Mateo 13 - AHYERƐLƐ KRONGRON

Kuaniɛ bie nwo anyandera

¹ Ɛlɛho ne ala, Yesu fili awuro ɔɔtenane ase wɔ mboanoa.

² Mmenia pee bɛɛpɛle ye nwo beyiale, yiti ɔfo tenane ɛlɛen nu; na mmenia wora ne amukoraa begyinagyinane mboanoa berɛ.

³ Na ɔhane edwirɛ pee wɔ anyandera nu hyirele bɛ kyɛ, “Ɛ́mɔtie, kuaniɛ bie hɔle kyɛ ɔkwaapete ye bakaammaa.

⁴ Na ɔpete nen, bakaammaa ne bie ooguale atee noa, na nnomaa wale beesusole.

⁵ Ebie koso ooguale ayɔboɛ so, nekaa bɔ nnɛterɛ pee nne berɛ ɔ; na wangyɛ yeɛ befifili ɔ, ofikyɛ né nnɛterɛ nzone wɔ bɛ bo.

⁶ Na eyia pukyele nen, bɛkesene, na ɔnate kyɛ bandira ndii ne ati, bɛyerale.

⁷ Bakaammaa ne bie ooguale mmowue nu; mmowue ne nyini, na bemiamiane bɛ.

⁸ Bakaammaa ne bie koso ooguale aseɛ paa so; na besuli mmaa, ebie ɛyaa, ebie aburasia, ebie aburasa.

⁹ Bɔ ole asoɛ kotie ne, maa otie!”

Bɔ yiti yeɛ Yesu dwudwo anyandera nu ɔ

¹⁰ Afei, asuafoɛ nemɔ wale ye berɛ beebisale ye kyɛ, “Nzu ati yeɛ edwudwo kyire bɛ wɔ anyandera nu ye?”

¹¹ Na obuale bɛ kyɛ, “Ɛmɔ de, bafa bama ɛmɔ kyɛ ɛ́mɔnwu nyameɛso ahennie nu mvealeɛ nu dwirɛ, nakoso bɛ de, bɛffa bɛmmane bɛ.

¹² Na ebiala bɔ ole bie ne, bɛkɔfa ebieku bɛkɔboka ye so, ná wanya ye mmorosoɛ; nakoso ebiala bɔ olle bie ne de, bɔ ole ye ne po, bekole bekofi ye sa nu.

¹³ Na ɛhe ati yeɛ ɔmaa medwudwo mekyire bɛ wɔ anyandera nu ɔ: ofikyɛ benwu ye de, nakoso bennwu ye; bɛte de, nakoso bɛnde, yeɛ bɛnde ye bo.

¹⁴ Na Yesaya ngɔm ne wawa nu wafa bɛ nwo kyɛ, ‘Etielɛ de, ɛmɔkotie, nakoso ɛmɔngɔte ye bo; enwunɛ de, ɛmɔkonwu ye, nakoso ɛmɔngonwu nu.

¹⁵ Ofikyɛ maen he b’adwene ala; bɛ so anu ayɛ se, yeɛ bamuamua bɛ nye. Wamma ye sɔ a, bɛ nye konwu nikye, bɛ so kɔte dwirɛ, bɛkɔfa b’adwene bɛkɔte ye bo, ná basa bawa me berɛ maa masa bɛ anwonyerɛ.’

¹⁶ “Nakoso ɛmɔ de, ɛmɔ nye anya saleɛ kyɛ benwu nikye ɔ, ɔne ɛmɔ so koso kyɛ bɛte dwirɛ ɔ.

¹⁷ Nahorɛ nu, mekã mekyire ɛmɔ kyɛ, ngɔmhyɛlɛfoɛ pee ne teneneefoɛ pee behurole kyɛ ahaa bekonwu bɔ ɛmɔnwu ye ye, nakoso bannwu ye, ɔne kyɛ bɛkɔte bɔ ɛmɔte ye, nakoso bande.”

Yesu kyire anyandera ne bo

¹⁸ “Kuaniɛ ne nwo anyandera ne, ɛ́mɔtie ye bo hyirelɛ.

¹⁹ Ebiala bɔ ɔte ahennie ne nwo dwirɛ, ná ɔnde ye bo nen, bɔnefoɛ ne ba ɔbafoti bɔ balua ye wɔ ye ahone nu ne ɔkɔ; na ɛhe gyi berɛ ma mmakaammaa bɔ beguale atee noa ne.

²⁰ Na mmakaammaa bɔ beguale ayɔboɛ so ne, ogyi berɛ ma sona bɔ sɛ ɔte edwirɛ ne a, ode to nu anigye so berɛ ne ala ɔ;

²¹ nakoso sɔ sona ne ondira ndii, na mmom ɔkora gyina mmerɛ kãa bie. Na sɛ ɔnate edwirɛ ne ati amaneɛnwunɛ anaa ndaneanyeɛ ba ye so a, berɛ ne ala ɔkakyi sundidua ma ye.

²² Na mmakaammaa bɔ beguale mmowue nu ne, ogyi berɛ ma ebiala bɔ ɔte edwirɛ ne, nakoso ewiase asetena nu adwenedwene ne anwonyadeɛ nnakannaka bemiamia edwirɛ ne, na onzu mmaa.

²³ Na mmakaammaa bɔ beluale bɛ wɔ aseɛ paa so ne, ogyi berɛ ma ebiala bɔ ɔte edwirɛ ne ná ɔte ye bo ɔ; na ye yeɛ osu mmaa ɔ: ebie su ɛyaa, ebie su aburasia, yeɛ ebie su aburasa.”

Atokoɔ ne ngyɛngyɛma nwo anyandera

²⁴ Yesu buli bɛ anyandera foforɛ kyɛ, “Nyameɛso ahennie ne, ɔte kyɛ biaa bie bɔ oluale mmakaammaa paa wɔ ye fieso ɔ.

²⁵ Na mmerɛ bɔ mmenia bɛlelale ne, ye pɔfoɛ wale ooluale ngyɛngyɛma forale atokoɔ ne, na ofili berɛ hɔle.

²⁶ Atokoɔ ne nyini ná ɔfale mmaa nen, ngyɛngyɛma ne koso yele ye ti.

²⁷ Yiti biaa ne, ye ngoaa wale ye berɛ beesele ye kyɛ, ‘Yɛ mene, aso nna mmakaammaa paa yeɛ eluale ye wɔ wɔ fie ne aso ɔ? Na ngyɛngyɛma ye de, ofi nisua?’

²⁸ Na obuale bɛ kyɛ, ‘Pɔfoɛ bie yeɛ wayɔ sɔ ne oo.’ Yeɛ ngoaa nemɔ bisale ye kyɛ, ‘Ekuro kyɛ yɛkɔ ná yɛkotutu ngyɛngyɛma ne anaa?’

²⁹ Na obuale bɛ kyɛ, ‘Daabi, ofikyɛ sɛ ɛmɔtutu ngyɛngyɛma ne a, annea a né ɛmɔatutu atokoɔ ne baboka so.

³⁰ Ɛ́mɔma bɛ munyɔ benyi bɛbɔ nu maa oodwu ye telɛ mmerɛ ne. Na ye telɛ mmerɛ ne yeɛ ngose mmenia bɔ bɛte ne kyɛ: Ɛ́mɔli moa betutu ngyɛngyɛma ne, ná ɛmɔkyekye bɛ tiretire bɛyera bɛ; nakoso atokoɔ ne de, ɛ́mɔboaboa ye noa bɛ́fa beegua me pata so.’ ”

Sinapi baa nwo anyandera

³¹ Yesu buli bɛ anyandera bieku kyɛ, “Nyameɛso ahennie ne, ɔte kyɛ sinapi baa ko bɔ biaa bie fa ooluale ye wɔ ye fieso ɔ.

³² Ye yeɛ ɔte mmakaammaa mukoraa nu kãa ɔ, nakoso sɛ onyi a, ɔyɛ piri tra kwaanzusuaa sɛso mmakaa mukoraa, na onyi yɛ bakaa ma ewienu nnomaa bayɛ bɛ saen wɔ ye mmaen nemɔ so.”

Mɔle harewaa nwo anyandera

³³ Yesu buli bɛ anyandera foforɛ bieku kyɛ, “Nyameɛso ahennie ne, ɔte kyɛ mɔle harewaa bɔ braa bie fa forale esam kongo nza maa odwuli kyɛ ye mukoraa tuli ɔ.”

Yesu dwudwo anyandera nu

³⁴ Yesu fale anyandera nu hane ɛhemɔ amukoraa hyirele ɛlɔen ne; na wangwati anyandera wanga edwirɛ biala wangyire bɛ.

³⁵ Na ɛhe mane bɔ ngɔmhyɛlɛniɛ ne hane ne wale nu kyɛ, “Anyandera nu yeɛ ngodwudwo ɔ, na edwirɛ bɔ wafea fi mmerɛ bɔ Ɛdangama bɔle wiase ɔ, ngɔhã.”

Yesu kyire ngyɛngyɛma anyandera ne bo

³⁶ Yesu yakyili ɛlɔen ne ate, na ɔhɔle awuro. Na ye asuafoɛ nemɔ wale ye berɛ beebisale ye kyɛ, “Kyire yɛ ngyɛngyɛma anyandera ne abo.”

³⁷ Na obuale bɛ kyɛ, “Bɔ odua mmakaammaa paa ne ole Sona Awa ne;

³⁸ eboo ne ole ewiase, na mmakaammaa paa ne ole ahennie ne mma; yeɛ ngyɛngyɛma ne ole bɔnefoɛ ne mma.

³⁹ Pɔfoɛ bɔ oluale ne ole abɔnzam; ye telɛ mmerɛ ne ole ewiase ayieleɛ, na bɛ bɔ bɛte ne ole abɔfo mɔ.

⁴⁰ Na kyɛbɔ betutuli ngyɛngyɛma ne ná bɛfale see bɛyerale bɛ ne, sɔ ala yeɛ ɔkɔyɛ wɔ ewiase ayieleɛ ne ɔ.

⁴¹ Sona Awa ne kɔsoma ye abɔfo mɔ, na bɛkɔboaboa bɔ ɔte sundidua amukoraa ne bɔnefoɛ amukoraa bekofi ye ahennie ne anu;

⁴² na bekogyi bɛ bekogua see wuronyiwuronyi nu, nekaa bɔ mmenia kosũ ná banwose bɛ gye ɔ.

⁴³ Na teneneefoɛ kɔta kyɛ eyia wɔ bɛ Baba ahennie ne anu. Bɔ ole asoɛ ne, maa otie!

Agyapadeɛ bɔ bafa bafea ne nwo anyandera

⁴⁴ “Nyameɛso ahennie ne, ɔte kyɛ agyapadeɛ bie bɔ bafa bafea fie bie aso, bɔ ebie oonwuni ye fa feale, ná ye fɛɛ bɔ ɔyɛle ye ne ati, ɔɔtɔnene ye agyapadeɛ amukoraa fa tɔle fie ne ɔ.

Afire paa bie nwo anyandera

⁴⁵ “Afei koso, nyameɛso ahennie ne, ɔte kyɛ dwadiniɛ bie bɔ ɔpena afire paa ɔ;

⁴⁶ na onwuni afire paa ko bɔ ye nyɔboɛ yɛ se nen, ɔɔtɔnene ye agyapadeɛ amukoraa fa tɔle afire ne.

Asawu ne nwo anyandera

⁴⁷ “Asa koso, nyameɛso ahennie ne, ɔte kyɛ asawu bɔ bɛto beguale ɛpo nu ná obungamone naen ahoroɔ pee ɔ;

⁴⁸ na oyili nen, bɛtwetwe bɛwale etii so, na bɛtenane ase bɛsesale paa ne beguale ngɛndɛen nu; nakoso bɔ ɔtte mayee ne de, begyi beguale.

⁴⁹ Sɔ ala yeɛ ɔkɔyɛ wɔ ewiase ayieleɛ ne ɔ. Abɔfo mɔ kɔwa bɛkɔɔpa nu bɛkɔye bɔnefoɛ bekofi teneneefoɛ nu,

⁵⁰ ná bagyi bɛ bagua see wuronyiwuronyi nu, na berɛ yeɛ mmenia kosũ ná banwose bɛ gye ɔ.”

Agyapadeɛ foforɛ ne daa deɛ

⁵¹ Yesu bisale bɛ kyɛ, “Ɛmɔate ɛhemɔ amukoraa bo anaa?” Na bebuale ye kyɛ, “Yoo, AWURADE.”

⁵² Na osele bɛ kyɛ, “Ɛhe kyire kyɛ, ahyerɛlɛniɛ biala bɔ wanya ndeteyɛɛ wafa nyameɛso ahennie ne anwo ne, ɔte kyɛ awuro mene bie bɔ ɔye ye agyapadeɛ nu foforɛ ne daa deɛ fite ɔ.”

Bɛpo Yesu wɔ Nasarɛte

⁵³ Yesu yiele sɔ anyandera nemɔ bu nen, ofili berɛ hɔle.

⁵⁴ Na ɔhɔle ye bɔbɔ ye kuro nen, ɔyɛle ngyerɛkyerɛ hyirele bɛ wɔ bɛ nyianu sua nu maa bɛ nwo dwirili bɛ, na bebisale kyɛ, “Nisua yeɛ biaa he onyane sɔ nworɛ ne anwanwadeɛ tumi hemɔ fili ɔ?

⁵⁵ Bakaa dwumvoɛ ne, aso nna ɔwa ne ɛhe? Aso bɛmvrɛ ye maame Maria? Aso nna oliɛma mmienzua mɔ ole Yakobo ne Yosef ne Simɔn ne Yudase?

⁵⁶ Aso nna oliɛma mmrasua mukoraa yeɛ yɛne bɛ wɔ ɛwa ye? Na nisua koraa yeɛ biaa he oonyane ɛhemɔ amukoraa ɔ?”

⁵⁷ Yiti bɛpole ye. Na Yesu sele bɛ kyɛ, “Anidie mmɔ ngɔmhyɛlɛniɛ, sana ye bɔbɔ ye kuro ne ye awuro.”

⁵⁸ Na wanyɔ anwanwadeɛ pee wɔ berɛ, ɔnate elelɛ bɔ banne banni ne ati.