Nehemia 12 - AHYERƐLƐ KRONGRON

Asɔfo ne Lewifoɛ nemɔ dumaa

¹ Asɔfo ne Lewifoɛ bɔ bɛ ne Sɛtiɛl awa Serubabɛl, yeɛ Yesua bɛwale nemɔ ɛhe: Seraya, Yeremia, Ɛsra,

² Amaria, Maluke, Hatuse,

³ Sekania, Rehum, Meremote,

⁴ Yido, Gyinetoye, Abiya,

⁵ Miyamin, Maadia, Bilega,

⁶ Semaya, Yoaribo, Yedaya,

⁷ Salu, Amoko, Hilkia, yeɛ Yedaya. Sɔ mmenia nemɔ, né bɛlela asɔfo nemɔ ne bɛ mmango nemɔ noa wɔ Yesua aberɛ so.

⁸ Na Lewifoɛ nemɔ ɛhe: Yesua, Binuyi, Kadimiɛl, Serebia, Yuda yeɛ Matania bɔ ɔne ye mmango Lewifoɛ mɔ yeɛ né bɛnea ayɛyelɛ edweintolɛ ne aso ɔ.

⁹ Na sɛ bɛto ayɛyelɛ dwein a, b’eliɛma Bakebukia ne Yuno gyina bɛ ndendeneɛ so.

¹⁰ Yesua awa ole Yoakim; Yoakim awa ole Eliasibo, Eliasibo awa ole Yowada,

¹¹ Yowada awa ole Yonatan, yeɛ Yonatan awa ole Yadua.

¹² (Ɔsɔfo panyi paa) Yoakim aberɛ so, asɔfo mɔ bɔ bɛte bɛ nana mɔ sasofoɛ mbanyi mɔ ɛhe: Seraya boso ama deɛ ole Meraya; Yeremia boso ama deɛ ole Hanania;

¹³ Ɛsra boso ama deɛ ole Mesulam; Amaria boso ama deɛ ole Yehohanan;

¹⁴ Maluki boso ama deɛ ole Yonatan; Sebania boso ama deɛ ole Yosef;

¹⁵ Harim boso ama deɛ ole Adena; Merayote boso ama deɛ ole Helkae;

¹⁶ Yido boso ama deɛ ole Sakaria; Gyineton boso ama deɛ ole Mesulam;

¹⁷ Abiya boso ama deɛ ole Sikri; Miniamin ne Moadia bɛ boso ama deɛ ole Piletae;

¹⁸ Bilega boso ama deɛ ole Samua; Semaya boso ama deɛ ole Yehonatan;

¹⁹ Yoaribo boso ama deɛ ole Matenae; Yedaya boso ama deɛ ole Yusi;

²⁰ Salae boso ama deɛ ole Kalae; Amoko boso ama deɛ ole Ebere;

²¹ Hilkia boso ama deɛ ole Hasabia; yeɛ Yedaya boso ama deɛ ole Netanɛl.

²² (Asɔfo mbanyi paa) Eliasibo, Yowada, Yohanan ne Yadua b’aberɛ so, bɛhyerɛle Lewifoɛ nemɔ bɛ nana mɔ sasofoɛ mbanyi bɛ dumaa, yeɛ bɛhyerɛle asɔfo nemɔ koso bɛ deɛ maa oodwuli Pɛsia hene Dario ye aberɛ so.

²³ Lewifoɛ nemɔ, bɔ bɛte bɛ nana mɔ sasofoɛ mbanyi ne, bɛhyerɛle bɛ dumaa wɔ abakɔsɛm nwomaa ne anu maa oodwuli Yohanan bosoniɛ Eliasibo aberɛ so.

²⁴ Lewifoɛ mbanyi bɔ né bɛlela bɛ noa ɛhe: Hasabia, Serebia, yeɛ Yesua bɔ ye baba ole Kadimiɛl ne, bɛ ne b’eliɛma mɔ bɔ né begyina bɛ ndendeneɛ so besuro ayɛyelɛ ne asennaa dwein ne aso, kyɛbɔ Nyameɛ sona Dawide hyɛle ne. Kure ko to ye deɛ yie a, né ko koso wato ye deɛ.

²⁵ Né Matania, Bakebukia, Obadia, Mesulam, Talmon ne Akubo bɛte pambim awɛmvoɛ bɔ bɛwɛne sua bɔ bɛfa nningyein besie nu nemɔ ɔ.

²⁶ Sɔ mmerɛ ne te Yoakim bɔ ye baba ole Yesua bɔ ye baba ole Yosadake ne, yeɛ amrado Nehemia ne ɔsɔfo Ɛsra bɔ ɔte ahyerɛlɛniɛ ne b’aberɛ so.

Betu fasue ne bewura AWURADE sa

²⁷ Mmerɛ bɔ betu Yerusalem fasue ne bewura Nyameɛ sa ne, bɛpenane Lewifoɛ nemɔ wɔ nekaa bɔ bɛtete amukoraa. Na bɛfale bɛ bɛwale Yerusalem kyɛ bɛfa ahurusililɛ ne asennaa dweintolɛ, bɛbɔ firikyiwa, adengum ne sangoo bɛboka dwumadie ne wɔ anigye so.

²⁸ Edweintolɛfoɛ fekue boale bɛ noa fili nguro bɔ bapɛ Yerusalem nwo bayia nemɔ anu, ɔne Netofafoɛ nguraa nemɔ anu,

²⁹ Bete Gilgal, yeɛ Geba ne Asimawete mbɔtam, ofikyɛ né edweintolɛfoɛ nemɔ bakyekye nguraa wɔ Yerusalem nwo batenatena nu.

³⁰ Na asɔfo nemɔ ne Lewifoɛ petene bɛ bɔbɔ bɛ nwo, na bɛpetene mmenia ne, pambim nemɔ, ɔne fasue ne anwo.

³¹ Afei mmane Yuda mbanyi beegyinagyinane fasue ne aso, na nduli edweintolɛfoɛ kure mbiri nyɔ maa bɛtole sandene bɛtole ayɛyelɛ dwein. Kure ko fale fasue ne aso famaa so, na ɔfale ye nye hyirele Fofoɛ Pambim ne.

³² Mmenia hemɔ lili bɛ si: Hosaya ne Yuda mbanyi ne bɛ bue,

³³ yeɛ Asaria, Ɛsra, Mesulam,

³⁴ Yuda, Benyamin, Semaya ne Yeremia,

³⁵ yeɛ né asɔfo nemɔ bie behu totorobɛndo: Sakaria bɔ ye baba ole Yonatan bɔ ye baba ole Semaya bɔ ye baba ole Matania bɔ ɔse Mikaya bɔ ye baba ole Sakure bɔ ye baba ole Asafe ne,

³⁶ ne ye abusuafoɛ Semaya, Asarel, Milalae, Gilalae, Mayi, Netanɛl, Yuda ne Hanani. Né betiratira Nyameɛ sona Dawide ye nningyein bɔ ɔfa bɔ edwein ne, na né ahyerɛlɛniɛ Ɛsra oli bɛ nyunu.

³⁷ Bedwuli Abura Pambim ne anwo ne, bɛhɔle bɛ nyunu tee bɛɛfole Dawide kuro atweleɛ bɔ ɔwɔ fasue ne anwuro dɔ ne, na bɛfale Dawide awuro ne anwuro dɔ beedwuli Nzue Pambim bɔ ɔwɔ eyia afiteleɛ ne anwo.

³⁸ Edweintolɛfoɛ kure bɔ ɔtɔ so nyɔ, bɔ bɛye Nyameɛ ayɛ ne, bɛhɔle bɛ sa bɛen so. Na mene mmenia ne bue yɛfale fasue ne aso yɛlili bɛ si. Yɛfale Foonoo Abandenden ne aso yɛɛdwuli Fasue Tɛtrɛtɛɛ ne aso,

³⁹ wɔ Efraim Pambim ne anwuro wɔ Pambim Daa ne anwo ne Tire Pambim ne Hananel Abandenden ne, ɔne Ɛyaa Abandenden ne anwo yɛɛdwuli Mmoaen Pambim ne anwo. Na beegyinane Awɛmvoɛ Pambim ne anwo.

⁴⁰ Yiti edweintolɛfoɛ kure nyɔ bɔ bɛye Nyameɛ ayɛ ne, beegyinane Nyameɛ awuro ne anu berɛ. Yeɛ mene mbanyi nemɔ anu bue, yɛ koso yɛɛgyinane berɛ bie.

⁴¹ Yeɛ asɔfo Eliakim, Maaseya, Miniamin, Mikaya, Elionae, Sakaria ne Hanania bɔ betiratira totorobɛndo ɔ, bɛ koso beegyinane berɛ bie;

⁴² yeɛ Maaseya, Semaya, Eleasa, Yusi, Yehohanan, Malkiya, Elam ne Esere koso beegyinane berɛ bie. Na edweintolɛfoɛ ne tole dwein, na né Yesrahia yeɛ ɔla bɛ noa ɔ.

⁴³ Sɔ kyẽa ne, bɛbɔle afɔleɛ mbiri mbiri belili ahurusi, ofikyɛ Nyameɛ maa bele anigye belili ahurusi. Mmrasua mbanyi nemɔ bɛ ne ngwadaa nemɔ koso bɛgyele bɛ nye. Anigye bɔ bɛgyele wɔ Yerusalem ne, né bɛte ye dedeede.

Asɔneyɛɛ sua nu adwuma

⁴⁴ Sɔ kyẽa ne, sua mɔ bɔ bɛfa akyɛdeɛ nemɔ, fieso aleɛ bɔ bekoli moa bɛkɔfa nemɔ, yeɛ buru nu ngyɛmuɛ ko nemɔ besie nu ne, bɛyele mmenia kyɛ bɛnea so. Mbɔtam berɛ nguro nemɔ, bɛ fieso nningyein kyɛfa bɔ mmeraa ne kyire kyɛ bɛfa bɛma asɔfo ne Lewifoɛ nemɔ ne, né odi kyɛ sɔ mmenia bɔ baye bɛ ne, bɛboaboa ye noa begua nu, ofikyɛ né Yudafoɛ bɛ nye gye asɔfo ne Lewifoɛ b’adwuma bɔ bɛyɔ ne anwo.

⁴⁵ Bɛyɔle bɛ Nyameɛ solɛ adwuma ne, ɔne bɛ nwo petenɛ sɔnenɛ adwuma ne, kyɛbɔ edweintolɛfoɛ ne awɛmvoɛ nemɔ bɛyɔle ne, kyɛbɔ ahyɛdeɛ bɔ Dawide ne ɔwa Solomon bɛhyɛle ne, ɔte ne ala.

⁴⁶ Ofikyɛ ofi tete, fi Dawide ne Asafe aberɛ so, edweintolɛfoɛ nemɔ bele sona bɔ ɔla bɛ noa ɔ, bɔ odi bɛ nyunu maa bɛto dwein bɛye Nyameɛ ayɛ ná bɛda ye ase ɔ.

⁴⁷ Serubabɛl aberɛ so ne Nehemia aberɛ so, daa daa aleɛ bɔ odi kyɛ bɛfa bɛma edweintolɛfoɛ ne pambim awɛmvoɛ ne, Yisraelfoɛ amukoraa bɛfa bɛbrɛle bɛ. Bɛyele bɔ ɔte krongron ne besiele ahameɛ bɛmane Lewifoɛ nemɔ, na bɔ odi kyɛ bɛfa bɛma Aarɔn boso ama nemɔ ne, Lewifoɛ nemɔ ye siele ahameɛ bɛfa bɛmane bɛ.