Marko 8 - AHYERƐLƐ KRONGRON

Yesu ma mmenia apee nna aleɛ

¹ Sɔ mmerɛ ne anu, mmenia pembepembe yiale bieku, na né bennya nikye fee benni. Yiti Yesu frɛle ye asuafoɛ nemɔ wale ye nwo berɛ, na osele bɛ kyɛ,

² “Mmenia wora ye, bɛyɛ me anwumvo, ofikyɛ bali me nwo wa ɛlɛsa ɛhe, na belle nikye fee benni.

³ Na sɛ megua bɛ ate kyɛ bɛfa bɛ kunu hɔen bɛhɔ b’awuro a, ɛhɔen kɔpɛ bɛ atunu; ofikyɛ bɛ nu biemɔ befi dedeede yeɛ bɛwale ɔ.”

⁴ Na ye asuafoɛ nemɔ bisale ye kyɛ, “Ɛserɛ ye aso wa de, nisua yeɛ yɛkɔhora yɛkonya mmenia hemɔ bɛ noa aleɛ ɔ?”

⁵ Na obisale bɛ kyɛ, “Paanoo nyɛɛ yeɛ ɛmɔle ye berɛ ɔ?” Na bebuale kyɛ, “Nzoo!”

⁶ Yeɛ ɔmane ɛlɔen ne bɛtenatenane ase. Na ɔfale paanoo nzoo ne, ɔlale ase, obubuli nu, na ɔfa mane ye asuafoɛ nemɔ kyɛ bɛhyɛ bɛma bɛ, na bɛ koso bɛhyɛ bɛmane ɛlɔen ne.

⁷ Né bele tiré mmaa mmaa kãa bie koso wɔ berɛ; oyirale so, na ɔhane kyɛ bɛhyɛ ɛhene koso bɛma bɛ.

⁸ Bedidili bɛmane bɛ ko yili, na bɛsesale ye bo mboporoka kɛndɛen fokyefokyee nzoo.

⁹ Bɛ bɔ bedidili ne, bɛkɔyɛ apee nna. Na oguale bɛ ate.

¹⁰ Na berɛ ne ala, ɔne ye asuafoɛ nemɔ bɛfo bɛtenane ɛlɛen nu bɛhɔle Dalmanuta bue nu dɔ.

Farasiifoɛ pena nzɛngyerɛnneɛ

¹¹ Farasiifoɛ wale, na bɛhyɛle ye bo bɛfale edwirɛ bɛtetale Yesu. Ne bɛpena kyɛ beso ye bɛnea, yiti besele ye kyɛ ɔyɔ sɛngyerɛnneɛ bɔ ofi nyameɛso ɔ ma bɛnea.

¹² Yeɛ oguale anwongokoɔ wɔ ye sunzum nu, na osele kyɛ, “Nzu ati yeɛ ɛnɛmmafoɛ bɛpena sɛngyerɛnneɛ ye? Nahorɛ nu, mekã mekyire ɛmɔ kyɛ, bɛngɔma ɛnɛmmafoɛ nzɛngyerɛnneɛ biala.”

¹³ Afei ɔyakyili bɛ berɛ, na osa fole ɛlɛen nu hɔle asue ne asi dɔ.

Farasiifoɛ ne Herode mɔle harewaa

¹⁴ Asuafoɛ nemɔ wora fili kyɛ bɛkɔfa aleɛ bɛkɔhɔ ɔ. Né paanoo komapɛ yeɛ bele ye wɔ ɛlɛen ne anu ɔ.

¹⁵ Na Yesu bɔle bɛ kɔkɔ kyɛ, “Ɛ́mɔnea yé, ɛ́mɔnea ɛmɔ nwo yé wɔ Farasiifoɛ mɔle harewaa ne Herode mɔle harewaa nwo.”

¹⁶ Na bɛdwenedwenene ye nwo bɛhane kyɛ, “Yɛlle paanoo ne ati ɔ.”

¹⁷ Na Yesu nwuni b’adwene nen, obisale bɛ kyɛ, “Nzu ati yeɛ ɛmɔdwenedwene paanoo bɔ ɛmɔlle bie nwo ɔ? Aso ɛmɔnnya bennwuni ye, anaa ɛmɔnde ye bo? Yiti ɛmɔ ndeaseɛ wɔ dede sɔa?

¹⁸ Ɛmɔle anyeɛ, nakoso ɛmɔnnwu nikye hɔ ɔ? Ɛmɔle asoɛ, nakoso ɛmɔnde dwirɛ hɔ ɔ? Yiti ɛmɔngaye?

¹⁹ Mmubuli paanoo nnu mane mmenia apee nnu ne, ye bo mboporoka kɛndɛen fokyefokyee nyɛɛ yeɛ ɛmɔsesale ɔ?” Na bebuale ye kyɛ, “Buru ne nyɔ.”

²⁰ “Yeɛ mmubuli paanoo nzoo mane mmenia apee nna ne, ye bo mboporoka kɛndɛen fokyefokyee nyɛɛ yeɛ ɛmɔsesale ɔ?” Na bebuale kyɛ, “Nzoo.”

²¹ Na obisale bɛ kyɛ, “Afei ɔyɛle sɛɛ bɔ ɛmɔnde ye bo ɔ?”

Yesu te anyesiniwaaniɛ nye wɔ Betesaeda

²² Bedwuli Betesaeda nen, mmenia biemɔ fale anyesiniwaaniɛ bie bɛbrɛle Yesu, na bɛsrɛle ye kyɛ ɔfa ye sa hã ye.

²³ Yesu sɔle anyesiniwaaniɛ ne sa, ɔfale ye hɔle kuro ne tiwaa, ɔfele nwɔserɛ guale ye nye so, ɔfale ye sa guale ye so, na obisale ye kyɛ, “Yiti enwu nikye?”

²⁴ Biaa ne mane ye nye so, na obuale kyɛ, “Menwu mmenia, nakoso menwu bɛ kyɛ mmakaa bɔ bɛnatenate berɛ ɔ.”

²⁵ Yesu fale ye sa hane biaa ne nye bieku, ɔneane nikyee haa, na ye nye ne tele maa onwuni nikyee kaenn.

²⁶ Afei Yesu sele ye kyɛ, “Nnɛkɔ kuro nu dɔ ko,” na ɔmaa ɔhɔle ye awuro.

Petro hyirele kyɛ Yesu ole Kristo ne

²⁷ Yesu ne ye asuafoɛ nemɔ befili berɛ bɛhɔle Kaesarea Filipi nguraa nemɔ anu. Na obisale ye asuafoɛ nemɔ wɔ atunu kyɛ, “Mmenia kekã kyɛ nwa ole me?”

²⁸ Na bebuale ye kyɛ, “Asubɔlɛniɛ Yohane; nakoso ebiemɔ nwa: Elia; yeɛ ebiemɔ koso nwa: Ngɔmhyɛlɛfoɛ nemɔ nu ko.”

²⁹ Na obisale bɛ kyɛ, “Na ɛmɔ koso de, ɛmɔnwa nwa ole me?” Na Petro buale ye kyɛ, “Wɔ ole Kristo ne.”

³⁰ Na Yesu hyɛle bɛ kitii kyɛ nnɛmaa bɛbɔ edwirɛ bɔ ɔfa ye nwo ne aso bekyire ebiala.

Yesu hyɛ ye wue ne ye tingyelɛ nwo ngɔm

³¹ Na ɔhyɛle ye bo hyirehyirele bɛ kyɛ, odi kyɛ Sona Awa ne nwu amaneɛ pee, ná maen mbanyi, asɔfo mbanyi ne ahyerɛlɛfoɛ bɛpo ye, ná beku ye, ná ye ɛlɛsa so otingye.

³² Ɔhane sɔ dwirɛ ne pefee. Na Petro fale Yesu hɔle ahameɛ, na ɔhyɛle ye bo ohwili ye nyunu.

³³ Nakoso Yesu kakyili ye nwo neane ye asuafoɛ nemɔ, na ohwili Petro nyunu sele kyɛ, “Dwɔso berɛ kɔ dɔ, Abɔnzam! Ofikyɛ nna Nyameɛ adwene yeɛ ɛdwene ɔ, na mmom ɛdwene kuro sona adwene.”

³⁴ Afei Yesu frɛle ɛlɔen ne ne ye asuafoɛ nemɔ maa bɛwale ye nwo berɛ, na osele bɛ kyɛ, “Sɛ ebie pena kyɛ odi me si a, maa ɔpa ye nwo si, ná ɔfa ye mmeamudua, ná oli me si.

³⁵ Ofikyɛ ebiala bɔ okuro kyɛ ode ye kra ngoa ne, ɔkɔhwere ye; nakoso ebiala bɔ ɔnate me ne nzɛmba ne ati ɔkɔhwere ye ngoa ne, okonya ngoa kɔma ye kra.

³⁶ Na sɛ sona nya ewiase amukoraa ná ɔhwere ye kra a, nzikyɛ mvasoɛ yeɛ okonya ɔ?

³⁷ Anaakyɛ, nzikyɛ yeɛ sona kɔhora kɔfa kɔsesã ye kra ɔ?

³⁸ Na sona biala bɔ me ne me dwirɛ nwo kɔyɛ ye nya wɔ sɔ agyaasɛkyelɛfoɛ ne bɔnefoɛ he anu ne, ye koso ye nwo kɔyɛ Sona Awa ne nya, wɔ kyẽa bɔ ɔne abɔfo krongron mɔ bɛkɔwa wɔ ye Baba animnyam nu ne.”