Mika 6 - AHYERƐLƐ KRONGRON

AWURADE le dwirɛ tia Yisrael

¹ Afei, ɛ́mɔtie edwirɛ bɔ AWURADE ɔkã ɔ. Dwɔso ná bɔ wɔ kuro wɔ mmokaa nemɔ nyunu, ná ma pambaa mɔ betie bɔ ɛkã ɔ.

² Ɛmɔ, mmokaa mɔ, yeɛ aseɛ nyinasoɛ pindinn mɔ, ɛ́mɔtie AWURADE kwaadu bɔ ɔbɔ ne, ofikyɛ AWURADE ne ye maen banya edwudwolɛ, na ɔne Yisrael kɔbɔ nguro.

³ “Ao me maen, mayɔ wɔ nzu? Nzikyɛ anwo yeɛ mayɛ wɔ so tɔsom ɔ? Bɔ me kwaadu e!

⁴ Ofikyɛ nyele wɔ mvili Misraim aseɛ so mmale, mbɔle wɔ mvili ngoaasolɛ nu, na nzomane Mose, Aarɔn ne Miriam maa belili wɔ nyunu.

⁵ Ao me maen, kaye porɛ bɔ Moabo hene Balake bɔle ɔ, ɔne mmuayɛɛ bɔ Beɔ awa Balaam ɔfa mane ye, ofi Sitim bɔ ɔkwaadwu Gilgal ɔ, amaa ɔnate so anwu AWURADE tenenee ne.”

Bɔ AWURADE pena ɔ

⁶ “Nzikyɛ yeɛ mva mmra AWURADE nyunu, ná mmamɔ me nu ase wɔ Anwuro Anwuro Nyameɛ ne nyunu ɔ? Mva naen yeralɛ afɔleɛ mɔ yeɛ mmra ye nyunu ɔ, bɔ ɔte nandwie akrɔngrɔma mɔ bɔ bali afoɛ ko anaa?

⁷ Aso AWURADE nye kɔgye mmoaen nyii apee apee nwo, anaakyɛ ngoo asue apee buru apee buru nwo? Aso mva me bamuɛbaa ndua me mmeraatolɛ nwo kerɛ, anaakyɛ mva me bɔbɔ me kunu ba ndua me kra bɔne nwo kerɛ anaa?

⁸ Ao kuro sona, wala bɔ ɔte paa ɔ ali wahyire wɔ, nzikyɛ yeɛ AWURADE pena fi wɔ berɛ ɔ? Bɔ ɔpena ala ole kyɛ ɛkɔyɔ bɔ ɔtengyɛ, ekonwu anwumvoin, ɔne kyɛ ɛne wɔ Nyameɛ bɛkɔnate anwobrɛaseɛ nu ɔ.

⁹ AWURADE komvi tea nu frɛ kuro ne, na bɛ bɔ besuro wɔ dumaa ne yeɛ bɛte nworɛfoɛ ɔ. Ɛ́mɔtie asohwenɛ ne, ɔne ye bɔ wahyehyɛ wato berɛ ne.

¹⁰ Nzɛmmɔne nu anwonyadeɛ, yeɛ tonyi bɔ bawura nu bɔ ɔte akyiwadeɛ ɔ, bɛtɛ wɔ bɔnefoɛ awuro anaa?

¹¹ Aso sona bɔ otira bɔne asusudeɛ, ɔne nnakannaka tonyi ne, aso odi kyɛ mebua ye be anaa?

¹² Ofikyɛ basabasayɔlɛ wali sikafoɛ nemɔ bɛ ti, kuro ne anu ama bɛpɛ ngondombo, na bɛ noa nu dwirɛ te nnakannaka.

¹³ Yiti ngɔbɔ wɔ maa ɛkɔbɔ anwonyerɛ, wɔ bɔne ti ngɔmaa ɛkɔyɛ pasapasa.

¹⁴ Ekodidi, nakoso wɔ ko ngoyi; ɛhɔen kandinga kɔwa wɔ wɔ nu, ɛkɔfa nningyein kosie, nakoso ɛngɔhora ngɔbɔ ye nwo waen; nakoso bɔ ɛkɔbɔ ye nwo waen ne, ngɔmaa okofi wɔ sa wɔ koɛ nu.

¹⁵ Ekolua, nakoso engonya so aleɛ; ekohwi olive mma, nakoso engonya ye ngoo ne bie ngɔfa ngɔpopa; ekohwi bobe mma, nakoso engonya ye nzaa ne bie ngɔno.

¹⁶ Ofikyɛ edi Omri ahyɛdeɛ so, ɔne Ahabo boso ama yɔleɛ amukoraa so, yeɛ ɛmɔdi bɛ foɛtulɛ so. Ɔnate so ngɔmaa ɛkɔyɛ pasapasa, na ngɔma wɔ nu ama bɛkɔkakyi ngorohoɛ nikye. Yiti ɛmɔkɔsoa me maen animguaseɛ.