Mateo 22 - AHYERƐLƐ KRONGRON

Atɔmvorɛ poentolɛ nwo anyandera

¹ Na Yesu dwudwo hyirele bɛ wɔ anyandera nu bieku kyɛ,

² “Nyameɛso ahennie ne, ɔte kyɛ ɛhene bie bɔ ɔtole atɔmvorɛ poen mane ɔwa bienzua ɔ.

³ Na ɔsomane ye somvoɛ mɔ kyɛ bɛɛfrɛfrɛ bɛ bɔ wato ye sa wafrɛ bɛ kyɛ bɛbra atɔmvorɛ ne abo ne, nakoso bambene so kyɛ bɛkɔwa ɔ.

⁴ Yiti osa somane somvoɛ foforɛ mɔ kyɛ, ‘Ɛmɔɔhã behyire bɛ bɔ mato me sa mafrɛ bɛ ne kyɛ: Ɛ́mɔtie, masiesie m’aleɛ ne mayie, mahu me nandwie nyii mɔ ne me nyɛmmoa bɔ balɔ ɔ, na mayie nikyee biala, yiti ɛmɔbra atɔmvorɛ ne abo.’

⁵ Na bɛ wora, bamva banyɛ dwirɛ, na besili nu bɛhɔle b’atee; ko hɔle ye fieso, ko oolili ye dwaa,

⁶ yeɛ bɛ ngaa ne wora bɛhyele ye somvoɛ nemɔ beguale bɛ nyunu ase, na behuni bɛ.

⁷ Na ɛhene ne tele ne, ye ahone huli, na ɔsomane ye asraafoɛ maa beehuhuni sɔ awudifoɛ nemɔ, na bɛyerale bɛ kuro.

⁸ Afei osele ye somvoɛ mɔ kyɛ, ‘Basiesie atɔmvorɛ ne bayie de, nakoso bɛ bɔ ndole me sa mvrɛle bɛ ne, bɛmvata.

⁹ Yiti ɛmɔhɔ mmorɔnoɛ nemɔ aso, na mmenia somaa biala bɔ ɛmɔkonwu bɛ ne, ɛ́mɔfrɛfrɛ bɛ ma bɛbra atɔmvorɛ ne abo.’

¹⁰ Na sɔ somvoɛ nemɔ besili nu bɛhɔle dwaa nemɔ aso bɛɛboaboale mmenia bɔ benwuni bɛ amukoraa noa, bɔne mmenia ne mmeni paa; na mmenia beeyili atɔmvorɛ sua ne anu tɛkyɛ.

¹¹ “Na ɛhene ne wurale nu kyɛ ɔkwaanea bɛ bɔ bawa atɔmvorɛ ne abo nen, onwuni biaa bie wɔ berɛ, bɔ né ye de owwura atɔmvorɛfalɛ ataadeɛ ɔ.

¹² Na obisale ye kyɛ, ‘Damvo, ɛyɛle sɛɛ yeɛ ɛwale wa ɔ, bɔ wɔ de nna atɔmvorɛfalɛ ataadeɛ yeɛ ewura e?’ Na wangora wammukye ye noa.

¹³ Yeɛ ɛhene ne sele somvoɛ nemɔ kyɛ, ‘Ɛ́mɔkyekye ye gya ne ye sa, ná ɛmɔfindi ye bɛto bondua dɔ awosii ne anu; dɔ yeɛ mmenia kosũ ná banwose bɛ gye ɔ.’

¹⁴ Ofikyɛ, bafrɛ pee, nakoso kãa bie yeɛ baneanea nu bayɛ bɛ ɔ.”

Ɛtoɔtualɛ nwo adwobisa

¹⁵ Yeɛ Farasiifoɛ mɔ bɛhɔle bɛɛbɔle porɛ kyɛbɔ bɛkwafa edwirɛ bɛkɔtetɛ Yesu noa ɔ.

¹⁶ Na bɛsomane b’asuafoɛ mɔ ne Herodefoɛ maa bɛwale ye berɛ beebisale ye kyɛ, “Kyerɛkyerɛniɛ, yɛse kyɛ ɛte nahorɛniɛ, na ekyirekyire Nyameɛ atee ne turoloo, ɛnyɛ nyeyemuɛ; ofikyɛ ɛmva wɔ nye ndo mmenia bɛ dibea.

¹⁷ Yiti kyire yɛ w’adwene. Aso mmeraa ma ate kyɛ yɛtua ɛtoɔ yɛma Kaesare, anaakyɛ ɔmma ate?”

¹⁸ Nakoso Yesu nwuni b’adwenemmɔne ne, na obuale kyɛ, “Ɛmɔ, nyaatwomfoɛ! Nzu ati yeɛ ɛmɔbaatetɛ me noa ɔ?

¹⁹ Ɛ́mɔfa sikaa bɔ bɛfa betua ɛtoɔ ne bie behyire me!” Na bɛfale denare ko bɛbrɛle ye.

²⁰ Na obisale bɛ kyɛ, “Nwa mvonini ne dumaa yeɛ ɔwɔ so ye?”

²¹ Bebuale ye kyɛ, “Kaesare deɛ ɔ!” Yeɛ osele bɛ kyɛ, “Nzaade ɛ́mɔfa Kaesare deɛ bɛ́ma Kaesare, ná ɛ́mɔfa Nyameɛ deɛ bɛ́ma Nyameɛ.”

²² Na bɛtele edwirɛ he nen, ɔyɛle bɛ nwanwa, na befili ye nwo berɛ besili nu bɛhɔle.

Ewutingyelɛ nwo adwobisa

²³ Ɛlɛho ne ala, Sadusiifoɛ bɔ bɛnwa awufoɛ dwɔsolɛ nne berɛ ne, bɛwale Yesu berɛ beebisale ye kyɛ,

²⁴ “Kyerɛkyerɛniɛ, Mose hane kyɛ, ‘Sɛ bienzua bɔ wanwo ba owu a, odi kyɛ oliɛma bienzua gya kunaniɛ ne, ná ɔwo mmaa ma oliɛma ne.’

²⁵ Tie, né aliɛmaa mmienzua nzoo bie bɛ ne yɛ wɔ wa. Bɔ oli moa ne gyale braa, na owuli bɔ wanwo mmaa ɔ, na ɔyakyili ɔye ne berɛ mane oliɛma bienzua.

²⁶ Sɔ ala koso yeɛ ɔtole aliɛmaa bɔ ɔtɔ so nyɔ ne bɔ ɔtɔ so nza ne ɔ, maa odwuli bɔ ɔtɔ so nzoo ne aso ɔ.

²⁷ Na bɔ ɔpɛ ye bo ɔ, braa ne koso wuli.

²⁸ Yiti awufoɛ dwɔsolɛ ne anu, mmenia nzoo nemɔ anu beni yeɛ braa ne kɔyɛ ɔye ɔ? Ofikyɛ bɛ mukoraa begyale ye.”

²⁹ Yeɛ Yesu buale bɛ kyɛ, Ɛmɔafõ, ɔnate kyɛ ɛmɔnze Ahyerɛlɛ ne, anaa Nyameɛ tumi ne.

³⁰ Ofikyɛ awufoɛ dwɔsolɛ ne anu, bengya, yeɛ bɛmva ebie bɛmma agyaa, na mmom bɛte kyɛ nyameɛso abɔfo mɔ.

³¹ Bɔ ɔfa awufoɛ etingyelɛ nwo de, aso ɛmɔkkenngale bɔ Nyameɛ hã hyirele ɛmɔ ne,

³² kyɛ ‘Me ole Abraham Nyameɛ, Yisake Nyameɛ ne Yakob Nyameɛ’? Nyameɛ ɔtte awufoɛ Nyameɛ, na mmom ɔte ateasefoɛ Nyameɛ.”

³³ Na ɛlɔen ne tele ɛhe nen, ye ngyerɛkyerɛ ne yɛle bɛ nwanwa.

Mmeraa titire ne

³⁴ Na mmerɛ bɔ Farasiifoɛ nemɔ bɛtele kyɛ Yesu noa abɔ Sadusiifoɛ nemɔ nen, beeyiale neka horɛ,

³⁵ na bɛ nu ko bɔ ɔte mmeraa nwo nimdeɛniɛ ɔ obisale Yesu dwirɛ fa suale ye ngaen kyɛ,

³⁶ “Kyerɛkyerɛniɛ, mmeraa dwirɛ beni yeɛ ɔte piri paa wɔ mmeraa ne anu ɔ?”

³⁷ Na Yesu buale ye kyɛ, “Fa w’ahone amukoraati, wɔ kra mukoraati, ɔne w’adwene amukoraati kuro AWURADE wɔ Nyameɛ dwirɛ!

³⁸ Mmeraa dwirɛ bɔ ɔte piri paa bɔ oli moa hɔ ɛne.

³⁹ Na bɔ ɔtɔ so nyɔ ne koso ɔte kyɛ ɛhene ala: Kuro ebiɛngo dwirɛ kyɛ wɔ bɔbɔ wɔ nwo!

⁴⁰ Mmeraa dwirɛ nyɔ hemɔ aso yeɛ mmeraa ne ne ngɔmhyɛlɛfoɛ amukoraa begyi ɔ.”

Kristo ne nwo adwobisa

⁴¹ Na Farasiifoɛ nemɔ beyiale neka horɛ nen, Yesu bisale bɛ

⁴² kyɛ, “Kristo ne, ɛmɔdwene ye nwo sɛ? Nwa awa ɛne?” Bebuale ye kyɛ, “Dawide awa ɛne.”

⁴³ Yeɛ Yesu bisale bɛ kyɛ, “Na afei ɔwale ye sɛ bɔ Dawide nate Sunzum Krongron so frɛ ye me Mene ɔ, kyɛ,

⁴⁴ ‘Awurade sele me Mene kyɛ: Tena me sa famaa so, kodwu kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ.’?

⁴⁵ Na sɛ Dawide frɛ ye me Mene a, né ɔyɛle sɛɛ bɔ ɔte ɔwa ɔ?”

⁴⁶ Na ebiala angora amma ye mmuayɛɛ, na ofi sɔ kyẽa ne, ebiala angora ammisa ye dwirɛ biala ko.