Mateo 2 - AHYERƐLƐ KRONGRON

Nworɛfoɛ nemɔ

¹ Mmerɛ bɔ bɛwole Yesu wɔ Betlehem bɔ ɔwɔ Yudea, wɔ ɛhene Herode aberɛ so nen, nworɛfoɛ biemɔ fili eyia afiteleɛ maen nu dɔ bɛwale Yerusalem,

² na bebisale kyɛ, “Yudafoɛ hene bɔ bawo ye ne, nisua yeɛ ɔwɔ ɔ? Ofikyɛ yanwu ye nzramaa wɔ eyia afiteleɛ dɔ, na yawa kyɛ yɛbaasɔne ye.”

³ Na ɛhene Herode tele edwirɛ he nen, ɔhale ye, Yerusalemfoɛ amukoraa koso sɔ ala.

⁴ Yiti ɔfrɛfrɛle maen ne anu asɔfo mbanyi ne ahyerɛlɛfoɛ amukoraa maa beeyiale, na obisale bɛ penane neka horɛ bɔ bɛkɔwo Kristo ne ɔ.

⁵ Na bebuale ye kyɛ, “Betlehem bɔ ɔwɔ Yudea; na sɔ yeɛ ngɔmhyɛlɛniɛ ne wahyerɛ ɔ, kyɛ,

⁶ ‘Wɔ, Betlehem bɔ ɛwɔ Yuda aseɛ so ɔ, wɔ dibea wɔ Yuda atitirefoɛ nu ɔtte ba; ɔnate kyɛ wɔ nu yeɛ maenbulɛniɛ bɔ ɔbaanea me maen Yisrael so ne okofi kɔwa ɔ.’ ”

⁷ Yeɛ Herode frɛle nworɛfoɛ nemɔ kudɛɛ, na obisale bɛ mmerɛ deinn bɔ nzramaa ne fitele ɔ.

⁸ Afei ɔsomane bɛ Betlehem, na osele kyɛ, “Ɛmɔhɔ, ná ɛ́mɔma ɛmɔ nye boro bɛpena akwadaa ne; na sɛ ɛmɔnwu ye a, ɛmɔɔbɔ me amaneɛ, ná me koso ngɔnzɔne ye bie.”

⁹ Betiele ɛhene ne dwirɛ ne beyiele, ná besili nu kyɛ bɛkɔ nen, yieee, nzramaa bɔ benwuni ye wɔ eyia afiteleɛ dɔ ne lili bɛ nyunu moa alaa oogyinane nekaa bɔ adɔma ne la ne ye anwuro.

¹⁰ Na benwuni nzramaa ne nen, ɔyɛle bɛ fɛ soma.

¹¹ Na bɛworole awuro ne anu nen, benwuni adɔma ne ne oni Maria, na bɛkotole bɛsɔnene ye. Afei bɛsangyele bɛ nningyein nu, na bɛhyɛle ye esikaa kɔkorɛ, ayirefona ne korobo.

¹² Né babɔ bɛ kɔkɔ wɔ laleɛ nu kyɛ nnɛmaa besa bɛkɔ Herode dɔ ko, yiti bɛfale atee foforɛ so besa bɛhɔle bɛ maen nu.

Yosef fa adɔma ne nwati kɔ Misraim

¹³ Nworɛfoɛ nemɔ hɔle ne asi ne, yieee, Awurade abɔfo yele ye nwo ali wɔ laleɛ nu hyirele Yosef, na osele ye kyɛ, “Herode pena akwadaa ne ku ye, yiti dwɔso fa akwadaa ne ne oni nwati kɔ Misraim, ná tena dɔ maa oodwu kyɛ ngose wɔ kyɛ esa bra ɔ.”

¹⁴ Na odwɔsole nen, ɔfale akwadaa ne ne oni bokale ye nwo so, na ofili berɛ hɔle Misraim.

¹⁵ Ɔtenane dɔ maa oodwuli kyɛ ɛhene Herode wuli ɔ. Na ɛhe mane bɔ Awurade nate ngɔmhyɛlɛniɛ ne so hane ne wale nu kyɛ, “Mafrɛ mma bienzua mafi Misraim.”

Herode kuku ngwadaammaa wɔ Betlehem

¹⁶ Na Herode nwuni kyɛ nworɛfoɛ nemɔ balakalaka ye nen, ɔfɛle yaa hahii. Na ɔsomane maa beehuhuni ngwadaa mmienzua amukoraa bɔ bali afoɛ nyɔ ne bɛ bɔ bendwu ɔ, bɔ bɛwɔ Betlehem ne ye mbɔtam amukoraa; kyɛbɔ mmerɛ bɔ ɔtele dwirɛ ne fili nworɛfoɛ nemɔ berɛ ne osi kyire ne.

¹⁷ Na ɛhe mane ngɔmhyɛlɛniɛ Yeremia dwirɛ bɔ ɔhane ne wale nu kyɛ,

¹⁸ “Bɛtele komviɛ bie wɔ Rama, awuye ne esuɛ hahii, Rahɛl sũ ye mma; Bɛkyekye ye wora a ondie, ofikyɛ bɛnne berɛ ko.”

Yosef fi Misraim sa ba Nasarɛte

¹⁹ Herode wue asi ne, yieee, Awurade abɔfo yele ye nwo ali wɔ laleɛ nu hyirele Yosef wɔ Misraim

²⁰ sele kyɛ, “Dwɔso, fa akwadaa ne ne oni sa kɔ Yisrael aseɛ so, ofikyɛ bɛ bɔ né bɛpena akwadaa ne beku ye ne, bawu.”

²¹ Yiti Yosef dwɔsole fale akwadaa ne ne oni bokale ye nwo so, na osa wale Yisrael aseɛ so.

²² Nakoso Yosef tele kyɛ Arkelao yeɛ wali ɔse Herode bia wayɛ Yudea hene nen, osurole kyɛ ɔkɔhɔ berɛ ɔ. Nyameɛ ye hyirele ye wɔ laleɛ nu, yiti ɔhɔle Galilea manzini nu.

²³ Na ɔhɔle kuro bie bɔ bɛfrɛ ye Nasarɛte so ɔɔtenane berɛ. Na ɛhe mane bɔ ngɔmhyɛlɛfoɛ nemɔ hane ne wale nu kyɛ, “Bɛkɔfrɛ ye Nasarɛteniɛ.”