Mateo 18 - AHYERƐLƐ KRONGRON

Anwobrɛaseɛ nwo ngyerɛkyerɛ

¹ Sɔ mmerɛ ne ala nu yeɛ asuafoɛ nemɔ wale Yesu berɛ beebisale ye kyɛ, “Nwa yeɛ ɔte titire paa wɔ nyameɛso ahennie ne anu ɔ?”

² Yeɛ Yesu frɛle akwadaa bie maa ɔwale, na ɔfale ye oogyinane b’afia berɛ,

³ na ɔhane kyɛ, “Nahorɛ nu, mekã mekyire ɛmɔ kyɛ, sɛ ɛmɔanzesã ná ɛmɔanyɛ kyɛ ngwadaa a, ɛmɔngɔhɔ nyameɛso ahennie ne anu le.

⁴ Na ebiala bɔ ɔkɔbrɛ ye nwo ase kyɛ akwadaa he nen, ye yeɛ ɔte titire paa wɔ nyameɛso ahennie ne anu ɔ.

⁵ Na ebiala bɔ okole akwadaa bɔ ɔte kyɛ he kɔto nu wɔ me dumaa nu nen, né wale me wato nu.”

Sundiduatolɛ nwo kɔkɔbɔlɛ

⁶ “Na ebiala bɔ ɔkɔto ngwadaammaa hemɔ bɔ bede me bedi ye anu ko sundidua nen, ahaa ɔte paa ma sɔ sona ne kyɛ bɛkɔfa nyɔboɛ kandinga bɔ bɛfa beti aburoo bekosinze ye kɔme, ná bagyi ye bato ɛpo buma nu maa wamono ɔ.

⁷ Ɔnate sundiduatolɛ ti, ewiase ye yaakɔ! Ɔyɛ sɛɛ ala a sundiduatolɛ kɔwa; nakoso sona bɔ ɔnate ye so sundiduatolɛ kɔwa ne de, ye yaakɔ!

⁸ “Sɛ wɔ sa anaa wɔ gya to wɔ sundidua a, pɛ ná gyi to! Na ɔte paa ma wɔ kyɛ ɛkɔfa asaa ko anaa agyirɛ ko ɛkɔhɔ ngoa nu tra kyɛ ɛkɔfa asaa nyɔ anaa agyirɛ nyɔ, ná bekogyi wɔ bɛkɔto daa see nu ɔ.

⁹ Yeɛ sɛ wɔ nye to wɔ sundidua a, tu ná gyi to! Ɔte paa ma wɔ kyɛ ɛkɔfa anyeɛ ko kɔhɔ ngoa nu tra kyɛ ɛkɔfa anyeɛ nyɔ, ná bekogyi wɔ bɛkɔto amaneɛnwunɛ see nu ɔ.

Boaen bɔ wamini ne nwo anyandera

¹⁰ “Ɛmɔnea yé ná ɛmɔammu ngwadaa ye anu biala animtia; na mekã mekyire ɛmɔ kyɛ, nyameɛso dɔ, b’abɔfo mɔ benwu me Baba bɔ ɔwɔ nyameɛso ne nyunu daa.”

¹¹ [Ɔnate kyɛ, Sona Awa ne wale kyɛ ɔbaale bɛ bɔ bamini nemɔ ngoa.]

¹² “Edwirɛ he, ɛmɔdwene ye nwo sɛ? Sɛ ebie le mmoaen ɛyaa, ná bɛ nu ko mini a, aso ɔnyakyi aburahona ne ngona ne wɔ mmokaa ne aso berɛ, ná ɔngɔhɔ ngɔɔpena ko bɔ wamini ne anaa?

¹³ Na sɛ onwu ye a, nahorɛ nu, mekã mekyire ɛmɔ kyɛ, onya anika wɔ boaen ko ne nwo tra aburahona ne ngona bɔ bɛ de bammini ne nwo.

¹⁴ Sɔ ala yeɛ ɛmɔ Baba bɔ ɔwɔ nyameɛso ne, onguro kyɛ ngwadaa hemɔ nu ko po komini ɔ.

Sɛ ebie yɛ wɔ tɛɛ a

¹⁵ “Sɛ eliɛma yɛ wɔ tɛɛ a, kɔhã ye mvomsoɛ kyire ye wɔ mmerɛ bɔ ɛne ye bɛ munyɔ pɛ yeɛ bɛwɔ berɛ ɔ. Sɛ otie wɔ a, anya eliɛma.

¹⁶ Nakoso sɛ wandie a, fa sona ko anaa nyɔ boka wɔ nwo so, kyɛbɔ ɔkɔyɛ bɔ mmenia nyɔ anaa nza kɔyɛ edwirɛ ne nwo adanzefoɛ ɔ.

¹⁷ Na sɛ wandie bɛ koso a, kɔhã kyire asɔre ne. Na sɛ wandie asɔre ne koso a, ye de bu ye kyɛ bosoensolɛniɛ ne ɛtoɔdidelɛniɛ.

¹⁸ “Nahorɛ nu, mekã mekyire ɛmɔ kyɛ, nikyee biala bɔ ɛmɔkɔkyekye ye wɔ aseɛ ye aso nen, bɛkɔkyekye ye nyameɛso; yeɛ nikyee biala bɔ ɛmɔkɔsangye nu wɔ aseɛ ye aso nen, bɛkɔsangye nu nyameɛso.

¹⁹ “Nahorɛ nu, mekã mekyire ɛmɔ bieku kyɛ, sɛ ɛmɔ nu nyɔ yɛ adwene ko aseɛ ye aso wɔ nikyee biala bɔ bekobisa nwo a, me Baba bɔ ɔwɔ nyameɛso ne kɔyɔ kɔma bɛ.

²⁰ Ofikyɛ nekaa biala bɔ mmenia nyɔ anaa nza koyia nu me dumaa nu nen, né nwɔ b’afia wɔ berɛ.”

Yesu bu bɔnefakyɛ nwo anyandera

²¹ Yeɛ Petro wale Yesu berɛ oobisale ye kyɛ, “Awurade, pɛen nyɛɛ yeɛ nniɛma yɛ me tɛɛ a, mva ngyɛ ye ɔ? Pɛen nzoo anaa?”

²² Na Yesu buale ye kyɛ, “Menga mengyire wɔ kyɛ pɛen nzoo, na mmom aburasoo sɔ alaa nzoo.

²³ Ye sɔ ati, nyameɛso ahennie ne, ɔte kyɛ ɛhene bie bɔ né ɔpena kyɛ ɔne ye ngoaa bebu ngondaa ɔ.

²⁴ Na ɔhyɛle ngondaabulɛ ne abo nen, bɛfale ko bɔ ɔma ye kerɛ talɛnde apee buru ɔ bɛwale ye berɛ.

²⁵ Né ɔngɔhora kerɛ ne tua, yiti ye mene ne hyɛle kyɛ bɛtɔne ye, ɔne ɔye ne ye mma, yeɛ bɔ ole ye amukoraa, ná bɛfa betua kerɛ ne.

²⁶ Yiti akoaa ne yakyili ye nwo tole aseɛnwo berɛ wɔ ye nyunu berɛ, na ɔsrɛle ye kyɛ, ‘Me mene, nya me nwo aboterɛ kãa, na ngotua ye mukoraa ngɔma wɔ.’

²⁷ Na akoaa ne mene ne nwuni ye anwumvoin, ɔyakyili ye, na ɔfale kerɛ ne hyɛle ye.

²⁸ “Na sɔ akoaa ne ala fili berɛ bɔ ɔkɔ nen, onwuni obiɛngo akoaa ko bɔ ɔma ye kerɛ denare ɛyaa ko; yeɛ obumane ye komvi sele ye kyɛ, ‘Tua me kerɛ!’

²⁹ Yiti obiɛngo akoaa ne guale ndwerɛ srɛle ye kyɛ, ‘Nya me nwo aboterɛ kãa, na ngotua ye mukoraa ngɔma wɔ.’

³⁰ Nakoso wambene, na ɔmaa bɛhyele ye bɛtole kuku nu kɔpem kyɛ okotua kerɛ ne ɔ.

³¹ Na ye mmango ngoaa nemɔ nwuni bɔ wasi nen, ɔyɛle bɛ yea paa, na bɛɛhane bɔ wasi ne amukoraa behyirele bɛ mene.

³² Yeɛ ye mene ne frɛle ye sele ye kyɛ, ‘Wɔ, akoaa atianuserɛniɛ! Mvale wɔ kerɛ ne amukoraa ngyɛle wɔ, ɔnate kyɛ ɛpale me kyerɛ.

³³ Aso onni kyɛ ahaa wɔ koso enwu ebiɛngo akoaa anwumvoin kyɛbɔ nwuni wɔ anwumvoin ne anaa?’

³⁴ Na ye mene ne fɛle yaa, na ɔfale ye wurale kukunufoɛ so neafoɛ mɔ bɛ sa, kɔpem kyɛ okotua ye kerɛ ne amukoraa ɔ.

³⁵ “Na sɛ ɛmɔanye ɛmɔ kunu fitaa bamva ɛmɔ aliɛma mvomsoɛ bangyɛ ye a, sɔ ala yeɛ me Baba bɔ ɔwɔ nyameɛso ne koso kɔyɛ ɛmɔ ɔ.”