Numeri 1 - AHYERƐLƐ KRONGRON

Yisrael mmeniahalɛ bɔ oli moa

¹ Yisraelfoɛ tu fili Misraim aseɛ so ne asi, ye afoɛ bɔ ɔtɔ so nyɔ ne anu, bosome bɔ ɔtɔ so nyɔ, ye kyẽa bɔ oli moa ne, AWURADE sele Mose wɔ ɛtena sua atenaleɛ ne anu wɔ Sinai ɛserɛ ne aso kyɛ,

² “Ɛ́mɔha Yisraelfoɛ amukoraa, kyɛbɔ bɛ mmusua mmusua ne bɛ nana mɔ sasofoɛ te ɔ. Ɛmɔhyerɛ bienzua biala dumaa ngoko ngoko;

³ ebiala bɔ ɔwɔ Yisrael, bɔ wali ofi afoɛ aburanyɔ bɔ ɔkɔ ɔ, bɔ ɔkora kɔ koɛ ne. Odi kyɛ ɛne Aarɔn yeɛ ɛmɔka bɛ koɛhonɛfoɛ kure kure ɔ.

⁴ Odi kyɛ abusua kure biala nu sona ko, bɔ ɔla b’abusua ne noa ne ɔboka ɛmɔ.

⁵ Mmenia bɔ bɛkɔboka ɛmɔ ne, bɛ dumaa ɛhe: Ruben abusua kure ne, Sedɛre awa Elisure kogyina bɛ gya nu.

⁶ Simeon abusua kure ne, Surisadai awa Selumiɛl kogyina bɛ gya nu.

⁷ Yuda abusua kure ne, Aminadabo awa Nason kogyina bɛ gya nu.

⁸ Yisaka abusua kure ne, Suare awa Netanɛl kogyina bɛ gya nu.

⁹ Sebulɔn abusua kure ne, Helon awa Eliabo kogyina bɛ gya nu.

¹⁰ Na Yosef mma nemɔ: Efraim abusua kure ne, Amihude awa Elisama kogyina bɛ gya nu. Manase abusua kure ne, Pedasure awa Gamaliɛl kogyina bɛ gya nu.

¹¹ Benyamin abusua kure ne, Gideoni awa Abidan kogyina bɛ gya nu.

¹² Dan abusua kure ne, Amisadae awa Ahiesa kogyina bɛ gya nu.

¹³ Asɛ abusua kure ne, Okran awa Pagyiɛl kogyina bɛ gya nu.

¹⁴ Gade abusua kure ne, Dewel awa Eliasafe kogyina bɛ gya nu.

¹⁵ Nafetali abusua kure ne, Enan awa Ahira kogyina bɛ gya nu.”

¹⁶ Ɛhemɔ yeɛ bɛyele bɛ befili mmenia ne anu ɔ, mbanyi mɔ bɔ bɛlela b’abusua kure nemɔ noa ɔ: bɛ yeɛ bɛlela Yisrael mmusua mmusua nemɔ noa ɔ.

¹⁷ Mose ne Aarɔn fale mmienzua hemɔ bɔ babobɔ bɛ dumaa ne bɛbokale bɛ nwo so,

¹⁸ na bosome bɔ ɔtɔ so nyɔ ne, ye kyẽa bɔ oli moa ne, bɛmane maen ne amukoraa bɛbɔle dwaa. Bɛhyerɛhyerɛle bɛ dumaa kyɛbɔ bɛ mmusua mmusua ɔne bɛ nana mɔ sasofoɛ te ɔ, na mmienzua bɔ bali ofi afoɛ aburanyɔ bɔ ɔkɔ ne, bɛhyerɛle bɛ dumaa ngoko ngoko,

¹⁹ kyɛbɔ AWURADE hyɛle Mose ne. Yiti Mose hale bɛ wɔ Sinai ɛserɛ ne aso.

²⁰ Yisrael bamuɛbaa Ruben, ye bosofoɛ, kyɛbɔ b’aworɛ ndoatoasoɛ, bɛ mmusua mmusua, bɛ nana mɔ sasofoɛ, ɔne bɛ dumaa ne ngoko ngoko te ɔ, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

²¹ Ruben abusua kure nu ama bɔ bɛhale bɛ ne, bɛte apee aburanna ne nzia ne ɛyaa nnu.

²² Simeon bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

²³ Simeon abusua kure nu ama bɔ bɛhale bɛ ne, bɛte apee aburannu ne ngona ɔne ɛyaa nza.

²⁴ Gade bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

²⁵ Gade abusua kure nu ama bɔ bɛhale bɛ ne, bɛte apee aburanna ne nnu ɛyaa nzia ne aburannu.

²⁶ Yuda bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

²⁷ Yuda abusua kure nu ama bɔ bɛhale bɛ ne, bɛte apee aburasoo ne nna ɔne ɛyaa nzia.

²⁸ Yisaka bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

²⁹ Yisaka abusua kure nu ama bɔ bɛhale bɛ ne, bɛte apee aburannu ne nna ɔne ɛyaa nna.

³⁰ Sebulɔn bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

³¹ Sebulɔn abusua kure nu ama bɔ bɛhale bɛ ne, bɛte apee aburannu ne nzoo ɔne ɛyaa nna.

³² Yosef bosofoɛ ne, Efraim sasofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne bɛ bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

³³ Efraim abusua kure nu ama bɔ bɛhale bɛ ne, bɛte apee aburanna ne ɛyaa nnu.

³⁴ Manase sasofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne bɛ bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

³⁵ Manase abusua kure nu ama bɔ bɛhale bɛ ne, bɛte apee aburasa ne nyɔ ɔne ɛyaa nyɔ.

³⁶ Benyamin bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

³⁷ Benyamin abusua kure nu ama bɔ bɛhale bɛ ne, bɛte apee aburasa ne nnu ɔne ɛyaa nna.

³⁸ Dan bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

³⁹ Dan abusua kure nu ama bɔ bɛhale bɛ ne, bɛte apee aburasia ne nyɔ ɔne ɛyaa nzoo.

⁴⁰ Asɛ bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

⁴¹ Asɛ abusua kure nu ama bɔ bɛhale bɛ ne, bɛte apee aburanna ne ko ɔne ɛyaa nnu.

⁴² Nafetali bosofoɛ bɔ bɛhale bɛ ngoko ngoko, kyɛbɔ b’aworɛ ndoatoasoɛ, bɛ mmusua mmusua ɔne bɛ nana mɔ sasofoɛ te ne, ɔne mmienzua amukoraa bɔ bali ofi afoɛ aburanyɔ bɔ ɔkɔ ɔ, bɔ bɛkora bɛkɔ koɛ ne, bɛ somaa ɛhe:

⁴³ Nafetali abusua kure nu ama bɔ bɛhale bɛ ne, bɛte apee aburannu ne nza ɔne ɛyaa nna.

⁴⁴ Sɔ mmenia ne yeɛ Mose ne Aarɔn, bɛmane Yisrael mbanyi buru ne nyɔ nemɔ bɔ ebiala gyi ye abusua kure gya nu ne, bɛbokale bɛ maa bɛhyerɛle bɛ dumaa ɔ.

⁴⁵ Yiti Yisraelfoɛ amukoraa bɔ bali ofi afoɛ aburanyɔ bɔ ɔkɔ ɔ, ebiala bɔ ɔkora kɔ koɛ ne, kyɛbɔ bɛ nana mɔ sasofoɛ te ne, bɛ somaa ɛhe:

⁴⁶ bɛ mu bɛ somaa te apee ɛyaa nzia ne nza ɔne ɛyaa nnu ne aburannu.

⁴⁷ Bɛhale mmusua kure ngaa nemɔ, nakoso Lewifoɛ mɔ de, banga bɛ.

⁴⁸ Né AWURADE aha ahyire Mose kyɛ,

⁴⁹ “Lewi abusua kure ne angome yeɛ nnɛka bɛ ɔ; nnɛka bɛ fra Yisraelfoɛ ngaa ne aso.

⁵⁰ Na mmom, adanzeɛ ɛtena sua ne, nu nningyein amukoraa, ɔne ye nwo nikyee biala, odi kyɛ ɛye Lewifoɛ maa bɛnea so. Odi kyɛ bɛsoa nyianu sua ne, ɔne nu nningyein amukoraa, ná bɛ́nea so, ná bɛkyekye b’asikyeleɛ bɛ́pɛ ye nwo bɛbra beyia.

⁵¹ Sɛ mmerɛ dwu kyɛ ɛmɔtutu nyianu sua ne bɛkɔ a, odi kyɛ Lewifoɛ nemɔ yeɛ betutu ɔ. Na odwu ye silɛ so a, odi kyɛ Lewifoɛ mɔ besa bɛnea bɛhyehyɛ. Na sɛ ebiala bɔ nna Lewiniɛ ahɔ ɔ opingye ɛtena sua ne a, odi kyɛ beku ye.

⁵² Yisraelfoɛ ngaa nemɔ de, odi kyɛ ebiala si ye asikyeleɛ wɔ bɛ koɛhonɛfoɛ kure kure nemɔ anu;

⁵³ nakoso Lewifoɛ mɔ de, odi kyɛ besi b’asikyeleɛ maa ɔbra adanzeɛ ɛtena sua ne anwo yia, amaa ɔnate so AWURADE yaafɛlɛ piri ne wamma Yisraelfoɛ so. Odi kyɛ Lewifoɛ mɔ bɛbɔ adanzeɛ ɛtena sua ne anwo waen.”

⁵⁴ Yisraelfoɛ yɔle sɔ ala; bɛyɔle kyɛbɔ AWURADE hyɛle Mose ne.