Nehemia 13 - AHYERƐLƐ KRONGRON

Betu amanvrafoɛ befi Yisrael badwa nu

¹ Sɔ kyẽa ne, bɛkengale Mose nwomaa ne anu dwirɛ behyirele maen ne. Na benwuni kyɛ bahyerɛ ye wɔ nu kyɛ onni kyɛ Amonniɛ anaa Moaboniɛ biala ɔkɔ Nyameɛ badwa nu le,

² ofikyɛ bamva aleɛ ne nzue banzo Yisraelfoɛ wɔfoɛ, na mmom bɛbɔle Balaam paa kyɛ ɔɔnoma bɛ. Nakoso yɛ Nyameɛ mane ɛnomalɛ ne kakyili saleɛ.

³ Na maen ne tele mmeraa ne anu dwirɛ ne, betuli amanvrafoɛ amukoraa befili Yisrael.

Nehemia nzesãleɛ ne

⁴ Anzana ɛhe baasi ne, ɔsɔfo Eliasibo bɔ bɛyele ye kyɛ ɔnea Nyameɛ awuro sua bɔ bɛfa nningyein besie nu ne aso, bɔ ye nwoniɛ ole Tobia ne,

⁵ né wasiesie sua piri ko wama Tobia. Sɔ sua ne, né bɛfa sɔ nningyein hemɔ besie nu: aburoo afɔleɛ, ɛyɛɛ, ngukue, aburoo ngyɛmuɛ buru nu ko, nzaa ngyɛmuɛ buru nu ko ne ngoo ngyɛmuɛ buru nu ko bɔ bahyɛ kyɛ bɛfa bɛma Lewifoɛ, edweintolɛfoɛ ɔne pambim awɛmvoɛ, yeɛ afei akyɛdeɛ bɔ bɛfa bɛma asɔfo nemɔ ne.

⁶ Mmerɛ bɔ ɛhe amukoraa ɔkɔ so nen, né nne Yerusalem, ofikyɛ Babilɔn hene Atasɛsɛse ye ahennie afoɛ bɔ ɔtɔ so aburasa ne nyɔ ne anu, ngɔle ye berɛ. Na mmerɛ kãa pɛle nu ne, nzrɛle Nana ate,

⁷ na nza mmale Yerusalem. Sɔ mmerɛ ne yeɛ nwuni dwirɛ tɛɛ bɔ ɔnate Tobia ti Eliasibo wali ɔ, ɔnate kyɛ né wasiesie sua wama Tobia wɔ Nyameɛ awuro ne akunu.

⁸ Mvɛle yaa paa, na ngyili Tobia nningyein amukoraa nguale dwaaso.

⁹ Afei nhyɛle maa bɛpetene sua nemɔ anu, na mmaa bɛfale Nyameɛ awuro ngukue nemɔ ne aburoo afɔleɛ ne, ɔne ɛyɛɛ ne besa beeguale sua nemɔ anu.

¹⁰ Afei koso nwuni kyɛ Lewifoɛ nemɔ bɛ bue deɛ bɔ odi kyɛ bɛfa bɛma bɛ ne, saa bɛmva bɛmma bɛ. Ɔnate ye sɔ ti, né Lewifoɛ nemɔ ne edweintolɛfoɛ nemɔ bɔ odi kyɛ bɛyɔ ɛsɔnenɛ adwuma ne, basa baatenatena bɛ namue nemɔ anu bɛyɛ eboo.

¹¹ Yiti ngane mbanyi nemɔ anyunu, na mmisale bɛ kyɛ, “Nzu ati yeɛ Nyameɛ awuro berɛ ɛsɔnenɛ adwuma ne, ɛmɔayakyi bagua berɛ ye?” Na mmoaboale Lewifoɛ ne edweintolɛfoɛ nemɔ noa maa besa bɛtoale b’adwuma so.

¹² Yeɛ maen ne amukoraa besa bɛfale aburoo, nzaa ne ngoo so buru nu ngyɛmuɛ ko ne bɛwale asɔneyɛɛ sua nu berɛ nekaa bɔ bɛfa nningyein besie ne.

¹³ Na nyele ɛhemɔ kyɛ bɛnea sua bɔ bɛfa nningyein besie nu nemɔ aso: ɔsɔfo Selemia, ahyerɛlɛniɛ Sadoke, yeɛ Lewiniɛ Pedaya. Hanan bɔ ye baba ole Sakure bɔ ye baba ole Matania ne, ɔkɔboka bɛ wɔ sɔ adwuma ne anu, ofikyɛ sɔ mmenia nemɔ, mmenia de bɛ di kyɛ bedi nahorɛ. Na b’adwuma ole kyɛ bɛkɔhyɛ aleɛ ne nningyein bɛkɔma b’eliɛma mɔ ɔ.

¹⁴ Ao me Nyameɛ, kaye me wɔ ɛhe anwo. Me Nyameɛ, me nningyein paa bɔ mayɔ ɔfa wɔ sua ne ɔne nu ɛsɔnenɛ adwuma ne anwo ne, nnɛma wɔ wora fi.

Besa bedi afofikyẽa

¹⁵ Sɔ mmerɛ ne, nwuni ye wɔ Yuda kyɛ mmenia betwi nzaa, yeɛ afei bɛsoa aburoo bɛteta afunum mɔ si afofikyẽa. Sɔ ala yeɛ né bɛfa nzaa, bobe, borɔdoma ne nningyein ahoroɔ bɛsoa ngaka nemɔ bɛba Yerusalem afofikyẽa ɔ, na mmɔle bɛ kɔkɔ kyɛ nnɛmaa bɛtɔne nningyein afofikyẽa.

¹⁶ Tirofoɛ bɔ ne bɛte kuro ne aso ne, bɛ koso bɛfale tiré ne dwaa nningyein ahoroɔ bɛɛtɔnene bɛ afofikyẽa bɛmane Yudafoɛ wɔ Yerusalem.

¹⁷ Yiti ngane Yuda atitire nemɔ nyunu kyɛ, “Nzikyɛ musue yeɛ ɛmɔbɔ ye? Ɛmɔgua afofikyẽa ne anwo fiɛ?

¹⁸ Aso nna sɔ yeɛ ɛmɔ nana mɔ bɛyɔle ɔ, bɔ ɔnate so yɛ Nyameɛ ɔpraprale musue he amukoraa oguale yɛ ne kuro he aso ɔ’?” Nakoso ɛmɔtɛgua afofikyẽa ne anwo fiɛ maa ɔnate so Nyameɛ ɔtɛfɛ Yisrael so yaa.

¹⁹ Yiti nhyɛle kyɛ, afofikyẽa ne baadwu, na sɛ ewienu hyɛ ye bo kyɛ opini a, odi kyɛ bɛtoto Yerusalem pambim anoa nemɔ anu, na onni kyɛ bebukye, sana afofikyẽa ne apɛ nu koraka. Na mmane me somvoɛ nemɔ bie bɛtenatenane pambim nemɔ anoa, kyɛbɔ mmenia bɛngɔfa nningyein bengowura kuro ne anu afofikyẽa ɔ.

²⁰ Yiti dwadifoɛ nemɔ, yeɛ bɛ bɔ bɛtɔne nningyein ahoroɔ nemɔ, bɛlale Yerusalem fasue ne asi ma aleɛ hyene bɛ komapɛ anaa pɛen nyɔ.

²¹ Na mmɔle bɛ kɔkɔ mmisale bɛ kyɛ, “Nzi ati yeɛ ɛmɔda fasue ne asi maa aleɛ kye ɔ’? Sɛ ɛmɔyɔ sɔ bieku a, ngɔhye ɛmɔ.” Ofi sɔ mmerɛ ne, bamma afofikyẽa ko.

²² Na mvale ahyɛdeɛ mmane Lewifoɛ nemɔ kyɛ bɛpete bɛ nwo ná bɛbra bɛɛwɛne pambim nemɔ, amaa ɔnate so bama afofikyẽa ne wayɛ krongron. Ao me Nyameɛ, kaye me wɔ sɔ nikyee he anwo koso, na nwu me anwumvoin, kyɛbɔ wɔ ɔdɔ bɔ onni ngasi ne ye piri te ɔ.

Bɛbra ɛwɔfoɛ agyaa

²³ Sɔ mmerɛ ne anu, nwuni Yudafoɛ bɔ bagyigya Asedɔde, Amon ne Moabo mmrasua ɔ.

²⁴ Bɛ mma nemɔ, né bɛ bue kã Asedɔde dwudwolɛ. Né bɛnde Yuda dwudwolɛ, na mmom mmenia biemɔ bɛ dwudwolɛ yeɛ né bɛkã ɔ.

²⁵ Na ndwili bɛ nyunu nnomale bɛ, mmole bɛ nu biemɔ ndutuli bɛ ti nwiaa, na mmaa bɛfale Nyameɛ dumaa bɛtale ndaen kyɛ, “Nnɛma ɛmɔfa ɛmɔ mma mmrasua nemɔ bɛma bɛ mma mmienzua nemɔ agyaa, yeɛ nnɛma ɛmɔde bɛ mma mmrasua nemɔ agyaa bɛma ɛmɔ mma mmienzua, yeɛ ɛmɔ bɔbɔ koso nnɛma ɛmɔgyigya bɛ.

²⁶ Yisrael hene Solomon, aso nna sɔ mmrasua hemɔ anwo yeɛ ɔyɔle bɔne ne? Amaen maen ahoroɔ nu, né ɛhene biala nne berɛ bɔ ɔte kyɛ ye ɔ. Né ye Nyameɛ kuro ye dwirɛ, na Nyameɛ fale ye siele Yisrael amukoraa so hene. Nakoso amanvrafoɛ mmrasua maa ɔyɔle bɔne.

²⁷ Aso odi kyɛ yɛtie ɛmɔ dwirɛ ná yɛyɔ sɔ bɔne kandinga he ná yɛgyigya amanvrafoɛ mmrasua yɛfa yɛyɔ yɛ Nyameɛ nwo lɔen anaa?”

²⁸ Ɔsɔfo panyi paa Eliasibo, ɔwa Yehoada, ye mma mmienzua nemɔ anu ko bɔ né ogya Horonniɛ Sanbalate ɔwa brasua ne, mvoane ye mvili me nyunu maa ɔhɔle.

²⁹ Ao me Nyameɛ, kaye bɛ ná ɛne bɛ li, ofikyɛ sɔfolilɛ adwuma ne, yeɛ sɔfolilɛ ne Lewifoɛ apam ne, bagua ye nwo fiɛ.

³⁰ Yiti mbetene bɛ nwo mvili amanvrafoɛ nningyein biala anwo, na asɔfo ne Lewifoɛ nemɔ, mvale ebiala adwuma nwurale ye sa,

³¹ na mmerɛ bɔ odi kyɛ bɛfa afɔleɛ bɔlɛ eyein ɔne fieso aleɛ bɔ bali moa bafa bɛba ne, nyɛle ye nwo nhyehyɛleɛ ndole berɛ. Ao me Nyameɛ, kaye me maa oyie me yé.