Numeri 14 - AHYERƐLƐ KRONGRON

Yisraelfoɛ dwɔso tia AWURADE

¹ Yisraelfoɛ amukoraati bɛteateane nu serɛserɛ, na besuni sɔ kɔngɔen ne.

² Na Yisraelfoɛ amukoraa bɛpenepenene bɛ komvi beguale Mose ne Aarɔn so. Maen ne amukoraa sele bɛ kyɛ, “Sɛ yɛwuwuli wɔ Misraim aseɛ so po a, ahaa ɔte paa! Sɛ yɛwuwuli wɔ ɛserɛ ye aso po a, ahaa ɔte paa!

³ Nzu ati yeɛ AWURADE ɔfa yɛ ba aseɛ he aso maa yɛbatotɔ wɔ ngrandɛ noa ye? Yɛ ye mɔ ne yɛ mma mɔ kɔyɛ koɛ nu nzesadeɛ. Sɛ yɛsa yɛ si yɛkɔ Misraim a, aso ahaa ɔtte paa mma yɛ?”

⁴ Yiti besisele bɛ nwo kyɛ, “Ɛ́mɔma yɛpena safohene maa oli yɛ nyunu ɔfa yɛ sá hɔ Misraim.”

⁵ Yeɛ Mose ne Aarɔn fale bɛ nyunu bebutubutuli ase wɔ Yisrael maen amukoraa bɔ babɔ dwaa ne nyunu.

⁶ Na Nun awa Yosua ɔne Yefune awa Kalebo, bɔ bɛboka mmenia bɔ bɛɛtetɛle aseɛ ne aso ne, besunzuale bɛ bɔbɔ bɛ ndaadeɛ nu,

⁷ na besele Yisrael maen ne amukoraati kyɛ, “Aseɛ bɔ yɛɛtetɛle yɛhyinini so ne, ɔte aseɛ paa paa.

⁸ Sɛ AWURADE do yɛ a, aseɛ he bɔ nyɔfonesue ne woɛ tengyɛ wɔ so ye, ɔkɔfa yɛ kɔhɔ so ná wafa wama yɛ.

⁹ Mmom, nnɛma ɛmɔdwɔso betia AWURADE, yeɛ nnɛma ɛmɔsuro aseɛ ne aso ama, ofikyɛ bɛte yɛ sa nu ngwadaa koraa. AWURADE bɔ ɔbɔ bɛ nwo waen ne, waye ye sa wafi bɛ bo, nakoso yɛ de, AWURADE gyi yɛ si; nnɛma ɛmɔsuro bɛ.”

¹⁰ Nakoso maen ne amu yɛle b’adwene kyɛ bɛkɔboro bɛ nyɔboɛ. Yeɛ AWURADE animnyam yele ye nwo ali ɛtena sua atenaleɛ ne anu hyirele Yisraelfoɛ amukoraa.

¹¹ Na AWURADE sele Mose kyɛ, “Mmenia hemɔ kobu me animtia maa okoodwu kyinzu? Nzɛngyerɛnneɛ amukoraa bɔ mayɔ mama bɛ ye asi ye, kyinzu yeɛ bekole me bekoli ɔ?

¹² Ngɔfa ewue anwonyerɛ ngɔto bɛ so ná mapo bɛ, na ngɔfa wɔ ngɔyɛ maen bɔ ɔte piri bɔ ye nwo yɛ se tra bɛ ɔ.”

Mose srɛ ma Yisraelfoɛ

¹³ Nakoso Mose sele AWURADE kyɛ, “Sɛ ɔba ye sɔ a, Misraimfoɛ kɔte, ofikyɛ wɔ tumi yeɛ ɛfa yele mmenia hemɔ fili bɛ nu ɔ,

¹⁴ na bɛkɔhã bekohyire aseɛ ye aso ama. Bate ye kyɛ wɔ AWURADE ɛne mmenia hemɔ yeɛ bɛnate ɔ; ofikyɛ wɔ AWURADE, bɛ nye bɔ wɔ nyunu, na wɔ munungum mundu bɛ so. Ɛfa munungum ningɔnn nu edi bɛ nyunu eyia, yeɛ kɔngɔen ɛfa see ningɔnn nu edi bɛ nyunu.

¹⁵ Na sɛ eku mmenia ye amukoraa kyɛbɔ eku sona horɛ ne a, ye de maen maen bɔ bate wɔ nga ne kɔha kyɛ,

¹⁶ ‘Aseɛ bɔ AWURADE tale ndaen kyɛ ɔkɔfa kɔma mmenia nemɔ ne, wangora wamva bɛ wangɔandwu so, yiti yeɛ wahũhũ bɛ wɔ ɛserɛ ye aso ye.’

¹⁷ Yiti mesrɛ wɔ AWURADE, wɔ tumi piri ne, maa ɔla ali kyɛbɔ ɛhyɛle bɔ ne, bɔ ɛhane kyɛ,

¹⁸ ‘AWURADE ahone nhu ndɛ, na ye ɔdɔ bɔ onni ngasi sone; ɔfa amumuyɛɛ ne mmeraatolɛ kyɛ, nakoso ɔmma sona bɔ odi fɔ ne, ɔmva ye nwo tɔtorɔtɔɔ; ɔprapra seɛ mɔ bɔne nwo asohwenɛ gua bɛ boso ama mɔ so, maa okodwu aworɛ ndoatoasoɛ nza ne nna so.’

¹⁹ Wɔ ɔdɔ pindinn ne, kyɛbɔ osi te piri ne, fa wɔ nye to ná fa mmenia ye b’amumuyɛɛ kyɛ bɛ, kyɛbɔ afa ahyɛ bɛ fi Misraim maa waadwu ɛnɛ ye.”

²⁰ Yeɛ AWURADE buale kyɛ, “Mafa mahyɛ bɛ kyɛbɔ asrɛ ne ala.

²¹ Nakoso, kyɛ nde ase ye, ɔne kyɛ AWURADE animnyam koyi aseɛ ye aso amukoraa tɛkyɛɛ ye,

²² mmenia ye mɔ bɔ banwu m’animnyam ne nzɛngyerɛnneɛ bɔ nyɔle ye wɔ Misraim ɛserɛ ne aso, nakoso baso me banea pɛen buru, ná bandie me dwirɛ ne,

²³ bɛ nu biala ngonwu aseɛ bɔ ndale ye nwo ndaen kyɛ ngɔfa ngɔma bɛ nana mɔ ne. Bɛ bɔ bebuli me animtia ne, bɛ nu biala ngonwu aseɛ ne.

²⁴ Nakoso me somvoɛ Kalebo de, ɔnate kyɛ ye suban deɛ te sonongo ná wali nahorɛ wama me ne ati, ngɔfa ye ngɔhɔ aseɛ bɔ yeɛ ɔhɔle so ne aso, na aseɛ ne kɔyɛ ye boso ama bɛ deɛ.

²⁵ Na afei, ɔnate kyɛ Amalɛkefoɛ ne Kanaanfoɛ bɛte bɔnza nemɔ anu ne ati, ɛhema ɛ́mɔkakyi bɛ nwo ná ɛ́mɔfa bɛ nye behyire Ɛpo kɔkorɛ atee ne aso bɛhɔ ɛserɛ ne aso dɔ.”

²⁶ Na AWURADE sele Mose ne Aarɔn kyɛ,

²⁷ “Mmenia amumuyɛɛfoɛ ye, bɛkɔpenepene bɛ komvi bekogua me so maa okoodwu kyinzu? Mate Yisraelfoɛ bɛ komvi bɔ bɛpenepenene beguale me so ne.

²⁸ Se bɛ kyɛ, AWURADE nwa nyoo, ‘Kyɛ nde ase ye, edwirɛ mɔ bɔ mate kyɛ ɛmɔaha ne, sɔ ala yeɛ ngɔfa ngoli ɛmɔ ɔ.

²⁹ Ɛserɛ ye aso yeɛ ɛmɔkowu bekogua ɔ, na ɛmɔ amukoraa bɔ bɛhale ɛmɔ ne, ebiala bɔ wali ofi afoɛ aburanyɔ bɔ ɔkɔ, bɔ wapenepene ye komvi wagua me so ne,

³⁰ ɛmɔ nu ko po ngodwu aseɛ bɔ ndale ndaen kyɛ ngɔfa ɛmɔ ngɔɔtena so ne aso, sana Yefune awa Kalebo ɔne Nun awa Yosua.

³¹ Na ɛmɔ mma mmaa mmaa bɔ ɛmɔnwa bɛkɔhye bɛ nnure ne, ngɔfa bɛ ngɔhɔ aseɛ ne aso maa bekonwu aseɛ bɔ ɛmɔato ye nwo ne.

³² Nakoso ɛmɔ de, ɛmɔkowuwu bekogua ɛserɛ ye aso.

³³ Na ɛmɔ mma mɔ de, bɛkɔyɛ mmoaenneafoɛ wɔ ɛserɛ so afoɛ aburanna. Na ɔnate kyɛ ɛmɔanne me banni ne ati, bekonwu amaneɛ toonn kɔpem kyɛ ɛmɔ nu sona bɔ ɔpɛ ye bo kowu kɔla ɛserɛ so ɔ.

³⁴ Ngyẽa eleburanna yeɛ ɛmɔfa bɛɛtetɛle aseɛ ne ɔ. Na kyɛbɔ ngyẽa ne somaa te ne, ɛmɔ amumuyɛɛ kɔbɔ ɛmɔ ti so afoɛ aburanna, bɔ kyẽa ko biala gyi berɛ ma afoɛ ko ɔ; na ɛmɔkonwu kyɛbɔ me yaafɛlɛ si te ɔ.

³⁵ Me, AWURADE, yeɛ mahã ɔ. Amba ngɔyɔ ɛhe ngotia mmenia atianuserɛfoɛ bɔ bɛ mukoraa babɔ porɛ bayɛ lɔen batia me ye. Bɛ mukoraa bɛ boso konua ɛserɛ ye aso, na berɛ yeɛ bekowuwu ɔ.’ ”

³⁶ Mmenia bɔ Mose somane bɛ maa bɛɛtetɛle aseɛ ne, bɔ besa bɛwale bɛɛbɔle aseɛ ne nwo amaneɛ tɛɛ maa yiti maen ne amukoraa bɛpenepenene bɛ komvi beguale Mose so ne,

³⁷ mmenia bɔ bɛɛbɔle aseɛ ne anwo amaneɛ tɛɛ ne, ewue te pene bɛ so maa bewuwuli wɔ AWURADE nyunu.

³⁸ Na mmenia bɔ bɛɛtetɛle aseɛ nen, Nun awa Yosua ɔne Yefune awa Kalebo angome yeɛ bɛhale ɔ.

³⁹ Mose hane edwirɛ hemɔ hyirele Yisraelfoɛ amukoraa ne, besuni hahii.

⁴⁰ Bedwɔsole ngyerɛmɔ tutututu bɛhɔle mmokaa aseɛ ne ati afia, na besele kyɛ, “Yɛ ɛhe. Yɛkɔhɔ nekaa bɔ AWURADE fa hyɛle yɛ bɔ ne, ofikyɛ yayɔ bɔne.”

⁴¹ Nakoso Mose sele kye, “Nzu ati yeɛ ɛmɔtɛbu AWURADE mmeraa dwirɛ so ye? Sɔ ngɔboka ɛmɔ.

⁴² Nnɛma ɛmɔsi nu bɛkɔ, ofikyɛ AWURADE aye ye sa wafi ɛmɔ bo. Nnɛmɔma ɛmɔ nwo ate ma ɛmɔ pɔfoɛ mɔ kuku ɛmɔ.

⁴³ Ofikyɛ Amalɛkefoɛ ne Kanaanfoɛ kɔfa koɛ kɔtoa ɛmɔ wɔ dɔ, na ɛmɔkɔtotɔ ngrandɛ noa. Ɔnate kyɛ ɛmɔayɛ AWURADE nwo lɔen ne ati, AWURADE ngogyina ɛmɔ si.”

⁴⁴ Ɔwɔ nu kyɛ né AWURADE apam alaka ne, ɔne Mose bɛtɛ wɔ asikyeleɛ ne anu berɛ de, nakoso Yisraelfoɛ tuli bɛ bo kyɛ bɛfo bɛkɔ mmokaa aseɛ ne aso dɔ.

⁴⁵ Yeɛ Amalɛkefoɛ ne Kanaanfoɛ bɔ bɛte mmokaa aseɛ ne aso ne beeyiale bɛ ɔ. Belili Yisraelfoɛ so ngonim, na bɛfoane bɛ toonn beedwuli Hɔma.