Mika 3 - AHYERƐLƐ KRONGRON

Nyameɛ bua Yisrael mbanyi ndɛen

¹ Na ngane kyɛ, Ao, mesrɛ ɛmɔ, ɛ́mɔtie oo, Yakob atitire ne Yisrael awuro ama mbanyi. Aso nna ɛmɔ yeɛ odi kyɛ ɛmɔnea kyɛ ndɛen turoloo kɔyɛ adwuma ɔ?

² Nakoso ɛmɔ yeɛ ɛmɔkyi paa, ná ɛmɔkuro bɔne ɔ, ɛmɔwɔngye me maen bɛ nwo wereɛ, ɔne bɛ nwonaen fi bɛ mmowue nwo ɔ;

³ ɛmɔdi me mmenia nwonaen, na ɛmɔpuro bɛ nwonaen befi bɛ nwo, ɛmɔbubu bɛ mmowue nu, ɛmɔpepɛ nu ahuronzi ahuronzi, kyɛ bɛfa begua kukue nu ɔ, kyɛ naen bɔ ogua turonzemaa nu ɔ.

⁴ Afei bekosu bɛkɔfrɛ AWURADE, nakoso ɔngɔtɛ bɛ so. Sɔ mmerɛ ne, ɔkɔye ye nye kɔfea bɛ, ofikyɛ bɛ yɔleɛ te bɔne.

⁵ Ngɔmhyɛlɛfoɛ bɔ bɛma me maen di makyebu, bɔ ɛma bɛ aleɛ maa bedi a bɛkekã kyɛ, “Asomdwee oo, asomdwee oo”, nakoso sɛ ebie amma bɛ aleɛ maa banni a, bɛfa koɛ bɛtoa ye ne, bɔ AWURADE kã fa bɛ nwo ɛne.

⁶ Yiti aleɛ kɔsã ɛmɔ, bɔ ɛmɔngonwu nyekyire biala ɔ, awosii kɔto ɛmɔ, bɔ ɛmɔngɔhyɛ ngɔm biala ɔ. Eyia bɔ ɔta ma ngɔmhyɛlɛfoɛ nemɔ ne ɔkɔɔtɔ, na alehyeleɛ kɔkakyi bɛ so awosii tunn.

⁷ Bɛ bɔ bɛse ase ne, bɛ nyunu kogua ase, na ngonyaayelɛfoɛ kɔfɛre; amba, bɛ mukoraa bekomua bɛ noa, ofikyɛ mmuayɛɛ biala mvi Nyameɛ berɛ ɔmma.

⁸ Nakoso me de, AWURADE Sunzum ama me tumi, wama ndɛenbualɛ turoloo ne anwoserɛ ayi me tɛkyɛ, kyɛ mva Yakob ye mmeraatolɛ ndo ye nyunu, ná mva Yisrael koso ye bɔne ndo ye nyunu.

⁹ Ɛmɔ, ɛ́mɔtie, Yakob awuro atitire, yeɛ Yisrael awuro ama mbanyi bɔ ɛmɔkyi ndɛenbualɛ turoloo, ná ɛmɔkyea pɛpɛɛpɛyɛlɛ amukoraa ɔ,

¹⁰ ɛmɔ bɔ ɛmɔnate mogya hã gualɛ so bɛkyekye Sion, ná ɛmɔfa amumuyɛɛ so bɛkyekye Yerusalem ɔ.

¹¹ Bɛ nu mbanyi mɔ bede fea-ase-ma bebua ndɛengyea, nu asɔfo mɔ koso bɛyɛ ngyerɛkyerɛ bede paa, yeɛ nu ngɔmhyɛlɛfoɛ nemɔ, bɛhyɛ ngɔm bede sikaa’. Nakoso bɛfa bɛ nwo bɛto AWURADE so bɛkã kyɛ, “Aso AWURADE oggyi yɛ si? Musue biala ngɔto yɛ.”

¹² Yiti ɔnate ɛmɔ ti, bekofundam Sion kyɛ eboo; Yerusalem kɔkakyi esire sire, na bokaa bɔ awuro ne gyi so ne, ɔkɔkakyi ɛhɔayeɛ nu asɔneyɛɛ.