Nehemia 3 - AHYERƐLƐ KRONGRON

Bɛhyɛ fasue ne silɛ bo

¹ Ɔsɔfo panyi paa Eliasibo ɔne ye mmango asɔfo nemɔ, bɛhyɛle ye bo bɛyɔle adwuma, na besili Mmoaen Pambim ne. Bɛtele Mmoaen Pambim ne anwo bɛyɛle ye krongron, na betuatuale ye anoa nemɔ. Bɛtele ye nwo alaa beedwuli Mmenia Ɛyaa Abandenden ne anwo ɔne Hananel abandenden ne anwo.

² Na Yerikofoɛ nemɔ besi bɛtoale ye deɛ ne aso. Yeɛ Yimri awa Sakure sili fasue ne toale bɛ deɛ ne aso.

³ Hasenaa mma mmienzua nemɔ, besili Tire Pambim ne. Begyinagyinane ye mbuna nemɔ, betuatuale ye anoa nemɔ, na bɛfale mberɛgoo bemiamiane mmuralɛ bɔ ɔbrambram ye si ne anu.

⁴ Hakose awa Yuriya ɔwa Meremote toale bɛ so yɔle nekaa bɔ wasɛkye ne bie yé. Mesesabɛl ɔwa Berekia awa Mesulam koso toale so yɔle nekaa bɔ wasɛkye ne bie yé. Baana awa Sadoke toale so yɔle nekaa bɔ wasɛkye ne bie yé.

⁵ Tekoafoɛ nemɔ, bɛtoale so bɛyɔle nekaa bɔ wasɛkye ne bie yé, nakoso bɛ mmenia titire nemɔ de, adwuma bɔ bɛ mene nemɔ hyirele bɛ ne, bamva bɛ sa banzɔ nu bie.

⁶ Pasea awa Yowada ne Besodeya awa Mesulam bɛyɔle Pambim Daa ne yé. Begyinagyinane ye mbuna nemɔ, betuatuale ye anoa nemɔ, na bɛfale mberɛgoo bemiamiane mmuralɛ bɔ ɔbrambram ye si ne anu.

⁷ Gibeonniɛ Melatia ne Merononiɛ Yadon, yeɛ Gibeonfoɛ ne Misepafoɛ bɔ bɛte mmenia bɔ bewura asue ne asi dɔ amrado ne abo ne, bɛtoale bɛ so bɛyɔle nekaa biemɔ bɔ né basɛkye ɔ yé.

⁸ Hahayia awa Yusiɛl bɔ ɔte esikaa kɔkorɛ dwumvoɛ nemɔ ko ne, ɔtoale bɛ so yɔle nekaa bɔ wasɛkye ɔ ne bie yé. Hanania bɔ ɔte bɛ bɔ bɛfrafra sakyeɛfona nemɔ bɛ nu ko ne, ɔtoale bɛ so yɔle nekaa bɔ wasɛkye ɔ ne bie yé, na besa bɛkyekyele Yerusalem beedwuli Fasue Tɛtrɛtɛɛ ne.

⁹ Hure awa Refaya bɔ ɔte Yerusalem manzini ne bue so amrado ne, ɔtoale bɛ so yɔle nekaa bɔ wasɛkye ɔ ne bie yé.

¹⁰ Harumafo awa Yedaya, nekaa bɔ wasɛkye bɔ ɔwɔ ye awuro ne ndendeneɛ so ne, ɔyɔle ye yé, na Hasabeneya awa Hatuse toale ye so yɔle nekaa bɔ wasɛkye ɔ ne bie yé.

¹¹ Harim awa Malkiya ne Pahate Moabo awa Hasubo yɔle fasue ne nekaa foforɛ bɔ wasɛkye ɔ, ɔne Foonoo Abandenden ne yé.

¹² Halohese bɔ ɔte Yerusalem manzini ne bue so amrado ne, ɔwa Salum ne Salum mma mmrasua mɔ, bɛtoale so bɛyɔle nekaa bɔ wasɛkye ne bie yé.

¹³ Hanun ne Sanoafoɛ bɛyɔle Bɔnza Pambim ne yé. Besa besili na betuatuale ye anoa nemɔ, na bɛfale mberɛgoo bemiamiane mmuralɛ bɔ ɔbrambram ye si ne anu. Fasue ne, nekaa bɔ bɛyɔle ye yé maa oodwuli Fofoɛ Pambim ne, ye tendenn te agyirɛ apee ko.

¹⁴ Na Malkiya bɔ ye baba ole Bete Hakerem manzini Rekabo amrado ne, ɔyɔle Fofoɛ Pambim ne yé. Osa sili na otuatuale ye anoa nemɔ, na ɔfale mberɛgoo omiamiane mmuralɛ bɔ ɔbrambram ye si ne anu.

¹⁵ Na Salum bɔ ye baba ole Misepa manzini amrado Kolhose ne, ɔyɔle Mbombonzue Pambim ne, osa sili, ɔkatale so, na otuatuale ye anoa nemɔ, na bɛfale mberɛgoo bemiamiane mmuralɛ bɔ ɔbrambram ye si ne anu. Na Sela Ɛkwaa fasue bɔ ɔwɔ Nana ye turo ne anu ne, osili alaa oodwuli atweleɛ bɔ ɔtoro kɔ Dawide kuro ne anu nwo.

¹⁶ Nehemia bɔ ye baba ole Bete Sure manzini ne bue so amrado Azebuke ne, ɔtoale Salum deɛ ne aso. Nekaa bie bɔ ɔwɔ Dawide ɛbaa nu berɛ ndendeneɛ so ne, ɔyɔle ye yé, maa oodwuli ɛkwaa bɔ bahyɛ da bapɛ ne, ɔne koɛhonɛfoɛ ahoneserɛfoɛ b’awuro ne ndendeneɛ so.

¹⁷ Lewifoɛ nemɔ toale ye so bɛyoyɔle nekaa biemɔ yé: Bani awa Rehum koso toale Hasabia bɔ ɔte Keila manzini ne bue so safohene ne aso. Ɔtoale so yɔle nekaa biemɔ bɔ basɛkye wɔ ye manzini ne anu ne yé.

¹⁸ Ye abusuafoɛ mɔ toale ye deɛ ne aso bɛyɔle nekaa bɔ wasɛkye biemɔ yé. Na Henadade bɔ ɔte manzini ne bue so amrado ne, ɔwa Bawayi koso toale so.

¹⁹ Yesua bɔ ɔnea Misepa kuro ne aso ne, ɔwa Esere ɔtoale Bawayi deɛ ne aso. Nekaa foforɛ bie bɔ ɔwɔ pambaa bɔ besie akodeɛ wɔ so ne ndendeneɛ so ne, ɔyɔle ye yé.

²⁰ Sabae awa Baruku yɔle fasue ne nekaa bie bɔ ofi Ndweasoɛ ne aso bɔ ɔkwaadwu ɔsɔfo panyi Eliasibo awuro ne anoa ne yé.

²¹ Hakose awa Yuriya ɔwa Meremote, ɔyɔle fasue ne nekaa bie fite Eliasibo awuro ne anoa maa oodwuli Eliasibo awuro ne ye ti dɔ paa.

²² Asɔfo nemɔ bɔ bɛwɔ mbɔtam berɛ ne, bɛtoale Hakose deɛ ne aso bɛyɔle fasue ne yé.

²³ Benyamin ne Hasubo bɛtoale bɛ deɛ ne aso bɛyɔle fasue ne nekaa bɔ ɔwɔ b’awuro ne ndendeneɛ so ne yé. Na Anania awa Maaseya ɔwa Asaria toale bɛ deɛ ne aso ɔyɔle nekaa bɔ ɔwɔ ye bɔbɔ ye awuro ne anwo ne yé.

²⁴ Henadade awa Binuyi toale ye deɛ ne aso yɔle fasue ne yé, fi Asaria awuro berɛ bɔ ɔkɔ ndweasoɛ ne ɔne ahameɛ dɔ ne.

²⁵ Ndweasoɛ ne abandenden bɔ ogyi ahemvie aborɔsaen so bɔ opingye kuku nu aluo berɛ ne, ye ndendeneɛ so, Yusae awa Palal yɔle berɛ fasue ne yé. Parose awa Pedaya toale ye deɛ ne aso;

²⁶ ɔne asɔneyɛɛ sua nu somvoɛ mɔ bɔ bɛte Ofel, bɛtoale so bɛyɔle fasue ne yé beedwuli Nzue Pambim bɔ ɔwɔ eyia afiteleɛ so ne ɔne abandenden bɔ ogyi sua ne aso ne, bɛ ndendeneɛ so.

²⁷ Tekoafoɛ mɔ bɛtoale ye deɛ ne aso bɛyɔle fasue ne yé wɔ abandenden piri ne ndendeneɛ so maa oodwuli Ofel fasue ne.

²⁸ Pɔngɔ Pambim ne anwuro dɔ, asɔfo nemɔ yɔle fasue ne yé, na ebiala yɔle nekaa bɔ ɔwɔ ye bɔbɔ ye awuro ndendeneɛ so ɔ.

²⁹ Yimere awa Sadoke yɔle fasue ne yé wɔ nekaa bɔ ɔwɔ ye bɔbɔ ye awuro ne ndendeneɛ so ɔ. Sekania awa Semaya bɔ ɔnea Eyia Afiteleɛ Pambim ne aso ne, ɔyɔle fasue ne yé toale Sadoke deɛ ne aso.

³⁰ Selemia awa Hanania ne Hanun bɔ ɔte Salafe awa bienzua bɔ ɔtɔ so nzia ne, bɛtoale ye deɛ ne aso bɛyɔle fasue ne yé. Berekia awa Mesulam ɔyɔle fasue ne nekaa bɔ ɔwɔ ye pumbu ndendeneɛ so ne yé.

³¹ Malkiya bɔ ɔte esikaa kɔkorɛ dwumvoɛ nemɔ anu ko ne, ɔtoale Mesulam deɛ ne aso. Ɔyɔle pambim ne yé alaa odwuli asɔneyɛɛ sua somvoɛ ne dwadifoɛ mɔ awuro wɔ Dwaabɔlɛ Pambim ne ndendeneɛ so, kɔpem ndweasoɛ so aborɔsaen pumbu ne.

³² Ndweasoɛ so aborɔsaen so pumbu bɔ ɔkwaadwu Mmoaen Pambim ne, esikaa kɔkorɛ dwumvoɛ ne dwadifoɛ yeɛ bɛyɔle berɛ fasue ne yé ɔ.