Biblia Todo Logo
Bìoball air-loidhne

- Sanasan -

Numeri 13 - AHYERƐLƐ KRONGRON


Bɛsoma maentetɛlɛfoɛ
( Deuteronomi 1.19-33 )

1 AWURADE sele Mose kyɛ,

2 “Soma mmenia maa bɛɛtetɛ Kanaan aseɛ bɔ méfa méma Yisraelfoɛ ne. Ye sona ko fi b’abusua kure biala anu, bɔ ɔte abusua kure ne anu mbanyi nemɔ ko ɔ.”

3 Yiti Mose somane bɛ fili Paran ɛserɛ ne aso, kyɛbɔ AWURADE hyɛle ye ne. Né bɛ nu biala te Yisraelfoɛ nu sona titire.

4 Bɛ dumaa mɔ ɛhe: Ruben abusua kure nu deɛ ole Sakure awa Samua;

5 Simeon abusua kure nu deɛ ole Hori awa Safate;

6 Yuda abusua kure nu deɛ ole Yefune awa Kalebo;

7 Yisaka abusua kure nu deɛ ole Yosef awa Yigale;

8 Efraim abusua kure nu deɛ ole Nun awa Hosea;

9 Benyamin abusua kure nu deɛ ole Rafu awa Palti;

10 Sebulɔn abusua kure nu deɛ ole Sodi awa Gadiɛl;

11 Yosef abusua kure nu (Manase abusua kure nu) deɛ ole Susi awa Gadi;

12 Dan abusua kure nu deɛ ole Gemali awa Amiɛl;

13 Asɛ abusua kure nu deɛ ole Mikayɛl awa Seture;

14 Nafetali abusua kure nu deɛ ole Wofesi awa Nahebi;

15 Gade abusua kure nu deɛ ole Maki awa Gewel.

16 Mmienzua bɔ Mose somane bɛ kyɛ bɛɛtetɛ maen ne, bɛ dumaa mɔ ɛne. Na Mose sesane Nun awa Hosea ye dumaa yɛle ye Yosua.

17 Mose somane bɛ kyɛ bɛɛtetɛ Kanaan aseɛ ne, na osele bɛ kyɛ, “Ɛmɔɔfa ngwaen dɔ aseɛ ne aso bɛfo bɛhɔ mmokaa aseɛ ne aso,

18 ná ɛmɔɔnea kyɛbɔ aseɛ ne osi te ɔ; kyɛ so mmenia ne bɛ nwo yɛ se anaa bɛ nwo nyɛ se; kyɛ banzo anaa bɛsone;

19 kyɛ aseɛ bɔ bɛte so ne ɔte paa anaa ɔtte mayee; kyɛ bɛ nguro bɔ bɛtete so ne bɛttole bɛ nwo fasue anaa bato bɛ nwo fasue;

20 ɔne kyɛ aseɛ ne ɔkye aleɛ anaa ɔngye aleɛ; kyɛ mmakaa wɔ so anaa mmakaa nne so. Ɛ́mɔma ɛmɔ hue yɛ se, ná ɛ́mɔfa aseɛ ne aso mmakaammaa ne bie bɛ́bra.” Né sɔ mmerɛ ne te mmerɛ bɔ bobe ɔhyɛ ye bo ɔboro ɔ.

21 Yiti bɛhɔle bɛɛtetɛle aseɛ ne fi Sen ɛserɛ ne aso maa oodwuli Rehobo bɔ opingye Lebo Hamate ne.

22 Bɛfo bɛɛfale ngwaen dɔ aseɛ ne aso. Beedwuli Hebron, na berɛ yeɛ né Anake bosofoɛ Ahiman, Sesayi ɔne Talmae bɛte ɔ. (Bɛkyekyele Hebron ɔ, afoɛ nzoo koraka yeɛ bɛkyekye Soan bɔ ɔwɔ Misraim ne ɔ.)

23 Beedwuli Ɛseko bɔnza ne anu, bɛpɛle bobe mmaen ko bɔ wasu betire biribiraa ko ɔ wɔ berɛ, na bɛ nu nyɔ fa tole mbuna so bɛsoale. Afei koso bɛtetele akengaa ne borɔdoma bɛbokale so bɛwale.

24 Bɛfrɛle berɛ Ɛseko bɔnza, ɔnate bobe betire biribiraa bɔ Yisraelfoɛ pɛle ye berɛ ne ati.


Maentetɛlɛfoɛ nemɔ bɔ b’amaneɛ

25 Ye eleburanna ne aso, befili nekaa bɔ bɛɛtetɛle aseɛ ne besa bɛwale.

26 Bɛwale Mose ne Aarɔn ɔne Yisrael maen amukoraa berɛ wɔ Kadese bɔ ɔwɔ Paran ɛserɛ ne aso ne. Bɛfale amaneɛ bɛɛbɔle bɛ ne maen ne amukoraa, na bɛfale aseɛ ne aso mmakaammaa ne behyirele bɛ.

27 Bɛbɔle Mose amaneɛ kyɛ, “Yɛɛdwuli aseɛ bɔ ɛsomane yɛ wɔ so ne aso. Nyɔfonesue ne woɛ tengyɛ wɔ so, na so mmakaammaa ne bie ɛhe.

28 Nakoso mmenia bɔ bɛtete aseɛ ne aso ne, bɛ nwo yɛ se. Bato ɛwaen bafa bɛ nguro nemɔ anwo, na nguro nemɔ te mbiri. Asa koso, yɛnwuni Anake bosofoɛ nemɔ wɔ berɛ.

29 Amalɛkefoɛ nemɔ bɛte ngwaen dɔ aseɛ ne aso; Hitifoɛ, Yebusifoɛ, ɔne Amorifoɛ nemɔ bɛte mmokaa aseɛ ne aso, yeɛ Kanaanfoɛ te mboanoa ne asue Yɔɔdan noa.”

30 Nakoso Kalebo tuli mmenia ne noa dwirɛ guale wɔ Mose nyunu, na ɔhane kyɛ, Ɛ́mɔma yɛhã yɛ nwo yɛhɔ kekesaala ye yɛɛfa aseɛ ne, ofikyɛ yɛkɔhora yɛkɔho yɛkɔfa.”

31 Yeɛ mmienzua bɔ bɛ ne ye hɔle ne hane kyɛ, “Yɛngɔhora yɛne mmenia hemɔ ngɔho, ofikyɛ bɛ nwo yɛ se tra yɛ.”

32 Yiti bɛfale aseɛ bɔ bɛɛtetɛle ne nwo amaneɛ tɛɛ bɛɛbɔle Yisraelfoɛ kyɛ, “Aseɛ bɔ yɛɛtetɛle yɛhyinini so ne, ɔte aseɛ bɔ ɔngye aleɛ mma so ama nnya bie benni ɔ. Na mmenia bɔ yɛnwuni bɛ berɛ ne, bɛ mukoraa bɛte kwabranoa paa.

33 Yɛnwuni Nefilifoɛ wɔ berɛ (Anakefoɛ te Nefilifoɛ mɔ bosofoɛ); na yɛnea yɛ nwo a, né yɛte kyɛ torɔka mɔ, na sɔ ala yeɛ bɛ koso benwu yɛ ɔ.”

Esahie Bible © Bible Society of Ghana, 2018.

Bible Society of Ghana
Lean sinn:



Sanasan