Mateo 27 - AHYERƐLƐ KRONGRON

Bɛfa Yesu begyina amrado Pilato nyunu

¹ Na aleɛ hyene ne, asɔfo mbanyi ne maen mbanyi amukoraa bɛhɔle Yesu nwo agyina bɛbɔle porɛ kyɛ bekohu ye.

² Bɛkyekyele ye, na bɛfale ye bɛhɔ beewurale amrado Pontio Pilato sa.

Yudase bɔ ye kɔme wu

³ Yudase bɔ ɔyele ye mane ne, mmerɛ bɔ onwuni kyɛ babua Yesu ewue foɛ nen, onuni ye nwo, na ɔfale ɛdwetɛ aburasa ne sa brɛle asɔfo mbanyi ne maen mbanyi nemɔ,

⁴ na ɔhane kyɛ, “Mayɔ bɔne kyɛ maye mogya bɔ odi be ɔ mama ɔ.” Na bebuale kyɛ, “Yɛ de, ɔfa yɛ nwo nzu? Wɔ yeɛ ɔte wɔ dwirɛ ɔ!”

⁵ Na ɔtole ɛdwetɛ ne guale asɔneyɛɛ sua ne anu berɛ, ofili berɛ hɔle, na ɔɔbɔle ye kɔme.

⁶ Yeɛ asɔfo mbanyi nemɔ sesale ɛdwetɛ ne, na bɛhane kyɛ, “Mmeraa mma ate kyɛ yɛkɔfa yɛkogua fotoɛ alaka ne anu ɔ, ofikyɛ ɔte mogya sikaa.”

⁷ Yiti bɛhɔle agyina, na bɛfa bɛtɔle ngukuenwonɛniɛ aseɛ ne, kyɛ so yeɛ bekosie amanvrafoɛ ɔ.

⁸ Yiti bɛfrɛ sɔ aseɛ ne Mogya Aseɛ maa waadwu ɛnɛ.

⁹ Na ɛhe mane bɔ ngɔmhyɛlɛniɛ Yeremia hane ne wale nu kyɛ, “Na belele ɛdwetɛ aburasa ne, nyɔboɛ bɔ Yisraelfoɛ bɛbɔle kyɛ sɔ yeɛ odi ɔ, bɔ bɛfa bɛyɛle ye ti nyɔboɛ bɛtɔle ye ɔ,

¹⁰ na bɛfa bɛtɔle ngukuenwonɛniɛ aseɛ, kyɛbɔ Awurade fale ahyɛdeɛ mane me ne.”

Pilato bisa Yesu dwirɛ

¹¹ Né Yesu gyi amrado ne nyunu berɛ; na amrado ne bisale ye kyɛ, “Wɔ ole Yudafoɛ Hene ne anaa?” Yeɛ Yesu buale ye kyɛ, “Ye ala yeɛ ahã ne.”

¹² Nakoso kwaadu bɔ asɔfo mbanyi ne maen mbanyi nemɔ bɛbɔle ye ne de, wammua ye nwo bie.

¹³ Yeɛ Pilato bisale ye kyɛ, “Aso ɛnde kwaadu worawora bɔ bɛ́bɔ wɔ ye?”

¹⁴ Nakoso wamma ye mmuayɛɛ wɔ kwaadu komapɛ po anwo, na ɛhe yɛle amrado ne nwanwa paa.

Bebua Yesu ewue foɛ

¹⁵ Na aluolue ne anu, né ɔyɛ a amrado ne ɔyakyi kukununiɛ ko bɔ ɛlɔen ne bekuro ɔ ɔma bɛ.

¹⁶ Na sɔ mmerɛ ne, né kukununiɛ bie bɔ oli Baraba bɔ wale dumaa paa ɔ ɔla nu.

¹⁷ Yiti beyiale nen, Pilato bisale bɛ kyɛ, “Bɛ nu nwa yeɛ ɛmɔkuro kyɛ meyakyi ye mema ɛmɔ ɔ? Baraba anaa Yesu bɔ bɛfrɛ ye Kristo ne?”

¹⁸ Ofikyɛ, né Pilato se kyɛ ɛpɔen ti yeɛ baye Yesu bama ye ɔ.

¹⁹ Asa koso, mmerɛ bɔ ɔtenane ndɛenbualɛ bia nu ne, ɔye somane maa bɛɛhã behyirele ye kyɛ, “Nnɛma ndoto biala ba wɔ ne sɔ biaa teneneeniɛ ne b’afia, ofikyɛ, ɔnate ye ti manwu amaneɛ pee wɔ laleɛ nu ɛnɛ kɔngɔen.”

²⁰ Yeɛ asɔfo mbanyi ne maen mbanyi nemɔ bɛyele bɛ nye bewurale ɛlɔen ne kyɛ bɛsrɛ ma ɔyakyi Baraba, ná behũ Yesu.

²¹ Yeɛ amrado ne sa bisale bɛ kyɛ, “Mmenia nyɔ ye, bɛ nu beni yeɛ ɛmɔkuro kyɛ meyakyi ye mema ɛmɔ ɔ?” Na bebuale kyɛ, “Baraba!”

²² Na Pilato bisale bɛ kyɛ, “Nzaade nzikyɛ yeɛ mva nyɛ Yesu bɔ bɛfrɛ ye Kristo ne ɔ?” Na bɛ mukoraa bɛhane kyɛ, “Maa bɛbɔ ye mmeamudua nu!”

²³ Yeɛ Pilato bisale bɛ kyɛ, “Nzu ɔ, nzikyɛ bɔne yeɛ wayɔ ɔ?” Na bɛteateane nu serɛserɛ kyɛ, “Maa bɛbɔ ye mmeamudua nu!”

²⁴ Na Pilato nwuni kyɛ ɔngɔhora ngɔyɔ ye nwo hwee, ná mmom basabasayɔlɛ yeɛ ɔpena ba ne, ɔfale nzue nwunzini ye sa wɔ ɛlɔen ne anyunu berɛ, na ɔhane kyɛ, “Sona teneneeniɛ he, medi be wɔ ye mogya nwo. Ɛmɔ bɔbɔ ɛ́mɔyɔ bɔ ɛmɔkɔyɔ ɔ!”

²⁵ Na maen ne amukoraa bebuale kyɛ, “Ye mogya ɔ́bɔ yɛ ne yɛ mma mɔ ti so!”

²⁶ Yeɛ ɔyakyili Baraba mane bɛ ɔ, na ofini Yesu mbire, na ɔyele ye mane bɛ kyɛ bɛɛbɔ ye mmeamudua nu.

Asraafoɛ goro Yesu nwo

²⁷ Yeɛ amrado n’asraafoɛ fale Yesu bɛhɔle amrado n’aluo berɛ, na bɛmane asraafoɛ ne amukoraa bɛpɛle ye nwo kango.

²⁸ Bɛyele ye ataadeɛ ne, na bɛfale ataadeɛ kɔkorɛ bie bɔ ɔkɔta bɛ kɔme anu ɔ beguale ye so;

²⁹ bɛfale mmowue bɛnwone abotire bɛbɔle ye, na bɛfale elemmire bewurale ye sa famaa nu; yeɛ bebuli ndwerɛ wɔ ye nyunu bɛgorole ye nwo kyɛ, “Yudafoɛ Hene, wɔ ngoa so oo!”

³⁰ Bɛfefele nwɔserɛ beguale ye nwo, na belele ye sa nu elemmire ne bɛfa befifini ye ti anu.

³¹ Na bɛgorole ye nwo beyiele nen, bɛyele ataadeɛ bɔ bafa bakata ye kɔme anu ne befili ye nwo, na bɛfale ye bɔbɔ ye ataadeɛ ne bewurale ye; na bɛfale ye bɛhɔle kyɛ bɛkwaabɔ ye mmeamudua nu.

Bɛbɔ Yesu mmeamudua nu

³² Na befili berɛ bɔ bɛkɔ nen, beyiale Kireneniɛ bie bɔ bɛfrɛ ye Simɔn; na bɛhyɛle ye maa ɔsoale Yesu mmeamudua ne.

³³ Beedwuli nekaa bie bɔ bɛfrɛ berɛ Golgota, bɔ ye bo kyire: “Tire Kokuroka so” nen,

³⁴ bɛmane ye nzaa kekarekekare bɔ bafa abɔwee bafra nu ɔ kyɛ ɔno; nakoso ɔhane ye noa nen, wanguro kyɛ ɔno.

³⁵ Na bɛbɔle ye mmeamudua nu nen, beguale serewa bɛhyɛle ye ndaadeɛ ne, [amaa ɔnate so, bɔ ngɔmhyɛlɛniɛ ne hane ne wawa nu kyɛ: bɛhyɛle me ndena nu bɛfale, na beguale serewa bɛhyɛle me ndaadeɛ.]

³⁶ Afei bɛtenane ase bɛwɛnene ye.

³⁷ Na kwaadu bɔ bɛbɔle ye ne, bɛhyerɛ bɛfa bɛbɔle ye ti anwuro kyɛ, “Yesu Yudafoɛ Hene Ne Ɛhe!”

³⁸ Yeɛ bɛbɔle awerɔm awuefoɛ nyɔ mmeamudua nu bɛbokale ye so, ko wɔ ye sa famaa so, yeɛ ko wɔ ye sa bɛen so.

³⁹ Na bɛ bɔ bɛɛpɛle nu berɛ ne, bɛwosole bɛ ti bɛkekane dwirɛ betiale ye

⁴⁰ kyɛ, “Wɔ bɔ edwiri asɔneyɛɛ sua ne gua, ná ɛfa ɛlɛsa si ne, de wɔ nwo e! Sɛ Nyameɛ Awa ne ole wɔ a, fi mmeamudua ne aso dwu ase!”

⁴¹ Na sɔ ala koso yeɛ asɔfo mbanyi, ahyerɛlɛfoɛ ne maen mbanyi bɛgorole ye nwo ɔ,

⁴² kyɛ, “Olele ebiemɔ, nakoso ɔngora nne ye nwo! Sɛ ye yeɛ ɔte Yisraelfoɛ Hene ne a, maa odwu ase fi mmeamudua ne aso kekesaala ye, na yɛkole ye yɛkoli.

⁴³ Ɔfale ye nwo tole Nyameɛ so; sɛ okuro ye dwirɛ a, maa ɔpepɛ ole ye e; ofikyɛ ɔhane kyɛ, ‘Me ole Nyameɛ Awa ne!’ ”

⁴⁴ Na awerɔm awuefoɛ bɔ bɛbɔle bɛ mmeamudua nu bokale ye so ne koso, bɛpepɛle ye nzoaa sɔ ala.

Yesu wue

⁴⁵ Na ofi eyia duabien mmerɛ ne, awosii katale aseɛ so amukoraa maa ɔɔbɔle eyia nnɔnmmiɛnza.

⁴⁶ Na ɔbɔle kɔyɛ eyia nnɔnmmiɛnza ne, Yesu teane nu serɛserɛ hane kyɛ, “Eli, Eli, lama sabaktani?” Bɔ ye bo kyire kyɛ, “Me Nyameɛ, Me Nyameɛ, nzu ati yeɛ apo me ye?”

⁴⁷ Na mmenia bɔ né begyigyi berɛ ne bie tele sɔ dwirɛ nen, bɛhane kyɛ, “Ɔ́frɛ Elia!”

⁴⁸ Na berɛ ne ala, bɛ nu ko tuli amirika ɔɔfale eminaen, ɔfa bɔle nzaa kekarekekare bie anu, na ɔfa tuale elemmire noa mane ye kyɛ ɔno.

⁴⁹ Nakoso bɛ ngaa ne hane kyɛ, “Yakyi, maa yɛnea sɛ Elia kɔwa koole ye a.”

⁵⁰ Na Yesu teane nu serɛserɛ bieku, na ɔyakyili ye sunzum nu.

⁵¹ Na yieee, ɛtena bɔ ɔpɛ asɔneyɛɛ sua ne anu ne, nu suale nyɔ fili anwuro oodwuli ase; na aseɛ wosole, na nyɔbotaen mɔ nu dwudwale;

⁵² asieleɛ mɔ so bukyebukyele, na mmenia krongron bɔ né balela nemɔ, bɛ nu pee tingyetingyele;

⁵³ na ye wutingyelɛ asi ne, befili asieleɛ nemɔ anu bɛhɔle kuro krongron ne anu, na bɛyele bɛ nwo ali behyirele mmenia pee.

⁵⁴ Na asraafoɛ ɛyaa so panyi ne bɛ bɔ bɛboka ye so, bɔ bɛwɛne Yesu ne, benwuni aseɛwosolɛ ne ne nningyein bɔ osisili nen, besurole paa, na bɛhane kyɛ, “Amba, Nyameɛ Awa ne ɛhe!”

⁵⁵ Né mmrasua pee wɔ berɛ bɔ begyigyi nziɛ bɛnea, na bɛ yeɛ belili Yesu si fili Galilea bɛsole ye ɔ;

⁵⁶ né Maria Magdalene, Maria bɔ ye mma ole Yakobo ne Yosef, yeɛ Sebedeo mma nemɔ bɛ maame boka bɛ so.

Besie Yesu

⁵⁷ Odwuli nɔsoa nen, esikaniɛ bie bɔ ofi Arimatea, bɔ oli Yosef, bɔ ye koso ɔte Yesu suaniɛ ɔ ɔwale.

⁵⁸ Ɔhɔle Pilato berɛ ɔɔsrɛle Yesu fuin ne; na Pilato hyɛle kyɛ bɛfa efuin ne bɛma ye.

⁵⁹ Yiti Yosef fale efuin ne, ɔfale nwera kama kyekyele ye nwo,

⁶⁰ na ɔfale ye tole ye bɔbɔ (Yosef) asieleɛ kumaa foforɛ bɔ wapɛ ye nyɔbotaen nu wato berɛ ɔ nu. Omununi nyɔboɛ pirikua bie katale asieleɛ ne noa, na ofili berɛ hɔle.

⁶¹ Né Maria Magdalene ne Maria ko ne koso bɛwɔ berɛ, bɔ bɛtete asieleɛ ne ndendeneɛ so ɔ.

Asraafoɛ wɛne asieleɛ ne

⁶² Aleɛ hyene ne, bɔ ɔte kyẽa bɔ ɔtoa anwoboaboa kyẽa ne aso nen, asɔfo mbanyi ne Farasiifoɛ beeyiale nu Pilato nyunu,

⁶³ na bɛhane kyɛ, “Yɛ mene, yɛkaye kyɛ sɔ nnakannakaniɛ ne ɔte ase ne, ɔhane kyɛ, ‘Ɛlɛsa asi ne, ngotingye’

⁶⁴ Yiti maa bɛwɛne asieleɛ ne yé maa odwu ɛlɛsa ne aso, na anyɔ a, ye asuafoɛ nemɔ koowua ye [kɔngɔen] kɔhɔ, ná bahã bahyire maen ne kyɛ, ‘Watingye wafi awufoɛ nu;’ na ahaa sɔ nnakannaka bɔ oli nziɛ ne kɔtra daa deɛ ne.”

⁶⁵ Na Pilato sele bɛ kyɛ, “Asraafoɛ ɛhe! Ɛ́mɔfa bɛ bɛhɔ bɛɛwɛne kyɛbɔ ɛmɔkɔhora ɔ.”

⁶⁶ Yiti bɛhɔle bɛɛfale nikyee bɛtale nyɔboɛ ne noa, na bɛmane wɛmvoɛ mɔ wɛnene asieleɛ ne.