Nehemia 6 - AHYERƐLƐ KRONGRON

Pɔfoɛ mɔ kɔso bɛtaataa Yudafoɛ

¹ Na Sanbalate, Tobia, Araboniɛ Gesem ne pɔfoɛ ngaa nemɔ bɛtele kyɛ masi fasue ne mayie bɔ tokuro biala ɔnne ye neka fee ɔ (ɔwɔ nu kyɛ ɔbaadwu sɔ kyẽa nen, né nnya nduatuale pambim anoa nemɔ).

² Yeɛ Sanbalate ne Gesem bɛsomane maa beesele me kyɛ, “Bra maa yɛyia wɔ Ono aseɛ frɛtɛɛ so nguraa nemɔ ko anu.” Nakoso né babɔ me nwo porɛ tɛɛ.

³ Yiti nduli ɛbɔfoɛ maa beesele bɛ kyɛ, “Meyɔ adwuma bɔ ohia paa ɔ, yiti mengɔhora ba. Nzu ati yeɛ odi kyɛ meyakyi adwuma ne megua berɛ na mene ɛmɔ bayia ɔ?”

⁴ Betuli mmenia maa bɛwale me berɛ pɛen nna bɛfale sɔ ngraa ne ala bɛbrɛle me, na me koso mvale sɔ mmuayɛɛ komapɛ ne ala yeɛ mmane bɛ ɔ.

⁵ Sanbalate sa somane ye somvoɛ wɔ me berɛ ye pɛen nnu so maa ɔfale krataa bɔ banda ye noa ɔ ɔbrɛle me.

⁶ Krataa ne anu dwirɛ ole kyɛ, “Bɛkekã ye wɔ maen maen so, na Gesem koso wafa wato so, kyɛ ɛne Yudafoɛ ɛmɔbɔ porɛ kyɛ ɛmɔkɔyɛ lɔen. Ye sɔ ti yeɛ esi fasue nen. Amaneɛ bɔ baabɔ yɛ ne kyire kyɛ ɛpena kyɛ ɛyɛ bɛ so hene.

⁷ Afei koso, aye ngɔmhyɛlɛfoɛ kyɛ bɛhyɛ wɔ nwo ngɔm wɔ Yerusalem kyɛ, ‘Yuda anya ɛhene oo!’ Kaye kyɛ bɛkɔfa sɔ dwirɛ he bɛkɔɔbɔ Nana amaneɛ. Yiti bra ma yɛdwene ye nwo.”

⁸ Na mvale mmuayɛɛ ngɔmane ye kyɛ, “Sɔ edwirɛ bɔ ɛkekã ye, nu biala ɔtte nahorɛ, ɛbɔ wɔ sɔ nu yeɛ ɛkã ɔ!”

⁹ Ofikyɛ né bɛ mukoraa bɛpena kyɛ benwunanwuna yɛ. Bɛdwene kyɛ, “Bɛkɔpa aba wɔ adwuma ne anwo, na bɛkɔyakyi ye yɔlɛ.” (Na mmɔle mbaeɛ kyɛ,) “Ao Nyameɛ, mesrɛ wɔ, ma me hue yɛ se.”

¹⁰ Ɛlɛho bie, Semaya bɔ ye baba ole Delaya bɔ ye baba ole Mehetabel bɔ né ɔngora omvi ye awuro mvite ne, ngɔle ye awuro. Semaya hane kyɛ, “Maa yɛyia wɔ Nyameɛ awuro asɔneyɛɛ sua ne anu, ná yɛtoto asɔneyɛɛ sua anoa nemɔ anu, ofikyɛ bɛbaahu wɔ. Ɛnɛ kɔngɔen bɛbaahu wɔ.”

¹¹ Nakoso mmuale kyɛ, “Mmenia bɔ bɛnwati bɛkɔfea ne, ebie ole me? Sona bɔ ɔte kyɛ me, aso odi kyɛ ɔnwati ɔkɔfea asɔneyɛɛ sua nu amaa onya ye ti odidi nu? Mengɔhɔ asɔneyɛɛ sua ne anu!”

¹² Na nwuni kyɛ nna Nyameɛ yeɛ ɔsomane ye ɔ, na mmom ɔhyɛle sɔ ngɔm ne fale me nwo, ofikyɛ Tobia ne Sanbalate yeɛ bɛbɔle ye paa ɔ.

¹³ Ɛhe ati yeɛ bɛbɔle ye paa ɔ: kyɛ ɔma ɛserɛ hã me, na nyɔ sɔ bɔne ne, amaa ɔnate so male dumaa tɛɛ, ná banya me basere me.

¹⁴ Ao me Nyameɛ, kaye Tobia ne Sanbalate kyɛbɔ bɛ yɔleɛ si te ɔ. Afei koso, kaye ngɔmhyɛlɛniɛ brasua Noadia ne ngɔmhyɛlɛfoɛ ngaa nemɔ bɔ bɛpena kyɛ ɛserɛ kã mene.

Bɛto fasue ne beyie

¹⁵ Yiti yɛyiele fasue ne tolɛ bosome bɔ bɛfrɛ ye Elul ne, ye kyẽa bɔ ɔtɔ so aburanyɔ ne nnu ne aso. Yɛfale ngyẽa aburannu ne nyɔ yeɛ yɛtole ɔ.

¹⁶ Na yɛ pɔfoɛ nemɔ amukoraa bɛtele nen, maen maen amukoraa bɔ bapɛ yɛ nwo bayia ne, esuronyi tɔle bɛ so, na bɛ nyunu guale ase paa. Ofikyɛ benwuni kyɛ yɛ Nyameɛ yeɛ waboka maa yayɔ sɔ adwuma he ɔ.

¹⁷ Afei koso, sɔ mmerɛ ne, Yuda atitire nemɔ fale ngrataa pee bɛɛmane Tobia, na Tobia koso hyerɛle bɛ ngrataa.

¹⁸ Né Yudafoɛ pee bata ndaen kyɛ bɛ ne Tobia kɔyɛ ko, ofikyɛ né Tobia ɔye ye baba ole Ara awa Sekania. Yeɛ né Tobia awa bienzua Yehohanan koso wagya Berekia awa Mesulam ɔwa brasua.

¹⁹ Na belili Tobia nwo adanzeɛ paa behyirele me, yeɛ bɛɛhane edwirɛ bɔ ngane nemɔ behyirele ye. Na Tobia hyerɛle ngrataa oonwunanwunane me.