Mateo 26 - AHYERƐLƐ KRONGRON

Bɛbɔ Yesu ti so porɛ

¹ Na ɔwale kyɛ Yesu yiele edwirɛ he amukoraa kã nen, osele ye asuafoɛ nemɔ kyɛ,

² “Kyɛbɔ ɛmɔse ne, waha elenyɔ né Abɔtra aluolue ne adwu, na bɛkɔye Sona Awa ne bɛkɔma maa bɛkɔbɔ ye mmeamudua nu.”

³ Yeɛ asɔfo mbanyi ne maen mbanyi beeyiale ɔsɔfo panyi paa bɔ bɛfrɛ ye Kaifa n’ahemvie,

⁴ na bɛbɔle porɛ kyɛ bɛkɔhye Yesu kudɛɛ ná bahu ye.

⁵ Na bɛhane kyɛ, “Yɛngɔyɔ sɔ wɔ aluolue ne abo, anyɔ a né mmenia ayɔ basabasa wɔ maen ne anu.”

Braa bie tutu sakyeɛfona fa gua Yesu ti so

⁶ Na mmerɛ bɔ né Yesu wɔ Betania, wɔ Simɔn kwataniɛ n’awuro berɛ nen,

⁷ braa bie bɔ otira towaa nyɔboɛ serɛ bɔ sakyeɛfona nyɔboɛ serɛ wɔ nu ɔ wale Yesu nwo berɛ. Na Yesu tenane ase bɔ odidi nen, otutuli sakyeɛfona ne fa guale Yesu ti so.

⁸ Nakoso asuafoɛ nemɔ nwuni ye sɔ nen, wanyɛ bɛ fɛ, na bɛhane kyɛ, “Ɛhe bɔ asɛkye ye e, ye bo ole sɛɛ?

⁹ Ahaa bɛkɔhora bɛkɔtɔne sakyeɛfona he nyɔboɛ serɛ, ná bafa sikaa ne bama ehiafoɛ!”

¹⁰ Na Yesu nwuni ye sɔ nen, osele bɛ kyɛ, “Nzu ati yeɛ ɛmɔha braa ye ɔ? Bɔ wayɔ wama me ne, ɔte nikyee piri paa.

¹¹ Ɛmɔ ne ehiafoɛ wɔ berɛ daa, nakoso me de, nna ɛmɔ ne me yeɛ bɛwɔ berɛ daa ɔ.

¹² Sakyeɛfona he bɔ watutu wagua me nipadua so ye, wayɔ sɔ wafa wasiesie me wama me sielɛ.

¹³ Nahorɛ nu, mekã mekyire ɛmɔ kyɛ, ewiase nekaa biala bɔ bɛkɔhã nzɛmba he nen, bɔ braa he ayɔ ne koso, bɛkɔhã bɛkɔfa bɛkɔyɛ ye ngayeɛ.”

Yudase pene so kyɛ ɔkɔye Yesu kɔma

¹⁴ Yeɛ asuafoɛ buru ne nyɔ nemɔ anu ko bɔ bɛfrɛ ye Yudase Yiskariote ne, ɔhɔle asɔfo mbanyi nemɔ berɛ

¹⁵ oobisale kyɛ, “Sɛ meye ye mema ɛmɔ a, nzikyɛ yeɛ ɛmɔkɔfa bɛkɔma me ɔ?” Na bɛhale ɛdwetɛ aburasa bɛfa bɛmane ye.

¹⁶ Na ofi sɔ mmerɛ ne, ɔpenane atee bɔ ɔkɔfa so kɔye ye kɔma ɔ.

Yesu ne ye asuafoɛ di Abɔtra aluolue aleɛ

¹⁷ Na Paanoo kabrɛdi aluolue kyẽa bɔ oli moa ne, asuafoɛ nemɔ wale Yesu berɛ beebisale ye kyɛ, “Nisua yeɛ ekuro kyɛ yɛkosiesie maa ekodi Abɔtra aleɛ ne ɔ?”

¹⁸ Na Yesu buale kyɛ, “Ɛmɔhɔ kuro nu dɔ asomasi berɛ, ná ɛmɔhã behyire ye kyɛ, ‘Kyerɛkyerɛniɛ ne nwa: Me mmerɛ ne apingye, na w’awuro yeɛ me ne m’asuafoɛ yɛkooli Abɔtra (aluolue) ne ɔ.’ ”

¹⁹ Na asuafoɛ nemɔ bɛɛyɔle kyɛbɔ Yesu sele bɛ kyɛ bɛyɔ ne ala, na besiesiele Abɔtra aleɛ ne.

²⁰ Na odwuli nɔsoa nen, ɔne asuafoɛ buru ne nyɔ nemɔ bɛtenane ase kyɛ bedidi.

²¹ Na bedidi nen, ɔhane kyɛ, “Nahorɛ nu, mekã mekyire ɛmɔ kyɛ, ɛmɔ nu ko kɔye me kɔma.”

²² Na bɛ wora bɔle paa, na bɛhyɛle ye bo bebisale ye ngoko ngoko kyɛ, “Awurade, me ahɔ anaa?”

²³ Na obuale kyɛ, “Bɔ ɔne me to asaa didi wɔ talie ko anu ne, ye ala yeɛ ɔkɔye me kɔma ɔ.

²⁴ Sona Awa ne ɔ́kɔ kyɛbɔ bahyerɛ bafa ye nwo ne, nakoso kuro sona bɔ ɔkɔye Sona Awa ne kɔma ne de, ye yaakɔ! Sɛ banwo sɔ sona ne po a, ahaa ɔte paa ma ye!”

²⁵ Yeɛ Yudase bɔ ɔyele ye mane ne, obisale kyɛ, “Kyerɛkyerɛniɛ, me ahɔ anaa?” Na obuale ye kyɛ, “Ye ala yeɛ ahã ne.”

Awurade Adidie Krongron ne bohyɛlɛ

²⁶ Bɛwɔ so bɔ bedidi nen, Yesu fale paanoo, oyirale so, obubuli nu, ɔfa mane asuafoɛ nemɔ, na ɔhane kyɛ, “Ɛ́mɔle beli; ɛhe te me nwonaen.”

²⁷ Yeɛ ɔfale kulie, ɔlale ase, ɔfa mane bɛ, na ɔhane kyɛ, “Ɛmɔ amukoraa bɛ́no bie;

²⁸ ofikyɛ ɛhe yeɛ ɔte me mogya bɔ ogyi berɛ ma apam bɔ mmenia pee ti béhwie bégua bɛ́ma bɔnefakyɛ ɔ.

²⁹ Na mekã mekyire ɛmɔ kyɛ, ofi ɛnɛ bɔ ɔkɔ ɔ, mengɔno bobe nzaa he ko kodwu kyẽa bɔ me ne ɛmɔ yɛkɔno ye foforɛ wɔ me Baba ahennie nu ɔ.”

³⁰ Afei bɛtole ayɛyelɛ dwein, na befili berɛ bɛhɔle Olive Bokaa ne aso.

Yesu hyɛ Petro nzano nwo ngɔm

³¹ Yeɛ Yesu sele bɛ kyɛ, “Me nwo kɔyɛ sundidua kɔma ɛmɔ amukoraa ɛnɛ kɔngɔen ye, ofikyɛ bahyerɛ ye kyɛ, ‘Ngopura mmoaenneafoɛ ne, na mmoaen bɔ bɛwɔ kure ne anu ne, bɛkɔbɔ aya.’

³² Nakoso me wutingyelɛ asi ne, ngoli ɛmɔ nyunu moa ngɔhɔ Galilea.”

³³ Yeɛ Petro buale ye kyɛ, “Sɛ wɔ nwo kɔyɛ sundidua kɔma bɛ mukoraa po a, me de, ɔngɔyɛ sundidua ngɔma me le!”

³⁴ Na Yesu buale ye kyɛ, “Nahorɛ nu, mekã mekyire wɔ kyɛ, ɛnɛ kɔngɔen ye, akɔ ngɔbɔ né ahã ye pɛen nza kyɛ ɛnze me.”

³⁵ Na Petro buale ye kyɛ, “Sɛ ɔba kyɛ me ne wɔ yɛwu po a, mengɔhã kyɛ menze wɔ!” Na sɔ ala yeɛ asuafoɛ nemɔ amukoraa bɛhane ɔ.

Yesu bɔ mbaeɛ wɔ Getsemane

³⁶ Yeɛ Yesu ne bɛ bɛhɔle nekaa bie bɔ bɛfrɛ berɛ Getsemane, na osele asuafoɛ nemɔ kyɛ, “Ɛ́mɔtena wa maa ngɔ dɔ ngɔmɔ mbaeɛ.”

³⁷ Na ɔfale Petro ne Sebedeo mma nyɔ nemɔ ɔbokale ye nwo so, na aworabɔlɛ ne ahunundetelɛ hyɛle ye bo tɔle ye so.

³⁸ Afei osele bɛ kyɛ, “Me kra wora abɔ paa kɔ ewue nu. Ɛmɔtena wa, ná ɛmɔ ne me wɛne.”

³⁹ Na ɔhɔle ye nyunu moa kãa nen, ɔfale ye nyunu butuli berɛ bɔle mbaeɛ kyɛ, “Me Baba, sɛ ɔkɔyɛ yee a, ma sɔ kulie he ofi me so hɔ! Nakoso nna bɔ mepena hɔ ɔ, na mmom bɔ ɛpena ɔ.”

⁴⁰ Osa wale asuafoɛ nemɔ anwo berɛ; onwuni bɛ kyɛ balela, na osele Petro kyɛ, “Yiti ɛmɔangora bɛ ne me anwɛne dɔnhwere ko po?

⁴¹ Ɛ́mɔwɛne ná ɛ́mɔbɔ mbaeɛ, ná ɛmɔangɔ nzɔhwɛ nu. Sunzum ne kuro de, nakoso anwoɔnaen ne yɛ mmerɛ.”

⁴² Osa hɔle ye pɛen nyɔ so ɔɔbɔle mbaeɛ kyɛ, “Me Baba, sɛ sɔ kulie he ngɔhora ngofi me so ngɔhɔ, ná sana meno a, ye de, bɔ ekuro yeɛ ɔyɛ berɛ ɔ.”

⁴³ Na ɔwale bɛ nwo berɛ oonwuni kyɛ balela bieku, ofikyɛ né bɛ nye twaa so.

⁴⁴ Osa yakyili bɛ berɛ hɔle bieku ɔɔbɔle mbaeɛ ye pɛen nza so, na ɔhane edwirɛ komapɛ ne ala.

⁴⁵ Yeɛ osa wale asuafoɛ nemɔ nwo berɛ, na osele bɛ kyɛ, “Yiti ɛmɔtɛda, ɛmɔtɛde ɛmɔ nwome? Ɛ́mɔnea! Mmerɛ ne adwu bɔ bɛbaaye Sona Awa ne bewura bɔnefoɛ mɔ sa ɔ.

⁴⁶ Ɛ́mɔdwɔso! Ɛ́mɔma yɛhɔ! Ɛ́mɔnea, bɔ ɔbaaye me ma ne, wawa!”

Bɛhyele Yesu

⁴⁷ Na Yesu gu so bɔ odwudwo nen, Yudase bɔ ɔte asuafoɛ buru ne nyɔ nemɔ anu ko ne, ɔwale. Na né ɛlɔen bɔ betiratira ngrandɛ ne mmopura, bɔ befi asɔfo mbanyi ne maen mbanyi mɔ berɛ ɔ bɛboka ye so.

⁴⁸ Na sona bɔ ɔyele ye mane ne, né wali moa wamaa bate ye bo kyɛ, “Sona bɔ ngɔfe ye noa ne, ye ɛne; ɛ́mɔhye ye!”

⁴⁹ Na berɛ ne ala, ɔwale Yesu nwo berɛ, na ɔhane kyɛ, “Rabi, asomdwee ha wɔ oo!” Na ɔfele ye noa.

⁵⁰ Yeɛ Yesu sele ye kyɛ, “Me damvo, ɛwale wa kyɛ ɛbaayɔ nzu?” Yeɛ bɛwale Yesu so bɛfale bɛ sa bɛsosɔle ye nu bɛhyele ye.

⁵¹ Na yieee, bɛ bɔ né bɛ ne Yesu wɔ berɛ ne, bɛ nu ko tengyɛle ye sa hwene ye ngrandɛ, na ɔfa bɔle ɔsɔfo panyi paa n’akoaa pɛle ye so.

⁵² Yeɛ Yesu sele ye kyɛ, “Fa wɔ ngrandɛ ne wura nekaa bɔ owura ɔ; ofikyɛ ebiala bɔ ɔtwe ngrandɛ ne, ngrandɛ noa yeɛ okowu ɔ.

⁵³ Ɛdwene kyɛ mengɔhora ngɔsrɛ me Baba maa ɔngɔsoma abɔfo asafokure bɔ bɛbo buru ne nyɔ kekesaala ye maa bɛngɔɔboka me anaa?

⁵⁴ Na ɔkɔyɛ sɛɛ né Ahyerɛlɛ ne awa nu kyɛ, odi kyɛ sɔ yeɛ osi ɔ?”

⁵⁵ Na sɔ mmerɛ ne anu ala, Yesu sele ɛlɔen ne kyɛ, “Yiti ngrandɛ ne mmopura yeɛ ɛmɔfa bɛbakye me ɔ, kyɛ awerɔm awueniɛ bɔ ɛmɔba ye so ɔ? Ndenane asɔneyɛɛ sua ne anu nyɛle ngyerɛkyerɛ daa biala, nakoso ɛmɔangye me.

⁵⁶ Na ɛhe amukoraa asi, amaa ɔnate so bɔ ngɔmhyɛlɛfoɛ nemɔ bahã ye wɔ Ahyerɛlɛ ne anu ne wawa nu.” Yeɛ asuafoɛ nemɔ amukoraati bɛyakyili ye berɛ bɛnwatili.

Yesu gyi Yuda badwa nyunu

⁵⁷ Bɛ bɔ bɛhyele Yesu ne, bɛfale ye bɛhɔle ɔsɔfo panyi paa Kaifa berɛ, nekaa bɔ né ahyerɛlɛfoɛ ne maen mbanyi mɔ bayia ɔ.

⁵⁸ Nakoso Petro de, olili ye si wɔ nziɛ nziɛ oodwuli ɔsɔfo panyi paa n’aluo berɛ, owurale nu, na ɔne somvoɛ nemɔ bɛtenane ase kyɛ ɔnea edwirɛ n’ayieleɛ.

⁵⁹ Na asɔfo mbanyi nemɔ ne badwafoɛ ne amukoraa bɛpenane edwirɛ bɔ bɛkɔfa bekoli Yesu nwo adanzewia ɔ, amaa ɔnate so banya ye bahu ye;

⁶⁰ nakoso bannya bie, ɔwɔ nu kyɛ adanzewiafoɛ pee bɛwale de. Bɔ ɔpɛ ye bo ɔ, mmenia nyɔ dwɔso gyinane,

⁶¹ na bɛhane kyɛ, “Sɔ akoaa he hane kyɛ, ‘Ngɔhora ngobubu Nyameɛ asɔneyɛɛ sua ne, ná mafa ɛlɛsa masi.’ ”

⁶² Na ɔsɔfo panyi paa ne dwɔso gyinane sele Yesu kyɛ, “Engobua ye nwo bie? Nzikyɛ anwo yeɛ mmenia hemɔ bédi adanzeɛ bétia wɔ ye?”

⁶³ Nakoso Yesu yɛle dinn. Yeɛ ɔsɔfo panyi paa ne sele ye kyɛ, “Mefa Nyameɛ teasefoɛ ne meta ndaen megua wɔ so kyɛ, sɛ wɔ ole Kristo ne, Nyameɛ Awa ne a, kã kyire yɛ.”

⁶⁴ Na Yesu buale ye kyɛ, “Ye ala yeɛ ahã ne, nakoso mekã mekyire ɛmɔ kyɛ, ofi ɛnɛ bɔ ɔkɔ ɔ, ɛmɔkonwu Sona Awa ne kyɛ ɔte Tumi sa famaa so, na ɔ́ba anwuro munungum so ɔ!”

⁶⁵ Yeɛ ɔsɔfo panyi paa ne sunzuale ye ndaadeɛ nu hane kyɛ, “Wahã musue dwirɛ! Adanzefoɛ bieku de, yɛhia yɛyɛ ye sɛ? Eh, afei de, ɛmɔate ye musue dwirɛ ne!

⁶⁶ Ɛmɔdwene ye nwo sɛ?” Na bebuale kyɛ, “Ɔfata kyɛ beku ye ɔ.”

⁶⁷ Afei bɛfefele nwɔserɛ beguale ye nyunu, bɛbobɔle ye, yeɛ ebiemɔ bobɔle ye nye so

⁶⁸ hane kyɛ, “Kã kyire yɛ e, Kristo! Nwa yeɛ ɔbɔle wɔ ne?”

Petro po Yesu

⁶⁹ Na Petro de, né ɔte aluo berɛ. Na afaneɛ bie wale ye nwo berɛ oosele ye kyɛ, “Wɔ koso, né ɛne Yesu Galileaniɛ ne yeɛ bɛnate ɔ.”

⁷⁰ Na ɔsale wɔ bɛ mukoraati bɛ nyunu berɛ kyɛ, “Bɔ ɛ́ka ne, menze ye nwo hwee.”

⁷¹ Na ofili berɛ hɔle ngurolo ne anu dɔ ne, afaneɛ foforɛ nwuni ye, na osele bɛ bɔ bɛwɔ berɛ ne kyɛ, “Akoaa he, né ye koso ɔne Yesu Nasarɛteniɛ ne yeɛ bɛnate ɔ.”

⁷² Na Petro tale ndaen sale bieku kyɛ, “Biaa ne, menze ye oo!”

⁷³ Wangyɛ biala, mmenia bɔ né begyigyi berɛ ne, bɛwale beesele Petro kyɛ, “Ɔte nahorɛ, wɔ koso ɛboka bɛ so, na wɔ dwudwolɛ koraa kyire sɔ!”

⁷⁴ Na Petro hyɛle ye bo lili amoen tale ndaen kyɛ, “Biaa ne, menze ye oo!” Na berɛ ne ala, akɔ bɔle.

⁷⁵ Na Petro kayele edwirɛ bɔ Yesu hã hyirele ye ne, kyɛ, “Akɔ ngɔbɔ né ahã ye pɛen nza kyɛ ɛnze me.” Na ofite hɔle oosuni hahii.