Mika 2 - AHYERƐLƐ KRONGRON

Nhyɛsoɛfoɛ, bɛ yaakɔ

¹ Bɛ bɔ besusu amumuyɛɛ nwo, ná bɛdwene bɔne nwo wɔ bɛ bɛen so ne, bɛ yaakɔ! Aleɛ kye a, bɛyɔ sɔ, ofikyɛ ye nwo tumi wura bɛ sa.

² Bɛ nye boro eboo mɔ, na bɛfa bɛ tumi bedide, yeɛ bɛ nye boro awuro mɔ, na bede bɛfa, yiti bɛhyɛ ebie ne ye awuro ama so, yeɛ ebie ne ye agyapadeɛ koso so.

³ Yiti AWURADE nwa nyoo: Tie, medwene kyɛ ngɔprapra musue ngogua abusua he aso, bɔ ɛmɔngɔhora bɛngɔye ye nyamaa bengofi ɛmɔ kɔme ɔ; yeɛ ɛmɔngɔhora bɛngɔnate bɛngɔmoma bɛ bati so, ofikyɛ sɔ mmerɛ ne te mmerɛ tɛɛ.

⁴ Sɔ kyẽa ne, bekobu anyandera bɛkɔfa ɛmɔ nwo, ná basu babɔ awuye yeayea bahã kyɛ, “Edwirɛ piri ato yɛ oo! Wafa me maen agyapadeɛ ne bie oo! Nea kyɛbɔ wale wafi me sa nu ɔ! Wahyɛ yɛ boo mɔ wama bɛ bɔ bahye yɛ nnure ne.

⁵ Yiti ɛmɔngonya ebiala bɔ okogua serewa kɔfa nyamaa kɔhyɛ aseɛ ne wɔ AWURADE asafo nu ɔ.

⁶ Bese bɛ bɔ bɛhyɛ ngɔm nemɔ kyɛ, “Nnɛma ɛmɔhyehyɛ ngɔm, nnɛma ebiala hyɛ ɛhemɔ nwo ngɔm kyire bɛ, amaa ɔnate so animguaseɛ anga yɛ.”

⁷ Ao Yakob boso ama, aso odi kyɛ bɛkã kyɛ, AWURADE Sunzum ne, aso olle aboterɛ anaa? Aso ye sa noa adwuma ɛhe? Aso me dwirɛ onziezie sona bɔ ye bra tengyɛ ɔ?

⁸ Na ɛlɛsa ye, ɛmɔadwɔso batia me maen kyɛ pɔfoɛ, na bɛ bɔ bɛpɛ nu konn, bɔ bɛte mmenia bɔ benguro koɛ ne, ɛmɔpuro bɛ ndaadeɛ aguasoɛ.

⁹ Me maen mmrasua nemɔ, ɛmɔatu bɛ bafi b’awuro nyemenenyemene nemɔ anu, na ɛmɔale m’animnyam bafi bɛ mma mɔ sa nu afebɔɔ.

¹⁰ Ɛ́mɔdwɔso, ná ɛmɔhɔ, ofikyɛ nna ɛwa yeɛ odi kyɛ ɛmɔde bɛ nwome ɔ; ofikyɛ ɛwa nwo agua fiɛ, na okohũ ɛmɔ ewue yealɛ paa.

¹¹ Sɛ ebie nate ɔkekã edwirɛ mbaen mbaen ne ngondombo dwirɛ kyɛ, “Ngɔhyɛ nzaa ne nzaa serɛ nwo ngɔm ngohyire wɔ” a, ye yeɛ bekobu ye kyɛ ɔte maen ngɔmhyɛlɛniɛ ɔ.

¹² Ao, Yakob, ngɔboa ɛmɔ amukoraa ɛmɔ noa amba, amba, ngɔboa Yisrael ngaa ne bɛ noa; ngɔhã bɛ ngɔbɔ nu kyɛ Bosra mmoaen, kyɛ mmoaen kure bɔ begua bɛ tuin nu ɔ, na bɛkɔyɛ dede pee, ɔnate kyɛ bɛte mmenia bɔ bɛsone ne ati.

¹³ Bɔ odwiri ɛwaen gua ne, ɔkɔfo koli bɛ nyunu moa; bele amirika yiridididi bɛkɔfa pambim ne anu, bɛkɔfa nu bekofite bɛkɔhɔ. Bɛ hene ne, ɔkɔsẽ koli bɛ nyunu, na AWURADE yeɛ okotua bɛ noa ɔ.