Nahum 2 - AHYERƐLƐ KRONGRON

Bɛkɔbɔ Ninewe tɔɔ

¹ Bɔ ɔsɛkye nikyee pasapasa ne, ɔ́ba wɔ so. Wɛne ɛwaen nemɔ, fa wɔ nye sra atee ne, bɔ w’abɔsoɛ, ná mia w’anwoserɛ nu paa.

² (Ofikyɛ AWURADE ɔ́ma Yakob osa onya ye ahennie animnyam kyɛ Yisrael ahennie animnyam ne, ofikyɛ apaabɔlɛfoɛ bafe bɛ nningyein bafa, yeɛ basɛkye bɛ bobe mmaen nemɔ.)

³ Ye anwoserɛfoɛ nemɔ b’akokyɛm nwo aboro kɔɔ, na ye koɛhonɛfoɛ nemɔ baherahera kɔbene. Teaseɛnam nemɔ, bɛte see yerɛmyerɛm wɔ ye kyẽa bɔ ɔboaboa ye nwo kɔ koɛ ne, na ɛframmire nemɔ bɛwoso paa.

⁴ Teaseɛnam nemɔ betu amirika kikikiki wɔ dwaa nemɔ aso, bedi akɔneaba wɔ mandamu nemɔ anu, bɛ nwo te kyɛ ɛtɛen, betu amirika kyɛ agralaa.

⁵ Ɔto ye sa frɛ ye atitire mɔ, bɛkɔ a, bɛnate fofalifofali; bɛma bɛ nwo yɛ nyera bɛkɔ fasue ne anwo, na bɛhyehyɛ bɔ bɛfa bɛbɔ bɛ nwo waen ne.

⁶ Babukyebukye asue nemɔ bɛ pambim nemɔ, na ahemvie ne kodwiri kogua.

⁷ Babɔ ye hemmaa kwaterekwa, bahye ye nnure bahɔ; ye ndaluwa mɔ bɛbɔ awuye, bɛpene kyɛ abubure, na bɛfa bɛ sa befi b’ahone.

⁸ Ninewe te kyɛ ɛkwaa fi tetetete, nakoso bɛkɔnwati bɛkɔhɔ. Bɛkɔtea nu kyɛ, “Ɛ́mɔgyina berɛ oo! Ɛ́mɔgyina berɛ oo!” Nakoso ebiala ngɔpɛne ye nye ngɔnea ye si.

⁹ “Ɛ́mɔfẽ ɛdwetɛ ne, ɛ́mɔfẽ sikaa kɔkorɛ ne. Anwonyadeɛ ne, ye bo ngotu, yeɛ nningyein nyɔboɛ serɛ biala wɔ nu!”

¹⁰ Ninewe abɔ tɔɔ, wabɔ tɔɔ, wasɛkye bɔkɔɔ! Mmenia nwo ngaka atu amini, nangoroma mɔ bayɛ hodwoo, bɛ sisia amukoraa yɛ bɛ yea, yeɛ bɛ nyunu amukoraa ayɛ hoyaa!

¹¹ Gyata mɔ b’atenaleɛ ne, ɔwɔ nisua? Nisua yeɛ gyata akrɔngrɔma nemɔ bedidi ɔ, nekaa bɔ gyata nyii ne gyata beleɛ bɛnate, nekaa bɔ ye mma mɔ bɛwɔ bɔ ebiala ɔnha b’adwene ɔ?

¹² Gyata nyii tetele naen nu bɔ ɔkɔso ye mma mɔ di ɔ; na obumane naen kɔme ohuni ye mane ye gyata mmeleɛ nemɔ; ɔfale naen bɔ wahũ ye ne yili ye nekaa bɔ ɔla nemɔ, na ɔfale naen bɔ watete ye nu ne yili ye tuin nemɔ anu.

¹³ Tie, meko metia wɔ, na ngɔyera ye teaseɛnam nemɔ wɔ nwosina ne anu. Ngrandɛ kohũhũ wɔ gyata mmaa nemɔ, ngɔma wɔ noa aleɛ komini kofi aseɛ ye aso, na bɛngɔte wɔ bɔfoɛ mɔ bɛ komvi ko, Asafo AWURADE noa dwirɛ ɛne.