Mateo 23 - AHYERƐLƐ KRONGRON

Ahyerɛlɛfoɛ ne Farasiifoɛ nwo kɔkɔbɔlɛ

¹ Afei Yesu sele ɛlɔen ne ne ye asuafoɛ nemɔ kyɛ,

² “Mose bia so yeɛ ahyerɛlɛfoɛ mɔ ne Farasiifoɛ mɔ bɛtena ɔ;

³ yiti bɔ bɛkɔhã bekohyire ɛmɔ kyɛ ɛmɔyɔ biala, ɛ́mɔli so ná ɛ́mɔyɔ. Nakoso bɛ yɔleɛ de, nnɛma ɛmɔyɔ bie; ofikyɛ bɛmmɔ edwirɛ bɔ bɛkã ne anwo bra.

⁴ Bɛkyekye nningyein nonɛnonɛ bɛto mmenia bati so; nakoso bɛ de, bɛmva bɛ sa mmɛseka ko po bɛnzɔ nu ma bɛmma so.

⁵ Bɔ bɛyɔ amukoraa te bɔ mmenia konwu bɛ ɔ; ofikyɛ bɛyɛ bɛ ngayeɛ nwomaa ne tɛtrɛtɛɛ, yeɛ bɛyɛ bɛ ndaadeɛ noa bɔ banwo ne ndendenn.

⁶ Bekuro mbanyi bia wɔ ɛpoentolɛ bo, ɔne mbanyi bia wɔ nyianu sua mɔ nu,

⁷ ɔne kyɛ mmenia kobisa bɛ ahye wɔ dwaaso ɔ, ɔne kyɛ mmenia kɔfrɛ bɛ ‘kyerɛkyerɛniɛ’ ɔ.

⁸ Nakoso ɛmɔ de, onni kyɛ bɛfrɛ ɛmɔ: ‘kyerɛkyerɛniɛ’ ɔ, ofikyɛ ɛmɔ Kyerɛkyerɛniɛ te komapɛ, na ɛmɔ amukoraa bɛte aliɛmaa.

⁹ Yeɛ nnɛma ɛmɔfrɛ ebiala ɛmɔ baba wɔ aseɛ ye aso, ɔnate kyɛ ɛmɔle Baba komapɛ, na ye yeɛ ɔwɔ nyameɛso ne.

¹⁰ Afei koso, nnɛmɔma bɛfrɛ ɛmɔ ‘meneɛ mɔ,’ ɔnate kyɛ ɛmɔ Mene te komapɛ, bɔ ye ole Kristo ne.

¹¹ Bɔ ɔte titire wɔ ɛmɔ nu ne, ɔkɔyɛ ɛmɔ somvoɛ.

¹² Na ebiala bɔ ɔmoma ye nwo so ne, bɛkɔbrɛ ye ase; yeɛ ebiala bɔ ɔbrɛ ye nwo ase ne, bɛkɔma ye so.

Nyaatwomyɛlɛ nwo kɔkɔbɔlɛ

¹³ “Ahyerɛlɛfoɛ ne Farasiifoɛ, ɛmɔ yaakɔ! Nyaatwomfoɛ! Ofikyɛ, ɛmɔto nyameɛso ahennie ne anu betia mmenia. Ɛmɔ bɔbɔ a ɛmɔngɔ nu, nakoso bɛ bɔ bɛ́kɔ nu ne, ɛmɔmma bɛ ate mma bɛngɔ nu. [

¹⁴ Ahyerɛlɛfoɛ ne Farasiifoɛ, ɛmɔ yaakɔ! Nyaatwomfoɛ! Ofikyɛ, ɛmɔbɔ akunafoɛ mmrasua apoo bede bɛ nningyein, nakoso ɛmɔpati bɛbɔ mbaeɛ tendenn bekyire. Ɛhe ati, bekobua ɛmɔ foɛ piri paa!]

¹⁵ “Ahyerɛlɛfoɛ ne Farasiifoɛ, ɛmɔ yaakɔ! Nyaatwomfoɛ! Ofikyɛ, ɛmɔkyini ɛpo ne aseɛ so kyɛbɔ ɛmɔkonya sona ko maa ɔkɔɔboka ɛmɔ fekue ne aso ɔ, na sɛ ɛmɔnya ye a, ɛmɔmaa ɔyɛ amaneɛnwunɛ kuroniɛ mmɔhoɛ nyɔ tra ɛmɔ bɔbɔ.

¹⁶ “Ɛmɔ yaakɔ, anyesiniwaafoɛ bɔ ɛmɔkyire atee ɔ, bɔ ɛmɔnwa: ‘Sɛ ebie fa asɔneyɛɛ sua ne ɔta ndaen a, ɔndo ndaen; nakoso sɛ ebie fa asɔneyɛɛ sua ne anu sikaa kɔkorɛ ɔta ndaen de a, ɔto ndaen.’

¹⁷ Ɛmɔ, ngwaseafoɛ ne anyesiniwaafoɛ! Beni yeɛ odi mu ɔ? Esikaa kɔkorɛ ne, anaakyɛ asɔneyɛɛ sua ne bɔ ɔma sikaa kɔkorɛ ne nwo te ne?

¹⁸ Yeɛ ɛmɔnwa, ‘Sɛ ebie fa afɔleɛ bokyea ne ɔta ndaen a, ɔndo ndaen; nakoso sɛ ebie fa ayɛyɛdeɛ bɔ ogua so ne ɔta ndaen de a, ɔto ndaen.’

¹⁹ Anyesiniwaafoɛ! Beni yeɛ odi mu ɔ? Ayɛyɛdeɛ ne, anaakyɛ afɔleɛ bokyea ne bɔ ɔma ayɛyɛdeɛ ne nwo te ne?

²⁰ Yiti ebiala bɔ ɔfa afɔleɛ bokyea ne ɔta ndaen ne, ɔfa ye ne bɔ ogua so amukoraa yeɛ ɔta ndaen ɔ;

²¹ yeɛ ebiala bɔ ɔfa asɔneyɛɛ sua ne ɔta ndaen ne, ɔfa ye ne bɔ ɔte nu ne yeɛ ɔta ndaen ɔ.

²² Na ebiala bɔ ɔfa nyameɛso ta ndaen ne, ɔfa Nyameɛ ahennie bia ne, ɔne bɔ ɔte so ne yeɛ ɔta ndaen ɔ.

²³ “Ahyerɛlɛfoɛ ne Farasiifoɛ, ɛmɔ yaakɔ! Nyaatwomfoɛ! Ofikyɛ, ɛmɔtua ɛmeɛ, ɛmanyire ne ɛkaberɛ so buru nu ngyɛmuɛ ko, nakoso ɛmɔnni mmeraa ne anu dwirɛ bɔ ohia paa ne aso, bɔ ye ole pɛpɛɛpɛyɛlɛ, anwumvoinnwunɛ ne gyidie. Na ɛhemɔ yeɛ ahaa odi kyɛ ɛmɔyɔ ɔ, bɔ ɛmɔnyakyi ye ngaa nemɔ koso yɔlɛ ɔ.

²⁴ Anyesiniwaafoɛ bɔ ɛmɔkyire atee ɔ, bɔ ɛmɔsongyi anonneɛ so bɛye nwɔsea bɛto, nakoso ɛmɔme afupɔngɔ ɔ!

²⁵ “Ahyerɛlɛfoɛ ne Farasiifoɛ, ɛmɔ yaakɔ! Nyaatwomfoɛ! Ofikyɛ, ɛmɔnwunzi kwangoa ne prɛte nwo, nakoso bɛ kunu de, apoo ne adifuu ayi bɛ tɛkyɛ.

²⁶ Farasiiniɛ anyesiniwaaniɛ! Wɔ, di moa nwunzi kwangoa ne prɛte ne anu koraka, na ye nwo koso kofi.

²⁷ “Ahyerɛlɛfoɛ ne Farasiifoɛ, ɛmɔ yaakɔ! Nyaatwomfoɛ! Ofikyɛ, ɛmɔte kyɛ asieleɛ bɔ bafa ewure bahura ye nwo ɔ, bɔ ye nwo bɔ enwu ye ne ɔyɛ nyemene, nakoso nu dɔ de, efuin mmowue ne efiɛ amukoraa ayi ye tɛkyɛ.

²⁸ Na ɛmɔ koso, sɔ ala yeɛ ɛmɔyɛ ɛmɔ nwo kyɛ mmenia bɔ bɛtengyɛ ɔ wɔ mmenia nyunu ɔ, nakoso ɛmɔ nu de, nyaatwom ne amumuyɛɛ ayi ye to.

Nyaatwomyɛlɛ nwo asotwe

²⁹ “Ahyerɛlɛfoɛ ne Farasiifoɛ, ɛmɔ yaakɔ! Nyaatwomfoɛ! Ofikyɛ, ɛmɔto ngɔmhyɛlɛfoɛ b’asieleɛ so, yeɛ ɛmɔsiesie teneneefoɛ b’asieleɛ so kama,

³⁰ na ɛmɔkã kyɛ, ‘Sɛ né yɛte ase yɛ mbanyi mɔ aberɛ so a, ahaa yɛngɔboka bɛ so ma bengohwie ngɔmhyɛlɛfoɛ mɔ bɛ mogya bengogua.’

³¹ Yiti ɛmɔdi adanzeɛ betia ɛmɔ nwo, kyɛ ɛmɔte bɛ bɔ behuhuni ngɔmhyɛlɛfoɛ nemɔ ne bɛ bosofoɛ.

³² Ɛmɔ nana mɔ b’asusudeɛ ne, ɛmɔ koso ɛmɔhɔ so bewura ma oyi tɛkyɛ!

³³ Ewoo, ɛkyenebene mmaa! Ɔkɔyɛ sɛɛ né ɛmɔahora banwati bafi amaneɛnwunɛ kuro ndɛenbualɛ ne anu?

³⁴ Yiti, ɛ́mɔtie, mésoma ngɔmhyɛlɛfoɛ ne nworɛfoɛ ne ahyerɛlɛfoɛ maa bɛba ɛmɔ berɛ, na ɛmɔkohũ bɛ nu biemɔ bɛkɔbɔ bɛ mmeamudua nu, yeɛ ɛmɔkofi bɛ nu biemɔ mbire wɔ ɛmɔ nyianu sua mɔ nu, ná ɛmɔatane bɛ nye bafi kuro so bahɔ kuro so.

³⁵ Ye sɔ ne ati, mogya tenenee amukoraa bɔ bahwie bagua aseɛ so, ofi teneneeniɛ Abel mogya so kodwu Barakia awa Sakaria, bɔ ɛmɔhuni ye wɔ nekaa krongron berɛ ne afɔleɛ bokyea ne b’afia ne, bɛ mogya ne nwo asotwe kɔwa ɛmɔ so.

³⁶ Nahorɛ nu, mekã mekyire ɛmɔ kyɛ, ɛhemɔ amukoraa nwo asotwe kɔwa ɛnɛmmafoɛ so!

Yesu kuro Yerusalem dwirɛ

³⁷ “O, Yerusalem, Yerusalem, wɔ bɔ eku ngɔmhyɛlɛfoɛ ná ɛboro bɛ bɔ basoma bɛ wɔ berɛ nyɔboɛ ɔ! Mmerɛ pee yeɛ mbenane kyɛ ahaa meboaboa wɔ mma noa, kyɛbɔ akɔtaen boaboa ye mma noa wura ye ndaa bo ɔ, nakoso ɛmɔambene so!

³⁸ Ɛ́mɔtie, bɛkɔyakyi ɛmɔ awuro ne berɛ dandue kɔma ɛmɔ.

³⁹ Na mekã mekyire ɛmɔ kyɛ, ofi ɛnɛ bɔ ɔkɔ ɔ, ɛmɔgonwu me ko kodwu kyɛ ɛmɔkɔhã kyɛ, ‘Saleɛ ole bɔ ɔnate Awurade dumaa nu ɔ́ba ye!’ ”