Mika 1 - AHYERƐLƐ KRONGRON

Nyameɛ baabua wiase ndɛen

¹ AWURADE dwirɛ bɔ ɔlale ye ali hyirele Moreseteniɛ Mika, wɔ Yuda ahemvo Yotam, Ahase ne Hesekia b’aberɛ so, bɔ onwuni ye fale Samaria ne Yerusalem nwo ne, ye ɛhe.

² Ɛ́mɔtie, maen maen mɔ amukoraa; ao aseɛ ne bɔ ɔwɔ so amukoraa, ɛ́mɔyɛ asoɛ bétie, mesrɛ kyɛ AWURADE Nyameɛ ooli adanzeɛ otia ɛmɔ; kyɛ AWURADE ófi ye asɔneyɛɛ sua krongron ne anu yeɛ ɔ́yɔ sɔ ɔ.

³ Ofikyɛ tie, AWURADE fi ye atenaleɛ berɛ ɔ́ba, na okodwu kɔwa kootiatia aseɛ so asɔneyɛɛ nemɔ aso.

⁴ Mmokaa nemɔ kohuro wɔ ye gya bo, na bɔnza nemɔ nu kodwudwa kyɛ amena bɔ ɔla see nye ɔ, kyɛ nzue bɔ bahwie bagua nekaa bɔ ɔtorotoro ɔ.

⁵ Ɛhe amukoraa ɔnate Yakob mmeraatolɛ ti ɔ, yeɛ Yisrael awuro ama bɛ bɔne ti ɔ. Yakob mmeraatolɛ ole beni? Aso nna Samaria ɔ? Yeɛ Yuda asɔneyɛɛ mɔ ole beni? Aso nna bɛ ole Yerusalem?

⁶ Yiti ngɔma Samaria kɔkakyi kurofoen wɔ eburo, ɔne aseɛ bɔ bɛyɛ so bobe boo ɔ. Ngodwiri ye nyɔboɛ mɔ ngogua bɔnza ne anu, ná mama ye fapem mɔ nwo alela berɛ.

⁷ Bɛkɔnyoko ye amoen nemɔ amukoraa pasapasa, ná bafa see bayera ye adwuma akatuaa amukoraa. Ngɔsɛkyesɛkye ye mmosoen amukoraa bɔkɔɔ, ofikyɛ gyanderafoɛ akatuaa yeɛ ɔfa onyane bɛ ɔ, na bekosa bɛkɔfa bɛkɔyɛ gyanderafoɛ akatuaa.

⁸ Na ɛhe ati, ngosu ngɔbɔ awuye; ngɔye me gya ngogua ase ngɔye me nwo ngɔto so; ngɔbɔ awuye kyɛ ɛserɛ so ngyea, ná mali aworabɔlɛ kyɛ patue.

⁹ Ofikyɛ ye ngena nemɔ te kenangɔ; waadwu Yuda, waadwu me maen bɛ pambim ne anoa, waadwu Yerusalem.

¹⁰ Nnɛma ɛmɔbɔ so wɔ Gate, nnɛma ɛmɔsu koraa; ɛ́mɔmunumunu bɛ nwo wɔ mvuture nu wɔ Bete Leafra.

¹¹ Ɛmɔ, Safirefoɛ, ɛ́mɔpɛ nu bɛhɔ bɔ ɛmɔ nwo so ná animguaseɛ ahã ɛmɔ ɔ; Saananfoɛ de, bamvite bamma; Bete Esel bɔ awuye, na ɔkɔye ye sa kofi ɛmɔ bo.

¹² Ofikyɛ Marotefoɛ bɛtole bɛ bo ase bɛnwondɛle mmerɛ paa; nakoso amaneɛnwunɛ yeɛ ofili AWURADE berɛ wale Yerusalem pambim ne anwo berɛ ɔ.

¹³ Lakisefoɛ, ɛ́mɔfa teaseɛnam bɛsosɔ kaka anwonyeralɛ ne: ye yeɛ ɔte bɔne bohyɛlɛ ma Sion awa brasua ne ɔ, ofikyɛ wɔ nu yeɛ benwuni Yisrael mmeraatolɛ ɔ.

¹⁴ Yiti odi kyɛ ɛfa akyɛdeɛ ma Moresete Gate, na Akisibofoɛ kɔyɛ nnakannaka mmenia kɔma Yisrael ahemvo.

¹⁵ Na ɛmɔ, Maresafoɛ, ngosa ngɔfa koliagyaa ngɔbrɛ ɛmɔ; na Yisrael animnyam ne kɔwa Adulam.

¹⁶ Tete wɔ ti ná bɔ tikwa, ɔnate wɔ mma bɔ bɛmaa enya anika ne ati; ma wɔ tikwa ne ɔyɛ kyɛ ɛpɛtɛ deɛ, ofikyɛ bɛkɔhye bɛ nnure bekofi wɔ nwo bɛkɔhɔ.