Mateo 24 - AHYERƐLƐ KRONGRON

Asɔneyɛɛ sua ne sɛkyelɛ nwo ngɔm

¹ Na Yesu fili asɔneyɛɛ sua ne anu fitele bɔ ɔkɔ nen, ye asuafoɛ nemɔ wale ye nwo berɛ beelili asɔneyɛɛ sua ne nwo ngɔmɔ behyirele ye.

² Na obuale bɛ kyɛ, “Yeɛ ɛmɔnwu ɛhemɔ amukoraa? Nahorɛ nu, mekã mekyire ɛmɔ kyɛ, bɛngɔyakyi nyɔboɛ bɔ ogyi nyɔboɛ so ɔ wɔ wa bɔ bengodwiri bengogua ase ɔ.”

Ndaneanyeɛ ne amaneɛnwunɛ

³ Né Yesu te Olive Bokaa ne aso, na asuafoɛ nemɔ wale ye berɛ ahameɛ beesele ye kyɛ, “Kã kyire yɛ, kyinzu yeɛ ɛhemɔ bɛkɔwa nu ɔ? Na nzikyɛ yeɛ ɔkɔyɛ wɔ walɛ ne ne ewiase ayieleɛ ne nwo sɛngyerɛnneɛ?”

⁴ Na Yesu buale bɛ kyɛ, “Ɛ́mɔnea yé ná ebiala annakalaka ɛmɔ.

⁵ Ofikyɛ mmenia pee bele me dumaa bɛkɔwa bɛkɔɔhã kyɛ, ‘Me ole Kristo ne,’ na bɛkɔlakalaka mmenia pee.

⁶ Ɛmɔkɔte koɛ mɔ ne koɛ mɔ nwo ngunga. Nakoso nnɛma ɛmɔ kunu tete ɛmɔ, ofikyɛ odi kyɛ ɛhemɔ besi, nakoso né ayieleɛ ne onnya oddwuli.

⁷ Na maen kodwɔso kotia maen, ahennie kodwɔso kotia ahennie, yeɛ ɛhɔen ne [anwonyerɛ] ne aseɛwosolɛ kɔwa nekaa ahoroɔ.

⁸ Na ɛhemɔ amukoraa bɛte aworɛ nu yealɛ bɔ oli moa ne.

⁹ “Afei bɛkɔye ɛmɔ bɛkɔma maa ɛmɔkonwu amaneɛ, bekohũhũ ɛmɔ, na ɔnate me dumaa ti maen maen amukoraa bɛkɔpɔ ɛmɔ.

¹⁰ Na afei, ɛhe kɔto mmenia pee sundidua; na bɛkɔyeye bɛ nwo ne bɛ nwo bɛkɔma, ná bapopɔ bɛ nwo ne bɛ nwo.

¹¹ Na ngɔmhyɛlɛfoɛ ngondombofoɛ pee bekodwɔso, ná balakalaka mmenia pee.

¹² Na ɔnate kyɛ amumuyɛɛ kɔsone pee ne ati, mmenia pee b’ehurolɛ bɔ bekurokuro bɛ nwo dwirɛ ne, ye noa kodwo.

¹³ Nakoso bɔ okotindim koodwu ayieleɛ nen, ye yeɛ bekole ye ngoa ɔ.

¹⁴ Na bɛkɔhã ahennie ne nwo nzɛmba he wɔ ewiase amukoraa maa ɔkɔyɛ adanzeɛ kɔma maen maen amukoraa; koraka ná afei ayieleɛ ne awa.

Akyiwadeɛ bɔ ɔbɔ maen ne

¹⁵ “Yiti sɛ ɛmɔnwu akyiwadeɛ bɔ ɔbɔ maen ne, bɔ ngɔmhyɛlɛniɛ Daniel hane ye nwo dwirɛ ne, kyɛ ogyi nekaa krongron berɛ a, (bɔ ɔkenga ne, maa ɔte ye bo),

¹⁶ ye de, bɛ bɔ bɛwɔ Yudea ne, odi kyɛ bɛnwati bɛkɔ mmokaa nemɔ aso;

¹⁷ sona bɔ ɔwɔ sua ti afia ne, onni kyɛ odwu ase kyɛ ɔkwaafa nikyee biala fi ye awuro;

¹⁸ yeɛ sona bɔ ɔwɔ fieso ne koso, onni kyɛ osa ye si kɔ kyɛ ɔkwaafa ye tena.

¹⁹ Na pemvoɛ mɔ ne bɛ bɔ bɛma mmaa nyɔfone wɔ sɔ mmerɛ ne anu de, bɛ yaakɔ!

²⁰ Na ɛ́mɔbɔ mbaeɛ, ná ɛmɔ nwatilɛ ne wamma prakasua mmerɛ anaa afofikyẽa!

²¹ Ɔnate kyɛ, amaneɛnwunɛ piri bɔ ɔkɔwa ne, ofi mmerɛ bɔ Ɛdangama bɔle wiase bɔ ɔbaadwu ɛnɛ ɔ, ye sɛso ɔwwale le, na sɔ bieku koso ngɔwa le.

²² Na sɛ bande sɔ ngyẽa ne aso a, ahaa bengole sona biala ngoa; nakoso ɔnate bɛ bɔ baneanea nu baye bɛ ne ati, bɛkɔte sɔ ngyẽa ne aso.

²³ “Na sɛ ebiala kã kyire ɛmɔ kyɛ, ‘Nea, Kristo ne wɔ wa!’ anaakyɛ ‘Ye yeɛ ɔwɔ dɔ ne!’ a, nnɛma ɛmɔde bedi.

²⁴ Ɔnate kyɛ, kristo ngondombofoɛ ne ngɔmhyɛlɛfoɛ ngondombofoɛ kodwɔso, na bɛkɔyɔ nzɛngyerɛnneɛ ne anwanwadeɛ mbiri mbiri, bɔ ɔkɔhora kɔwa kyɛ, bɛkɔlakalaka bɛ bɔ Nyameɛ aneanea nu waye bɛ ne po.

²⁵ Ɛ́mɔtie! Mali moa mahã mahyire ɛmɔ dada.

²⁶ “Yiti, sɛ bɛkã bekyire ɛmɔ kyɛ, ‘Nea, ɔwɔ ɛserɛ so dɔ’ a, nnɛma ɛmɔkɔ dɔ; yeɛ sɛ bɛkã kyɛ, ‘Nea, ɔwɔ pumbu nemɔ anu dɔ’ a, nnɛma ɛmɔde bedi.

²⁷ Na kyɛbɔ agralaa tete fi eyia afiteleɛ, ná ɔta kodwu eyia atɔleɛ ne, sɔ ala yeɛ Sona Awa ne walɛ ne koso ɔkɔyɛ ɔ.

²⁸ Na nekaa bɔ efuin la ne, berɛ yeɛ mbɛtɛ bɛboa bɛ noa ɔ.

Sona Awa ne walɛ

²⁹ “Na sɔ mmerɛ ne anu amaneɛnwunɛ ne asi ne, berɛ ne ala, eyia kɔkakyi awosii, na ɛsraen ngɔta, na nzramaa mɔ kotutu kofi anwuro kogua ase, na anwuro tumi mɔ kɔwoso;

³⁰ na afei Sona Awa ne, ye sɛngyerɛnneɛ kɔla ali wɔ ewienu; na aseɛ so mmusua kure amukoraa bɛkɔbɔ awuye, na bekonwu Sona Awa ne kyɛ ɔ́ba wɔ nyameɛso munungum nu wɔ tumi ne animnyam kandinga nu ɔ.

³¹ Na ɔkɔsoma ye abɔfo mɔ maa bɛkɔfa totorobɛndohulɛ akomvi piri bɛkɔwa, na bɛkɔboaboa bɛ bɔ waneanea nu waye bɛ nemɔ noa bekofi mvrama nna nemɔ anu, kofi anwuro noa koodwu ye noa.

Borɔdoma bakaa ne nwo nikyeesualɛ

³² “Borɔdoma bakaa nwo anyandera ne, ɛ́mɔma ɔyɛ nikyeesualɛ ma ɛmɔ: Sɛ ye mmaen nemɔ nya yɛ frɔmfrɔm, ná ɔfefɛ a, né ɛmɔse kyɛ ahuhuro mmerɛ apingye.

³³ Sɔ ala yeɛ sɛ ɛmɔnwu sɔ nningyein nemɔ amukoraa a, odi kyɛ ɛmɔnwu kyɛ wapingye, na wadwu anoa nu berɛ.

³⁴ Nahorɛ nu, mekã mekyire ɛmɔ kyɛ, aworɛ ndoatoasoɛ he ngɔpɛ nu, sana ɛhemɔ amukoraa bawa nu koraka.

³⁵ Anwuro ne aseɛ kɔpɛ nu kɔhɔ, nakoso me dwirɛ de, ɔngɔpɛ nu le.

Kyẽa ne ne dɔnhwere ne

³⁶ “Na kyẽa ne ne dɔnhwere ne de, ebiala nze; nyameɛso abɔfo mɔ [anaa Baa ne] po nze, sana Baba ne ngome twe.

³⁷ Na kyɛbɔ Nowa aberɛ so deɛ ne yɛle ne, sɔ ala koso yeɛ Sona Awa ne walɛ ɔkɔyɛ ɔ.

³⁸ Sɔ mmerɛ ne, anzana nzueyilɛ ne baawa ne, mmenia didili na bɛnone, begyigyale, na bɛmane agyaa maa odwuli kyẽa bɔ Nowa fole ɛlɛen ne anu ɔ;

³⁹ na né bɛnze bɔ ɔbaasi ɔ maa oodwuli kyɛ nzueyilɛ ne wale oopiane bɛ mukoraa hɔle ɔ; na sɔ ala yeɛ Sona Awa ne walɛ ɔkɔyɛ ɔ.

⁴⁰ Sɔ mmerɛ ne, mmienzua nyɔ bɔ bɛwɔ fieso ɔ, bɛkɔfa ko, né bayakyi ko berɛ.

⁴¹ Mmrasua nyɔ bɔ besi aburoo ɔ, bɛkɔfa ko, né bayakyi ko berɛ.

⁴² Yiti ɛ́mɔwɛne, ofikyɛ ɛmɔnze kyẽa horɛ bɔ ɛmɔ Awurade kɔwa ɔ.

⁴³ Na ɔsɛ kyɛ ɛmɔnwu ye kyɛ, sɛ né awuro mene ne ɔse kɔngɔen mmerɛ horɛ bɔ awueniɛ ne kɔwa a, ahaa ɔkɔwɛne, bɔ ahaa ɔngɔma ongootu ye anoa bo ongoowua ye ɔ.

⁴⁴ Yiti ɛmɔ koso, ɛ́mɔboaboa ɛmɔ nwo bésie, ɔnate kyɛ mmerɛ bɔ ɛmɔnzusu ɔ nu yeɛ Sona Awa ne kɔwa ɔ.

Akoaa nahorɛniɛ ne akoaa bɔnefoɛ ne

⁴⁵ “Na nwa koraa ole akoaa nahorɛniɛ ne nworɛniɛ, bɔ ye mene afa ye awuro berɛ ngoaa mɔ wawura ye sa, kyɛ ɔma bɛ aleɛ wɔ mmerɛ bɔ ɔsɛ ɔ nu ɔ?

⁴⁶ Akoaa bɔ ye mene ba banwu ye kyɛ sɔ ala yeɛ ogu so ɔyɔ ne, onya saleɛ.

⁴⁷ Nahorɛ nu, mekã mekyire ɛmɔ kyɛ, ɔkɔfa ye nningyein amukoraa kowura ye sa.

⁴⁸ Nakoso sɛ akoaa bɔnefoɛ ne de, ɔkã ye wɔ ye ti anu kyɛ, ‘Me mene kɔhyɛ koraka ná wawa,’

⁴⁹ ná ɔhyɛ ye bo ɔbo ye mmango ngoaa nemɔ, ná ɔne akɔnomnzafoɛ bedidi bɛno a,

⁵⁰ ye de, sɔ akoaa ne mene kɔwa kyẽa bɔ okoofu ye nu ɔ, ɔne dɔnhwere bɔ ɔnze ɔ nu;

⁵¹ na ɔkɔpepɛ akoaa ne nu ahuronzi ahuronzi, ná wamaa wanya nyaatwomfoɛ bɛ kyɛfa ne bie; na berɛ yeɛ mmenia kosũ ná banwose bɛ gye ɔ.