Mateo 11 - AHYERƐLƐ KRONGRON

Asubɔlɛniɛ Yohane soma ye asuafoɛ Yesu berɛ

¹ Mmerɛ bɔ Yesu dwudwo hyirele ye asuafoɛ buru ne nyɔ ne yiele nen, ofili berɛ hɔle kyɛ ɔkwaayɛ ngyerɛkyerɛ ná ɔkã nzɛmba wɔ bɛ nguro nemɔ aso.

² Na Yohane la kuku nu nen, ɔtele nnwumaa bɔ né Kristo yɔ ɔ, na ɔsomane ye asuafoɛ maa

³ beebisale ye kyɛ, “Aso wɔ ole bɔ ɔ́ba ne, anaa odi kyɛ yɛnea foforɛ ate?”

⁴ Na Yesu buale bɛ kyɛ, “Ɛmɔhɔ bɛɛhã bɔ ɛmɔte, ɔne bɔ ɛmɔnwu ye ɔ behyire Yohane:

⁵ anyesiniwaafoɛ nwu nikye, bubuafoɛ nate, kwatafoɛ nwo fi, asotiniwaafoɛ te dwudwolɛ, awufoɛ tingye, na bɛkã nzɛmba ne bekyire ehiafoɛ.

⁶ Na sona bɔ nnde sundidua mma ye ne, wanya saleɛ.”

⁷ Na mmerɛ bɔ béfi berɛ bɛ́kɔ nen, Yesu hyɛle ye bo hane edwirɛ bɔ ɔfa Yohane nwo ɔ hyirele ɛlɔen ne kyɛ, “Nzikyɛ yeɛ ɛmɔsili nu bɛhɔle ɛserɛ so dɔ bɛɛneane ɔ? Elemmire bɔ mvrama wosowoso ye anaa?

⁸ Anaakyɛ nzikyɛ yeɛ ɛmɔsili nu bɛhɔ bɛɛneane ɔ? Sona bɔ owura ndaadeɛ nyemenenyemene anaa? Ɛ́mɔtie, bɛ bɔ bewura ndaadeɛ nyemenenyemene ne de, ahemvo mɔ b’awuro yeɛ bɛte ɔ.

⁹ Anaakyɛ nzikyɛ yeɛ ɛmɔsili nu bɛhɔ bɛɛneane ɔ? Ngɔmhyɛlɛniɛ anaa? Yoo, mekã mekyire ɛmɔ kyɛ, ɔtra ngɔmhyɛlɛniɛ po.

¹⁰ Ofikyɛ ye ole bɔ bahyerɛ ye nwo dwirɛ kyɛ, ‘Tie, mésoma me bɔfoɛ maa odi wɔ nyunu, bɔ okoli wɔ nyunu moa kosiesie w’atee nu ɔ.’

¹¹ Nahorɛ nu, mekã mekyire ɛmɔ kyɛ, bɛ bɔ mmrasua awo bɛ amukoraa, bɛ nu biala oddwɔsole bɔ odi mu tra Asubɔlɛniɛ Yohane ɔ. Nakoso bɔ ɔte kãa koraa wɔ nyameɛso ahennie ne anu ne po odi mu tra ye.

¹² Na ofi Asubɔlɛniɛ Yohane aberɛ so bɔ ɔbaadwu ɛnɛ ye, nyameɛso ahennie ne ɔ́ba anyeborolɛ so; na bɛ bɔ bɛ nye aboro ne bɛfa ye anyeborolɛ so.

¹³ Ngɔmhyɛlɛfoɛ ne amukoraa ne mmeraa ne hyɛle ngɔm maa odwuli Yohane so;

¹⁴ na sɛ ɛmɔkuro kyɛ ɛmɔde bɛto nu a, ye ole Elia bɔ ɔ́ba ne.

¹⁵ Bɔ ole asoɛ ne, maa otie!

¹⁶ “Na nwa mɔ nwo yeɛ ngɔfa ɛnɛmmafoɛ ngɔtoto ɔ? Bɛte kyɛ ngwadaa bɔ bɛtete dwaaso, bɔ bɛ́frɛfrɛ bɛ mmango kyɛ,

¹⁷ ‘Yɛhuli awɛen yɛhyirele ɛmɔ, na ɛmɔango; yɛbɔle awuye yɛhyirele ɛmɔ, na ɛmɔ wora ammɔ’

¹⁸ Yohane wale ne, onnidi, yeɛ ɔnno, na bɛnwa: ‘Ole sunzummɔne.’

¹⁹ Na Sona Awa ne wale ne, odidi, yeɛ ɔno, na bɛnwa: ‘Ɛ́mɔnea, adifuu ne akɔnomnzaniɛ, ɛtoɔdidelɛfoɛ ne bɔnefoɛ adamvo!’ Nakoso nworɛ nate ye nnwumaa so di be.”

Korasin, Betesaeda ne Kapanɔm

²⁰ Nguro bɔ Yesu yɔle ye nnwumaa mbiri mbiri pee wɔ nu ne, banzakyera b’adwene, yiti ɔhyɛle ye bo hwili bɛ nyunu kyɛ,

²¹ “Wɔ, Korasin, wɔ yaakɔ! Wɔ, Betesaeda, wɔ yaakɔ! Ofikyɛ, nnwumaa mbiri mbiri bɔ bɛyɔle ye wɔ ɛmɔ nu ne, sɛ bɛyɔle bɛ wɔ Tiro ne Sidon a, ahaa bahera ɛsɛen tena bafa nzoen bayɛ bɛ nwo basakyera b’adwene dada.

²² Yiti mekã mekyire ɛmɔ kyɛ, ndɛenbualɛ kyẽa ne, amaneɛ bɔ ɔkɔto Tiro Sidon nen, ongodwu bɔ ɔkɔto ɛmɔ ne.

²³ Na wɔ, Kapanɔm, bɛkɔma wɔ so bɛkɔhɔ nyameɛso anaa? Daabi. Bekogyi wɔ bɛkɔto abɔnzam see nu. Ofikyɛ, nnwumaa mbiri mbiri bɔ bɛyɔle bɛ wɔ wɔ nu ne, sɛ bɛyɔle bɛ wɔ Sodom a, ahaa ɔtɛwɔ berɛ maa waadwu ɛnɛ.

²⁴ Yiti mekã mekyire ɛmɔ kyɛ, ndɛenbualɛ kyẽa ne, amaneɛ bɔ ɔkɔto Sodom aseɛ ne, ongodwu bɔ ɔkɔto wɔ ne!”

Yesu ye Baba ne kyire

²⁵ Sɔ mmerɛ ne anu, Yesu hane kyɛ, “Baba, anwuro ne aseɛ Mene, meda wɔ ase kyɛ afa edwirɛ hemɔ afea nworɛfoɛ ne nimdeɛfoɛ, ná aye ahyire ngokwaammaa ɔ.

²⁶ Yoo, Baba, sɔ yeɛ ɔte nikyee bɔ ɔyɛ nyemene wɔ wɔ nyunu ɔ.

²⁷ Me Baba afa nningyein amukoraa awura me sa; na ebiala nze Baa ne, sana Baba ne; yeɛ ebiala nze Baba ne, sana Baa ne ne ebiala bɔ Baa ne kuro kyɛ ɔda ye adi kyire ye ɔ.

²⁸ “Ɛmɔ amukoraa bɔ ɛmɔayɔ adwuma bafɛ ná bafa adesoa nonɛnonɛ basoa ɛmɔ ne, ɛmɔbra me berɛ, na ngɔmaa ɛmɔkole ɛmɔ nwome.

²⁹ Ɛ́mɔfa me kɔnnua ne bɛ́to bɛ nwo so, na ɛ́mɔsua me, ofikyɛ medwo na mebrɛ me nwo ase wɔ ahone nu, na ɛmɔkonya nwomelelɛ bɛkɔma ɛmɔ kra.

³⁰ Ofikyɛ me kɔnnua ne yɛ mmerɛ, yeɛ m’adesoa ne anu yɛ nyera.”