Nehemia 10 - AHYERƐLƐ KRONGRON

¹ Nwomaa ne, mmenia hemɔ yeɛ bɛfale bɛ nzɔanoɛ bɛsɔle ye noa ɔ: Hakalia awa Nehemia bɔ ɔte amrado ne, ɔne Sedekia;

² Seraya, Asaria, Yeremia,

³ Pasure, Amaria, Malkiya,

⁴ Hatuse, Sebania, Maluke,

⁵ Harim, Meremote, Obadia,

⁶ Daniel, Gyineton, Baruku,

⁷ Mesulam, Abiya, Migyamin,

⁸ Maasia, Bilgae, Semaya: sɔ mmenia nemɔ bɛte asɔfo.

⁹ Na Lewifoɛ nemɔ ɛhe: Yesua bɔ ye baba ole Asania ne, Binuyi bɔ ɔte Henadade bosoniɛ ne, Kadimiɛl,

¹⁰ ne bɛ mmango Lewifoɛ Sebania, Hodia, Kelita, Pelaya, Hanan,

¹¹ Mika, Rehobo, Hasabia,

¹² Sakure, Serebia, Sebania,

¹³ Hodia, Bani, Beninu.

¹⁴ Bɛ bɔ bɛlela mmenia nemɔ anoa ɛhe: Parose, Pahate Moabo, Elam, Satu, Bani,

¹⁵ Buni, Asegade, Bebae,

¹⁶ Adoniya, Bigiwae, Adin,

¹⁷ Atɛ, Hesekia, Asure,

¹⁸ Hodia, Hasum, Besae,

¹⁹ Harife, Anatote, Nebae,

²⁰ Magepiase, Mesulam, Hesire,

²¹ Mesesabɛl, Sadoke, Yadua,

²² Pelatia, Hanan, Anaya,

²³ Hosea, Hanania, Hasubo,

²⁴ Halohese, Piliha, Sobeke,

²⁵ Rehum, Hasabena, Maaseya

²⁶ Ahia, Hanan, Anan,

²⁷ Maluke, Harim ne Baana.

Apam ne anu dwirɛ

²⁸ Maen ne ngaa ne, asɔfo nemɔ, Lewifoɛ nemɔ, anoa awɛmvoɛ nemɔ, edweintolɛfoɛ nemɔ, asɔneyɛɛ sua nu somvoɛ nemɔ, ɔne ebiala bɔ wahwe ye nwo wafi aseɛ ne aso ama nwo kyɛ okoli Nyameɛ mmeraa so ne, bɛ ne bɛ ye mɔ, bɛ mma mmienzua, bɛ mma mmrasua, ɔne ebiala bɔ ole nimdeɛ ne nworɛ ɔ,

²⁹ bɛ ne bɛ nwo ama ne b’atitire mɔ bɛnomane bɛtale ndaen, kyɛ Nyameɛ mmeraa bɔ ɔnate ye somvoɛ Mose so ɔfa mane bɛ ne, bekoli so, kyɛ bekoli AWURADE, yɛ Mene ye mmeraa dwirɛ ne ye nhyehyɛleɛ ne ye ahyɛdeɛ amukoraa so.

³⁰ Yɛngɔfa yɛ mma mmrasua ngɔma aseɛ ne aso ama agyaa, yeɛ yɛngɔma yɛ mma mmienzua ngogyigya bɛ mma mmrasua.

³¹ Na aseɛ ne aso ama, sɛ bɛfa bɛ nningyein anaa b’aleɛ biala bɛba kyɛ bɛbayɛ ye atɔen afofikyẽa a, yɛngɔtɔ ngofi bɛ brɛ afofikyẽa anaa kyẽa krongron biala. Afei, afoɛ bɔ ɔtɔ so nzoo ne, yɛngɔyɛ boo wɔ aseɛ ne aso. Afei yɛkɔfa kerɛ biala bɔ ebiala ma yɛ ɔ yɛkɔhyɛ ye.

³² Afei koso, yɛde yɛto yɛ nwo so kyɛ, afoɛ biala yɛ nu biala kotua ɛtoɔ sekel ko nu ngyɛmuɛ nza maa bɛkɔfa bɛkɔyɛ Nyameɛ awuro berɛ ɛsɔnenɛ adwuma hemɔ:

³³ paanoo krongron, daa daa aburoo afɔleɛ, daa daa naen yeralɛ afɔleɛ, afofingyẽa mɔ, ɛsraen foforɛ aluolue, aluolue bɔ bahyehyɛ bato berɛ nemɔ, akyɛdeɛ krongron ne, bɔnefakyɛ afɔleɛ bɔ bɛfa bɛyɛ mbata bɛma Yisrael ne, yeɛ yɛ Nyameɛ awuro ɛsɔnenɛ adwuma ne amukoraa.

³⁴ Afei koso, y’asɔfo, Lewifoɛ ne maen ne, yagua serewa yafa yaye mmerɛ bɔ afoɛ biala anu yɛ nu biala ye abusua kɔfa eyein kɔwa Nyameɛ awuro maa bɛkɔyera ye wɔ AWURADE yɛ Nyameɛ afɔleɛ bokyea ne aso, kyɛbɔ bahyerɛ ye wɔ mmeraa ne anu ne.

³⁵ Yale yato yɛ nwo so kyɛ afoɛ noa biala, yɛ fieso aleɛ bɔ yɛkoli moa yɛkɔfa biala, yeɛ aseɛ ne aso bakaa biala, ye mmaa bɔ yɛkoli moa yɛkɔte ne, yɛkɔfa yɛkɔwa AWURADE awuro.

³⁶ Afei koso, yɛkɔfa yɛ bamuɛbaa mmienzua mɔ ne yɛ nandwie mɔ, mmoaen mɔ ne abɔngye mɔ bɛ mma mɔ bɔ oli moa ne yɛkɔhɔ yɛ Nyameɛ awuro yɛkɔɔma asɔfo bɔ bɛyɔ Nyameɛ awuro berɛ ɛsɔnenɛ adwuma ne, kyɛbɔ bahyerɛ ye wɔ mmeraa ne anu ne.

³⁷ Yɛkɔfa ɛhemɔ yɛkɔbrɛ asɔfo nemɔ maa bɛkɔfa bekogua Nyameɛ awuro berɛ pumbu nemɔ anu: yɛ mɔle nu paa paa ne, y’akyɛdeɛ mɔ, bakaa biala so mmaa, nzaa ne ngoo. Yɛ fieso aleɛ wora, yɛkɔfa buru nu ngyɛmuɛ ko yɛkɔbrɛ Lewifoɛ nemɔ, ofikyɛ Lewifoɛ yeɛ odi kyɛ bede buru nu ngyɛmuɛ ko ne befi yɛ nguraa nemɔ amukoraa nu ɔ.

³⁸ Na ɔsɔfo ne, bɔ ɔte Aarɔn bosoniɛ ne, sɛ Lewifoɛ nemɔ bede buru nu ngyɛmuɛ ko ne a, odi kyɛ ɔboka bɛ so. Na buru nu ngyɛmuɛ ko ne, odi kyɛ Lewifoɛ nemɔ bɛfa nu buru nu ngyɛmuɛ ko bɛba yɛ Nyameɛ awuro berɛ pumbu mɔ bɔ bɛfa nningyein besie nu nemɔ anu.

³⁹ Ofikyɛ odi kyɛ Yisraelfoɛ ne Lewi bosofoɛ ne bɛfa b’akyɛdeɛ bɔ ɔte aburoo, nzaa ne ngoo bɛba pumbu mɔ bɔ bɛfa nningyein krongron besie nu nemɔ anu, ɔne nekaa bɔ asɔfo mɔ bɔ bɛyɔ ɛsɔnenɛ adwuma ne, anoa wɛmvoɛ nemɔ ne edweintolɛfoɛ nemɔ bɛwɔ ne. Yɛngobu yɛ nye ngogua yɛ Nyameɛ awuro ne aso.