Mateo 14 - AHYERƐLƐ KRONGRON

Asubɔlɛniɛ Yohane wue

¹ Sɔ mmerɛ ne anu, manzini hene Herode tele Yesu nga;

² na osele ye somvoɛ nemɔ kyɛ, “Asubɔlɛniɛ Yohane ne, ye ɛne; watingye wafi awufoɛ nu, yiti yeɛ ɔmaa wanya tumi bɔ ɔkora yɔ anwanwadeɛ hemɔ ye?”

³ Ofikyɛ né Herode wali moa wahye Yohane wakyekye ye wato kuku nu, ɔnate Herode aliɛma Filipo aye Herodiase ti.

⁴ Ɔnate kyɛ né Yohane ahã ahyire Herode kyɛ, “Mmeraa mma ate kyɛ egya ye ɔ.”

⁵ Ye sɔ ne ati, né Herode kuro kyɛ oku Yohane, nakoso né osuro mmenia ne, ofikyɛ né bebu Yohane kyɛ ɔte ngɔmhyɛlɛniɛ.

⁶ Na Herode krakyẽa dwuli nen, Herodiase awa abaayaa gole abilie hyirele bɛ bɔ bayia berɛ ne maa ɔyɛle Herode nyemene.

⁷ Yiti ɔbɔle anohoba tale ndaen foale so kyɛ ɔkɔfa nikyee biala bɔ okobisa ɔ kɔma ye.

⁸ Na oni mane ye adwene tɛɛ kyɛ ɔhã kyɛ, “Fa Asubɔlɛniɛ Yohane ye ti bɔ ɔla prɛte nu ɔ ma me ɛwa ala!”

⁹ Na ɔyɛle ɛhene ne yea, nakoso ɔnate ye ndaen bɔ wata ɔne mmenia bɔ né ɔne bɛ didi ne ati, ɔhyɛle kyɛ bɛyɔ sɔ bɛma abaayaa ne.

¹⁰ Yiti ɔsomane maa bɛɛpɛle Yohane ti wɔ kuku nu dɔ.

¹¹ Bɛfale ye ti ne bɔ ɔla prɛte nu ɔ bɛbrɛle abaayaa ne, na ye koso ɔɔfa mane oni.

¹² Yeɛ Yohane asuafoɛ nemɔ wale bɛɛfale ye fuin ne besiele ye, na bɛɛbɔle Yesu amaneɛ.

Yesu ma mmenia apee nnu aleɛ

¹³ Yesu tele edwirɛ bɔ wasi nen, ɔfale ɛlɛen ofili berɛ hɔle nekaa bie bɔ berɛ te dinn ɔ. Nakoso ɛlɔen ne tele nen, bɛfale ase befili nguro nemɔ aso bɛpole ye.

¹⁴ Ofili ɛlɛen ne anu dwuli ná onwuni mmenia wora nen, bɛyɛle ye anwumvo, na ɔsale bɛ nu ayarefoɛ nemɔ anwonyerɛ.

¹⁵ Na odwuli nɔsoa nen, ye asuafoɛ nemɔ wale ye berɛ beesele ye kyɛ, “Ɛwa te ɛserɛ so, yeɛ aleɛ koso adwo, yiti ma ɛlɔen ne bɛhɔ nguraa nemɔ anu bɛɛtɔ aleɛ bie beli.”

¹⁶ Yeɛ Yesu buale bɛ kyɛ, “Onhia kyɛ bɛkɔ ɔ, ɛ́mɔma bɛ nikyee ma beli!”

¹⁷ Na bebuale ye kyɛ, “Yɛlle aleɛ biala wɔ wa, sana paanoo nnu ne tiré nyɔ.”

¹⁸ Na osele kyɛ, “Ɛmɔfa bɛbrɛ me wa.”

¹⁹ Afei ɔmane ɛlɔen ne bɛtenatenane ase wɔ ɛserɛ ne aso. Na ɔfale paanoo nnu ne tiré nyɔ ne, ɔtole ye nye neane nyameɛso, oyirale so, obubuli nu, na ɔfale paanoo ne mane ye asuafoɛ nemɔ, na asuafoɛ nemɔ koso bɛfa bɛmane ɛlɔen ne.

²⁰ Bɛ mukoraa bedidili bɛmane bɛ ko yili; na ye bo mboporoka ne, asuafoɛ nemɔ boaboa guale ngɛndɛen buru ne nyɔ nu maa beyili fokyefokyee.

²¹ Na bɛ bɔ belili ne, bɛkɔyɛ mmienzua apee nnu, mmrasua ne ngwadaa de banga bɛ bammoka so.

Yesu nate nzue nye so

²² Berɛ ne ala, Yesu hyɛle asuafoɛ nemɔ kyɛ bɛ́fo ɛlɛen nu beli moa bɛhɔ asue ne asi dɔ, ná ye de ogua ɛlɔen ne ate koraka.

²³ Na oguale ɛlɔen ne ate yiele nen, ye ngome ɔhɔle bokaa bie so kyɛ ɔkwaabɔ mbaeɛ. Na aleɛ dwole nen, né ye ngome yeɛ ɔwɔ berɛ ɔ.

²⁴ Sɔ mmerɛ ne, né ɛlɛen ne adwu ɛpo n’afia dɔ bɔ asorɔkye ohuruhuru ye ɔ, ofikyɛ né mvrama ne ɔbɔ yia bɛ.

²⁵ Na alebahyene ne, Yesu natele ɛpo n’anye so hɔle bɛ dɔ.

²⁶ Na asuafoɛ nemɔ nwuni ye kyɛ ɔnate ɛpo n’anye so nen, besurole, na bɛhane kyɛ, “Ɛnwomee ɔ!” Na ɛserɛ hane bɛ maa bɛteateane nu.

²⁷ Na berɛ ne ala, Yesu sele bɛ kyɛ, “Ɛ́mɔma ɛmɔ ahone tɔ ɛmɔ kunu, me ɔ; nnɛma ɛmɔsuro!”

²⁸ Na Petro buale ye kyɛ, “Awurade, sɛ wɔ ahɔ a, nzaade maa mva nzue n’anye so mmra wɔ dɔ.”

²⁹ Na obuale kyɛ, “Bra!” Yiti Petro fili ɛlɛen ne anu dwuli natele nzue n’anye so kyɛ ɔkɔ Yesu nwo dɔ.

³⁰ Nakoso onwuni mvrama bagyabagya ne nen, ɛserɛ hane ye; na ɔhyɛle ye bo kyɛ ɔmono nen, ɔteane nu kyɛ, “Awurade, de me!”

³¹ Na ndɛndɛ, Yesu tengyɛle ye sa sɔle ye nu, na osele ye kyɛ, “O, wɔ bɔ wɔ gyidie te kãa ɔ! Nzu ati yeɛ esuli aporowaa ɔ?”

³² Na bɛtenane ɛlɛen ne anu nen, mvrama ne yakyili tulɛ.

³³ Na bɛ bɔ bɛwɔ ɛlɛen ne anu ne, bɛɛsɔnene ye, na bɛhane kyɛ, “Amba, wɔ ole Nyameɛ Awa ne.”

Yesu sa anwonyerɛ wɔ Gɛnesarɛte

³⁴ Bɛpɛle nzue ne, na beedwuli Gɛnesarɛte aseɛ so.

³⁵ Na berɛ ama nwuni ye sona horɛ nen, bɛsomane mmenia maa bɛhɔle mbɔtam berɛ amukoraa, na bɛfale bɛ bɔ bɛnde apɔ amukoraa bɛbrɛle ye;

³⁶ na bɛsrɛle ye kyɛ ɔma bɛfa bɛ sa bɛhã ye ataadeɛ noa ala; na mmenia wora bɔ bɛfale bɛ sa bɛhane ye ne, bɛtele apɔ.