Mateo 19 - AHYERƐLƐ KRONGRON

Yesu yɛ agyaayiralɛ nwo ngyerɛkyerɛ

¹ Na Yesu hane sɔ dwirɛ nemɔ yiele nen, ofili Galilea hɔle Yudea mbɔtam, wɔ asue Yɔɔdan si;

² na mmenia pee belili ye si, na ɔsale bɛ anwonyerɛ wɔ berɛ.

³ Yeɛ Farasiifoɛ wale ye berɛ beesole ye bɛneane, na bebisale ye kyɛ, “Aso mmeraa ma ate kyɛ ɔnate edwirɛ biala so, ebie kora yira ɔye anaa?”

⁴ Na obuale bɛ kyɛ, “Aso ɛmɔkkenngale kyɛ ahyɛaseɛ ne, Ɛdangama bɔ ɔbɔle sona nen, bienzua ne brasua yeɛ ɔbɔle bɛ ɔ?

⁵ Na ɔhane kyɛ, ‘Ɛhe ati yeɛ bienzua kɔyakyi ɔse ne oni berɛ, ná wafa ye nwo waabata ɔye nwo, ná bɛ munyɔ bayɛ anwoɔnaen ko.’

⁶ Yiti bɛtte nyɔ ko, na mmom bɛte anwoɔnaen ko. Ye sɔ ati, bɔ Nyameɛ ahã abɔ nu ne, nnɛma sona biala tete nu.”

⁷ Yeɛ bebisale ye kyɛ, “Na nzu ati yeɛ Mose hyɛle kyɛ odi kyɛ biaa ne ma agyaayiralɛ krataa, ná oyira braa ne ɔ?”

⁸ Na obuale bɛ kyɛ, “Ɔnate ɛmɔ asoserɛ ti yeɛ Mose mane ɛmɔ ate kyɛ ɛ́mɔyira ɛmɔ aye mɔ ɔ; nakoso ofi ahyɛaseɛ ne de, ahaa né nna sɔ yeɛ ɔte sɔ.

⁹ Yiti mekã mekyire ɛmɔ kyɛ, sɛ wamma kyɛ adwamanbɔlɛ ti, ná bienzua yira ɔye kogya braa foforɛ a, né biaa ne asɛkye agyaa.” (Na bienzua bɔ okogya braa bɔ bayira ye ne, ye koso wasɛkye agyaa.)

¹⁰ Na ye asuafoɛ nemɔ sele ye kyɛ, “Sɛ sɔ yeɛ bienzua ne ɔye b’afia dwirɛ te de a, né nzaade ɔtte mayee kyɛ begya braa ɔ.”

¹¹ Na osele bɛ kyɛ, “Nna mmenia mukoraa yeɛ bɛkɔhora bekole sɔ dwirɛ ne bɛkɔto nu ɔ, sana bɛ bɔ bafa balo bɛ ɔ.

¹² Ebiemɔ ngora ngya braa, ofikyɛ sɔ yeɛ bɛwole bɛ ɔ; ebiemɔ koso de, sona yeɛ wayɛ bɛ sɔ ɔ; yeɛ ebiemɔ wora, nyameɛso ahennie ne ati yeɛ bɛ bɔbɔ bayɛ bɛ nwo sɔ ɔ. Bɔ ɔkɔhora kole sɔ dwirɛ ne kɔto nu ne, maa ole to nu.”

Yesu yirayira ngwadaa

¹³ Yeɛ bɛfale ngwadaa bɛbrɛle Yesu kyɛ ɔfa ye sa gua bɛ so ɔbɔ mbaeɛ ma bɛ; nakoso asuafoɛ nemɔ dwudwole bɛ bɔ bɛfale bɛ bɛwale ne.

¹⁴ Nakoso Yesu sele kyɛ, “Ɛ́mɔma ngwadaa nemɔ ate ma bɛbra me berɛ, na nnɛma ɛmɔsi bɛ ate; ofikyɛ ɛhemɔ sɔa ye yeɛ nyameɛso ahennie ne ɔte bɛ deɛ ɔ.”

¹⁵ Yeɛ ɔfale ye sa guale bɛ so yirayirale bɛ, na afei ofili berɛ hɔle.

Esikaniɛ bie ne daa ngoa

¹⁶ Na yieee, biaa bie wale Yesu berɛ oobisale ye kyɛ, “Kyerɛkyerɛniɛ, nikyee paa beni yeɛ nyɔ ná manya daa ngoa ɔ?”

¹⁷ Na Yesu buale ye kyɛ, “Nzu ati yeɛ ebisa me paa nwo dwirɛ ɔ? Nyameɛ ngome twe yeɛ ɔte paa ɔ. Sɛ ɛpena kyɛ ɛkɔ daa ngoa nu a, di mmeraa dwirɛ ne aso.”

¹⁸ Na obisale ye kyɛ, “Nu beni?” Yeɛ Yesu buale kyɛ, “Nnɛdi awue, nnɛsɛkye agyaa, nnɛwua, nnɛdi adanzewia.

¹⁹ Di ɛse ne eni ni; yeɛ kuro ebiɛngo dwirɛ kyɛ wɔ bɔbɔ wɔ nwo.”

²⁰ Na aberandeɛ ne sele ye kyɛ, “Mali ɛhe amukoraa so; na nzikyɛ bieku yeɛ ohia kyɛ meyɔ ɔ?”

²¹ Na Yesu sele ye kyɛ, “Sɛ ekuro kyɛ ɛyɛ pɛpɛɛpɛ a, ye de kɔ, ná kɔtɔne w’anwonyadeɛ, ná fa sikaa ne ma ehiafoɛ, na ekonya agyapadeɛ wɔ nyameɛso; ná afei bra baali me si.”

²² Na aberandeɛ ne tele edwirɛ he nen, ole aworabɔlɛ sili nu hɔle; ofikyɛ né ole anwonyadeɛ pee.

²³ Yeɛ Yesu sele ye asuafoɛ nemɔ kyɛ, “Nahorɛ nu, mekã mekyire ɛmɔ kyɛ, ɔkɔyɛ se kɔma sikaniɛ kyɛ ɔkɔhɔ nyameɛso ahennie ne anu ɔ.

²⁴ Mekã mekyire ɛmɔ bieku kyɛ, ɔyɛ mmerɛ ma afupɔngɔ kyɛ okowura drɔwaa bɔen nu tra kyɛ esikaniɛ kɔhɔ Nyameɛ ahennie ne anu ɔ.”

²⁵ Na asuafoɛ nemɔ tele edwirɛ he nen, ɔyɛle bɛ nwanwa pee, na bɛhane kyɛ, “Ye de nwa yeɛ bɛkɔhora bekole ye ngoa ɔ?”

²⁶ Na Yesu neane bɛ haa sele bɛ kyɛ, “Sona bue nu de, ɛhe ngɔhora ngɔyɛ berɛ; nakoso Nyameɛ bue nu de, nningyein mukoraa kɔhora kɔyɛ berɛ.”

²⁷ Yeɛ Petro buale ye kyɛ, “Eh, yayakyi nikyee biala berɛ yaali wɔ si oo; na nzikyɛ koraa yeɛ yɛkonya ɔ?”

²⁸ Na Yesu sele bɛ kyɛ, “Nahorɛ nu, mekã mekyire ɛmɔ kyɛ, ewiase foforɛ ne anu, mmerɛ bɔ Sona Awa ne kɔtena ye animnyam ahennie bia so ne, ɛmɔ bɔ ɛmɔaali me si ne, ɛmɔ koso ɛmɔkɔtena ahennie bia buru ne nyɔ so bekobua Yisrael mmusua kure buru ne nyɔ ne ndɛen.

²⁹ Na ebiala bɔ me dumaa ti wayakyi awuro mɔ, anaa aliɛmaa mmienzua, anaa aliɛmaa mmrasua, anaa seɛ, anaa niɛ, anaa mmaa, anaa aseɛ mɔ berɛ nen, okonya ye nwo mmɔhoɛ ɛyaa, na okonya daa ngoa.

³⁰ Nakoso mmenia pee bɔ bali moa ne, bɛkɔha nziɛ, yeɛ bɛ bɔ baha nziɛ ne bekoli moa.”