Mateo 28 - AHYERƐLƐ KRONGRON

Yesu wutingyelɛ

¹ Afofikyẽa ne pɛle nu, na dapɛn ne anu kyẽa bɔ oli moa ne, ye alebahyene, Maria Magdalene ne Maria ko ne bɛhɔle kyɛ bɛkwaanea asieleɛ ne.

² Na yieee, aseɛ wosole serɛserɛ; ofikyɛ Awurade abɔfo fili nyameɛso dwuli ase oomununi nyɔboɛ ne fili asieleɛ ne noa, na ɔtenane so.

³ Né ye nwo ta te kyɛ agralaa, na ye ataadeɛ ne te fufue kyɛ asukɔtwea.

⁴ Na ye nwo suronyi ne ati, awɛmvoɛ nemɔ nwo wosowosole bɛ, na bɛbɔle fuin.

⁵ Na abɔfo ne sele mmrasua ne kyɛ, “Nnɛma ɛmɔsuro! Na mese kyɛ ɛmɔpena Yesu bɔ bɛbɔle ye mmeamudua nu ne.

⁶ Ɔnne wa; ofikyɛ watingye, kyɛbɔ ɔhane ne ala. Ɛmɔbra bɛɛnea nekaa bɔ né ɔla ne.

⁷ Yiti ɛmɔhã ɛmɔ nwo bɛhɔ, ná ɛ́mɔbɔ ye asuafoɛ nemɔ amaneɛ kyɛ watingye wafi awufoɛ nu. Na ɛ́mɔtie, ódi ɛmɔ nyunu moa kɔ Galilea, na berɛ yeɛ ɛmɔkonwu ye ɔ!’ Ɛ́mɔtie, mahã mahyire ɛmɔ.”

⁸ Yiti bele esuronyi ne anigye befili asieleɛ ne aso ndɛndɛ bɛhɔle; na betuli amirika bɛɛbɔle ye asuafoɛ nemɔ amaneɛ.

⁹ Na mvum nu, Yesu yiale bɛ, na ɔhane kyɛ, “Asomdwee hã ɛmɔ oo!” Na bɛwale ye nwo berɛ bɛɛsosɔle ye gya, na bɛsɔnene ye.

¹⁰ Yeɛ Yesu sele bɛ kyɛ, “Nnɛma ɛmɔsuro; na ɛmɔɔhã behyire nniɛma nemɔ kyɛ bɛhɔ Galilea, na dɔ yeɛ bekonwu me ɔ.”

Awɛmvoɛ nemɔ anga nahorɛ

¹¹ Na mmerɛ bɔ bɛ́kɔ nen, yieee, awɛmvoɛ nemɔ bie wale kuro ne anu bɛɛfale bɔ wasisi ne amukoraa bɛbɔle asɔfo mbanyi nemɔ amaneɛ.

¹² Na bɛ ne maen mbanyi nemɔ bɛhɔle agyina bɛfale ye nwo adwene, na bɛmane asraafoɛ nemɔ sikaa bɔ ɔsone ɔ;

¹³ na bɛhane kyɛ, “Ɛmɔhã kyɛ, ‘Kɔngɔen ne bɔ yɛlale ne, yeɛ ye asuafoɛ nemɔ wale beewuale ye bɛhɔle ɔ.’

¹⁴ Na sɛ amrado ne te sɔ dwirɛ ne a, yɛkohyirehyire nu yɛkohyire ye, ná ɛmɔ nwo angyere ɛmɔ.”

¹⁵ Yiti belele sikaa ne, na bɛyɔle kyɛbɔ bɛhã behyirele bɛ kyɛ bɛyɔ ne ala. Na sɔ dwirɛ ne atrɛ wɔ Yudafoɛ nu maa waadwu ɛnɛ.

Yesu ye ye nwo ali kyire ye asuafoɛ nemɔ

¹⁶ Na asuafoɛ buru ne ko ne sili nu bɛhɔle Galilea, bokaa bɔ Yesu hyirele bɛ kyɛ bɛhɔ so ne aso.

¹⁷ Na mmerɛ bɔ benwuni ye nen, bɛsɔnene ye, nakoso bɛ nu biemɔ anne anni.

¹⁸ Yeɛ Yesu pingyele bɛ nwo berɛ sele bɛ kyɛ: “Bafa nyameɛso ne aseɛ so tumi amukoraati bawura me sa.

¹⁹ Yiti ɛmɔhɔ bɛɛyɛ maen maen mukoraa m’asuafoɛ, ná ɛ́mɔbɔ bɛ asu wɔ Baba ne, Baa ne ne Sunzum Krongron ne dumaa nu,

²⁰ ná ɛmɔhyirehyire bɛ maa beli nikyee biala bɔ mahyɛ ɛmɔ ne aso. Na ɛ́mɔtie, me ne ɛmɔ wɔ berɛ mmerɛ biala kodwu ewiase ayieleɛ.”