Nehemia 11 - AHYERƐLƐ KRONGRON

Mmenia batena Yerusalem

¹ Né maen mbanyi nemɔ bɛtete Yerusalem. Na maen ne anu ama ngaa ne guale serewa kyɛ bɛfa so bɛyeye mmenia ne anu buru nu ngyɛmuɛ ko maa bɛbatena kuro krongron Yerusalem nu, ná buru nu ngyɛmuɛ ngona koso bɛtena nguro ngaa nemɔ aso.

² Na maen ne yirale bɛ bɔ bɛ bɔbɔ deinn bɛyele bɛ kunu kyɛ bɛkɔɔtena Yerusalem ne.

³ Mbɔtam mbanyi ne, né bɛtete Yerusalem. Nakoso Yuda nguro ngaa nemɔ aso de, Yisraelfoɛ ngaa ne, asɔfo, Lewifoɛ, asɔneyɛɛ sua nu somvoɛ ne Solomon somvoɛ nemɔ bɛ boso ama nemɔ, né ebiala te ye bɔbɔ ye aseɛ so.

⁴ Yuda abusua kure ne, yeɛ Benyamin abusua kure ne ne bɛ nu biemɔ tete Yerusalem. Yuda abusua kure ne anu ama nemɔ bɛ ɛhe: Ataya bɔ ye baba ole Yusia bɔ ye baba ole Sakaria bɔ ye baba ole Amaria bɔ ye baba ole Sefatia bɔ ye baba ole Mahalaleel bɔ ɔte Pɛrɛse bosoniɛ ne;

⁵ yeɛ Maaseya bɔ ye baba ole Baruku bɔ ye baba ole Kol Hose bɔ ye baba ole Hasaya bɔ ye baba ole Adaya bɔ ye baba ole Yoaribo bɔ ye baba ole Sakaria bɔ ɔse te Silonniɛ ne.

⁶ Pɛrɛse boso ama amukoraa bɔ né bɛtete Yerusalem ne, bɛte koɛhonɛfoɛ ahoneserɛfoɛ ɛyaa nna aburasia ne mmɔtwɛ.

⁷ Na Benyamin abusua kure ne anu ama nemɔ, bɛ ɛhe: Salu bɔ ye baba ole Mesulam bɔ ye baba ole Yode bɔ ye baba ole Pedaya bɔ ye baba ole Kolaya bɔ ye baba ole Maaseya bɔ ye baba ole Yitiɛl bɔ ye baba ole Yesaya ne.

⁸ Na Salu nwo ama ole Gabae ne Salae: bɛte ɛyaa ngona, aburanyɔ ne mmɔtwɛ.

⁹ Sikri awa Yowel yeɛ né ɔnea bɛ so ɔ, na sɛ ɔne berɛ a, Hasenua awa Yuda yeɛ ɔnea kuro ne aso ɔ.

¹⁰ Na asɔfo nemɔ ɛhe: Yedaya bɔ ye baba ole Yoaribo, Yakin,

¹¹ Seraya bɔ ye baba ole Hilkia, bɔ ye baba ole Mesulam, bɔ ye baba ole Sadoke, bɔ ye baba ole Merayote, bɔ ye baba ole Ahitubo bɔ ɔnea Nyameɛ awuro ne aso ne,

¹² ɔne bɛ nwo ama bɔ bɛyɔ AWURADE awuro berɛ ɛsɔnenɛ adwuma ne: bɛ somaa te ɛyaa mmɔtwɛ aburanyɔ ne nyɔ; ne Adaya bɔ ye baba ole Yehoram bɔ ye baba ole Pelalia bɔ ye baba ole Amisi bɔ ye baba ole Sakaria bɔ ye baba ole Pasure bɔ ye baba ole Malkiya,

¹³ ne ye nwo ama, bɛ nana mɔ sasofoɛ awuro mbanyi bɔ bɛ somaa te ɛyaa nyɔ aburanna ne nyɔ; ne Amasae bɔ ye baba ole Asarel bɔ ye baba ole Asae bɔ ye baba ole Mesilemote bɔ ye baba ole Yimere,

¹⁴ ne bɛ nwo ama koɛhonɛfoɛ ahoneserɛfoɛ ɛyaa ko aburanyɔ ne mmɔtwɛ; Sabidiɛl bɔ ye baba ole Hagyedolim yeɛ né ɔla bɛ noa.

¹⁵ Na Lewifoɛ nemɔ ɛhe: Semaya bɔ ye baba ole Hasubo bɔ ye baba ole Asrikam bɔ ye baba ole Hasabia bɔ ye baba ole Buni,

¹⁶ ne Sabetae ne Yosabade bɔ bɛla Lewifoɛ noa, bɔ bɛnea Nyameɛ awuro ne anwo adwuma ne aso,

¹⁷ yeɛ Matania bɔ olili bɛ nyunu maa bɛbɔle mbaeɛ bɛtole ayɛyelɛ dwein, bɔ ye baba ole Mika bɔ ye baba ole Sabidi bɔ ye baba ole Asafe ne, ɔne Bakebukia bɔ ye abusuafoɛ nemɔ anu, Matania nne berɛ a, ye yeɛ ɔwɔ berɛ ne, yeɛ Aboda bɔ ye baba ole Samua bɔ ye baba ole Galal bɔ ye baba ole Yedutun ne.

¹⁸ Lewifoɛ bɔ né bɛwɔ kuro krongron ne anu ne, bɛ mukoraa bɛte ɛyaa nyɔ aburawɔtwɛ ne nna.

¹⁹ Pambim awɛmvoɛ bɔ bɛ ole Akubo, Talmon ne bɛ mmango pambim awɛmvoɛ nemɔ ne, bɛ somaa te ɛyaa ko aburasoo ne nyɔ.

²⁰ Na Yisraelfoɛ ngaa ne, bɛ ne asɔfo ne Lewifoɛ ngaa ne, né bɛwɔ Yuda nguro ne amukoraa so bɔ ebiala ɔte ye aseɛ deɛ so ɔ.

²¹ Nakoso asɔneyɛɛ sua somvoɛ nemɔ de, né bɛte Ofel, na Siha ne Gisepa yeɛ né bɛnea asɔneyɛɛ sua nu somvoɛ nemɔ so ɔ.

²² Lewifoɛ bɔ né bɛtete Yerusalem ne, Yusi yeɛ né ɔnea bɛ so ɔ. Ɔse ole Bani bɔ ye baba ole Hasabia bɔ ye baba ole Matania bɔ ye baba ole Mika bɔ ɔte Asafe bosofoɛ edweintolɛfoɛ nemɔ anu ko ne. Asafe bosofoɛ ne, bɛ yeɛ né bɛnea Nyameɛ awuro berɛ adwuma ne aso ɔ.

²³ Ofikyɛ ɛhene ne fale ahyɛdeɛ bie tole dwaa fale bɛ nwo wɔ nningyein bɔ odi kyɛ bɛfa bɛma bɛ daa biala ɔ.

²⁴ Na Yuda awa Sera ye boso ama nemɔ, Petahia bɔ ye baba ole Mesesabɛl yeɛ né otu ɛhene ne foɛ wɔ nikyee biala bɔ ɔfa maen ne anwo ɔ.

Yerusalem nwo nguraa

²⁵ Na nguraa nemɔ ne bɛ nwo aseɛ ne de, Yudafoɛ nemɔ bie tenane Kiriate Aba ne ye nwo nguraa mɔ nu, Dibɔn ne ye nwo nguraa mɔ nu, yeɛ Yekabeseel ne ye nwo nguraa mɔ nu,

²⁶ Yesua, Molada ne Bete Pelete,

²⁷ Hasa Soale, Beɛ Hyeba ye nwo nguraa mɔ,

²⁸ Siklage, Mekona ne ye nwo nguraa mɔ,

²⁹ Ɛn Rimon, Sora, Yamute,

³⁰ Sanoa, Adulam ne bɛ nwo nguraa mɔ, Lakise ne ye nwo aseɛ mɔ, yeɛ Aseka ne ye nwo nguraa mɔ. Yiti bɛkyekyele asikyeleɛ fi Beɛ Hyeba beedwuli Hinom bɔnza ne anu.

³¹ Benyaminfoɛ nemɔ koso bɛtenane nguro bɔ ofi Geba bɔ ɔkɔ nemɔ aso: Mikimase, Aiya, Betel ne ye nwo nguraa mɔ,

³² Anatote, Nɔbo, Anania,

³³ Hasɔ, Rama, Gitaim,

³⁴ Hadidi, Seboyim, Nebalate,

³⁵ Lode ne Ono bɔ ɔte adwiililɛfoɛ bɔnza ne.

³⁶ Na Lewifoɛ bɔ bɛwɔ Yuda ne, bɛmane bɛ nu biemɔ bɛɛtenane Benyaminfoɛ nu.