Mateo 15 - AHYERƐLƐ KRONGRON

Tetefoɛ ngyerɛkyerɛ

¹ Yeɛ Farasiifoɛ ne ahyerɛlɛfoɛ befili Yerusalem bɛwale Yesu berɛ beebisale ye kyɛ,

² “Nzu ati yeɛ w’asuafoɛ nemɔ benni mbanyi mɔ b’amammerɛ ne aso ɔ? Ofikyɛ bennwunzi bɛ sa koraka né badidi.”

³ Na obuale bɛ kyɛ, “Nzu ati yeɛ ɔnate ɛmɔ amammerɛ ti ɛmɔbu Nyameɛ mmeraa dwirɛ so ɔ?

⁴ Ofikyɛ Nyameɛ hyɛle kyɛ, ‘Di ɛse ne eni ni,’ yeɛ, ‘Ebiala bɔ ɔkɔhã edwirɛ tɛɛ kotia ɔse anaa oni ne, ehunɛ yeɛ odi kyɛ beku ye ɔ’?

⁵ Nakoso ɛmɔ de, ɛmɔnwa: ‘Sɛ ebie kã kyire ɔse anaa oni kyɛ, ‘Nikyee biala bɔ ahaa ekonya kofi me berɛ nen, mafa mama Nyameɛ’ a, ye de onhia kyɛ sɔ sona ne odi ɔse anaa oni ni ɔ.

⁶ Ɛmɔ tete amammerɛ ne ati ɛmɔasɛkye Nyameɛ ahyɛdeɛ ne.

⁷ Nyaatwomfoɛ! Odi sɔ kyɛ Yesaya hyɛle ngɔm fale ɛmɔ nwo kyɛ,

⁸ ‘Maen he bele bɛ noa mbaen yeɛ bedi me ni ɔ, nakoso b’ahone de, ombingye me.

⁹ Bɛsɔne me mbaen, na mmenia nhyehyɛleɛ yeɛ bekyirekyire ɔ!’ ”

Bɔ ogua sona nwo fiɛ ɔ

¹⁰ Yesu frɛle ɛlɔen ne wale ye nwo berɛ, na osele bɛ kyɛ, “Ɛ́mɔtie ná ɛ́mɔte ye bo!”

¹¹ “Nna bɔ ɔkɔ sona noa nu yeɛ ogua ye nwo fiɛ ɔ, na mmom bɔ ofi sona noa nu ba ne yeɛ ogua ye nwo fiɛ ɔ.”

¹² Yeɛ ye asuafoɛ nemɔ wale beesele ye kyɛ, “Farasiifoɛ nemɔ bɛtele sɔ dwirɛ ne nen, aso ɛse kyɛ wanyɛ bɛ fɛ ɔ?”

¹³ Na obuale kyɛ, “Bakaa biala bɔ nna me Baba bɔ ɔwɔ nyameɛso ne yeɛ oluale nen, bekotutu ye bo.

¹⁴ Nnɛma ɛmɔtɛ bɛ so! Bɛte anyesiniwaafoɛ bɔ bekyire anyesiniwaafoɛ atee ɔ. Na sɛ anyesiniwaaniɛ kyire anyesiniwaaniɛ atee a, bɛ munyɔ bɛkɔtɔ kumaa nu.”

¹⁵ Na Petro sele ye kyɛ, “Anyandera he, kyire yɛ ye bo.”

¹⁶ Na obuale kyɛ, “Na ɛmɔ koso, ɛnɛ ne ɛnɛ ye, ɛmɔnde ye bo anaa?

¹⁷ Aso ɛmɔnnwu ye kyɛ nikyee biala bɔ ɔkɔ bɛ noa nu ne okogua bɛ kunu, ná afei ɔsẽ kogua yaen nu ɔ?

¹⁸ Nakoso bɔ ofi bɛ noa nu ba ne de, ofi b’ahone nu yeɛ ɔba ɔ, na ye yeɛ ogua sona nwo fiɛ ɔ.

¹⁹ Ofikyɛ ahone nu yeɛ adwenemmɔne, awuelilɛ, agyaasɛkyelɛ, adwamanbɔlɛ, awue, adanzewia ne musue dwirɛ fi ba ɔ.

²⁰ Sɔ nningyein nemɔ yeɛ begua sona nwo fiɛ ɔ, na sɛ annwunzi wɔ sa ná edidi a, ongua sona nwo fiɛ.”

Amaenmaensoniɛ braa bie gyidie

²¹ Afei Yesu fili berɛ hɔle Tiro ne Sidon mbɔtam.

²² Na yieee, Kanaanniɛ braa bie bɔ ofi mbɔtam berɛ ɔ wale, na ɔteane nu kyɛ, “O Awurade, Dawide Awa, nwu me anwumvoin, na sunzummɔne bie ɔha mma brasua paa.”

²³ Nakoso Yesu andɛ ye so. Na ye asuafoɛ nemɔ wale bɛɛsrɛle ye kyɛ, “Maa ɔhɔ, ofikyɛ ɔteatea nu di yɛ si!”

²⁴ Na Yesu buale kyɛ, “Mmoaen bɔ bamini bɔ bɛ ole Yisrael awuro ama ne, bɛ ngome bɛ berɛ yeɛ bɛsomane me ɔ.”

²⁵ Na braa ne wale ooguale ndwerɛ wɔ Yesu nyunu berɛ srɛle ye kyɛ, “Awurade, boka me!”

²⁶ Na Yesu buale kyɛ, “Ɔtte mayee kyɛ bɛkɔfa mmaa mɔ b’aleɛ bekogyi bekogua ngyea berɛ ɔ.”

²⁷ Na braa ne hane kyɛ, “Amba, Awurade, nakoso ngyea mmaa nemɔ bedi aleɛ ne boso bɔ ɔporo fi bɛ mene poen so gua ase ne.”

²⁸ Yeɛ Yesu buale ye kyɛ, “Mmobraa, wɔ gyidie te piri! Ɔ́yɛ sɔ ma wɔ kyɛbɔ ɛpena ɔ.” Na berɛ ne ala, ɔwa brasua ne tele apɔ.

Yesu sa mmenia pee anwonyerɛ

²⁹ Afei Yesu fili berɛ ɔɔfale Galilea ɛpo ne noa. Na ɔhɔle bokaa bie so ɔɔtenane ase.

³⁰ Na mmenia pee fale mbakye, mmubuafoɛ, anyesiniwaafoɛ, emumu mɔ ne ayarefoɛ foforɛ pee bɛwale ye berɛ; na bɛfale bɛ beeguale ye gya bo, na ɔsale bɛ anwonyerɛ.

³¹ Yiti ɔyɛle ɛlɔen ne nwanwa, mmerɛ bɔ benwuni kyɛ emumu dwudwo, ná mbakye nwo asa, ná mmubuafoɛ nate, ná anyesiniwaafoɛ benwu nikye ne; na bɛhyɛle Yisrael Nyameɛ animnyam.

Yesu ma mmenia apee nna aleɛ

³² Afei Yesu frɛle ye asuafoɛ nemɔ, na osele bɛ kyɛ, “Mmenia hemɔ bɛyɛ me anwumvo, ofikyɛ bali me nwo wa ɛlɛsa ɛhe, bɔ nikye fee nne berɛ bɔ bekoli ɔ; na menguro kyɛ ngɔmaa bɛkɔfa ɛhɔen bekosa bɛkɔhɔ ɔ, anyɛ a, né bapepɛ bafi atunu.”

³³ Na asuafoɛ nemɔ bisale ye kyɛ, “Nisua yeɛ yɛkonya aleɛ wɔ ɛserɛ ye aso wa, bɔ ɔkɔso mmenia wora he di ɔ?”

³⁴ Na Yesu bisale bɛ kyɛ, “Paanoo nyɛɛ yeɛ ɛmɔle ye wɔ berɛ ɔ?” Bebuale kyɛ, “Nzoo, ɔne tiré mmaa mmaa kãa bie.”

³⁵ Yeɛ Yesu mane ɛlɔen ne tenatenane ase.

³⁶ Afei ɔfale paanoo nzoo ne ne tiré ne, ɔlale ase, na obubuli nu, ɔfa mane ye asuafoɛ nemɔ, na asuafoɛ nemɔ koso bɛfa bɛmane ɛlɔen ne.

³⁷ Na bɛ mukoraa bedidili bɛmane bɛ ko yili; na bɛsesale ye bo mboporoka ne beguale ngɛndɛen nzoo nu maa beyili fokyefokyee.

³⁸ Na bɛ bɔ belili ne, bɛte mmienzua apee nna, banga mmrasua ne ngwadaa bammoka so.

³⁹ Na oguale ɛlɔen ne atee nen, ɔtenane ɛlɛen nu hɔle Magadan mbɔtam.