Numeri 11 - AHYERƐLƐ KRONGRON

Bɛpenepene bɛ komvi wɔ ɛserɛ so

¹ Yisraelfoɛ penepenene bɛ komvi fale amaneɛ bɔ benwu ye ɔ nwo maa odwuli AWURADE nyunu. AWURADE tele, na ɔfɛle yaa paa. Yiti AWURADE see ne tɔle wɔ b’asikyeleɛ ne anu, na ɔyerale asikyeleɛ berɛ bondua ne bie.

² Nakoso mmenia ne sũ frɛle Mose. Mose srɛle AWURADE na see ne nuane.

³ Yiti bɛfrɛle berɛ Tabera ofikyɛ AWURADE see ne tɔle bɛ berɛ.

⁴ Mmenia bɔ bɛɛfrafrale Yisraelfoɛ nu ne bɛ komvi wale aleɛ biemɔ aso. Na Yisraelfoɛ sá bɔle awuye kyɛ, “Yɛnyane naen a ahaa yɛkoli!

⁵ Yɛkaye nzue nu naen bɔ né yɛfa ye mbaen wɔ Misraim, ɔne ndropo, ferɛ, ngondomire, gyeene ne galeke bɔ né yɛdi ɔ.

⁶ Nakoso kekesaala ye de, ɛhɔen yeɛ oku yɛ ɔ, na yɛnnya hwee, sana mana ye angome.”

⁷ Mana te kyɛ mviɛlɛ, na ye nwo sue te kyɛ anengyene.

⁸ Né mmenia kyini bɛkɔsesa. Né beti ye nyɔboɛ so anaa besi ye duwaa nu, ná afei bato ye kukue nu bafa bayɛ taterɛ. Ye fɛɛ te kyɛ taterɛ bɔ bafa ngoo bafra ye bato ɔ.

⁹ Sɛ odwu kɔngɔen ná sɛ bosue tɔ gua asikyeleɛ ne anu a, mana koso tɔ boka so.

¹⁰ Mose tele kyɛ mmusua mmusua ne anu mmenia besu, na né sona biala te ye ɛtena sua anoa nu. AWURADE fɛle yaa paa, na edwirɛ ne yɛle Mose ahomete.

¹¹ Yiti Mose bisale AWURADE kyɛ, “Nzu ati yeɛ ɛne w’akoaa bali ye weewee sɔa ye? Nzu ati yeɛ annwu me anwumvoin bɔ afa mmenia ne amukoraa bɛ nwo ngyeleɛ ahye me ye?

¹² Aso me yeɛ mvale mmenia hemɔ amukoraati mmale wiase ɔ? Me yeɛ nwole bɛ ɔ, bɔ yeɛ ɛkã kyire me kyɛ, ‘Dodo bɛ kyɛbɔ baanealɛniɛ ododo adɔma bɔ otua nyɔfone noa ɔ’, ná mva bɛ ngɔ aseɛ bɔ ɛtale ndaen fa hyɛle bɛ nana mɔ bɔ ne aso ɔ?

¹³ Nisua yeɛ mekwaanya naen mema mmenia hemɔ amukoraa ɔ? Baasu bagua me so kyɛ, ‘Ma yɛ naen maa yɛli!’

¹⁴ Me ngome mengɔhora mmenia hemɔ amukoraati so nea, ofikyɛ ɔbo m’anwoserɛ so.

¹⁵ Sɛ sɔ yeɛ ɛfa di me de a, ye de ku me pɛen ko. Nakoso sɛ anya alo me de a, nnɛma aworabɔlɛ to me.”

Mbanyi aburasoo ne

¹⁶ Yiti AWURADE sele Mose kyɛ, “Yisrael mbanyi bɔ ɛse kyɛ bɛte mmenia ne aso mbanyi ne atitire ne, boaboa bɛ nu aburasoo noa ma me. Fa bɛ bra ɛtena sua ne anu, ná ɛne bɛ gyina berɛ.

¹⁷ Ngodwu ngɔwa me ne wɔ yɛkoodwudwo wɔ berɛ, na ngɔfa sunzum bɔ ɔwɔ wɔ nu ne bie ngowura bɛ nu. Ɛne bɛ ɛmɔkɔfa mmenia ne anwo fɛɛ bɛkɔto ɛmɔ nwo so, amaa wanna wɔ ngome wɔ so.

¹⁸ Na se mmenia ne kyɛ, ‘Ɛ́mɔyɛ ɛmɔ nwo krongron bɛfa bɛnwondɛ ɛhema, na ɛmɔkoli naen; ofikyɛ ɛmɔasu maa AWURADE ate, bɔ ɛmɔnwa: ‘Yɛpena naen yɛdi! Amba yɛwɔ Misraim ne po, né ɔte paa ma yɛ.’ Yiti AWURADE kɔma ɛmɔ naen ma ɛmɔkoli.

¹⁹ Ɛmɔngoli ye ɛlɛho anaa elenyɔ, anaa elennu anaa eleburu, anaa eleburanyɔ,

²⁰ na mmom ɛmɔkoli ye bosome ko mumua, kɔpem kyɛ ɔkɔfa ɛmɔ bonyi anu, ná wabɔ ɛmɔ ɔ, ofikyɛ ɛmɔapo AWURADE bɔ ɔne ɛmɔ te ne, na ɛmɔabɔ awuye wɔ ye nyunu kyɛ, ‘Nzu ati po yeɛ yɛtu yɛfili Misraim ye?’ ”

²¹ Na Mose buale kyɛ, “Mmenia bɔ ndua bɛ noa ye, bɛ somaa te apee sɔ alaa ɛyaa nzia. Nakoso ɛnwa, ‘Ngɔma bɛ naen maa bekoli ye bosome ko mumua’!

²² Aso yɛkonya bɛ noa mmoaen ne nandwie bɔ bekohu bɛ bɛkɔma bɛ ɔ? Aso yɛkonya bɛ noa naen yɛkɔhye bɛ wɔ ɛpo nu?”

²³ Na AWURADE sele Mose kyɛ, “AWURADE tumi ne, aso nikyee bie wɔ berɛ bɔ ɔngora ye yɔ ɔ? Afei ekonwu ye, sɛ me dwirɛ ne kɔwa nu kɔma wɔ anaakyɛ ɔngɔwa nu a.”

²⁴ Yiti Mose fitele ɔɔfale AWURADE dwirɛ ne bɔle mmenia ne amaneɛ. Ɔboaboale maen ne anu mbanyi aburasoo noa, na ɔmaa beegyinagyinane ɛtena sua ne anwo bɛbra beyiale.

²⁵ Yeɛ AWURADE nate munungum nu dwu wale ase, na ɔne Mose beedwudwole. AWURADE fale sunzum bɔ ɔwɔ Mose nu ne bie wurale mbanyi aburasoo nemɔ anu. Sunzum ne wale bɛ so ne, bɛhyɛle ngɔm. Nakoso ye si ye, banhyɛ ngɔm ko.

²⁶ Mmienzua nyɔ hale asikyeleɛ ne anu. Bɛfrɛ ko Eldade, yeɛ bɛfrɛ ko koso Medade. Sunzum ne wale bɛ so. Né bɛboka mbanyi bɔ Mose yele bɛ ne aso de, nakoso bamma ɛtena sua ne anwo dɔ bie, yiti bɛhyɛle ngɔm wɔ asikyeleɛ ne anu.

²⁷ Aberandeɛ bie le amirika ɔɔbɔle Mose amaneɛ kyɛ, “Eldade ne Medade bɛwɔ asikyeleɛ ne anu dɔ bɛhyɛ ngɔm.”

²⁸ Yeɛ Nun awa Yosua bɔ ɔte Mose bokafoɛ fite ye mmerandeɛ nu, bɔ ɔboka mmienzua bɔ Mose yele bɛ ne aso ne, ɔhane kyɛ, “Me mene Mose, bera bɛ!”

²⁹ Nakoso Mose buale ye kyɛ, “Ɛ́ko me ti ngondii anaa? Ɔhale me ngome a, ahaa AWURADE mmenia amukoraati bɛte ngɔmhyɛlɛfoɛ; ahaa AWURADE afa ye sunzum wawura bɛ nu!”

³⁰ Na Mose ne Yisrael mbanyi nemɔ besa bɛwale asikyeleɛ ne anu.

Ayenzii nemɔ

³¹ AWURADE mane mvrama bie tuli, na ɔbɔle ayenzii fili ɛpo so maa beeguale asikyeleɛ ne ngyɛnu. Asikyeleɛ ne bue ko ne, ayenzii ne tete guale toonn kɔyɛ atee bɔ bɛfa ɛlɛho yeɛ bɛpɛ ɔ, yeɛ ye bue ko ne koso, beguale toonn kɔyɛ atee bɔ bɛfa ɛlɛho yeɛ bɛpɛ ɔ, maa bɛpɛle asikyeleɛ ne anwo amu beyiale. Né bataataa so bawa anwuro alaa kɔyɛ agyirɛ nyɔ.

³² Yiti maen ne boaboale ayenzii ne noa sɔ kyẽa ne amukoraa eyia ne kɔngɔen, na aleɛ hyene ne koso, besa bɛtoale so kyẽa ne amukoraa. Sona bɔ wanzesa bie koraa ne, nna angora buru ɔ, na bɛworɛle bɛpɛle asikyeleɛ ne anwo beyiale.

³³ Nakoso mmerɛ bɔ begu so bedi naen ne, bɔ né bennya belli beyyiele ne, AWURADE fɛle mmenia ne aso yaa paa, na AWURADE fale amaneɛ piri paa tole bɛ so.

³⁴ Yiti bɛfrɛle berɛ Kibrote Hataawa, ofikyɛ berɛ yeɛ besiele mmenia bɔ benyane akɔnnɔ tɛɛ ne ɔ.

³⁵ Mmenia ne fili Kibrote Hataawa ne, bɛtoale so bɛhɔle Haserote.