛwɔfoɛ ne bɛyɛ pɛ wɔ AWURADE nyunu.

¹⁶ Mmeraa komapɛ ne ala ne nhyehyɛleɛ komapɛ ne ala yeɛ ɛmɔ ne ɛwɔfoɛ bɔ waatena ɛmɔ nu ne odi kyɛ ɛmɔdi so ɔ.”

¹⁷ AWURADE sele Mose kyɛ,

¹⁸ “Ka kyire Yisraelfoɛ kyɛ, Sɛ ɛmɔkodwu aseɛ bɔ mefa ɛmɔ mekɔ so ne aso a,

¹⁹ mmerɛ biala bɔ ɛmɔkoli aseɛ ne aso aleɛ ne, ɛ́mɔfa akyɛdeɛ bɛ́brɛ AWURADE.

²⁰ Mɔle bɔ ofi aburoo bɔ ɛmɔkoli moa bekobu nu ne, ɛ́mɔfa bie bɛyɔ taterɛ bɛyɛ akyɛdeɛ bɛbrɛ AWURADE. Ɛ́mɔfa bɛbrɛ ye kyɛbɔ ɛmɔfa akyɛdeɛ bɔ ofi nekaa bɔ bɛboro aburoo bɛbrɛ ye ne.

²¹ Wɔ ɛmɔ aworɛ ndoatoasoɛ amukoraa nu, aburoo bɔ ɛmɔkoli moa bekobu ne, ɛ́mɔfa bie bɛ́yɔ mɔle bɛ́fa bɛ́yɛ akyɛdeɛ bɛ́brɛ AWURADE.

Bɔne bɔ bɛmmoa pa nwo afɔleɛ

²² Nakoso sɛ ɛmɔanhyɛ da, ná sɛ ɛmɔanni mmeraa dwirɛ hemɔ amukoraa bɔ AWURADE aha ahyire Mose ne aso a,

²³ nikyee biala bɔ AWURADE nate Mose so wahyɛ, ofi kyẽa bɔ AWURADE mane ɛmɔ ahyɛdeɛ ne bɔ ɔkɔ ɔ, wɔ ɛmɔ aworɛ ndoatoasoɛ amukoraati nu,

²⁴ ná sɛ ɛmɔanhyɛ da yeɛ ɛmɔbuli so bɔ maen ne nze ye nwo hwee a, ye de odi kyɛ maen ne amukoraati bɛfa nandwie nyii akrɔngrɔma ko bɛbɔ naen yeralɛ afɔleɛ, bɔ ɔbo AWURADE fona ɔ. Odi kyɛ bɛfa ye nwo aburoo afɔleɛ ɔne ye nwo anonneɛ afɔleɛ bɛboka so, kyɛbɔ nhyehyɛleɛ ne te ne, ná bɛ́fa abɔngye nyii ko bɛ́bɔ bɔne nwo afɔleɛ.

²⁵ Odi kyɛ ɔsɔfo ne pata ma Yisrael maen ne amu, na AWURADE kɔfa bɛ bɔne kɔhyɛ bɛ. Banhyɛ da, yeɛ afei babɔ afɔleɛ wɔ see so bama AWURADE, na babɔ bɛ bɔne nwo afɔleɛ wɔ AWURADE nyunu, ɔnate bɛ mvomsoɛ ti.

²⁶ AWURADE kɔfa Yisrael maen ne amukoraati ɔne ɛwɔfoɛ mɔ bɔ baatena bɛ nu ne, bɛ bɔne kɔhyɛ bɛ, ofikyɛ mmenia ne amu yeɛ bɛyɔle mvomsoɛ ne ɔ.

²⁷ Sona biala bɔ wanhyɛ da ná ɔkɔyɔ bɔne ne, odi kyɛ ɔfa abɔngye beleɛ bɔ wali afoɛ ko ɔ ɔbɔ bɔne nwo afɔleɛ.

²⁸ Sɛ ebie anhyɛ da ná ɔyɔ mvomsoɛ a, ɔsɔfo ne kɔpata kɔma sɔ sona ne wɔ AWURADE nyunu, na AWURADE kɔfa ye mvomsoɛ kɔhyɛ ye.

²⁹ Ɛ́mɔma mmeraa komapɛ ne ala yeɛ ɔla berɛ ma ebiala bɔ ɔkɔyɔ mvomsoɛ ɔ, kyɛ ɔte Yisrael maen baa oo, anaa ɛwɔfoɛ biala bɔ waatena ɛmɔ nu oo.

³⁰ Nakoso ebiala bɔ ye nye la ye nwo ná ɔkɔyɔ bɔne ne, kyɛ ɔte maen baa oo, anaa ɛwɔfoɛ oo, wabu AWURADE animtia, na odi kyɛ bɛpɛ ye asue befi ye mmenia nu.

³¹ Ɔnate kyɛ sɔ sona ne wabu AWURADE noa dwirɛ animtia, ná wabu ye mmeraa dwirɛ so ne ati, odi kyɛ bɛpɛ ye asue korakora, na ye musue kɔbɔ ye ti so.”

Afofikyẽa tonɛ nwo asohwenɛ

³² Mmerɛ bɔ né Yisraelfoɛ wɔ ɛserɛ ne aso ne, afofikyẽa bie, benwuni kyɛ biaa bie obubu eyein ɔ.

³³ Mmenia bɔ benwuni kyɛ obubu eyein ne fale ye wale Mose, Aarɔn ɔne maen ne amukoraati bɛ nyunu.

³⁴ Bɛfale ye bɛtole kuku nu, ofikyɛ né bennya bennwuni bɔ odi kyɛ bɛfa bɛyɔ ye ɔ.

³⁵ Yeɛ AWURADE sele Mose kyɛ, “Odi kyɛ beku biaa ne; ma mmenia ne amukoraa bɛboro ye nyɔboɛ wɔ asikyeleɛ ne asi dɔ.”

³⁶ Mmenia ne amukoraa bɛfale ye bɛwale asikyeleɛ ne asi, na bɛborole ye nyɔboɛ behuni ye, kyɛbɔ AWURADE hyɛle Mose ne ala.

Ndaadeɛ noa nwonɛ

³⁷ AWURADE sele Mose kyɛ,

³⁸ “Ka kyire Yisraelfoɛ kyɛ, wɔ b’aworɛ ndoatoasoɛ amukoraa nu, odi kyɛ bɛnwo nikyee besinzesinze bɛ ndaadeɛ noa, ná bɛ́fa nyamaa bibire bɛ́sosɔ nningyein bɔ bafa basinzesinze ye noa ne anu.

³⁹ Odi kyɛ ɛmɔfa sɔ nningyein ne besinzesinze ye noa, amaa sɛ ɛmɔnwu ye a, ɛmɔakaye AWURADE mmeraa dwirɛ amukoraa ná ɛmɔali so, ná ɛmɔanni ɛmɔ bɔbɔ b’akɔnnɔ ɔne nningyein bɔ ɔyɛ ɛmɔ nyemene si.

⁴⁰ Na ɛhe kɔma ɛmɔkɔkaye me mmeraa dwirɛ amukoraati ná ɛmɔali so, amaa ɛmɔayɛ krongron bama ɛmɔ Nyameɛ.

⁴¹ Me ole AWURADE ɛmɔ Nyameɛ bɔ nyele ɛmɔ mvili Misraim aseɛ so mmale ne, bɔ me yeɛ nde ɛmɔ Nyameɛ ɔ: Me ole AWURADE ɛmɔ Nyameɛ.”